MATIUS 20 - Nanduk Ngget Tul Pidnak Wene

Onggo wanuwokluk anggut yabu waniga nap enpem nden karuk yidnak wene 20:1-16

¹ ”Mbal Pem Nagawan-nen tenagaidnak wi iri-ge anggut yabu winde-nen-e eyabu wanuwakluk ap onkore kubu kabu mbirid iri nggal-nen yusu-o.

² Mberarik, yabu winde iri-nen it inmin wene mbarosolar-e: ’Yabu wanugup onggo-ge misiget tarem wanidnak pem-e tol misiget irit wok kindimin-o’ luk yak ondosoloma, it-nen-e ’Ob-o’ yogola karuk, yabu wil mburuwakluk ndimirik inpij-o.

³ Iri luk, jam sembilan pem onggo wanugwi sa iri me tuguruk mberarik, ap ereb-e we woragola eneyaruk,

⁴ at-nen it yak ondosolar-e: ”Kit min-et an neyapmu iri me yabu wil mberer-o. Nde, yabu wanogola-ge, onggo ndak ndak wok kindimin-o” luk yak indij-o.

⁵ Yak ondosoloma-ge, it na mbiriga-o. Iri luk, at iri na-ge jam duabelas pem min tuguruk jam tiga bem min mberarik, yanem iri na nggal-et kwarij-o.

⁶ Iri luk, keyama jam lima bem at yu na tuguruk mberarik, ap ereb-e iri me we ereba-t mendak woragola enayaruk-nen yak ondosolar-e: ’Kir-e noluk-nen yawo we taget yeba worali-o?’ luk yak indij-o.

⁷ Yak ondosoloma-ge, it-nen wene erep nggarogolar-e: ’Onggo wanurak yabu nenpem pigit lak me, we yeba-t worali-o’ luk yiga-o. Yogolikma-ge, at-nen yak ondosolar-e: ’Kit min-et neyabu wil mberer-o’ luk yak indij-o.

⁸ Alama-ge, o ki yosoloma-ge, at yabu winde iri-nen yabu wanugwi nap-nen ene kulugwi iri na yak tosolar-e: ’Yabu waniga nap ereba na yonggo unpuruk, onggo wok ondosolar-e, it abok nggwe nggwiga nab-e nandug-et wok indil indil-nen-e nanduk nggwiga nab-e wok undurag-o’ luk yak tij-o.

⁹ Alama-ge, jam lima bem yabu nggwiga nap na lobok yigarik, onggo-ge enambiktak kerep tol misiget irit waniga-o.

¹⁰ Wanogola karuk, it nandug-et yabu nggwiga nap ereba na lobok yogolar-e, onggo-ge terak minik nggal wanul-o luk peraiga-t nde, it na irit onggo-ge kerep tol misiget irit enambik-tak waniga-o.

¹¹ Nde, onggo na wonogolar-e, yabu winde iri na ebem ujwa mbariga-o.

¹² Ujwa mbarogolar-e: ’It abok nggwiga nap yeba-ge yabu-ge satu jam pem nak waniga-t nde, nir-e ap tu sa nggwigerik yabu wanogola mo eyak nenpem tela mbij-et nde, kar-e onggo-ge it wok indigen iri na ndak ndak wok nundusu yu-ge ngge-o’ luk yiga-o.

¹³ Yogolikma-ge, yabu winde na-nen it ennggendumu woraso nap misik yak tosolar-e: ’Nanggam wa-e. An-e kat kimin-e mot mor-et kwat kibigit lak yusu-ge lag-o. Nit lambuksa wene mbarogolar-e, misik tarem wanidnak onggo-ge kerep tol misiget wanurak wene mbarigit lak yige-a?

¹⁴ Nde, onggo wok kirigi-ge waruk kama mbiri-o. An nindi-net abok nggwiga nap iri na onggo wok ondosolar-e, kat onggo wanigen na ndak ndag-et wok indigi-o.

¹⁵ An nangge iri-ge an nondomok nindi-n peraruk tumbururag-e meya kaigen-a? Iri ala-ge, an nindi konak ala karuk, kar-e noluk-nen kerengen ale yusu-o?’ luk yak tij-o.

¹⁶ Iri nggal-et abok yidnak nab-e nanduk ma-o. Nde, nanduk yidnak nab-e abok ma-o” luk yij-o.

Kenan pem tak posolar-e, Yesus-nen ”Wat yimin-o” yid wene 20:17-19

¹⁷ Yesus na-ge Yerusalem nggwe lasolat ereya na-net at owosirak duabelas na enariget nak ndok worak unpuruk, tulama mborogolat-nen it yak ondosolar-e:

¹⁸ ”Nir-e yawo Yerusalem lali-o. Nde, Ap Ambara an-e wesera tepan omborak nagawan nagawan nde engga enaru nap nde inggem nubuwama-ge, it-nen-e an nuruwakluk niminep weserak puruk,

¹⁹ enlem nin nap ininggem nubuwama, it-nen-e nggweyel nobogolat, linggamburok norogolat, e lang pang tak pem panggarak nobogolat yuwa-t nde, kenan tak posolat tarem-nen nuruk tak puwa-o” luk yak indij-o.

Yakobus min Yoanes min iniya-nen nggi yidnak wene 20:20-28

²⁰ Iri ala-ge, Sebendeus ilirak iniya iri na at ilirak inmin luk Yesus eram wok luk, owak yunggusa at eralu kore luk, at ebem misik nggi yij-o.

²¹ Nggi yosoloma-ge, Yesus-nen kwe iri na yak tosolar-e: ”Kar-e no wok kururak min yigen-o?” luk yak tosoloma-ge, kwe iri-nen at yak tosolar-e: ”Kar-e abok nagawan men yugun tarem-e an nilirak ya-ge kinggi kigit nggwe, kware nggwe koreyak unpurak irit nindingen-o” luk yak tij-o.

²² Yak tosoloma-ge, Yesus-nen wene erep nggarosolar-e: ”Kit-nen nggi yili mende iri-ge kir-e kenaru bug-o. Yimbe arem kenanggo namin iri-ge kit-nen na norag-e ob-a?” luk yak ondosoloma-ge, it-nen yogolar-e: ”Nul-er-o” luk yiga-o.

²³ Yogolikma-ge, at-nen it yak ondosolar-e: ”Nidmbe arem kenanggo iri-ge ndemeret nunggub-et nde, an ninggi kigit nggwe, kware nggwe kore yurak iri-ge an-nen koreyak unpurag-e meya-o. Are, an Neid-nen: ’At iri aret pimin-o’ luk enperasu nap iri koreyak unpuwa-o” luk yak indij-o.

²⁴ Nde, at owosirak sepulu iri na-nen wene iri kulurug-e, insilepma-ge it mberen owe owot ereya na enpem piga-o.

²⁵ Alat nde, Yesus na it yonggo unpuruk-nen yak ondosolar-e: ”It enlem nin nap pemerinta iri-nen-e it inlirak teberak onpogolat, it sarok enne kulugwi nap-nen na it enne amawi bem it inlirak anggun panggun tak onpogolat yili iri-ge kenaru-t nde,

²⁶ kit kennggendumu-nen-e iri nggal momtag-e mondok lag-o. Kit kennggendumu-nen ta-nen nde ap nggulok momtak indingen ala-ge, yongga kondoso nap mag-o.

²⁷ Nde, ta-nen nde nanduk yidnak nap momtak indingen ala-ge, kit ndegel konposo nap irit mag-o.

²⁸ Iri nggal-et Ap Ambara lobok yid iri-ge ap yongga wuruwakluk lobok yigir-e lag-o. Are, ap yongga endeyekluk, ap kwarat onnggo posolat iminep wesel korayekluk-nen lobok yij-o” luk yij-o.

Yesus-nen ap enlengen ngguru mberen enlengen kuwarak pid wene 20:29-34

²⁹ Iri luk, it iri na-ge Yeriko-nen mborogola-ge, ap kwarat Yesus imbirik mbiriga-o.

³⁰ Nde, ap enlengen ngguru mberen iri-ge tu mbanggo ma koreyak worakmu-ge, it-nen kuliganggal-e, ”Yesus na wok luk mburusu-o” luk yogola kuluruk, enne ngguloksa-t wene mbo bogolar-e: ”Nagawan Indo Ndaud Ambara wa-e. Nenabuwa ki-o!” luk yiga-o.

³¹ Yogolikma-ge, ap kwarat ereba-nen it larok makluk met inpiga-t nde, it lembe luk enne ngguloksa yogolar-e: ”Nagawan Indo Ndaud Ambara wa-e. Nenabuwa ki-o!” luk yiga-o.

³² Yogolikma-ge, Yesus na ndong luk, it iri nawene mbo unpuruk-nen it kin wok onposolar-e: ”An-e no kwat kunpurak nde perali-o?” luk yij-o.

³³ Yosoloma-ge, it-nen at yak togolar-e: ”Nagawan Indo wa-e. Nit nenlengen op-net kwara kudtak irit nindingen-o” luk yak tiga-o.

³⁴ Yak togolikma-ge, Yesus na it unpud kasoluk, at inggi-ge it enlengen pem posola ereya na-net it enlengen kuwak yosoloma, at imbirik mbiriga-o.