LUKAS 5 - Nanduk Ngget Tul Pidnak Wene

Yesus-nen owosirak nanduk nandug-et len inpid wene 5:1-11

¹ Misik pem-e Yesus-e yi koma Nggenesaret eyak pem mendak worasoma-ge, Mbal Pem Nagawan-nen yidnak wene kuluwoklug-e, ap kwarat-nen at panggon ibiga-o.

² Iri ala-ge, Yesus-nen-e e koma mberen iri-ge yi eyak pem pidnak kagaij-o. Nde, e koma iri winde-ge e koma na keya buruk, keyane wanugwi sum marogolat woraiga-o.

³ Yesus na-ge Simon-nen idnak e koma misik na arem ngguruk, Simon yak tosolar-e: ”E koma yu-ge turuksa yi ma nggal pil li-o” yuruk, e koma na arem koreyak worasolar-e, ap mul indij-o.

⁴ Wene mul ondosolug-e, Yesus-nen Simon yak tosolar-e: ”E koma yu-ge yi koma enggendumu nggal pil li-o. Pil larug-e, keyane wanonok-nen keyane wanoso kusum-e yi ma mberak pi-o” luk yak tij-o.

⁵ Yak tosoloma-ge, Simon-nen yosolar-e: ”Mul Nondoso Nap wa-e. Nir-e yawo kubu kore yik tenak o nenpem nda yij-et nde, misiget ter-o luk wanigit lag-et nde, kat-nen: ’Tugurug-et mberak pi-o’ luk yak norosola me, mberak pimin-o” luk yij-o.

⁶ Yurug-e, keyane wanugwi sum na mberak pigarik, keyane kwarat sum na arem kobong yosolar-e, sum na ndelep yekluk yij-o.

⁷ Iri ala karuk, it ennggamirak e koma nin arem worakmu, ”Yonggo nindil lobok yer-o” luk ininggi sambok yiga-o. Nde, it na lobok yigarik, e koma mberen iri na me keyane ya yebetsa pil nggurug-e, e koma ya na-ge yubuk yurak nggal yij-o.

⁸ Nde, Simon-nen iri kwat yid iri na karug-e, Yesus eralu endaru yungguksa tud yosolat-nen yosolar-e: ”Nagawan Indo wa-e. An-e meya yoso nap me, keya nuburuk mbiri-o!” luk yij-o.

⁹ Simon min at imin woraiga nap min-nen keyane kwarat wanidnak iri na karug-e wi yiga-o.

¹⁰ Nde, Simon imin keyane wanugwi nap, Sebendeus ilirak Yakobus min Yoanes min-nen na wir-o luk yiga-o. Iri ala-ge, Yesus-nen Simon na yak tosolar-e: ”Kwiye kasu-ge meyog-o. Yawo-net keyane wanoso nggal ap wanoso nap kwat yugun-o” luk yak tij-o.

¹¹ Yak tosoloma-ge, ir-e ene koma ya na lesa wesu bem puruk, it enarengge oboksa yumbuk kuruk, Yesus imin mbiriga-o.

Yesus-nen mbijap nggal ebem mbidnak nap mbi ambut tak pidnak wene 5:12-16

¹² Misik tarem-e Yesus na o siri mbi me woragaij-o. Nde, o iri na me-ge ap mbi ebem ndigiril laso mbijap-nen yela keya bidnak irit woragaij-o. Nde, ap na-nen Yesus karug-e, at eralu tud luk-nen at emengen mbarosolar-e: ”Nap wa-e. Kat-nen nde an ambut tak nuburak perasolar-e, iri kwat nuburag-e ndak-nen yusu-o!” luk yij-o.

¹³ Yosoloma-ge, Yesus na inggi ap yu na ebem posolat-nen yosolar-e: ”An-e ambut tak kuburag-e nindingen-o. Ki min-o” luk yosoloma-ge, ereya na-net ndigiril laso mbijap na lak agaij-o.

¹⁴ Lak yosoloma-ge, Yesus-nen wene watsa yak tosolar-e: ”Wene yu-ge ap misiger-o luk tet yak undurak pug-o. Are, tepan ombo eram mburugundik, ’Mbenat nibi-o’ luk yurag-o. Iri lug-e, kat ambut tak kibidnak yenggerak kubuwakluk, Musa-nen yidnak yidnak kwarosolar-e, Mbal Pem Nagawan amanggim wosa pugwi mende wosa bi-o” luk yak tij-o.

¹⁵ Alat nde, Yesus-nen kwaridnak wene na nggok ma wigak yil mborosolar-e, ab-e kwarat lombok at-nen yidnak wene kulurak pem-nen na, it kugi worak woraidnak ki rak unpurak pem-nen na at eram lobok yugwi komo woraiga-o.

¹⁶ Nde, Yesus na-ge ap unsune lak ma arikmu mberarik, tepan yij-o.

Yesus-nen kambung puk tak woraso nap ki rak pidnak wene 5:17-26

¹⁷ Misik tarem Yesus-nen ap mul ondosolat worasoma-ge, o Nggalilea-nen na, Yurea-nen na, Yerusalem-nen na-nen lobok yidnak Parisi nap erep min imiri mbarak pidnak wene enaru nap erep min-e iri me koreyak woraiga-o. Nde, Nagawan Indo amawi-ge Yesus imin worala me, kugi worak nap ki rak onposolat woragaij-o.

¹⁸ Iri tarem-e ap erep-nen-e kambung puk tak woraso nap mbi nene yoso ondoro min kud turuk waruk lobok yigarik Yesus eram pil ngguwokluk yiga-t nde,

¹⁹ ap yebet nggoro yidnak me, it-nen nggurak meya agaij-o. Iri ala-ge, ap na waruk o ngguwa bem laigarig-e, o ngguwa iri na mijara keya buruk, ap na nene yoso ondoro min-et ap o ma woraiga ennggenggerak Yesus parosa irit mberak ibil mbiga-o.

²⁰ Mberak obogola-ge, Yesus-nen it inndi angin tubu yidnak yenggerak karug-e, at-nen ap yu na yak tosolar-e: ”La yu-ge wa-e. Kat meya yidnag-e namberam tak pigi-o” luk yak tij-o.

²¹ Wene na yak tosoloma-ge, it imiri mbarak pidnak wene enaru nap min Parisi nap min-nen yak kerak mbogolar-e: ”Abug-a! Mbal Pem Nagawan obok pusu yu-ge ta-nen yusu-o? Meya yidnak amberam tak purak nap mbi worali-ge lag-o. Iri kwaroso-ge Mbal Pem Nagawan arig-et nak worasu-o!” luk yiga-o.

²² Nde, Yesus na it-nen yebet kaiga wene iri na aru luk-nen yak ondosolar-e: ”Noluk-nen kinndi arem iri nggal yebet kali-o?

²³ ’Kat meya yidnak nemberam tak pigi-o’ luk yurag-e angin, lak? Are, ’Men luk mbiri-o’ luk yurak nde angin-a?

²⁴ Alat nde, nggweyak ma yu me-nen ap meya yidnak amberam tak purak amawi-ge Ap Ambara wok tidnak-nen yusu-o luk yenggerak kabog-o” luk yak indij-o. Iri yak undurug-e, at-nen kambung puk tak woraso nap na yak tosolar-e: ”Kar-e men luk, nene yoso kondoro kud turuk, kama mbiri-o luk yak kirigi-o!” luk yak tij-o.

²⁵ Yak tosola, ereya na-net ap iri na it pidsa inmbiri bem-et men luk, at nene yoso ondoro na kud turuk, Mbal Pem Nagawan erembel wil wil ama mbirij-o.

²⁶ Iri kwarosola karuk, it pidsa-nen wi langgu mbatluk, Mbal Pem Nagawan erembel wanogolat, kwiye min-et yogolar-e: ”Yawo kwiye worak mende nggulok irit nenlengen-nen kaige-o!” luk yiga-o.

Yesus-nen Lewi na wene mbo bidnak wene 5:27-32

²⁷ Iri lug-e, Yesus na mbepme mborosolat yik kagaidnggal-e, pemerinta enmanggim tol ndok woroso nap mbi unu-ge Lewi iri-ge tol ndok woroso ma koreyak worala, kagaij-o. Karug-e, Yesus-nen ap iri yak tosolar-e: ”An nimin ni-o” luk yak tij-o.

²⁸ Yak tosoloma-ge, Lewi na men luk, at arengge pidsa yumbuk karuk, Yesus imin mbirij-o.

²⁹ Iri luk, Lewi na-ge at ama-nen Yesus ijok kerengge nggulok mbi sagosola-ge, pemerinta enmanggim tol ndok wurugwi nap kwarat min ap erep min-e it inmin totno ningga-o.

³⁰ Nonggolat woragola-ge, Parisi nap erep min imiri mbarak pidnak wene enaru nap erep min-nen-e insili karug-e, Yesus owosirak yak ondogolar-e: ”Kir-e noluk-nen pemerinta enmanggim tol ndok wurugwi nap min meya yugwi nap erep min inmin totno nunggwi mende nili-o?” luk yiga-o.

³¹ Yogolikma-ge, Yesus-nen it yak ondosolar-e: ”Ap ki-nen-e ndoktet ukwe-ge lag-o. Alat nde, kugi worak nap-nen perak nde ndoktet ukwe-o.

³² An-e konak nap wene mbo enpeyekluk lobok yigit lag-o. Are, meya yugwi iri na it meya yidnak keya buruk, kondok makluk wene mbo enpeyekluk lobok yigi-o” luk yij-o.

Mburu keya buruk we woragwi bem Yesus kin wok pidnak wene 5:33-39

³³ Yosoloma-ge, ap erep-nen Yesus yak togolar-e: ”Yoanes imin nugwi nap min Parisi nap inmin nugwi nap min-e pempa mburu keya buruk, we woragolar-e, tepan nak yik tenak worali-t nde, kat kowosirag-e mburu nonggolat, yi nonggolat kwatli-o” luk yak tiga-o.

³⁴ Yak togolikma-ge, Yesus-nen it yak ondosolar-e: ”Kwe wanogola tarem nunggwi mende saidnak nunggwi tarem-nen kwe wanurak nab-e at anggamirak inmin worasola-t nde, kit-nen-e: ’Mburu keya buruk, we wolmer-o’ luk yak undugwi-a? Mondok lag-o!

³⁵ Alat nde, kwe wanurak nap na it endam-nen wok uburuk mburuwa tarem-nen perak nde, mburu keya buruk, we wolma-o” luk yij-o.

³⁶ Yurug-e, Yesus-nen nden karuk wene mbi yak ondosolar-e: ”Ap-nen-e sum umbuk ndelep yidnak panggarogolar-e, sum ngget pem umbuk min-e panggarugwi bug-o. Iri kwarosoma-ge, sum ngget na amawi-nen-e umbuk na ndelak poso-o. Iri-nen sum umbuk ebem ngget panggaridnak iri na ndak ndag-e lag-o.

³⁷ Nde, anggut engen amburu nggeret mbelag-e wam aboro yimbe taro arem woranggasa pil nggugwi bug-o. Iri kwarogola-ge, anggut engen amburu ngget iri amawi-nen ndowaga yimbe na tugwak yosolar-e, anggut engen amburu na nggilara mbosolat, yimbe na tugwara labuk ma-o.

³⁸ Iri bem-e, anggut engen amburu nggeret mbelag-e yimbe ngget arem-et woranggasa pil nggurag-o.

³⁹ Nde, ap-nen-e anggut engen amburu obi mende na nurug-e, anggut engen amburu nggeret mbelag-e indingen-e ma bug-o. ’Obi mende-ge undu konag-o’ luk yuwa-o” luk yij-o.