MARAKUS 3 - Nanduk Ngget Tul Pidnak Wene

Ap inggi ponok nggwe nggorak ki rak pid wene 3:1-6

¹ Misik tarem-e Yesus na-ge Yawuri nap tepan yugwi ma tuguruk nggwidnggal-e, ap mbi inggi ponok nggwe nggorak iri me worasoma, kagaij-o.

² Nde, iri me woraiga nap-nen-e: ”Yesus-e we woragwi tarem ap ki rak puwa, lak?” luk, at abut mbarogolat woraiga-o. Iri yiga iri-ge at-nen lugud tak posola-ge, ebem wene mbaruwokluk-nen yiga-o.

³ Yesus-nen inggi nggorak nap iri na yak tosolar-e: ”Enggendumu ya-t men min-o” luk yak tij-o.

⁴ Nde, Yesus-nen it kin wok onposolar-e: ”We woragwi tarem-nen op kwarurag-e ngge-o? Ap konak tak umpurak nde op, lak? Are,ap meya rak unpurak nde ob-a? Ap inmiri yurak nde ob-a? Are, ap undurak nde ob-a?” luk kin wok inpij-et nde, ir-e enne lak yiga-o.

⁵ Enne lak alama-ge, Yesus na isilepma min lembena keya unpuruk, it na inndi amawi alama karuk, at indi puru agaij-o. Yurug-e, ap iri na yak tosolar-e: ”Kinggi mbung tak pi-o” luk yak tosoloma-ge at inggi mbung tak pidnggal-e, at inggi na ki agaij-o.

⁶ Yosoloma-ge, it Parisi nab-e mbepme mborogolar-e, ndag-et nak Eroriani nap inmin Yesus wururak wene mbariga-o.

Yi koma eyak pem ap kwarat ndok wiriga wene 3:7-12

⁷ Iri alama-ge, Yesus owosirak inmin-e Nggalilea koma eyak pem mbiriga-o. Mborogola-ge, ap kwarat-nen at imbirik mbiriga-o. Mbiriga nab-e Nggalilea-nen na, Yurea-nen na

⁸ Yerusalem-nen na, Irumea-nen na, yi Yorodan eyak ele bem-nen na, Tirus min Siron min-nen na, at kwiye worak kwarusu na obok kulurug-e, ap kwarat-nen at eram ndok wiriga-o.

⁹ Nde, ap kwarat ndok worogola karuk, Yesus na inmik mik aye-nen at owosirak yak ondosolar-e: ”E koma misik an namanggim lud tak per-o” luk yak indij-o.

¹⁰ Iri yid iri-ge, at-nen ap kwarat ki rak inpid pem, ap kugi worak kwarat at tenabuwokluk inmik mik lagola-nen yij-o.

¹¹ Nde, ap enarem nggwidnak kugi ereba-nen at karuk, at eram mbud yogolat-nen enne nggoksa yogolar-e: ”Kar-e Mbal Pem Nagawan Ambara-nen yusu-o” luk yiga-o.

¹² Yogolikma-ge, Yesus-nen it yak ondosolar-e: ”An nobog-e yurak pug-o” luk mondok watsa imiri mbarak pij-o.

Yesus-nen wirik inpidnak nap duabelas len inpidnak wene 3:13-19

¹³ Iri lug-e, Yesus na-ge ndobo bem lasolug-e, at indi-n pidnak nap wene mbo onposola-ge, at eram lobok yiga-o.

¹⁴ Lobok yogolikma-ge, ap ereba na enngendumu-nen it enpe duabelas len unpuruk, it yak ondosolar-e: ”Kit len kinpigi yu-ge an nimin nogolat, an-nen wirik konposola, aid wene ap yak indil nogolat,

¹⁵ kir-e kugi wirik purak amawi na wanugub-o” luk yak indij-o.

¹⁶ Len inpidnak nap duabelas unnu-ge yu-o: Simon na Yesus-nen unu mbi-ge Peterus yarid na min,

¹⁷ Sebendeus ambara Yakobus min owot Yoanes min, it enmberek unu mbi-ge ”Mbowanerigis-o” luk yarid iri-ge nit nenne bem yogolar-e: ”O Nggu Ilirag-o” iri min,

¹⁸ Andereas min Pilipus min Mbatolomius min Matius min Tomas min Alpius ambara Yakobus min Tarius min nuwi nggweyag-o luk imiri yoso nap Simon iri na min

¹⁹ Yesus iminep wisirid nap Yuras Ikariot min irit len inpij-o.

Yesus min Mbelsebul min wene 3:20-30

²⁰ Iri luk, mbuwagarig-e Yesus na o ma mbi nggwij-et nde, ap kwarat tuguruk ndok wiridnak me, Yesus owosirak inmin-e mburu tet ninggit lag-o.

²¹ Iri alama-ge, ap erep-nen yogolar-e: ”At iri-ge indi wawa yusu-o” luk yogola kulurug-e, at owe owot-nen at inggi wil mbiriga-o.

²² Nde, Yerusalem-nen mbidnak imiri mbarak pidnak wene enaru nap-nen yogolar-e: ”At yu arem-e kugi Mbelsebul nggwidnak me, kugi nagawan amawi bem-nen kugi wirik pusu-o” luk yiga-o.

²³ Yogolikma-ge, Yesus-nen ap kwarat wene mbo unpuruk, nden karuk wene bem yak ondosolar-e: ”Sere-nen-e nggerak puruk Sere wirik poso-o?

²⁴ Nde, nagawan misik-nen tenagaidnak wi iri na me woragwi nap-nen nde lambuksa woragit lak, kuri worak woragolar-e, nagawan iri-nen tenagaidnak wi-ge nari wari ma-o.

²⁵ Nde, it lolo iri na nde kundik woragit lak, kuri werep mberep woragolar-e, it lolo kwasa wolma bug-o.

²⁶ Nde, iri nggal-et at Sere-nen nde ngara arik tik arik tak woralar-e, Sere-nen tenagaidnak wige wolma bug-o, lak ma-o.

²⁷ Nde, ap amawi worak nap na kamarigit lak-nen ama ngguruk isilobulo-ge wanugwi bug-o. Are, amawi worak nap iri kamarak puruk-nen perak nde isilobulo wanugwi-o.

²⁸ Wene yu-ge kenaru wolmer-o. Ap-nen meya kwarugwi pidsa min Mbal Pem Nagawan imin meya wene wirik pugwi pidsa min-e Mbal Pem Nagawan-nen-e amberam tak puwa-t nde,

²⁹ Konak Indi obok puwa nab-e, Konak Indi obok pugwi iri-ge mondok amberam tak puwa buk mende me, Mbal Pem Nagawan-nen-e at meya yidnak iri-ge mondok amberam tak puwa bug-o” luk yak indij-o.

³⁰ Yesus-nen iri yid iri-ge, it-nen-e: ”At arem-e kugi worasu-o” yogola karuk-nen yij-o.

Yesus ija min owosirak min lobok yidnak wene 3:31-35

³¹ Yesus ija min owosirak min lobok yigarik, mbepme mendak woragolar-e, Yesus wene mbo buwakluk, ap mbi yak tiga-o.

³² Iri tarem-e ap kwarat-nen at lop lop worak koreyak worakmu-ge, it-nen at yak togolar-e: ”Nab-o. Kat kiya min kowosirak min-e kat yik keyarok mbepme worali-o” luk yak tiga-o.

³³ Yak togolikma-ge, at-nen yosolar-e: ”An niya min nowosirak min-e tarag-o?” luk yij-o.

³⁴ Yurug-e, at eralu koreyak worali nap na erengen yik eneyasolat-nen yosolar-e: ”An niya min nowosirak min-e yur-o!

³⁵ Mbal Pem Nagawan indi-n pidnak kwarusu nab-e an nowosirak li ap min an nowosirak li kwami min an niya min-nen yili-o” luk yij-o.