LUKAS 15 - Nanduk Ngget Tul Pidnak Wene

Lomba wam pul yidnak pem nden karuk yidnak wene 15:1-7

¹ Misik tarem-e pemerinta enmanggim tol ndok wurugwi nap min meya yugwi nap min kwarat Yesus-nen yidnak wene kuluwokluk ndok wiri-ga-o.

² Iri ala-ge, Parisi nap min imiri mbarak pidnak wene enaru nap min-nen at obok pogolar-e: ”At yu-ge meya yugwi nap imin tak unpuruk, inmin mburu nasu yu nde ker-o” luk yiga-o.

³ Iri yogola karuk, Yesus-nen nden karuk wene bem it yak ondosolar-e:

⁴ ”Kit kennggendumu-nen ap misik olomba wam-e seratus (100) worasoma, misiget nde pul yuwama-ge, ngge kwaruwa kaigeb-o? Lag-o. Owam erep sembilan pulu sembilan (99) iri na tusuwangge worak ma keya buruk, pul yidnak na ogore yuwa yuwa kujwa-o.

⁵ Kasoluk, alen kwarat luk, olomba na endak pem kud turuk,

⁶ ama waruk lobok yosolat-nen at anggamirak min at eralu woragwi nap min wene mbo unpuruk-nen yak ondosolar-e: ’Nolomba wam pul yidnak wanigirik me, kijik kijak wuruwog-o!’ luk yak unduwa-o.

⁷ Nde, an yak kendeyeg-o. Iri nggal, meya yidnak nap misiget kondok yidnak pem-e aid arem-nen enalen kwarat kujwa-o. Nde, lud tak nak kwarugwi nap sembilan pulu sembilan (99) iri-ge ir-e meya yugwi buk me, kondok yuwa buk nap it enpem-e enalen te nggal-et kujwa-o” luk yij-o.

Kerep tol pul yidnak pem nden karuk yidnak wene 15:8-10

⁸ Yuruk, Yesus-nen yosolar-e: ”Nde, kwe misig-e egerep tol sepulu worasoma, misik nde pul yuwama-ge, ngge nde kwaruwa-o? Lag-o. At-nen tal paguruk, ama o liri korosolat, kwara-t kore luk-nen orol iri kujwa irir-o.

⁹ Tol na kasoluk, kwe na anggamirak min at eralu woraso nap min wene mbo unpuruk-nen yak ondosolar-e: ’Negerep tol pul yidnak na wanigirik me, kijik kijak wuruwog-o!’ luk yak unduwa-o.

¹⁰ An yak kendeyeg-o. Iri nggal, meya yoso nap misik at meya yidnak keya buruk, kondok yosola-ge, Mbal Pem Nagawan-nen idnak aid nap-e kijik kijak kwarat witli-o” luk yij-o.

Ap misik ambara pul yidnak pem nden karuk yidnak wene 15:11-32

¹¹ Iri luk, Yesus-nen yosolar-e: ”Ap misik ambara rak mberen woraiga-o.

¹² Owot iri-nen at eid yak tosolar-e: ’Neid wa-e. Kat karengge iri-ge menggesa an wanurag-e yawo-t wok niri-o’ luk yak tosoloma-ge, eid na-nen-e at isilobulo menggesa ambara rak mberen na tembet indij-o.

¹³ Tembet endamu, siyak worasolar-e, owot iri-nen-e at arengge pidsa onggo wanosoluk mbirij-o. O wandakma mberarig-e, we kasa ereba an indi-n pidnak pem at arengge ereba na piril peral kagaij-o.

¹⁴ Iri kwarosolar-e, at arengge pidsa lak tak parik pem-e o iri na me nogoro nggok mbud yosolar-e, la iri na arengge abu lak woragaij-o.

¹⁵ Iri ala-ge, o iri na me nap misik ndegel ibij-o. Ndegel obosolat worasoma-ge, ap iri na owam nduguruwakluk, owam worasu sa wirik ibij-o.

¹⁶ Nde, la iri na-ge nere-nen wam mak tugwi mende ereba na norak perasola-t nde, ap misiget ter-o luk-nen na wok tigit lag-o.

¹⁷ Iri kwarosolat woralar-e, at indi yebet kasolar-e: ’An neid ndegel ubugwi nap oboksa-ge nunggwi mende kwarat inmbitsa nili-t nde, an-e yu me-nen nere-nen wat yekluk yusu-o.

¹⁸ An-e neid eram mbirimindik-nen at yak tosolar-e: Neid wa-e. Mbal Pem Nagawan min kat min kinmbiri bem-e meya yosolat woragi-o.

¹⁹ Iri bem-e, an-e kat kambara momtag-e meya-o. An neberasolar-e, kat ndegel koboso nap nggal-et nuburudtag-o” luk yak timin-o’ luk yebet kagaij-o.

²⁰ Iri yebet karuk, la na at eid eram mbirij-o. Mborosola-ge, eid na-nen erepma ereba-nen yik karug-e, abuwa kwarat karuk, puburak mborosolar-e, ambara na urusu ngonok turuk, wa yak tij-o.

²¹ Iri kwarosola, ambara na-nen yosolar-e: ’Neid wa-e. An-e Mbal Pem Nagawan imin na, kat kimin na meya kwarosolat woragi-o. Iri bem-e an-e kat kambara momtag-e meya-o’ luk yij-o.

²² Alat nde, eid na-nen at ndegel ubugwi nap yak ondosolar-e: ’Ndag-et nak! Sum konak lombok waruk lobok yuk, yirik uburuk, manggo inggi bem puruk, ijok sum yirik per-o.

²³ Iri rak purug-e, at imin totno nenalen pem nok-nen sapi wam usul na wil mbutluk, werer-o.

²⁴ An nambara yu-ge wat yidnag-et nde, uruk luk lobok yij-o. Pul agaij-et nde, nam yij-o’ luk yosoloma-ge, it na kijik kijak wiriga-o.

²⁵ Nde, ambara manggu iri na-ge yapmu-nen o ma panggosa wok yosolat-nen kolel kagaidnggal-e, ndawi nggu kulij-o.

²⁶ Kulurug-e, owe na-nen ndegel oboso nap misik wene mbo buruk-nen kin wok obosolar-e: ’Iri-ge ngge kwarogolat-nen yili-o?’ luk yij-o.

²⁷ Yosoloma-ge, ndegel oboso nap-nen yosolar-e: ’Kat kowot na urug-et lobok yidnak pem keid-nen sapi wam usul na wutluk, igijak wurusu-o’ luk yij-o.

²⁸ Yosoloma-ge, owe na isilepma kwarat luk, o ma nggurak larok yosola-ge, eid na warik, ’Ma nggwi-o’ luk emengen mbarij-o.

²⁹ Alat nde, owe na-nen eid na ene erep nggarosolar-e: ’Yu nde ki-o. An-e olengen lasolat mbosolat kat kwara ndegel kobosolat, kat-nen yidnak yidnak nak kwarosolat woragi-t nde, kar-e no wok nirigen-o? An nanggamirak inmin kijak wuruwaklug-e, kambing wam misiget ter-o luk wok niriget lak yigen-o.

³⁰ Alat nde, kat kambara iri-ge kisilobulo wok tigen na-ge kasa kasa ye unpugwi kwami wok ondosolar-e silobulo pidsa lak tak puruk, ma lobok yij-et nde, sapi wam usul iri wat tigen-o’ luk yij-o.

³¹ Yosoloma-ge, eid-nen at yak tosolar-e: ’Nambara-o. Kar-e an nimin pempa woraso me, an narengge iri oboksa kat karengge nak-nen yusu-o.

³² Alat nde, kat kowot iri-ge wat yidnag-et nde, uruk luk, pul yidnag-et nde, wok yid pem-e nit-nen ijok kerengge sakolat, kijik kijak worogolat yili yu-ge ob-et yili-o’ luk yak tij-o.”