MATIUS 6 - Nanduk Ngget Tul Pidnak Wene

We wok undurak wene 6:1-4

¹ ”Ap-nen yik kiniyujwakluk, kit-nen konak nak kwarugwi mende iri na ap inmbiri bem-et kwarurak pug-o. Iri nggal kwarogola-ge kit Kineid aid arem woraso-nen-e onggo wok kunduwa bug-o.

² Iri bem-e, kit-nen nde yi mende ndi mende-ge insilobulo lak nap we wok ondogolar-e, it enesiget siget kwarugwi nap-nen-e Mbal Pem Nagawan uwi worak ma-nen na, tula tula nggwe-nen na ap-nen it yik eneyarik entembel wanuwakluk kwarugwi mende nggal, kit-nen kwarurak pug-o. An-nen yak kendeyeg-o: It iri kwatli iri-ge onggo mondok wanigarik worali-o.

³ Alat nde, kit-nen-e yi mende ndi mende-ge insilobulo lak nap we wok ondogolar-e, kininggi kigit nggwe-nen kwarusu iri-ge kininggi kware nggwe-ge aru rak purak pug-o.

⁴ Kit-nen yi mende ndi mende wok ondogolar-e, mondok kurasa wok undurag-o. Iri kwarugup pem-e, kura ma-nen kwarugwi kaso Kineid-nen keneyaruk onggo wok kunduwa-o.”

Tepan yurak wene 6:5-15

⁵ ”Nde, kit-nen tepan yogolar-e, it enesiget siget kwarugwi nap-nen kwarugwi nggal kwarurak pug-o. It iri na-ge ap-nen yik iniyujwakluk tepan yogolar-e, mendak nggwe-nen Mbal Pem Nagawan uwi worak ma-nen na, tu ondogwal mberen ma-nen na, tepan yurag-e inndingen-o. Nde, an-nen yak kendeyeg-o: It-nen wanurak onggo iri-ge mondok waniga irir-o.

⁶ Alat nde, kit-nen tepan yuwoklug-e, kenma nggogolar-e, tu lerak puruk, kura ma woraso Kineid na emengen mbarurag-o. Nde, kura ma-nen kwaridnak kaso Kineid iri-nen keneyaruk onggo wok kunduwa-o.

⁷ Nde, kit-nen tepan yogolar-e, it Mbal Pem Nagawan enaru buk nap-nen tepan yogolar-e, wene ereya na nag-et tuguruk yik tenak worali iri na nggal yurak pug-o. It inndi-nen peragolar-e: ’Nit tepan motsa yul iri bem-net kuluwa-o’ luk perali-o.

⁸ It iri-nen kwatli nggal, kit-nen kwarurak pug-o. Kit Kineid iri-nen-e at emengen awo mbarigit lak ma-net kit kinndi kabak yugwi mende iri-ge ar-e aru-o.

⁹ Kit-nen tepan yogolar-e, yu nggal yurag-o: Nit Nineid aid arem woraso wa-e. Kat kunu-ge kek tak irit wolmag-o.

¹⁰ Kat-nen tenagaidnak wi iri lobok yuwag-o. Aid arem-nen kat kindi-n pidnak kwatli nggal, nggweyak ma-nen na irit kwaruwag-o.

¹¹ Yawo norak mburu ndak yaga wok nindi-o.

¹² Ap-nen nit meya rak ninpidnak na nenmberam tak pili nggal, kat-nen na nit meya yidnak kamberam tak pi-o.

¹³ Nit ninndi ngaruwakluk keya nunpurak pug-o. Are, Sere inggem-nen ninmiri yi-o.

¹⁴ Kit-nen nin nap-nen meya rak kinpidnak iri na kenmberam tak pogola-ge, Kineid aid arem woraso iri-nen na kit meya yidnak amberam tak puwa-o.

¹⁵ Alat nde, ap-nen meya rak kinpidnak iri na kenmberam tak pigit lak yogola-ge, Kineid iri-nen na kit meya yidnak na amberam tak puwa bug-o.”

Mburu ninggit lak, we wolmomtak wene 6:16-18

¹⁶ ”Kit-nen mburu ninggit lak, we woragolar-e, it enesiget siget kwarugwi nap-nen entare mambu le sa luk worali iri nggal wolmomtak pug-o. It iri na-ge ap-nen: ’At iri-ge mburu ninggit lak, we worasu-o’ yuwakluk, it entare mambu le sa woragwi-o. Nde, an-nen yak kendeyeg-o: It iri na-ge onggo ndak waniga nar-o.

¹⁷ Alat nde, kit-nen mburu ninggit lak, we woragolar-e, kenanggulsu ngarogolat, kentare yi marogolat wolmer-o.

¹⁸ Ap-nen-e kit mburu ninggit lak, we woraidnak iri yenggerak kunpuwa naru, iri kwarurag-o. Alat nde, Kineid kura ma woraso iri nak-nen yenggerak kunpuwa-o. Nde, kura ma-nen kwaridnak mende kaso Kineid na-nen keneyaruk, onggo wok kunduwa-o.”

Enarengge aid arem ndok wosa purak wene 6:19-23

¹⁹ ”Nggweyak ma yu me-ge kinsilobulo ndok wosa purak pug-o. Yu mege pase min sil min-nen lak tak posolat, yariya wanugwi nap-nen o mijatluk, yariya wanogolat kwarugwi sa-nen yusu-o.

²⁰ Alat nde, kisilobulo iri-ge aid arem ndok wosa purag-o. Iri me-ge lak tak purak pase min sil min-e lag-o. Nde, yariya wanugwi nap-nen o mijatluk, yariya wil nggugwi buk sa-o.

²¹ Nde, kinsilobulo woraso sa-ge, kinndi na iri me-t wolmar-o.

²² Ap enlengen-e enpe amanggim tal-nen yusu-o. Nde, kit kenlengen-e op ala-ge, kenpe ebis-et na yaya worag-et ma-o.

²³ Alat nde, kenlengen nde unggul-nen-e, kenpe ebis-et na ndamug-et ma-o. Nde, kenarem worasu yaya iri na ndamuk-nen-e mondok ndamuk lombok irit ma-o.”

Silobulo min Mbal Pem Nagawan min lambuksa ndugururag-e meya-o luk yidnak wene 6:24-34

²⁴ ”Ap misik-nen-e eidtak mberentak ndegel unpugwi bug-o. Nde, iri kwarogolar-e, eid misik iri na isili rak posolat, misik iri na abuwa kujwa nde ma-o. Are, misik iri na kwara ndegel obosolat, nde, misik na kwara ndegel ibigit lak yosolat ma-o. Iri nggal, kit-nen na Mbal Pem Nagawan min nggweyak ma mende mberen ndugururag-e meyar-o.

²⁵ Iri bem-e, an yak kendeyeg-o: Kit kunluk wolmomtak pem nunggwi mende min yi min kenpe yururak sum min yebet karuk, kunmud kudtak pug-o. Kit kunluk wolmomtak iri-ge nunggwi mende nggal-e lag-o. Nggulok-nen yusu-o. Nde, kenpe iri-ge yurugwi sum nggal-e lag-o. Ija lombok-nen yusu-o.

²⁶ Pubu nak noso towe iri nde ker-o. Towe iri-ge uwi pil karuk, ebe pidnak na-ge mbara poso sa poso bug-et nde, Kineid aid arem woraso iri-nen-e nunggwi mende mak toso-o. Nde, kir-e towe iri nggal-e lag-o. Kir-e terak minik yu kali bug-a?

²⁷ Kit kennggendumu-nen ta-nen nde at umud kasu iri bem-nen at uruk wolmomtak mot tak purak ndag-a?

²⁸ Nde, noluk-nen kir-e yururak sum kunmud kali-o? Erambet laso engen isi ereba nde ker-o. Engen ereba-nen-e yabu waga, kere larusu bug-et nde,

²⁹ an-nen yak kendeyeg-o: Salomo iri-ge nagawan arengge worag-et nde, usum erare-ge engen isi ereba erare nggal ndak ndak yirigit lag-o.

³⁰ Kit kinndi kwara angin tubu yugwi buk nap wa-e. Mbal Pem Nagawan-nen-e yapmu woraso tusuwangge na umuruk poso-o. Nde, tusuwangge na-ge yawo nggal laruk, kub-e kan purag-et nde, umuruk poso-o. Nde, kir-e terak minik ija-t me, sum yirik kunpuwar-o.

³¹ Iri bem-e, kit-nen yogolar-e: ’Nunggwi mende nde no nul-o? Yi-ge no nul-o? Nunsum no yurul-o?’ luk kunmud kudtak pug-o.

³² Iri mende oboksa-ge Mbal Pem Nagawan enaru buk nap-nen yibikngonesa kore yugwi-o. Nde, kit kinndi kabak yidnak mende iri perak nde, Kineid aid arem woraso iri-nen-e aru-o.

³³ Alat nde, kit-nen Mbal Pem Nagawan-nen tenagaidnak wi min at-nen lud tak nak tak onposo elem min nanduk tak pugupndig-e, iri mende oboksa wok kunduwar-o.

³⁴ Iri bem-e, kup-nen kwarurak iri na kunmud kudtak pug-o. Kup-nen kunmud kudtak na ariget worasu-o. Yawo nggal amanggim kunmud kagolar-e, yawo nggal amanggim nak kudtag-o.”