MATIUS 7 - Nanduk Ngget Tul Pidnak Wene

Ap enpem wene mbarurak wene 7:1-6

¹ ”Mbal Pem Nagawan-nen kenpem wene mbaruwa naru, kit-nen na ap enpem wene mbarurak pug-o.

² Nde, kit-nen ap enpem wene mbarugup iri na bem-net Mbal Pem Nagawan-nen kit kenpem wene mbaruwa-o. Nde, kit-nen ap ndak wat unpugup iri na bem-net Mbal Pem Nagawan-nen kit ndak wat kunpuwa-o.

³ Kir-e noluk-nen kenggam erengen arem worasu kopkap marik iri na kali-t nde, kit kondomok kenlengen arem worasu e ebis nggugurik iri na kali bug-o?

⁴ Nde, kit kondomok kenlengen arem e ebis nggugurik iri na worala-t nde, kir-e kennggam iri na yak togolar-e: ’Kat kerengen arem worasu kopkap iri wabeyeg-o’ luk noluk-nen jak tili-o?

⁵ Ken ambik konmbol pem lagwi nap wa-e. Kit kondomok kenlengen arem worasu e ebis nggugurik iri nanduk waber-o. Kit kenlengen op-net kit kennggam erengen arem worasu kopkap iri konag-et wabobok-nen.

⁶ Marak kopkap lak mende iri-ge yengge wok turak pug-o. Nde, kit kenarengge onggo nggulok pugwi kerep iri-ge wam mbo wok turak pug-o. Wam iri ujok-nen lul lul wosa keya buruk, nden karuk lobok yosolar-e, mbal kunpuwa-o.”

Tepan yurak wene 7:7-12

⁷ ”Nggi yer-o. Nggi yogola-ge, wok kunduwa-o. Kore yer-o. Kore yogola-ge, kagub-o. Tu lel lel ker-o. Lel lel kagola-ge, tu kuwarak kunpuwa-o.

⁸ Nde, nggi yuwa nab-e wanuwar-o. Nde, kore yuwa nab-e kujwar-o. Nde, tu lel lel kujwa nab-e tu kuwarak ubuwa-o.

⁹ Nde, kit kennggendumu ap misik ambara-nen: ’Mburu wok niri-o’ yosola-ge, eid-nen kerep nde wok tuwa-a?

¹⁰ Are, ambara-nen: ’Keyane wok niri-o’ yosola-ge, waro nde wok tuwa-a?

¹¹ Iri ala-ge, kir-e meya yugwi nab-et nde, konak mende nak kinlirak wok undugwi kenaru me, Kineid aid arem woraso-nen-e at ebem nggi yuwa nap iri na konak mende wok unduwa irir-o!

¹² Ap-nen kwat kunpurak perali iri nggal-et kit-nen na irit kwat enper-o. Iri kwarogolar-e, imiri mbarak pidnak wene-nen yidnak yidnak min Mbal Pem Nagawan ene lomboksa yugwi nap-nen yidnak yidnak min ndak ndak tak pugwi irir-o.”

Tula mboronggo wene 7:13-14

¹³ ”Tumende mboronggo iri nggwe nggwer-o. Nde, lak tak unpurak tumende iri-ge nggok, nde, tula na owak la-nen yusu-o. Nde, ap mondok kwarat-nen tula iri nggwe mbitli-o.

¹⁴ Nde, unluk nak wolmomtak tumende iri-ge mboronggo, nde, tula na marik me, tumende iri nggwe-ge ap wonarak nak-nen nggwili-o.”

Engen pidnak pem-net e yenggerak pugwi wene 7:15-20

¹⁵ ”Enesiget wene owak ngara yugwi nap iri enabiyem-o luk kwil kwalsa wolmer-o. It iri na kit kendamlobok yogolar-e, enpage-ge lomba wam abage nggal lobok yuwa-t nde, it enarem-e ndemeret isilepma worak ndakngge-net yili-o.

¹⁶ It iri na-nen engen pidnak pem-net yenggerak unpugub-o. Isile worak e pirim-nen engen-e tona nde poso bug-o. Nde, kere isile worak momnid-nen engen-e tomate nde poso bug-o.

¹⁷ Iri nggal-et e konak-net engen-e konak poso-o. Nde, e meya-nen na engen meya-t poso-o.

¹⁸ E konak-nen-e engen meya-ge poso bug-o. Nde, e meya-nen na engen konak poso bug-o.

¹⁹ Nde, e-nen engen konak yigit lak ala-ge, e na-ge ndara kan pugwi-o.

²⁰ Iri bem-e engen puwa iri bem-nen yenggerak eneyagub-o.”

Ininggi-nen kwarugwi iri-ge enne-nen nak yugwi nggal-e lag-o 7:21-23

²¹ ”An nimin-e: ’Nagawan Indo wa-e. Nagawan Indo wa-e’ yugwi nap oboksa-nen-e Mbal Pem Nagawan-nen tenagaidnak wi ngguwa bug-o. Are, an Neid aid arem woraso na indi-n pidnak nak kwarugwi nap it nak-nen ngguwa-o.

²² Worok tak puwa tarem-e ap kwarat-nen an yak norogolar-e: ’Nagawan Indo wa-e. Nagawan Indo wa-e. Nir-e kat kunu bem-et aid wene ap yak ondogolat, kat kunu bem-et kugi wirik pogolat, kat kunu bem-et kwiye worak mende kwarat kwarige na-t nde-o!’ luk yuwa-o.

²³ Iri yogola-ge, an-nen nam-et it yak ondosolar-e: ’Kir-e an naru bug-o. Kit meya nak kwat tenak woragwi nap wa-e. An neram-nen mberer-o’ ” luk yak indi-min-o.

Mberen nap-nen o wiridnak wene 7:24-27

²⁴ ”Iri ala-ge, an-nen yidnak wene kuluruk, kulidnak iri ndak ndak kwaruwa nab-e, ap indi nggat nggat worak-nen at uwi worosolar-e, kerep pem wirid nap iri na nggal-nen yili-o.

²⁵ Talme mbosolat, yi ebe wasolat, obube puk kasolar-e, o iri na wat kagaij-et nde, o iri-ge kerep pem wiridnak me, landera tud yigit lak yij-o.

²⁶ Nde, an-nen yidnak wene kulurug-et nde, kulidnak iri na kwarigit lak yili nab-e, at indi lak nap-nen at uwi worosolar-e, yi sisiri bem wirid nap iri na nggal-nen yili-o.

²⁷ Talme mbosolat, yi ebe wasolat, obube puk kasolar-e, o iri na wat kagaidnggal-e, o iri na landera tud yij-o. O iri na tud yosolar-e, mondok yigerep yagarepsa tud yij-o!” luk yij-o.

Yesus amawi min-et yoso wene 7:28-29

²⁸ Yesus-nen wene iri na ndegera lak tak posola-ge, ap kwarat iri na-ge at-nen mul ondoso wene na bem wi langgu mbariga-o.

²⁹ At iri na-ge it mul undugwi engga enaru nap-nen yugwi nggal-e lag-o. Are, at na-ge ene amawi worak irit mul indij-o.