MBIRIGA WENE 10 - Nanduk Ngget Tul Pidnak Wene

Sil kwarat yidnak wene 10:1-20

¹ Nagawan Indo-nen Musa yak tosolar-e: ”Kar-e nagawan eram mbiri-o. An-e kwiye worak mende nin tak nan tak it ennggendumu kwareyekluk, Pirayon min at eyabu wanugwi nap min inndi amawi rak pigi-o.

² Iri kwarigi iri-ge, an-nen Mesira nap kwiye worak mende bem lel unpusu yu na kat-nen-e kelirak min it-nen ndaguwa min enaru rak posolat, kit oboksa-nen kenaru yogolar-e, an nimin-e ’Ar-e Nagawan Indo-nen yusu-o’ luk kenaru yobokluk-nen kwarigi-o” yak tij-o.

³ Yosoloma, Musa min Arun min-e Pirayon eram mbirigarik-nen yak togolar-e: ”Iberani nap Enmbal Pem Nagawan, Nagawan Indo-nen yosolar-e: ’Mepme tarem nggal-nen kar-e an neram tebe yugun-o? An nelem nap iri-ge an nerembel wil mburuwak-nen lerak inpi-o.

⁴ Kat-nen nde lerak inpigit lak ala-ge, kub-e sil kwarat kuwi silmu pil lobok yimin-o.

⁵ Iri yumu, sil kwarat iri-nen kuwi nggweyag-e ebebe lak luk keya buwa-o. Iri yosolar-e, talme engen mbosolat-nen lak tak pigit lak erep minggirik yapmu woraso mende min erep keya bidnak ereba min sil-nen mondok ondoro rak puwa-o.

⁶ Kat woraso sa min kat keyabu wanugwi nap min kat-nen tenagidnak wi woragwi nap min enma sil-nen nak kobong ma-o. Iri ma iri ge nanduk konmborak sil-nen kwat onposo-ge te-t nde, yawo-n kwat kunpuwa iri-ge mondok terak minig-et kwaruwa-o’ yak ti-o” yid. Yak tosola-ge, Musa na-ge tuguruk mbirij-o.

⁷ Nde, Pirayon eyabu wanugwi nap ereba na-nen at yak togolar-e: ”Ap yu-nen nit nenare posolar-e, nunggwirik tarem wolma-o? Nit nunuwi yu-ge yigisa keya busu me, yu ki-o. It Isarael nap yu-ge lerak keya unpugunmu, it Enmbal Pem Nagawan, Nagawan Indo iri na erembel wil mburuwag-o” luk yak tiga-o.

⁸ Yak togolikma, tuguruk Pirayon eram lobok yuwakluk Musa min Arun min wene mbo unpuruk, Pirayon-nen yak ondosolar-e: ”Kir-e kit-nen idnak Nagawan Indo, Kenmbal Pem Nagawan erembel wanobokluk mberer-o. Alat nde, kit kennggendumu-ge kenpe ta min ta min mburugub-o?” yosoloma,

⁹ Musa-nen onggo yosolar-e: ”Nir-e Nenagawan Indo kek tak pogolat inik inik nggok sagurak me, nit oboksa sujwe min indi worak min, ninlirak oboksa min nonowam lomba min kambing min sapi min oboksa waruk mburul-o” yij-o.

¹⁰ Nde, Pirayon-nen it yak ondosolar-e: ”Mondok Nagawan Indo unu bem yak kundusu-o. An-nen-e ’Konkwela inmin kinlirak inmin wok unpuruk mberer-o’ yak kindimin pug-o. Nde, kit kinndi arem-e meya kwarurak perali kagi-o.

¹¹ Mondok lag-o! Kit-nen nde ndemeret Nagawan Indo erembel wil mbururak yili ala-ge, we kit ap nak mbururag-o” yak indij-o. Wene iri na-nen ndowaga Musa min Arun min na-ge nagawan woraso sa-nen langgara wirik inpij-o.

¹² Nagawan Indo-nen Musa yak tosolar-e: ”Sil warat lobok yosolat yagidnak mende talme engen-nen nasolat erep minggirik ereba oboksa sil-nen nujwakluk, kinggi-ge Mesira nggweyak ambigit nuk ki-o”

¹³ yak tosoloma, Musa-nen owangun iri na ndimirik posola-ge, Nagawan Indo-nen-e mo luwaso (timur) ambigit nggwe-nen obube pil lobok yosolar-e, kubu-nen lengge-nen obube puk kasolat woragij-o. Woralar-e, kuplila-ge obube-nen sil kwarat waruk lobok yij-o.

¹⁴ Lobok yosolar-e, Mesira wi oboksa-nen sil-nen nak kobong yij-o. Nde, sil kwarat iri nggal woragolar-e, mondok kagwi bug-er-o. Iri ombol nggwe-nen na iri nggal-e kwat yigit lag-er-o.

¹⁵ Lobok yosolar-e, sil yeba na-ge Mesira nggweyak oboksa ebebe lak luk larok yidnak me, yik kagolar-e, miri nak tup tak irit yik kaiga-o. Sil ereba na-nen nasolar-e, talme engen-nen nasolat erep minggirik keya bidnak engen kerengen ereba na nasolar-e, o Mesira iri me-nen yagidnak mende engga kerengga misik mbi mondok keya bigit lag-o.

¹⁶ Iri ala karuk, Pirayon-nen ndag-et nak Musa min Arun min wene mbo unpuruk-nen yak ondosolar-e: ”An-e kit-nen idnak Nagawan Indo, Kenmbal Pem Nagawan imin na irit, kit kinmin na irit, meya kwarigi-o.

¹⁷ Iri ala-ge, an kwarigi iri-ge yawo-net kenmberam tak per-o. An nebem angin worak mende pamu, nundusu yu lak tak puwak-nen Nagawan Indo Kenmbal Pem Nagawan eram tepan yer-o” luk yak indij-o.

¹⁸ Yosoloma, Musa na Pirayon keya buruk mborosolar-e, Nagawan Indo emengen mbarij-o.

¹⁹ Emengen mbarosoloma-ge, Nagawan Indo nen obube iri na-ge nden kaga mo mboso (barat) nggwe-nen nggok amawi worak puk kil lobok yoso rak pij-o. Iri yosolar-e, sil kwarat ereba na-ge obube-nen puk kuruk yi Nggelaga koma arem puk kaga pil nggosolar-e, misiget tet Mesira nggweyak pem mbi keya bigit lag-o.

²⁰ Alat nde, Nagawan Indo-nen Pirayon iri na-ge indi amawi rak irit posoloma-ge, Isarael nab-e lerak inpigit lak irit yij-o.

O Mesira wi oboksa ndumuk tak pamu woraiga wene 10:21-29

²¹ Nagawan Indo-nen Musa yak tosolar-e: ”Kinggi teram nggwe nuk ki-o. Iri yosola, o Mesira yu me mondok ndamuk mom ki rak irit wolma-o” yak tij-o.

²² Yosoloma, Musa-nen inggi teram nggwe ligik posoloma, Mesira wi oboksa mondok ndamuk mom ki rak irit woralat kenan nene yiga-o.

²³ Worala-ge, it Mesira nab-e mondok yi mende ndi mende mondok mbi kagit lak, it enpe na nin me nan me mbirigit lak iri woragola-t nde, it Isarael nap enma-ge yaya irit woragij-o.

²⁴ Iri alama, Pirayon-nen Musa wene mbo buruk-nen yak tosolar-e: ”Kir-e Nagawan Indo erembel wil mborogolar-e, kwami min kinlirak min-e inmin mberer-o. Alat nde, kensapi wam nde konlomba wam nde kenkambing wam nde perak yeba keya burag-o” yij-o.

²⁵ Yosoloma, Musa-nen erep nggarosolar-e: ”Iri ala-ge, Nagawan Indo nit Nenmbal Pem Nagawan amanggim wosa kan purak usu worak mende kat-nen wok nundurag-o.

²⁶ Nit nonowam-e mondok oboksa waruk mburul-o. Wam ereba enggendumu-net waga Nagawan Indo Nenmbal Pem Nagawan amanggim wosa kan purak iri-ge ereba wok yogolat-nen lembena ’Yu-t puwog-o’ iri-ge yurak me, wam min-et mburul-o” yak tij-o.

²⁷ Nde, Nagawan Indo-nen nagawan iri na indi amawi rak posola, at-nen Isarael nap iri na lerak unpurag e larok yij-o.

²⁸ Pirayon-nen Musa yak tosolar-e: ”Kar-e mondok an neram yu-nen mbiri-o. An tuguruk kat kerare kudtag-e mondok lag-o. Tugurug-et nde kerare kasolar-e, mondok wat yugun-o” yak tij-o.

²⁹ Yosoloma, Musa-nen yosolar-e: ”Nab-o. Wene-ge kat-nen yigen irir-o. Ndemeret abog-e mondok neyagun pug-o” yak tij-o.