LUKAS 18 - Nanduk Ngget Tul Pidnak Wene

Kwe togwe min wene mbaroso nap min-nen kwaridnak pem nden karuk yidnak wene 18:1-8

¹ At owosirak-nen inndi tugup lak woragolat, kundugu kundugu tepan yogolat wolmakluk, Yesus-nen mul ondosolar-e, nden karuk wene yu yak indij-o.

² Yesus-nen yosolar-e: ”O siri misik me-ge wene mbaroso nap mbi woragaij-o. Ap iri na-ge Mbal Pem Nagawan indi aye lak nap, ap erep na nggok tak onposo buk irit woragaij-o.

³ Nde, o iri me-ge kwe togwe mbi woragaij-o. Woralar-e, kwe na-nen pempa wene mbaroso nap na eram lobok luk-nen at emengen mbarosolar-e: ’An nimin wene eyak woroso nap yu wene kona mbal niri-o’ luk yak terenak woraso-t nde,

⁴ ap iri na ene kola nak keya berenak woragaij-et nde, misik tarem-nen perasolar-e: ’An-e Mbal Pem Nagawan indi aye kaso buk, ap erep na nggok tak onposo bug-et nde,

⁵ kwe togwe yu-nen pempa an sil neyerenak wolmomtak iri-ge meya me, an-e wene na mbal teyeg-o. Nde, lak nde ala-ge, kwe yu-nen-e an pempa sil neyerenak worasolar-e, an anggun panggun tak nuburag-e meya kagi’ peragaij-o” luk yak indij-o.

⁶ Iri yuruk, Nagawan Indo-nen yosolar-e: ”Wene mbaroso nap mot mot kwaroso buk-nen yidnak wene iri kwara yebet ker-o.

⁷ Nde, at lenak inpidnak nab-e kubu-nen lengge-nen at emengen mbal tenak wolma nap iri-ge Mbal Pem Nagawan-nen wene kona wok unduwa buk kali-a? It yongga ondosolar-e, ndan-et yongga unduwa nde kali-a?

⁸ An yak kendeyeg-o. Ar-e ndag-et nak it onowene konak mbal unduwa-o. Alat nde, Ap Ambara an lobok yimin tarem-e nggweyak ma yu me-nen inndi angin tubu yugwi nap mbi eneyamin, lak?” luk yij-o.

Parisi nap min pemerinta enmanggim tol ndok woroso nap min-nen tepan yidnak pem nden karuk yidnak wene 18:9-14

⁹ Nden karuk wene yu-ge it ondomog-e lud tak nak kwarugwi nap nggal kwarogolat, nde, ap oboksa-ge teberak nggal yik eneyagwi nap iri na Yesus-nen yak endamu-o.

¹⁰ Yesus-nen yosolar-e: ”Ap mberen-e tepan yuwokluk Mbal Pem Nagawan ama mbiriga-o. Nde, misig-e Parisi nap, nde, misig-e pemerinta enmanggim tol ndok woroso nab-o.

¹¹ Nde, Parisi nap iri-ge men luk, indi arem-nen tepan yosolar-e: ’Mbal Pem Nagawan wa-e. An-e ap erep nggal-e lag-o. It ereb-e yariya wanugwi nap min lugud tak kwarugwi nap min uwingga mbarugwi nap min iri-ge an-e iri nggal kwaroso buk me, wa yak kurusu-o. An-e pemerinta enmanggim tol ndok woroso yu nggal-e lak me, wa yak kurusu-o.

¹² Tepan misik arem-e mberen pem tepan yosolat, mburu ninggit lak we nene yoso-o. Nde, an narengge pidsa wonasa enggep lombok karetkwe-nen idnag-e kat kamanggim poso-o’ luk yij-o.

¹³ Alat nde, pemerinta enmanggim tol ndok woroso nap iri na-ge mboksa nggal mendak worasolat-nen at erengen-e mbal nggwe lik kudtak na kwiye me, at ambik imigwak lel kasolat-nen yosolar-e: ’Mbal Pem Nagawan wa-e. An-e meya yoso nap-nen yusu-o. Nabuwa ki-o!’ luk yij-o.”

¹⁴ Iri luk, Yesus-nen it yak ondosolar-e: ”An yak kendeyeg-o. It na mborogolar-e, at Parisi nap iri-ge lag-o. Are, pemerinta enmanggim tol ndok woroso nap iri na nde Mbal Pem Nagawan-nen lud tak obosola, ama mbirij-o. Iri kwarid iri-ge ap-nen nde inndi kek yuwa nab-e teberak unpuwa-o. Nde, ap-nen nde inndi tebe yuwa nab-e, kek tak unpuwa-o” luk yij-o.

Yesus-nen li marik marik imbiringgat tak inpid wene 18:15-17

¹⁵ Yesus inggi-nen tena unpuwakluk, ap erep-nen-e li marik marik ereba na at eram waruk lobok yiga-o. Iri yogola-ge, Yesus owosirak-nen iri kwarogola karuk, ”Iri kwatli-ge meyog-o” luk met inpiga-o.

¹⁶ Alat nde, Yesus na li marik marik wene mbo unpuruk-nen yosolar-e: ”Li marik marig-e an neram lobok yuwag-o. Ap inndi-ge li marik yu inndi nggal kwat ma nap-net Mbal Pem Nagawan-nen tenagaidnak wi winde momtak nap-net yili me, langgal eneyali meyog-o.

¹⁷ An ndemeret yak kendeyeg-o. Ta-nen nde li marik nggal luk Mbal Pem Nagawan-nen tenagaidnak wi wanigit lak ala-ge, Mbal Pem Nagawan-nen tenagaidnak wi iri-ge ngguwa bug-o” luk yij-o.

Isilobulo kwarat winde-nen yidnak wene 18:18-30

¹⁸ Yawuri nap nagawan misik-nen Yesus kin wok obosolar-e: ”Mul Nondoso Nap konak nap wa-e. Nurug-et woralik nalik wolmomtak elem waneyeklug-e, no kwarimin-o?” luk kin wanij-o.

¹⁹ Kin wanosoloma-ge, Yesus-nen at yak tosolar-e: ”Kar-e noluk an konak nab-o yak nirigen-o? Konak nap mbi worali bug-o. Mbal Pem Nagawan arig-et nak worasu-o.

²⁰ Nde, Mbal Pem Nagawan-nen ’Iri nggal kwarurag-o’ yidnak iri-ge kar-e karu-o. Iri-ge: ’Ap onkwe yeburak pug-o. Ap wururak pug-o. Yariya wanurak pug-o. Kenesiget yurak pug-o. Keid kiya-nen yidnak yidnak nak kwarosolat wolmin-o’ ” luk yij-o.

²¹ Yosoloma-ge, ap iri-nen yosolar-e: ”Wene iri-ge an-e li marik pem-net kwarosolat woraso-o” luk yij-o.

²² Iri yosoloma kulurug-e, Yesus-nen at yak tosolar-e: ”Kat-nen mondok kwarurak mende misiget mbi keya bigen-o. Kat karengge pidsa onggo wanosoluk, onggo wanidnak tengge na insilobulo lak nap tembesa wok undugunmu-ge, an nimin ni-o. Iri yugundik pem-e aid arem-nen silobulo kwarat winde yugun-o” luk yak tij-o.

²³ Alat nde, wene na kulurug-e, ap iri na isilobulo kwarat me, indi puru pera yij-o.

²⁴ Ap iri na indi puru yid na Yesus na karuk-nen yosolar-e: ”Insilobulo kwarat worak nap-nen Mbal Pem Nagawan ilirak kwat momtag-e angin kwarar-o.

²⁵ Nde, sapi wam-e luruk erel uru nggwe nggurag-e te-t nde, insilobulo kwarat worak nap-nen Mbal Pem Nagawan-nen tenagaidnak wi nggurag-e angin kwarar-o” luk yij-o.

²⁶ Yesus-nen wene iri nggal yosola kuliga nap-nen kin wanogolar-e: ”Iri ala-ge, ab-e ta nggal nak imiri yaga wanuwa kaigeb-o?” lu yiga-o.

²⁷ Yogolikma-ge, Yesus-nen yosolar-e: ”Ki nap-nen kwarurag-e meya-t nde, Mbal Pem Nagawan-nen kwarurag-e ndak-net yusu-o” luk yij-o.

²⁸ Yosoloma-ge, Peterus-nen yosolar-e: ”Nir-e nenarenggi nenarengge keya buruk, kat kimin nili yu nde ki-o!” luk yosoloma-ge.

²⁹ Yesus-nen it yak ondosolar-e: ”Ndemeret yak kundusu-o. Ta-nen nde Mbal Pem Nagawan ndegel ubuwokluk at uwi min ogwe min owe owot min eid ija min ilirak min keya unpuwa nab-e

³⁰ yawo-nen-e at arengge ondolmasa terak mena lesa wanuwa-t nde, abok-nen-e unlug-et woralik nalik wolmomtak elem wok tuwa-o” luk yij-o.

Tuguruk kenan pem tak posolat, Yesus-nen ”An wat yimin-o” yid wene 18:31-34

³¹ Iri lug-e at owosirak duabelas na enarik ndok worak unpuruk, Yesus-nen it yak ondosolar-e: ”Yu nde ker-o. Nir-e Yerusalem mbitli-o. Nde, iri me-nen-e Mbal Pem Nagawan ene lomboksa yugwi nap-nen Ap Ambara an kwat nuburak wene mbaridnak pidsa iri na ndak ndag-et kwat nubuwa-o.

³² Enlem nin nap ininggem wesera nubuwama-ge, it-nen pesel nobogolat, nggweyel nobogolat, wusi tebal nobogolat,

³³ it-nen andi bandi rak nuburuk, nuruwa-t nde, mberen nene luk, kenan tak purak pem-e nuruk yimin-o” luk yak indij-o.

³⁴ Wene iri na ebe-ge it enambigir-e kurak yidnak me, at owosirak-nen-e wene na oboksa-ge marig-et ter-o luk yenggerak pigit lak yogolar-e, ir-e ”No wene nde yusu-o?” luk kabak yiga-o.

Yesus-nen erengen ngguru nap mbi erengen kuwarak pid wene 18:35-43

³⁵ Iri luk, Yesus na o Yeriko panggo panggo wok yosola-ge, ap erengen ngguru mbi-ge tu mbanggo nggwe koreyak worasolat-nen yi mende ndi mende nggi nggi yosolat woragaij-o.

³⁶ Nde, ap iri na-nen ap kwarat mborogolat unuwok ene mbirip kuluruk-nen it kin wok onposolar-e ”Yu ngge kwarogolat-nen yili-o?” luk yij-o.

³⁷ Yosoloma-ge, ap-nen yak togolar-e: ”O Nasaret nap Yesus na mburusu-o” luk yak tiga-o.

³⁸ Iri yogola kulurug-e, at-nen ene ngguloksa yosolar-e: ”Ndaud ambara Yesus wa-e! An nabuwa ki-o!” luk yij-o.

³⁹ Yosoloma-ge, at eralu mendak woraiga nap-nen ene lak makluk met piga-t nde, ar-e ebem lud ene ngguloksa yosolar-e: ”Ndaud ambara wa-e! Nabuwa ki-o!” luk yosolat woragaij-o.

⁴⁰ Alama-ge, Yesus na ndong yosolar-e: ”Ap iri-ge an neram waruk lobok yer-o” luk yosoloma-ge, ap erengen ngguru na at eram wok yosola-ge, Yesus-nen at kin wok obosolar-e:

⁴¹ ”Kar-e an-nen no mende kwat kuburak kindi perasu-o?” luk yak tosoloma-ge, at-nen yosolar-e: ”Nagawan Indo wa-e. An nerengen kuwarak purak irit nindingen-o” luk yij-o.

⁴² Yosoloma-ge, Yesus-nen at yak tosolar-e: ”Kerengen pengge yi-o! Kat kindi angin tubu yigen iri na-nen kerengen kuwak tak pij-o” luk yak tij-o.

⁴³ Yak tosoloma ereya na-net at erengen kuwak yosoloma, Yesus langgal luk mborosolar-e, Mbal Pem Nagawan wiwa-o luk yil yil mbirij-o. Iri kwaridnak karuk, ap oboksa-nen Mbal Pem Nagawan erembel waniga-o.