MARAKUS 16 - Nanduk Ngget Tul Pidnak Wene

Yesus uruk yidnak wene 16:1-8

¹ We woragwi tarem na woraruk, o Magaralena kwe Maria min Yakobus ija Maria min kwe Salome min-e Yesus orogwak pem ndarurak emben konak amburu onggo pil mbiriga-o.

² Nde, nene luk, kub-e Minggu tarem mondok kubu kabu molengen nggeret pil luwasola, ir-e Yesus yapma pidnak sa mbiriga-o.

³ Tula mborogolat-nen it na yak kerek mbogolar-e: ”Kerep tumende nggelak pidnak iri-ge ta-nen lembera wa nunpuwa-o?” luk yiga-o.

⁴ Yurug-e, panggosa wok yogolat-nen yik kaiganggal-e, kerep iri-ge nggulok pare-t nde, limbik tak worasoma, kaiga-o.

⁵ Karug-e, yapma pidnak sa na nggwiganggal-e, ap sugwe mbi sum loro mot yirik, kigit ambigit nggwe koreyak worasoma karug-e, wendet yiga-o.

⁶ Alama-ge, ap sugwe iri-nen it yak ondosolar-e: ”Kwiye kali-ge meyog-o. Kir-e Nasaret nap Yesus, e lang pang tak pem panggarak ibiga nap iri na ogore yili-t nde, at iri-ge yu me-ge lag-o. Uruk luk, men yamu-o. At yapma pogolat mbinggirik ibiga ondoro-ge yu nak ker-o.

⁷ Alat nde, kit mburugupndig-e, at owosirak min Peterus min yak ondogolar-e, ’At-nen kit nanduk yak kindid iri nggal-et ar-e kit kenabuwok Nggalilea mberamu-o. Iri me-nen kagub-o’ luk yak ender-o” luk yak indij-o.

⁸ Yak ondosoloma-ge, it na kwiye-nen enpem yugup tugup yosola, yapma pidnak sa-nen wurungsa mbepme mbutluk, mborogolar-e, wene iri na-ge kwiye-nen ap misiget ter-o luk mondok yak indigit lak yiga-o.

Yesus na Maria Magaralena imbiri bem nam yid wene 16:9-11

⁹ (Nde, kubu kabu Minggu tarem na-nen Yesus-e uruk luk, men yarik, nanduk nandug-er-e Magaralena kwe Maria iri na arem-nen kugi tuju wirik pidnak kwe iri na imbiri bem nam agaij-o.

¹⁰ Nam yosola karug-e, kwe na mberarig-e, iri wene-ge Yesus imin nugwi nap at ubud-nen tabun puruk worali nap na yak indil mbirij-o.

¹¹ Alat nde, kwe na-nen ”Yesus iri-ge uruk yarik, kagi-o” luk yak ondosola, kuliga-t nde, ir-e ndemerer-o luk peragit lag-o.

Yesus na owosirak mberen inmbiri bem nam yid wene 16:12-13

¹² Iri lug-e, at abage nin nggal luk, it mberen nab-e o misik mburukmu-ge, it enmberek inmbiri bem nam agaij-o.

¹³ Nam yosola karug-e, it na mbirigarig-e, at imin nugwi nap erep na yak indiga na-t nde, it-nen-e wene na ndemerer-o luk peragit lag-o.

Yesus na at imin nugwi nap inmbiri bem nam yid wene 16:14-18

¹⁴ Abok nggwe-ge at owosirak sebelas na mburu nonggolat worakmu-ge, it inmbiri bem nam agaij-o. Nam lug-e, at uruk yidnak iri na kaiga nap-nen yidnak wene-ge te rak pigarik me, ir-e ndemerer-o luk, inndi angin tubu yigit lak yiga bem-e, met inpij-o.

¹⁵ Met unpuruk, Yesus-nen it yak ondosolar-e: ”Kir-e yi wi ndi wi ap pidsa aid wene yak indil mberer-o.

¹⁶ Inndi angin tubu yogola, yi ma unpuwa nab-e, inmiri yuwa-t nde, inndi angin tubu yuwa buk nab-e, lak tak unpuwa-o.

¹⁷ Nde, inndi angin tubu yuwa nab-e yenggerak purak mende yu nggal: An nunu bem kugi wirik pogolat: enaru bug-et nde, nin wene nan wene bem yogolat;

¹⁸ waro lombok togolat, wat yurak wi nujwa-t nde, wat yigit lak yogolat; kugi indidnak nap tena onpogola, ki rak onpogolat iri nggal-et kwaril nuwa-o” luk yij-o.

Yesus aid arem lagaid wene 16:19-20

¹⁹ Nde, Nagawan Indo Yesus-nen it na wene iri na yak ondosolug-e, aid arem konok turuk lasolar-e, Mbal Pem Nagawan inggi kigit ambigit nggwe kore yij-o.

²⁰ Yosoloma-ge, at owosirak na mborogolar-e, yi wi ndi wi aid wene yil waring kagola-ge, Nagawan Indo-nen it yongga ondosolar-e, it-nen yidnak wene iri-ge ndemerer-o luk yebet kujwakluk, kagwi buk mende iri it enpem-nen kwarij-o.)