MATIUS 17 - Nanduk Ngget Tul Pidnak Wene

Yesus abinal worak yidnak wene 17:1-13

¹ Nde, enam nene lug-e, Yesus na mborosolar-e, Peterus nde Yakobus nde owot Yoanes nde inmin mberarig-e, it enarik wolmokluk ndobo mot misik iri bem inpil lagaij-o.

² Nde, it iri na enlengen ma-ge at na abage nin agaij-o. Iri yosolar-e, at erare-ge mo abinal nggal yaya worak yosolat, at usum-e loro lombok abina-nen igip kip worak agaij-o.

³ Iri luk, it-nen yik kagolar-e, Musa nde Elia nde Yesus na imin wene ndorogola, eneyaiga-o.

⁴ Iri alama-ge, Peterus na-nen Yesus yak tosolar-e: ”Nagawan Indo wa-e. Nir-e yu me worali yu-ge konak lombog-o. Kat kindingen nde ala-ge, o lije kenan yu me wereyeg-o. Misig-e kat kamanggim, nde misig-e Musa amanggim, nde misig-e Elia amanggim-et wirimin-o” luk yij-o.

⁵ Nde, Peterus-nen wene iri yosoma ereya na-net yaya worak nggan nggan iri arem-nen ene mbi-nen yosolar-e: ”At yu-ge an Nambara abuwa worak-nen yusu-o. At ebem-e an nalen kasu-o. At ene nak koler-o!” luk yij-o.

⁶ Iri yosoloma kuluruk yigarig-e, at owosirak ereya na-ge kwiye kwarat luk nggweyak pem entare nggwe yud tud mbiga-o.

⁷ Alama-ge, Yesus na it endam lobok yosolat, tena onposolat-nen yak ondosolar-e: ”Men mer-o. Kwiye kali-ge meyog-o” luk yak indij-o.

⁸ Yak ondosoloma-ge, it iri na undugun pugaksa yik kaiganggal-e, ap mbi eneyagir-e lak, Yesus arig-et nak kaiga-o.

⁹ Iri luk, ndobo bem-nen mbogolar-e, Yesus-nen ene amawi min-et it yak ondosolar-e: ”Kit-nen yanem kaigep iri-ge Ap Ambara an-e wat yidnak ennggendumu-nen nuruk tak pigit lak ma-ge ap misiger-o luk tet yak undurak pug-o” luk yak indij-o.

¹⁰ Yak ondosoloma-ge, at owosirak-nen Yesus na kin wok pogolar-e: ”Nde, it imiri mbarak pidnak wene enaru nap-nen yogolar-e: ’Elia na-ge nandug-et lobok yuwa-o’ luk yili iri-ge noluk-nen iri yili-o?” luk yiga-o.

¹¹ Yogolikma-ge, Yesus-nen wene erepnggarosolar-e: ”Ndemerer-o. Elia na-ge nanduk lobok yuwarig-e, yi mende ndi mende oboksa tuguruk op tak puwa-o.

¹² Alat nde, an-nen yak kendeyeg-o: Elia na-ge lobok yij-et nde, it ereba na-nen at yenggerak ibigit lak luk, it inndi-n pidnak nak at kwat ibiga-o. Nde, iri nggal-et Ap Ambara na irit it-nen andi bandi rak ubuwa-o” luk yij-o.

¹³ Yosoloma-ge, at owosirak na-nen yenggerak pogolar-e, ap yi maroso nap Yoanes na imin yidnak irit yenggerak piga-o.

Yesus-nen kugi arem nggwidnak la ki rak pid wene 17:14-21

¹⁴ Nde, it iri na-ge ap kwarat endam wok yogola-ge, ap misik na Yesus eram lobok yarik, at eralu endaru yunggusa kore luk-nen

¹⁵ at yak tosolar-e: ”Nagawan Indo wa-e. An nambara abuwa ki-o. At iri-ge wat wat yoso kugi ebem mbidnak me, wat nak yoso-o. Wat yosolar-e, kan ma mbud yosolat, yi ma mbud yosolat kwat tenak woraso-o.

¹⁶ Kat kowosirak na endam ibil lobok yigi-t nde, it-nen-e ki rak uburag-e meya-o” luk yij-o.

¹⁷ Yosoloma-ge, Yesus-nen wene erep nggarosolar-e: ”Kit kinndi angin tubu yugwi buk, kinndi nari wari rak nap wa-e! An-e nunggwirik tarem kit kinmin woramin-o? An-e nunggwirik tarem kit kinmin-e momak puruk woramin-o? La iri-ge an neram pil lobok yi-o” luk yij-o.

¹⁸ Iri luk, Yesus-nen ene amawi min-et kugi na yak tosolar-e: ”Mbiri-o” luk yak tosoloma, kugi na mborosola ereya na-net la iri na ki yij-o.

¹⁹ Iri ala-ge, at owosirak iri na-ge Yesus eram lobok luk, enarikmu-nen kin wok obogolar-e: ”Nit-nen kugi iri wirik purag-e noluk-nen meya yij-o?” luk kin wok ibiga-o.

²⁰ Yogolikma-ge, Yesus-nen wene erep nggarosolar-e: ”Kit kinndi kwara angin tubu yigit lak ala-nen meya yij-o. An-nen yak kendeyeg-o: Kit kinndi angin tubu yidnak iri-ge we sawi uwi marik iri nggal ndak ndak worala-ge, kit-nen ndobo yu yak togolar-e: ’Yu me-nen iri me mbiri-o’ luk yak togola-ge, mburuwar-o. Kit-nen kwarurak mende angin worak misik mbi worasu-ge lag-o. [

²¹ Alat nde, kugi yu mende yu-ge mburu keya buruk, tepan yogolat woraidnak pem-net wirik pugwi-o]” luk yij-o.

Mberen pem tak posolar-e, Yesus-nen ”Wat yimin-o” yid wene 17:22-23

²² Nde, at owosirak na-ge o Nggalilea iri me lambuksa woragola-ge, Yesus-nen it yak ondosolar-e: ”Ap Ambara na-ge wesera ap ininggem puwama,

²³ it iri-nen at wuruwama, mberen naruk, kenan tak purak pem-e ar-e uruk tak puwa-o” luk yak ondosoloma-ge, it iri na inndi puru kwarat yiga-o.

Yesus-nen tepan yugwi o na bem pemerinta enmanggim tol pidnak wene 17:24-27

²⁴ Yesus min at owosirak na min-e o Kaperenaum wok yogola-ge, it tepan yugwi o na bem pemerinta enmanggim tol ndok wurugwi nap-nen Peterus eram lobok luk, at kin wok pogolar-e: ”Kat mul koroso napna-nen-e tepan yugwi o amanggim tol-e poso, lak, lag-a?” luk yiga-o.

²⁵ Yogolikma-ge, Peterus-nen wene erep nggarosolar-e: ”Eyo posor-o” yij-o. Yak ondosoluk, o ma nggosoma-ge. Yesus nanduk-nen at yak tosolar-e: ”Simon wa-e. Kat kindi-nen ngge perasu-o? Nggweyak ma nap nagawan nagawan-nen tarak enpem-nen tol mengga wanogolat, enanggul wonaridnak tol mengga wanogolat yili-a? It inlirak enpem, lak? Are, ap sal enpem, lak?” luk yak tij-o.

²⁶ Yak tosoloma-ge, Peterus-nen wene erep nggarosolar-e: ”Lag-o. Ap sal enpem-nen mengga wanugwi-o” luk yosoloma karuk, Yesus-nen yosolar-e: ”Iri ala-ge, inlirak iri-nen tol purag-e lag-o.

²⁷ Alat nde, it iri na mbud tak unpurak kerep nggal kwarul naru, kat yi ma mburugundik, keyane wanugwi sugulud mberak pi-o. Nde, nanduk-net ulok ma keyane na wanugundig-e, emende penggera pak kasoma-ge, kerep tol misik kagun-o. Tol iri na wanosoluk, nit nenmberek nenmanggim it na wok indil mbiri-o” luk yak tij-o.