LUKAS 17 - Nanduk Ngget Tul Pidnak Wene

Meya yidnak pem nggomo indidnak wene 17:1-4

¹ Yesus-nen at owosirak yak ondosolar-e: ”Meya yuwakluk ap enarem woraga pil nggurak mende lak ma-ge lag-o. Irit pempa kwarogolat wolma-o. Alat nde, nin nap meya rak inpili nap enpem mbuma mende bem enabuwa-o!

² Nde, ap li marik nggal ndeyak yeba ennggendumu ap misiger-o luk tet meya yuwakluk arem woraga pil nggusu nap iri perak nde, kerep nggulok mbi at urusuwak pem tiyong tak puruk, yi koma arem peleksa ibil nggurak perak ob-o.

³ Kir-e kwil kwalsa wolmer-o. Kat kowe kowot mbi meya yosola-ge, ’Iri nggal kwarurak pug-o’ luk yak turag-o. Nde, at na kondok yosola-ge, at meya yidnak kamberam tak purag-o.

⁴ O misik pem nag-et nde kanggam-nen nde tuju bem-et meya rak kuburuk, tuju bemet kat keram lobok yosolat-nen ’Nab-o. Kat kimin meya yigi-o’ luk yosola-ge, at meya yidnak kamberam tak purag-o” luk yak indij-o.

Inndi angin tubu yurak wene 17:5-6

⁵ Nde, wirik inpidnak nap-nen Nagawan Indo yak togolar-e: ”Nit ninndi angin tubu yidnag-e kwara amawi rak pi-o” luk yiga-o.

⁶ Yogolikma-ge, Nagawan Indo-nen yosolar-e: ”Kit kinndi angin tubu yidnak nde sawi uwi kubuk lan iri nggal woragolat-nen nde, e wariya yu yak togolar-e: ’Kar-e konoksa yi koma arem yak yil mbiri-o’ yak togola-ge, kit-nen yak tugup iri nggal-et kwaruwa-o” luk yij-o.

Ndegel oboso nap-nen kwarurak wene 17:7-10

⁷ Yuruk, Yesus-nen yosolar-e: ”Kit misig-e ndegel konposo nap mbi-ge yabu wanoso ala na, lomba wam yik karok woraso ala na, yabu ebem pidnak na wanuruk lobok yosola-ge, kit-nen-e: ’Ndag-et nak nunggwi mende yu min-o’ luk yak tugub-a?

⁸ Mondok lag-o. Are, yu nggal yak tugub-o: ’An norak mende nanduk lid lud tak puruk, kusum konak yutluk, an mburu min yi min nasola-ge, ndegel nubugun-o. Nde, an namu-nen kar-e mburu min yi min nunggun-o’ luk yak tugub-o.

⁹ Nde, ndegel oboso nab-e at eid-nen yak tidnak irit kwarosola-ge, entembel wanugwi-a?

¹⁰ Kit-nen na iri nggal-et kwarurag-o. ’Kit-nen kwarer-o’ luk kenpem pidnak mende na ndegera kwatlug-e, yu nggal yurag-o? ’Nir-e we ndegel ubugwi nap-nen yili-o. Nir-e nenpem pidnak mende iri na-t kwarogolat woraige-o’ luk yugup na-e” luk yij-o.

Yesus-nen ap sepulu ki rak inpid wene 17:11-19

¹¹ Yesus na Yerusalem mborosolar-e, Samaria wok Nggalilea wok iri nggwe mbirij-o.

¹² Mborosolar-e, o siri misik me wok yidnggal-e, mbijap nggal enpem idnak nap sepulu iri inmin lambuk yij-o. It iri-ge erepma nggal mendak woragolat-nen

¹³ wene ngguloksa yogolar-e: ”Nagawan Indo Yesus wa-e. Nenabuwa ki-o” luk yiga-o.

¹⁴ Yogola-ge,Yesus na it eneyaruk-nen yak ondosolar-e: ”Ud iri mbenat kunpuwakluk tepan omborak endam mberer-o” luk yak ondosoloma-ge, it na mburukmu ereya na-net ud ereba na lak yij-o.

¹⁵ Alama-ge, it ennggendumu-nen ap misik na at ebem mbidnak ud na lak yidnak karug-e, nden karuk ijok lem lobok yosolar-e, ene nggulok pem-et Mbal Pem Nagawan erembel wil wil lobok yij-o.

¹⁶ Lobok luk, Yesus ijok eralu mbud lug-e, wiwa-o kwarat yak tij-o. Nde, ap iri-ge Samaria nap-nen kwarij-o.

¹⁷ Iri ala-ge, Yesus-nen yosolar-e: ”Ab-e sepulu ki rak inpigi-t nde, enpe sembilan-e ngge me worali-o?

¹⁸ Noluk-nen ap sal yu arig-et nak Mbal Pem Nagawan wa yak til lobok yij-o?” luk yij-o.

¹⁹ Yurug-e,Yesus-nen ap na yak tosolar-e: ”Men luk mbiri-o. Kindi angin tubu yigen iri-nen ki rak kibij-o” luk yak tij-o.

Mbal Pem Nagawan-nen tenagaidnak wi wok yurak wene 17:20-37

²⁰ Parisi nap erep-nen Yesus kin wok obogolar-e: ”Mbal Pem Nagawan-nen tenagaidnak wi-ge mepme tarem-nen wok yuwa-o?” luk yogoloma-ge, Yesus-nen wene erep nggarosolar-e: ”Mbal Pem Nagawan-nen tenagaidnak wi wok yosolar-e, ap-nen karuk yenggerak pugwi mende min wok yuwa bug-o.

²¹ Nde, Mbal Pem Nagawan-nen tenagaidnak wi-ge kit kennggendumu worasu me, ap-nen yogolar-e: ’Nde, ar-e indi me worasu-o. Yu me worasu-o’ luk yurag-e meya-o” luk yij-o.

²² Iri lug-e, Yesus-nen owosirak na yak ondosolar-e: ”Abok-nen-e ’Ap Ambara-nen idnak tarem mbi kayeg-o’ luk yugub-et nde, kagup pug-o.

²³ Nde, abok ap-nen kit yak kondogolar-e: ’Ar-e iri me worasu-o. Ar-e yu me worasu-o’ luk yak kondogola-ge, kir-e ereba na me ogore mbururak pug-o.

²⁴ Nde, obinel mbal pem-nen yebek yosola, mbal erep ponok ponok yembak yil mburusu iri nggal-et Ap Ambara an lobok yimin tarem-e iri nggal-et ma-o.

²⁵ Alat nde, nanduk nandug-er-e an-e kwarat andi bandi kasolat, yawo worali nap-nen-e insili rak nobogolat ma-o.

²⁶ Nde, Nu worala tarem-nen kwariga nggal-et, Ap Ambara an lobok yurak tarem-e iri nggal-et kwat ma-o.

²⁷ It pidsa-nen nunggwi mende min yi min nonggolat, kwe wok kerak mbogolat kwat tenak worakmu, Nu na o iri na arem nggosola-ge, yi wasolar-e, it pidsa lak tak inpij-o.

²⁸ Lut woragaid tarem-nen na it pidsa-nen-e nunggwi mende min yi min nonggolat, silobulo onggo pogolat, onggo wanogolat, yabu wanogolat, o worogolat woraiga-t nde,

²⁹ Lut na Sorom wi keya buruk mborosola tarem-e mbal pem-nen kanduk min emben worak kule (belerang) min nggilara pil mbuwasola, it pidsa lak tak inpij-o.

³⁰ Ap Ambara an lobok yimin tarem-e iri nggal-et kwat ma-o.

³¹ Iri kwat ma tarem-e ab-e erema worasoma, at arengge silabaga wolma na-ge wil ludtak pug-o. Iri nggal-et yapmu wolma nab-e tuguruk o ma mbururak pug-o.

³² Lut ogwe-nen kwarid iri-ge yeberak wolmer-o.

³³ Indi abuwa nggok tak puwa nab-e lak ma-o. Nde, ta-nen nde at indi abuwa lak tak posola-ge, urug-et wolma-o.

³⁴ An yak kendeyeg-o. Iri kwaruwa tarem kubu-ge ap mberen-e misik mu nene yuwa-t nde, misig-e wok uburuk mborosolat, misig-e keya bosolat ma-o.

³⁵ Kweyap mberen-e enmberek mburu marukmu, misig-e wok uburuk mborosolat misig-e keya bosolat ma-o.

³⁶ [Mberen nab-e yabu wanukmu, misig-e wok uburuk mborosolat, misig-e keya bosolat ma-o]” luk yij-o.

³⁷ Yosoloma-ge, at owosirak-nen at kin wok obogolar-e: ”Nagawan Indo wa-e. Ngge me-nen kwarurak nde yigen-o?” luk yogoloma-ge, Yesus-nen it yak ondosolar-e: ”Ontogwak woraso sa-ge ontogwak naso towe-nen nil ndok woroso-o” luk yij-o.