LUKAS 6 - Nanduk Ngget Tul Pidnak Wene

We woragwi tarem wene bem Yesus kin wok ibiga wene 6:1-5

¹ We woragwi tarem misik pem-e Yesus na mbato yagaidnak yapmu tula nggwe mborosola-ge, at owosirak-nen-e mbato mbatluk, lera nil nil mbiriga-o.

² Nonggola karuk, Parisi nap erep-nen yogolar-e: ”Kir-e noluk-nen we woragwi tarem-nen kwarurak pug-o yidnak mende kwatli-o?” luk yiga-o.

³ Yogolikma-ge, Yesus-nen it yak ondosolar-e: ”Nde, Ndaud anggamirak inmin nere enpem wok yamu-nen kwariga wene-ge kir-e wonarugwi bug-a?

⁴ Mbal Pem Nagawan amanggim pidnak oroti iri-ge tepan ombo nak-net nunggwi-t nde, Ndaud na-ge Mbal Pem Nagawan ama nggwarik, oroti iri nasolat at anggamirak na mak indid nar-o” luk yij-o.

⁵ Yurug-e, Yesus-nen tuguruk it yak ondosolar-e: ”We woragwi tarem-e Ap Ambara inggem pidnak-nen yusu-o” luk yij-o.

Ap inggi ponok nggwe nggorak ki rak pid wene 6:6-11

⁶ We woragwi tarem misik pem Yesus na-ge tepan yugwi ma nggwarik, ap mul ondosolat woragaij-o. Nde, inggi kigit nggwe nggorak nap mbi-ge iri me woragaij-o.

⁷ Worasola-ge, imiri mbarak pidnak wene enaru nap min Parisi nap min-nen-e ”We woragwi tarem-nen ap ki rak posola-ge, at inggiri wuruwog-o” lug-e, Yesus na abut mbarogolat enlengen waruk yiga-o.

⁸ Alat nde, Yesus na it inndi-n yebet kaidnak na aru luk-nen inggi nggorak nap na yak tosolar-e: ”Kar-e men luk, ndumu yu me men yil lobok yi-o” luk yak tosoloma-ge, ap iri na men yil mbirij-o.

⁹ Iri lug-e, Yesus-nen it yak ondosolar-e: ”Wene yu nde kin wok kenpeyeg-o: We woragwi tarem-nen kwarurak ndag-e ngge nde perali-o? Ap yongga undurag-e op, lak? Ap meya rak unpurak nde ob-a? Ap inmiri yurak nde op, lak? Are, ap undurak nde ob-a?” luk kin wok inpij-o.

¹⁰ Iri luk, it pidsa yimbinik unpurak-nen ap iri na yak tosolar-e: ”Kinggi mbung tak pi-o” yak tosoloma, at inggi mbung tak pidnggal-e, op yij-o.

¹¹ Alat nde, ir-e insilepma kwarat luk, Yesus kwat uburak wene it nak it nak mbariga-o.

Yesus-nen ap duabelas len inpid wene 6:12-16

¹² Iri na tarem-e Yesus na tepan yekluk ndobo bem lagarig-e, kubu nggwe Mbal Pem Nagawan emengen mbal tenak iri-net o nda yij-o.

¹³ Iri luk, o nda yosoloma-ge, at imin nugwi nap yonggo unpuruk, it ennggendumu-nen ap duabelas na len inpij-o. Len unpuruk, it unnu yarosolar-e: ”Wirik unpurak nab-o” luk yij-o.

¹⁴ Nde, len inpid nap iri-ge: Simon na unu misik yarij-e Peterus iri na min at owot Andereas min Yakobus min Yoanes min Pilipus min Mbatolomeus min

¹⁵ Matius min Tomas min Alpius ambara Yakobus min Simon uwi nggweyak imiri yoso nab-o luk yak tugwi na min

¹⁶ Yakobus ambara Yuras min Yesus iminep wisirid nap Yuras Ikariot min irit len inpij-o.

Yesus-nen ap mul ondosolat, ap ki rak inpid wene 6:17-19

¹⁷ Yesus na at owosirak inmin luk ndobo bem-nen mbigarig-e, at imin nugwi nap kwarat inmin-e mbirikmu iri me mendak woraiga-o. Ap mondok kwarat ndok worogolar-e, Yurea-nen na, Yerusalem-nen na yi koma eyak pem o siri Tirus min Siron min-nen na lobok yiga-o.

¹⁸ It lobok yiga iri-ge Yesus-nen yidnak wene kologolat, ki rak onposolat yuwakluk lobok yiga-o. Nde, kugi enarem lin yidnak nap na lobok yikma, ki rak inpij-o.

¹⁹ Nde, at arem-nen amawi mborosolar-e, it pidsa ki rak onposo ala, ap pidsa-nen at tena buwokluk yiga-o.

Enalen kudtak mende min inndi puru rak mende min 6:20-26

²⁰ Iri lug-e, Yesus na at owosirak yik eneyasolat-nen yosolar-e: ”Kinsilobulo lak nap wa-e. Mbal Pem Nagawan-nen tenagaidnak wi iri-ge kit winde me, kir-e kenalen ker-o!

²¹ Nere yawo kali nap wa-e. Kinmbit tak puwa me, kenalen ker-o! Yawo yip tili nap wa-e. Kit abok-nen nda tugup me, kenalen ker-o!

²² Ap Ambara an nebem ala, ap-nen insili rak konpogolat, ap-nen keya konpogolat, pesel konpogolat, ’Kir-e meya kwaroso nab-o’ luk kunnu mbilaro ngin tak pogolat, iri rak konpogola-ge, kenalen ker-o!

²³ It enlawingga-nen Mbal Pem Nagawan ene lomboksa yugwi nab-e iri nggal-et kwat inpidnak me, kit na iri nggal-et kwat konpogola-ge, aid arem-nen onggo nggulok wok kunduwa me, kenalen yogolat, kenalen-nen kot ker-o.

²⁴ Alat nde, kit yawo yi mende ndi mende ombo worali nab-e iri na bem-nen kenalen min worali me, kenabuwa-o!

²⁵ Kit yawo kinmbit worali nab-e abok nere kwarat woragup me, kenabuwa-o! Kit yawo nda togolat worali nab-e abok kinndi puru luk, yip tugup me, kenabuwa-o!

²⁶ Nandug-e it enlawingga-nen-e enesiget siget Mbal Pem Nagawan ene lomboksa yugwi nap entembel waniga iri na nggal-et ap pidsa-nen kentembel wanili nab-e kenabuwa-o!” luk yij-o.

Kit kunuwim nab-e enabuwa kudtag-o 6:27-36

²⁷ Yak ondosoluk yarik, wene erep min yak ondosolar-e: ”Alat nde, kit yawo an nene kulili nab-e wene yu kenpem pusu-o: Kit kunuwim nab-e enabuwa kagolat, insili keneyagwi nap inmin na konag-et kwarogolat,

²⁸ Imbiri lamut tak kunpugwi nab-e imbiringgat tak onpogolat, meya rak kunpugwi nap na enmanggim tepan yogolat mer-o.

²⁹ Kerabengen lel kasola-ge, kerabengen ponok nggwe na lel kujwakluk nuk ki-o. Nde, kusum wanosola-ge, misik min-et wanuwakluk, wok ti-o.

³⁰ Ap-nen nde kat kebem nggi yogola-ge, nggi yuwa mende iri-ge wok turag-o. Nde, kisilobulo mbi wanuwama-ge, ’Uwi yagi-o’ luk yurak pug-o.

³¹ Ap-nen kit kwat kunpurak perali iri nggal-et kit-nen na ap erep kwat enper-o.

³² Nde, kit-nen kit kenabuwa kagwi nap nak enabuwa kagola-ge, kit-nen konak kwarugwi-ge ngge-o? Meya yugwi nap-nen na irit it enabuwa kagwi nap na enabuwa-t kagwi-o!

³³ Nde, kit kinmin konak yugwi nap nak inmin konak yogola-ge, kit-nen konak kwarugwi-ge ngge-o? Meya yugwi nap-nen na iri nggal-et kwarugwi-o!

³⁴ Nde, kit-nen nde uang tuguruk onggo wok kunduwakluk luru wok ondogola-ge, kit-nen konak kwarugwi-ge ngge-o? Meya yugwi nap-nen na iri nggal-et tuguruk ondolma wol unduwakluk, it unuwang-e meya yugwi nap erep luru wok undugwi-o!

³⁵ Lag-o! Kir-e kunuwim nap enabuwa kagolat, it inmin konag-et kwarogolat yugup na-e. Kunuang luru wok unduruk, uwi yagurak yebet kudtak pug-o. Iri kwarugup ala-ge, onggo nggulok wanogolat, Kek tak Woraso Mbal Pem Nagawan ilirak kwat yugub-o. Mbal Pem Nagawan-nen-e wa yugwi buk nap min meya yugwi nap min-e enabuwa nak kaso-o.

³⁶ Kit kineid-nen ap inmin indi op yoso iri nggal-et kit-nen na kinndi ob-et wolmomtag-o” luk yij-o.

”Nin nap enpem wene mbarurak pug-o” yidnak wene 6:37-42

³⁷ Yuruk, at-nen yosolar-e: ”Mbal Pem Nagawan-e kit kenpem wene mbaruwa naru, kit-nen ap enpem wene mbarurak pug-o. Nde, Mbal Pem Nagawan-nen kit meya yidnak onggo kenpem puwa naru, kit-nen na it nin meya yidnak onggo enpem purak pug-o. Mbal Pem Nagawan-nen kit meya yidnak amberam tak puwakluk, kit-nen na nin nap meya yidnak kenmberam tak per-o.

³⁸ Kinsilobulo-ge nin nap wok ondogola-ge, Mbal Pem Nagawan-nen na silobulo wok kunduwa-o. Wok kondosolar-e, ndak wosa wanugwi iri na ndemeret kobongsa, nggilara kininggem puwa-o. Kit-nen ap wok undugup iri na nggal ndak ndag-et Mbal Pem Nagawan-nen wok kunduwa-o” luk yij-o.

³⁹ Yurug-e, Yesus-nen nden karuk wene yu yak ondosolar-e: ”Enlengen ngguru-nen ap enlengen ngguru ininggi waruk mbururag-e op kali-a? Iri nggal kwarogola, enmbereg-et yoboksa mbuwa-o.

⁴⁰ Mul ondogola kulugwi nap-nen-e it mul undugwi nap nggal kek tag-e lag-o. Alat nde, mul indidnak wene na pidsa enaru luk-nen perak nde, it mul undugwi nap inmin ndak ndak kwat yugwi-o.

⁴¹ Kit kenambik kenlengen ma-ge e ebis nggugurik worasu na yebet kagit lag-et nde, kir-e noluk-nen kenggam erengen ma nggwidnak kopkap marik iri nde kali-o?

⁴² Kit kenlengen ma nggwidnak e ebis nggugurik na limbinigit lak-net nde, kir-e kennggam yak togolar-e: ’Nanggam wa-e. Kopkap kerengen ma nggwidnak iri-ge wabeyeg-o’ luk nggesa-nen yak tugub-o? Kenesiget siget yugwi nap wa-e. Nandug-et kit kenlengen ma e ebis nggugurik na wabogoluk-nen kit kennggam erengen ma nggwidnak kopkap iri-ge kwara kagolat-nen waburag-o” luk yij-o.

”Engen-nen e yenggerak pugwi-o” yidnak wene 6:43-45

⁴³ Yuruk, at-nen yosolar-e: ”Nde, e konak-nen-e engen meya poso bug-o. Iri nggal-et e meya-nen na engen konak poso bug-o.

⁴⁴ E pidsa-ge engen pidnak pem-net yenggerak pugwi-o. Isile worak mende-nen-e engen-e tona poso bug-o. Nde, linggat-nen-e engen-e tomate poso bug-o.

⁴⁵ Ap enarem worasu iri na wirik pusu me, konak nap-nen-e at arem-e konak nak kobong tak worasola me, konak wene nag-et wirik poso-o. Nde, meya yoso nap-nen-e at arem-e meya mende nak kobong tak me, meya wene nak wirik poso-o” luk yij-o.

O woroso aru nap min o woroso aru buk nap min-nen o wiriga wene 6:46-49

⁴⁶ Yuruk, at-nen yosolar-e: ”Kir-e an-nen yidnak yidnak kwatli bug-et nde, noluk-nen ’Nit Nagawan Indo wa-e. Nit Nagawan Indo wa-e’ yak nitli-o?

⁴⁷ An neram lobok luk, an-nen yidnak wene kuluruk, kulidnak na ndak ndak kwatli nab-e ’Iri kwaroso nab-e yu nggal-o’ luk yak kendeyeg-o.

⁴⁸ Iri kwaroso nab-e o wiridnak nap misik nggal-nen yusu-o. O wereyeklug-e, nggweyak lilara mbid mbij-e o mabin-e kerep pem puruk wirij-o. Worak puruk worasoma-ge, yi ebe wasolar-e, o na wat kagaij-et nde, o iri-ge paro kerep pem pidnak me, landera mbud tak pigit lag-o.

⁴⁹ Alat nde, an-nen yidnak wene kulurug-et nde, iri na ndak-ndak kwarusu buk nab-e, o wirid nap mbi nggal-nen yusu-o. Ap iri-nen o worosolar-e, o mabin pigit lak, we nggweyak pem wiridnak me, yi ebe wasolar-e, o iri na wat kasolar-e, ndag-et nak tud tak pij-o. Tud tak posola-ge, mijara nari warisa labuk yij-o!” luk yij-o.