MBIRIGA WENE 12 - Nanduk Ngget Tul Pidnak Wene

O wot kaidnak wene 12:1-14

¹ Mesira-nen Nagawan Indo-nen Musa min Arun min yak ondosolat-nen yosolar-e:

² ”Waneya yawo yu-ge pempa olengen misik arem nggogolar-e kit-nen tanggal worarik waneya kwat yij-o.

³ Wene yu-ge mondok Isarael nap oboksa yak ender-o: ’Waneya yu arem tanggal sepulu bem-e ap enambiktak lombok onkwela min pid pud norak lomba wam ondomok tak linil lobok yurag-o.

⁴ O misik arem woragwi nde wam iri na uno pidsa norak nde enpe marig-et ala-ge, ennggamirak korok korok worali ereba na inmin tak purag-o. Nde, lomba iri worogolar-e, ap enpe min nunggwi min inndi wal karuk, ndak ndak irit wururag-o.

⁵ Iri worogolar-e, lomba wam ala na, kambing wam ala na wururag-o. Alat nde, kusi olengen misiget woraidnak mondok ebem kopkap lak iri nak wururag-o.

⁶ Nde, kir-e wam ereba-ge mondok ndoksa parugu woragupndik, tanggal empat belas pem keyama nggwe-ge Isarael nap oboksa-nen lomba wam ereba-ge wururag-o.

⁷ Nde, eyabi marig-et o wam nunggup sa ereba na tumende bem owak ponok ponok pem min tu mbanggo abam nggwe min ndaril lobok yurag-o.

⁸ Nde, wam-e wurugup tarem kubu irit kan ngen pem nak kona woraga keya burug-e, oroti lomboroso mende pigit lak woraidnak oroti min mbingga ngari worak mende min mondok norag-o.

⁹ Nde, wam ereba na-ge ki mondok norak puk. Saga na mondok norak puk. Are, anggul min inggi ijok min al min mondok ndegera kan ngen pem nak kona woraga norag-o.

¹⁰ Uno-ge mariger-o luk yugu purak pug-o. Nde, nonggolat kinmbit yidnak ala-ge, mondok kan purag-o.

¹¹ Nde, uno ereba nonggolar-e, mbururak pem kunsum yutluk, kunuwok sum yutluk, konowangun-e kininggem-nen ndag-et ndag-et nak norag-o. Nde, iri-ge ”Ar-e Nagawan Indo-nen yusu-o” luk kek tak nobogolat-nen kwarugub-o.

¹² Kubu iri tarem-et an-e Mesira wi mbenaril lobok yimin-o. An-e Nagawan Indo-t me, li marik-nen wam-nen nandug-et nderak iri-ge oboksa ondosolat, o Mesira-nen erembel wanugwi unkugiwak oboksa min ebe lak mende rak pimin-o.

¹³ Nde, wam eyabi kunuwi tumende bem ndarugup iri na karug-e, kir-e iri me worali-o luk yenggerak pimin-o. Mesira nap ondosolat, kir-e kindigit lak, we wot nak keneyamin-o.

¹⁴ Olengen misik arem tanggal iri wok yosola-ge, pempa ap pem lud woragolar-e, kinndi yebet yebet tak Nagawan Indo an kek tak nobogolar-e sakolat woragup na-e’ yij-o” luk yak indid.

Oroti lomboroso mende pigit lak woraidnak nunggwi tarem yebet kagwi wene 12:15-20

¹⁵ Nagawan Indo-nen yosolar-e: ”Kir-e oroti lomboroso mende pigit lak woraidnak oroti iri nak nonggolar-e, tuju tarem wolmomtag-o. Nde, mondog-et tel korogolar-e, oroti lomboroso mende-ge mondok kenma-nen oboksa pendega mbo ber-o. Ta-nen nde tuju tarem woragolat iri-nen nde oroti lomboroso mende pidnak oroti ninggidnak ala-ge, iri-ge an nelem nab-e wolma bug-o.

¹⁶ Iri kwarogolar-e, nandug-et tel korogolat tarem min worok tak pogolat tuju bem iri min kir-e oboksa Nagawan Indo nak erembel wanurak pem ndok wururag-o. Ndok wurugup iri tarem-e kir-e yi kwatlik ndi kwatlik kwarurak pug-o. Are, ap-nen norak nunggwi mende nak perak lid lud tak purag-o.

¹⁷ Nde, iri tarem-e kelem nap oboksa Mesira-nen wok kunpuruk mbiridnak iri bem-e pempa ap pem lud woragolar-e, olengen misik pem-e wok kunpuruk mbiridnak tarem iri-ge kit-nen yebet kagolar-e sakolat woragup na-e.

^18-20 Waneya nandug-et iri arem tanggal empat belas kubu kuri-nen tanggal dua pulu satu kubu iri kuri woragolar-e, oroti lomboroso mende puruk woraidnak oroti-ge mondok norak pug-o. Tuju tarem ereya woragolar-e, oroti lomboroso mende-ge kenma-nen oboksa pendega mbo burag-o. Tuju ereya tarem woragolar-e, enlem nin nap ala na, Isarael nap ala na-nen nde oroti lomboroso mende puruk woraidnak oroti nde nujwa ala-ge, mondok an nelem nab-e wolma bug-o” yij-o.

Mondog-et o wot kaidnak tarem 12:21-28

²¹ Nde, Musa-nen e Isarael nap ennggendumu enne kulugwi nap oboksa ene mbo unpuruk yak ondosolar-e: ”Kit kenambik tak lombok konkwela pid pud enmanggim mburugupndik, o wot kaidnak tarem tel korogolat sagurak lomba wam wil mberer-o.

²² Kir-e isop angga ambuk misik wanuruk, lomba wam eyabi kenanggo iri arem pil ngguruk, kunuwi tumende owak ponok ponok pem min tu mbanggo abam nggwe min eyabi ndarak purag-o. Iri rak purug-e, kit kennggendumu-nen-e ap misiger-o luk-nen mondok mbepme mbururak pug-o. Mbirigit lak irit worakmu o nda yuwag-o.

²³ Nagawan Indo-nen nde kubu nggwe Mesira nap endeyekluk Mesira wi kibiril lobok yosolat-nen nde, eyabi tumende owak ponok ponok pem min tu mbanggo abam nggwe bem min karug-e, Ap Ondoso Aid Nap na-nen kendeyekluk kenma ngguwa naru wot kaga wirik puwa-o.

²⁴ Nde, kit-nen na irit, kinlirak-nen na irit ’Irit kwarurag-o’ luk watsa yak kindigi wene yu-ge woragolar-e, pempa yidnak yidnak irit kwarogolat woragup na-e.

²⁵ Kit nde Nagawan Indo-nen urul yak kindid wi iri me nggugupndik woragolar-e, o wot kaidnak tarem yu-ge yebet kagolat woragup na-e.

²⁶ Nde, kinlirak-nen kin wok konpogolat-nen nde ’Yu-ge ngge yidnak tarem ala n sagili-o?’ yogola-ge,

²⁷ kit-nen onggo yak ondogolar-e: ’Yu-ge o Mesira-nen Mesira nap inliap manggiya-ge ondosolat, nit Isarael nab-e nindigit lak wot niniyidnak tarem ala, Nagawan Indo kek tak pogolat-nen amanggim lomba wam wiridnak tarem yebet kagolat sagili-o’ yak undurag-o” yij-o.

²⁸ Iri lug-e, it na mbirigarig-e, Nagawan Indo-nen ”Irit kwarurag-o” luk Musa min Arun min yak indid ereba na-t kwariga-o.

Mesira li manggiya nderak indidnak wene 12:29-36

²⁹ Kubu iri na-t nggiringgendumu-ge Mesira nap inlirak manggiya nderak ereba na-ge Nagawan Indo-nen ondosolar-e, nandug-er-e Pirayon ambara manggiya na wutlug-e, li oboksa indil indil o kubu me woragwi nap inlirak manggiya nderak na indij-o. Iri-nen wam amarik ija mul mul-nen ndagidnak min-et oboksa wirij-o.

³⁰ Nde, kubu iri na-ge Pirayon min at eyabu wanugwi nap min Mesira nap oboksa min inndi luk yiganggal-e, Mesira wi oboksa o worak arem-e iritsa li ap manggiya nderak oboksa wat yidnak me, yip nggu pabak langgu yosola irit kuliga-o.

³¹ Ala karuk, kubu iri na-t Pirayon-nen Musa min Arun min wene mbo unpuruk-nen yak ondosolar-e: ”Yawo kir-e mondok pidsa mberer-o! Yawo-ge nunuwi keya ber-o. Kit-nen ’Mbal Pem Nagawan erembel wil mburul-o’ yili na-ge yawo-n mburugupndik erembel waner-o.

³² Konowam sapi min lomba min kambing min oboksa waruk mberer-o! Iri yogolar-e imbiringgat tak nubuwakluk tepan neber-o” yij-o.

³³ Iri yogolar-e, Mesira nap-nen Isarael nap ndag-et nak Mesira keya buruk mburuwakluk lembe yogolat-nen yak ondogolar-e: ”Ndag-et mberer-o. Kit mbirigit lak yogola-ge, nit pidsa wat mul-o” yiga-o.

³⁴ Yak ondogola-ge, Isarael nab-e oroti lomboroso mende pigit lak awo woraguwakluk kona pidnak iri-ge togolwak arem yarak ereba na sum pem nggetla endak pem piga-o.

³⁵ Iri-nen Musa-nen yak indid iri na ndak ndag-et Mesira nap enpem nggi yogolar-e, unmuruk pugwi mende emas min perak min-nen konidnak min yurugwi sum min nggi yiga-o.

³⁶ Nggi yogola-ge, Nagawan Indo-nen-e Mesira nap inndi konak tak posola, ”Isarael nap-nen Mesira nap enpem nggi yugup mende ge wok kunduwa-o” yid iri na nggal kwarogolar-e, Isarael nap mborogolar-e, Mesira nap insilobulo kwarat waruk mbiriga-o.

Isarael nap Mesira wi keya buruk mbiriga wene 12:37-42

³⁷ Mborogolar-e, Isarael nap na-ge unuwok tu o Aramses-nen o Sukot mbiriga-o. Nde, mbiriga nab-e kwami min li marik min-e wonarigit lak ap nak wonarag-e enam ratus ribu (600.000) irit mbiriga-o.

³⁸ Nde, it mborogolar-e, onowam sapi min lomba min kambing min kwarat waruk mborogolar-e, enlem nin nap kwarat min-et mbiriga-o.

³⁹ Nde, ir-e Mesira-nen oroti lomboroso mende pigit lak awo worakit lak kona pidnak waruk mbiriga ereba na-ge oroti woraiga-o. Nde, it na-ge iri me-nen langgara wirik onpogola, mija lele nak mborogolar-e, tularo mondok lid lud tak pigit lak irit mbiriga-o.

⁴⁰ Nde, it Isarael nap Mesira woragolar-e, olengen empat ratus tiga pulu (430) irit woraiga-o.

⁴¹ Nde, olengen empat ratus tiga pulu (430) iri arem waneya woroksiyem iri na arem tanggal nggoboksa-ge Nagawan Indo elem nap ap kere kwarat ereba na-ge Mesira wi keya buruk mbiriga-o.

⁴² Kubu it mbiriga tarem-e Nagawan Indo-nen Mesira wi-nen it wok unpuruk mbereyekluk yik karok woragij-o. Nde, kubu it mbiriga tarem-e pempa ap pem lud woragolar-e, Nagawan Indo amanggim lenak pidnak yebet kagwi tarem-o. Nde, kubu iri tarem-e Isarael nab-e unluk nak irit woragwi-o.

O wot kaidnak tarem yebet kagolat-nen kwarugwi wene 12:43-51

⁴³ Nagawan Indo-nen Musa min Arun min yak ondosolar-e: ”O wot kaidnak tarem yebet kagolat-nen kwarurag-e yu-o: Elem nin nab-e o wot kaidnak tarem yebet kagolat-nen wiridnak lomba wam mbarag-e norak pug-o.

⁴⁴ Alat nde, kit-nen onggo pidnak nap na iye ambesap wabidnak ala-ge, totno norag-e ob-o.

⁴⁵ Nde, ap sal min onggo wanurak pem nak keneyabu wanugwi nab-e mondok inmin norak pug-o.

⁴⁶ Nde, lomba wam iri nonggolar-e, mbepme-ge mondok waruk mbururak pug-o. Ma nak-nen norag-o. Nde, owag-e misiger-o luk tet kalurak pug-o.

⁴⁷ O wot kaidnak tarem iri nde yebet kagolar-e, Isarael nap oboksa-net yebet kagolat sagurag-o.

⁴⁸ Nde, iniye ambesap mbarigit lak nap-nen-e o wot kaidnak tarem yebet kagolat-nen sagidnak nunggwi mende-ge mondok norak pug-o. Nde, elem nin nab-et nde, pem kinmin woraso-nen nde Nagawan Indo an kek tak nebeyekluk o wot kaidnak tarem sagidnak iri na norak yosola-ge, nandug-er-e at ama woragwi nap oboksa iniye ambesap mbarurag-o. Iri rak puruk, ap iri-ge Isarael nap nggal kwat yidnak me, o wot kaidnak tarem yebet kagolat sagidnag-e norag-o.

⁴⁹ ’Irit kwarurag-o’ luk wat tak pidnak wene ereba-ge kit Isarael nap kenmanggim na irit, it enlem nin nap kinmin woragwi nap enmanggim na irit, mondok misiget nak-nen yusu-o” yak indij-o.

⁵⁰ Nde, it Isarael nap oboksa-ge Nagawan Indo-nen Musa min Arun min ”Irit kwarurag-o” luk yak indid ereba na ndak ndag-et kwariga-o.

⁵¹ Iri na tarem-et Nagawan Indo-nen it Isarael nap oboksa Mesira wi-nen wok unpuruk mbirij-o.