LUKAS 2 - Nanduk Ngget Tul Pidnak Wene

Yesus ndet yid wene 2:1-7

¹ Iri tarem-e Kaisat Agustus-nen wene wirik posolar-e: ”An-nen tenagaidnak wi woragwi nap pidsa wanat unpurak pem unnu mbarurag-o” luk yij-o.

² Nde, nandug-e tel korogolat wanat inpiga tarem-e Kirenius na-ge Siria nggweyak pem iri me gubernor worasola tarem-nen-o.

³ Iri tarem-e, ap pidsa it unnu mbaruwaklug-e, it enlem ma lombok mbiriga-o.

⁴ Nde, Yusup na-ge Ndaud-nen wigarak me, Nggalilea nggweyak pem o Nasaret iri me-nen Yurea nggweyak pem o unu-ge Mbetleyem, nagawan Ndaud ndesa mbidnak sa iri me-t mbirij-o.

⁵ Mborosolar-e, at abi pidnak kwe Maria abila na imin luk, enmberek unnu mbaruwakluk, mbiriga-o.

⁶ Nde, Mbetleyem wok yigarik pem-e la ndagurak tarem, la erengen pa yij-o.

⁷ Iri lug-e, la ap manggu irit ndagurug-e, ap sal nene yugwi sa-ge yebet tak nak me, it enmberek nggurag-e meya ala-ge, la na-ge sum-nen perena keya buruk, sapi wam mburu naso ondoro e mbet konidnak ma iri na arem mbinggirik ibij-o.

Lomba wam ndugurugwi nap-nen aid nap eneyaiga wene 2:8-20

⁸ O iri me-ge lomba wam yik karok woragwi nap ereb-e karu me iri me onowam yik karok kubu iri me woraiga-o.

⁹ Worakmu-ge, Nagawan Indo-nen idnak aid nab-e it inmbiri bem nam luk, Nagawan Indo eyaya-ge it yaya rak onposola-ge, ir-e kwiye kwarat yiga-o.

¹⁰ Yogolikma-ge, aid nap iri-nen it yak ondosolar-e: ”Kwiye kali-ge meyog-o! Yi nap ndi nap oboksa enalen tak purak konak wene irit yak kindil lobok yigi-o.

¹¹ Yawo kubu-ge kit kinmiri yurak nap, Nagawan Indo Kerisut iri-ge Ndaud ama-nen ndet yij-o.

¹² Nde, yu bem-nen kenaru yugub-o. Mburugupndig-e, la nggisiya mbi sum-nen perena keya buruk, sapi wam mburu naso ondoro e mbet-nen konidnak iri me mbinggirik nde kagub-o” luk yak indij-o.

¹³ Ereya na-net aid nap na imin-e aid nap mondok kwarat nam luk, Mbal Pem Nagawan erembel wanogolat-nen ndawi yogolar-e:

¹⁴ ”Mbal ombol nggwe-nen-e Mbal Pem Nagawan erembel wanuwag-o! Nde, nggweyak ma yu-nen-e Nagawan Indo indi alen tak pugwi nab-e yamuksa wolmag-o!” luk yiga-o.

¹⁵ Ndawi na yogoluk, aid nap na-ge it keya unpuruk, unuwok lem aid arem lagola-ge, lomba wam yik karok woragwi nap iri-nen yak kerak mbogolar-e: ”Nagawan Indo-nen yak nindidnak iri na mbi Mbetleyem kil mburuwog-o” luk yiga-o.

¹⁶ Iri lug-e, ir-e ndaget nak mbirigarik, Maria min Yusup min eneyaruk, la nggisiya na-ge sapi wam mburu naso ondoro e mbet-nen konidnak iri me mbinggirik worala, kaiga-o.

¹⁷ La iri na karug-e, la iri obok aid nap-nen yak indidnak wene iri na kerengga yak indiga-o.

¹⁸ Yak ondogolikma-ge, lomba wam yik karok woragwi nap-nen kiringgiga wene na kulurug-e, it oboksa-ge wi langgu mbariga-o.

¹⁹ Alat nde, Maria na-nen-e wene na pidsa arem na puruk, indi yebet yebet tak woragaij-o.

²⁰ Iri rak puruk, lomba wam yik karok woragwi nap na mborogolar-e, it-nen kuliga min kaiga min iri-ge aid nap-nen yak indidnak na nggal-et ndak ndak ala karuk, Mbal Pem Nagawan erembel wanogolat, at unu kek tak pogolat kwaril mbiriga-o.

Yesus unu yaridnak wene 2:21

²¹ Yesus na nderak tuju nene luk, delapan pem-e la na iye ambasap mbarurak tarem ndak ala-ge, at unu-ge Yesus-o luk yariga-o. At unu yariga iri-ge at ija arem awo worala unu aid nap-nen yarid iri na-t yariga-o.

Mbal Pem Nagawan ama-nen Yesus Mbal Pem Nagawan amanggim piga wene 2:22-38

²² Musa-nen imiri mbarak pidnak wene yak indidnak iri na ndak ndak tak pogolar-e, kusimin lak tak pogolat, tu mburugwi tarem wok yosola-ge, Yesus na Mbal Pem Nagawan amanggim puwokluk, Yerusalem waruk mbiriga-o.

²³ Nde, Nagawan Indo-nen ”Irit kwarurag-o” luk mbaridnak engga bem-nen yosolar-e: ”Nandug-et li ap ndaidnak iri-ge Mbal Pem Nagawan amanggim purag-o” luk yij-o.

²⁴ Nde, Nagawan Indo-nen ”Irit kwarurag-o” luk mbaridnak engga bem-nen yosolar-e: ”Towe pururukturuk nggal mberen ala na, towe nggwende mberen ala na wosa burag-o” yidnak iri ndak ndak kwarogolar-e, Mbal Pem Nagawan amanggim towe wosa puwokluk mbiriga-o.

²⁵ Nde, iri tarem-e ap misik unu-ge Simeon iri-ge Yerusalem woragaij-o. At iri-ge Mbal Pem Nagawan indi aye worak konak nap woralar-e. Mbal Pem Nagawan-nen Isarael nap inmiri yurak iri na yik karok woralar-e, Konak Indi at imin irit woragaij-o.

²⁶ Nde, Konak Indi-nen at para yak tosolar-e: ”Nagawan Indo-nen urul pidnak Kerisut iri na kerengen kagit lak ma-ge wat yugun pug-o” luk yak tij-o.

²⁷ Konak Indi-nen lit kurug-e, Simeon na-ge Mbal Pem Nagawan ama nggwij-o. Nde, ”Irit kwarurag-o” luk yidnak na ndak ndak tak pogolar-e, Yusup min Maria min-nen la marik Yesus na waruk Mbal Pem Nagawan ama nggogola-ge,

²⁸ Simeon na-ge la na kambok turuk-nen Mbal Pem Nagawan erembel wanosolar-e:

²⁹ ”Nagawan Indo wa-e. Yawo-ge kat-nen urul pigen na-ge ndak tak pigen pem-e, ndegel koboso nap an-e yamuk tak pem-et wat eyeg-o.

^30-31 Kat keram-nen lobok yid nap inmiri yoso na-ge, ap pidsa enmanggim kat-nen pidnak inmiri yoso nap iri-ge nerengen-nen kagi-o.

³² At iri-nen-e kat keram lobok yuwakluk, enlem nin nap untula yaya rak posolat kat kelem nap Isarael nap unnu kek tak puwa nap-nen yusu-o” luk yij-o.

³³ Nde, la iri na eid min ija min-e Simeon-nen enla iri imin yidnak wene na kulurug-e, wi yiga-o.

³⁴ Iri lug-e, Simeon na-nen it imbiringgat tak onposolat-nen la iri ija Maria yak tosolar-e: ”Isarael nap ap kwarat lak tak onposolat, ap kwarat na inmiri yosolat maklug-e, Mbal Pem Nagawan-nen la yu-ge len ibij-o. At yu-ge Mbal Pem Nagawan eram-nen lobok yidnak-nen yusu-o luk yenggerak purug-e, ap kwarat-nen at insili rak puwa-o.

³⁵ At insili rak pogolar-e, it inndi arem-nen peragwi mende iri nam tak puwa-o. Nde, Maria kat kindi andi-ge yalawi anggat-nen kindi kundugu pidnak nggal kindi andi yugun-o” luk yak tij-o.

³⁶ Nde, Mbal Pem Nagawan ene lomboksa yoso kwe misik unu-ge Panuel ara Ana iri woragaij-o. Nde, kwe na elem unu-ge Aser kwe-o. Un wanurug-e, un imin-e olengen tuju woraruk,

³⁷ kwe togwe woralar-e, olengen depalan pulu empat (84) woraidnak me, kwe indi worak yidnak irit woragaij-o. Kwe na-ge Mbal Pem Nagawan ama-nen mbepme mboroso buk, kubu-nen lengge-nen mburu keya buruk, tepan nak kundugu yosolar-e. Mbal Pem Nagawan nak erembel wanosolat woraso-o.

³⁸ Iri na tarem-e kwe na lobok yarig-e, Mbal Pem Nagawan erembel wanuruk, Mbal Pem Nagawan-nen ap ininggem-nen Yerusalem nap wisirik unpuwa-o luk inndi mbung mbung tak woragwi nap pidsa inmbiri bem-e la iri owene-ge yak indij-o.

Unuwok lem Nasaret mbiriga wene 2:39-40

³⁹ Nde, Nagawan Indo-nen ”Irit kwarurag-o” luk yidnak wene pidsa kwat lug-e, Yusup min Maria min-e enma Nggalilea nggweyak pem Nasaret mbiriga-o.

⁴⁰ Nde, la na-ge ebe nggulok yosolat, amawi yosola-ge, Mbal Pem Nagawan-nen imbiringgat tak posola, indi tenggerak irit woragaij-o.

Yesus-e Mbal Pem Nagawan ama-nen kwarid wene 2:41-52

⁴¹ O Anggul Pandok Mbiridnak tarem na yebet kagolat saguwokluk-nen pempa olengen irit wosa Yesus eid ija-ge Yerusalem mborogolat woragwi-o.

⁴² Nde, Yesus ndesa mburuk, olengen duabelas worala tarem-e, it-nen kwarugwi mende kwarogolar-e, silo sagukmu mbiriga-o.

⁴³ O Anggul Pandok Mbiridnak tarem na saga nurug-e, Yesus na-ge Yerusalem worala nde, at eid ija min-e enaru buk irit unuwok lem mbiriga-o.

⁴⁴ It-nen peragolar-e, ap ereba na inmin mburusu-o perarug-e, mbiriga, mbiriga-ge keyama nggwe-ge la na it onowe onowot nde, annggamirak nde ennggenggerak na ogore yiga-t nde,

⁴⁵ lak alama-ge, ir-e at ogore yuwokluk tuguruk Yerusalem mbiriga-o.

⁴⁶ Mbirigarik, ogore yogolat mberen nene lug-e, Mbal Pem Nagawan ama-nen it Yawuri nap mul undugwi nap inmin kore luk, it enne kolosolat, it kin wok onposolat worasoma, kaiga-o.

⁴⁷ Nde, kin wok obogola, onggo mondok lud tak nak yosola kuliga nap ereba na-nen-e wi yiga-o.

⁴⁸ Iri kwarosola karuk, at eid ija na wi lug-e, at ija-nen yak tosolar-e: ”Nambara wa-e. Kar-e noluk-nen yu nggal kwat ninpigen-o? Kat kombo nenmbereg-e kogore yogolat, pabok pil waring kaige-o” luk yak tij-o.

⁴⁹ Yak tosoloma-ge, Yesus-nen it yak ondosolar-e: ”Kir-e noluk-nen an nogore waring kagolat woraigeb-o? An-e an Neid ama worasu-ge kit kenaru buk-nen yili, lak?” luk yak indij-et nde,

⁵⁰ it-nen-e at-nen yid wene na kwara yenggerak pigit lag-o.

⁵¹ Alama-ge, Yesus na it inmin luk Nasaret mberarig-e, eid ija-nen yidnak yidnak irit kwarosolat woragaij-o. Nde, at ija-nen-e iri kwaridnak wene pidsa-ge arem tak puruk woragaij-o.

⁵² Nde, Yesus ebe nggok yosolat, indi nggat nggat worak yosola-ge, Mbal Pem Nagawan-nen na irit, ap-nen na irit inndi-ge at ebem pogolat woraiga-o.