MBIRIGA WENE 1 - Nanduk Ngget Tul Pidnak Wene

Mbiriga Wene Isarael nap Mesira-nen anggun panggun tak inpidnak wene 1:1-22

¹ Nde, Yakup iri unu misig-e Isarael. Nde, Isarael na-ge at ilirak inmin nde at ilirak onkwela inmin nde ndugulug-e, Mesira mbiriga-o. Nde, Yakup ilirag-e

² Uruben, Simeon, Lewi, Yewura,

³ Isakat, Sebulon, Mbenyamin,

⁴ Ndan, Naptali, Nggat, Aset irit mbiriga-o.

⁵ Nde, Yakup-nen wigarag-e lambuksa wonarag-e enpe-ge tuju pulu-o (70). Nde, Yusub-e nandug-et mberarik, Mesira woragij-o.

⁶ Nde, iri kwasa mbirigarik woragolat Yusup min at owerak inmin-e wat yiga-o. Iri nggal-et ap erep at anggul mbilit ereba na war-et yiga-t nde,

⁷ it Isarael nap na-ge it inlirak-nen ndagidnak ereba na-nen kwarat ndakolar-e, o iri me-ge Isarael nab-e kwarat wigak yosolat, o Mesira iri me-ge it nak kobong yij-o.

⁸ Nde, ereya tarem-e Yusup aru buk nap Mesira nagawan mbi men yosolar-e, o Mesira iri na tena buruk woragij-o.

⁹ Nagawan iri na-nen at nap Mesira nap yak ondosolar-e: ”It Isarael nap yu-ge enpe na kwarat wigak yogolat, enmawi na kwarat me, abog-e nindilik nde ma-o.

¹⁰ Nit-nen nde ap inmin wim mbarogola-ge, ir-e wim nap inmin yogolar-e, nit nunduruk, o yu keya buruk nde mburuwa-o. Iri ala-ge, it yu-ge ap kwarat ma naru, nir-e tu nggesa kore yuwog-o?” luk wene wirik pij-o.

¹¹ Iri lug-e, it Mesira nap-nen-e Isarael nap yik eneyarok wolmomtak nap lenak inpikma, it-nen Isarael nap na anggun panggun tak onpogolar-e, enne amawi bem watsa yabu enpem pogola, it-nen-e Mesira nagawan iri na amanggim o siri iminepma silobulo ndok wosa purak o Pitom min Aramses min ereya-ge it Isarael nap-nen wiriga-o.

¹² Alat nde, Mesira nap-nen iri anggun panggun tak onpogola-t nde, it Isarael nab-e kwarat nde wigak yogolar-e, o iri me-ge it nak kobong yogola karuk, it Mesira nab-e it enaye kagolat woraiga-o.

¹³ Iri lug-e mondok insilepma min Isarael nap na anggun panggun tak inpiga-o.

¹⁴ It enpe na andi bandi wok ondogolat, enabuwa kagit lak yabu nggok nin tak nan tak ereba na ”Mondok waner-o” luk insilepma min watsa enpem pogola, unuwi worogolat, eneyabu na wanogolat irit woraiga-o.

¹⁵ Nagawan-nen-e Iberani kweyap-nen li ndakola yongga undugwi kweyap mberen Sipera min Puwa min mondok watsa yak ondosolar-e:

¹⁶ ”Kit-nen nde Iberani kweyap li ndakola yongga ondogolar-e, li ap nde ala-ge, mondok undurag-o. Nde, kakmu nde kwami ala-ge, keya unpurag-o” luk yak indij-o.

¹⁷ Alat nde, kwami mberen ya na-ge Mbal Pem Nagawan indi aye worak me, nagawan nen ”Iri kwarurag-o” yak indid iri na ndak ndag-e kwarigit lak. Li ap ndet yogola na indigit lak keya onpogolat woraiga-o.

¹⁸ Nde, nagawan na-nen kweyap mberen ya na wene mbo unpuruk-nen yak ondosolar-e: ”Kir-e noluk-nen li ap ndakola indigit lak, keya inpili-o?” luk kin wok inpij-o.

¹⁹ Yosoloma, it-nen yogolar-e: ”Iberani kwami-ge Mesira kwami nggal-e lag-o. Ir-e terag-et kore yugwi me, yongga undugwi nab-e pi kore yosoma nggwe nde wok yili-o” luk yak tiga-o.

^20-21 Nde, kweyap yongga undugwi kwami ereya na-ge Mbal Pem Nagawan indi-n pidnak nag-et kwarogola me, Mbal Pem Nagawan-nen it imbiringgat tak onposolar-e, it inlirak wok indij-o. Nde, it Isarael nap na kwarat yogolat, enmawi worak irit kwat yiga-o.

²² Iri ala karug-e, nagawan iri na-nen wene wirik posolar-e: ”Iberani kweyap-nen li ap nde ndakola-ge, mondok yi Nil su bem unpurag-o. Nde, kwe ndakola iri-ge parugu wolmomtag-o” luk at nap Mesira woragwi oboksa yak indij-o.