LUKAS 10 - Nanduk Ngget Tul Pidnak Wene

Yesus-nen ap tujupulu lena wirik inpid wene 10:1-12

¹ Iri rak purug-e, Nagawan Indo-nen ap erep tujupulu lenak unpuruk, mberen lombok at waring kudtak o ereba na me at abuwok it nanduk wirik inpij-o.

² Wirik onposolat-nen it yak ondosolar-e: ”Ogore yidnag-e kwarat worala-t nde, ndagurak nab-e wanarak nag-o. Iri bem-e, at umburu ndagurak nap ereb-e eyapmu wirik inpil lobok yuwakluk yabu winde Nagawan Indo na emengen mbarurag-o.

³ Kir-e mberer-o. Ndakngge enggenggerak lomba wam marik wirik pugwi nggal wirik kunpusu-o.

⁴ Nde, mborogolar-e, kot manik min tu laro min kunuwok sum min waruk mbururak pug-o. Ap wa yak unduwokluk tundumu ndong yurak pug-o.

⁵ Nde, o misik nde ngguwoklug-e, nandug-e yu nggal yugub-o: ’Yamuksa woragwi indi-ge kit kinmin wolmag-o’ luk yurag-o.

⁶ Nde, o iri me-nen nde yamuksa wolmomtak inndi woragola-ge, yamuksa woragwi indi enpem pugup na-ge inmin-et wolma-o. Alat nde, yamuksa woragwi indi iri nggal lak nde ala-ge, yamuksa woragwi indi enpem pugup na tuguruk wanurag-o.

⁷ Kir-e nggugup sa iri me-t woragolar-e, yabu wanidnak nab-e onggo-ge wanugwi me, it-nen mak kunduwa nunggwi mende nonggolat, yi nonggolat irit wolmer-o. Nde, kit-nen o nin me nggwilik, o nin me nggwilik waring kudtak pug-o.

⁸ Nde, kir-e o siri mbi nggukmu nde kona-t wok konpogola-ge, it-nen mak kunduwa irit nonggolat,

⁹ o iri me woraidnak kugi worak nap ki rak onpogolat, o iri me woragwi nap yak ondogolar-e: ’Mbal Pem Nagawan-nen tenagaidnak wi-ge panggo yusu-o’ luk yurag-o.

¹⁰ Alat nde, kit o siri misik wok yukmu nde, wok kinpigit lak ala-ge, it enma na tula waring kagolat-nen yak ondogolar-e:

¹¹ ’Kit kinndi wanobokluk, kit kunuwi liri nunuwok pem lop nok yidnak yu-ge nir-e pil kali-t nde, Mbal Pem Nagawan-nen tenagaidnak wi-ge nit nendam panggo yij-o luk kenaru wolmer-o’ luk yak undugub-o.

¹² Wene yu yebet ker-o. Ap pidsa enpem wene mbarurak tarem-nen-e Mbal Pem Nagawan-nen o Sorom nap unpud kujwa-t nde, o wok kinpigit lak yuwa iri enpem-e mondok unpud kujwa bug-o” luk yak indij-o.

O siri inndi angin tubu yigit lak nap yak indid wene 10:13-16

¹³ Yuruk, Yesus-nen yosolar-e: ”O Korasin woragwi min Mbetsaira woragwi min wa-e. Kenpem mbuma mende bem kenabuwa-o! Kit kendam-nen kwiye worak mende kwarusu yeba nde o Tirus min Siron min kwatlep nggal-e, o iri me nap-nen-e obi-net it meya yidnak keya buruk kondok yogolar-e, sum meya yorogolat, entare bem mabe mbo bogolat kwatleb-o.

¹⁴ Ap pidsa enpem wene mbaruwa tarem-nen-e Mbal Pem Nagawan-nen Tirus woragwi min Siron woragwi min unpud kujwa-t nde, kit Korasin woragwi min Mbetsaira woragwi min kunpuj-e kujwa bug-o.

¹⁵ Nde, kit Kaperenaum nap wa-e. Kit-nen peragolar-e: ’Nir-e keksa teram lali-o’ luk perali-t nde, lag-o. Kir-e kan mare arem mbo kunpuwa-o” luk yak indij-o.

¹⁶ Yuruk, at-nen at owosirak yak ondosolar-e: ”Nde, ta-nen nde kit kenne kologola-ge, an nene-t kulili-o. Nde, ta-nen nde keya konpogola-ge, an-et keya nibili-o. Nde, ta-nen nde an keya nobogola-ge, an wirik nibil lobok yid nap iri na-t keya ibili-o” luk yak indij-o.

Ap tujupulu na tuguruk lobok yiga wene 10:17-20

¹⁷ Nde, at owosirak tujupulu wirik inpid na enalen min-et lobok yogolat-nen yak togolar-e: ”Nagawan Indo wa-e. Kat kunu bem wene yak ondogola, kugi tet nit-nen yidnak irit kwariga-o” luk yiga-o.

¹⁸ Yogolikma-ge, Yesus-nen it yak ondosolar-e: ”Sere-ge obinel yebek yidnak nggal mbal pem-nen mbuwasola, kagi-o.

¹⁹ Wene yu yebet ker-o. Nde, kir-e waro min kigaru min-et nde, kunuwok yemen kagolat, kit kunuwim nap enmawi lak tak pogola, it-nen andi bandi rak kinpigit lak momtak amawi-ge wok kundukmu-o.

²⁰ Irit nde, kugi-nen kit-nen yidnak yidnak kwaruwa iri bem nak kenalen kudtak pug-o. Are, ’Nit nunnu aid arem mbarak worasu-o’ luk-nen kenalen kagolat wolmer-o” luk yak indij-o.

Yesus na alen kagaid wene 10:21-24

²¹ Iri tarem na-net Konak Indi at ebem mbosola-ge, Yesus na alen kasolat-nen yosolar-e: ”Neid wa-e. Kar-e aid arem min nggweyak ma min tena woraso Nagawan Indo-nen yusu-o. Iri mende pidsa-ge enaru nap min inndi nggat nggat worak nap min enambigir-e lumurak posolat, it enaru buk nap enambigir-e nam tak pigen iri bem-e wa yak kurusu-o. Eyo, Neid wa-e. Kat kindi-n peraidnak ndak ndag-et kwarij-o.

²² An Neid-nen-e yi mende ndi mende pidsa an ninggem pid irir-o. Neid arig-et nak-nen Ambara an aru yusu-o. Nde, Ambara an-nen na irit, Ambara an-nen ’Neid iri enaru mag-o’ eberamin nap-nen na irit, Neid iri enaru yili-o” luk yij-o.

²³ Iri yurug-e, Yesus na nden karuk, at owosirak na enarikmu-nen yak ondosolar-e: ”Kir-e yawo kali yu kenlengen kaidnak pem-e konak lombog-o.

²⁴ An-e yak kundusu yur-o. Mbal Pem Nagawan ene lomboksa yugwi nap kwarat min nagawan nagawan min-e kit yawo kali yu kudtag-e inndingen yiga-t nde, kagit lak yiga-o. Kit keneyanggo-nen kulili wene kulurag-e inndingen yiga-t nde, kuligit yak yiga-o” luk yak indij-o.

O Samaria nap indi konak iri ebem nden karuk yid wene 10:25-37

²⁵ Iri lug-e, imiri mbarak pidnak wene mul ondoso nap misik lobok yarik, Yesus indi nggarosolat-nen yosolar-e: ”Mul Ondoso Nap wa-e. An-e nurug-et woralik nalik momtak elem waneyek-nen no kwarimin-o?” luk yij-o.

²⁶ Yosoloma-ge, Yesus-nen at yak tosolar-e: ”Imiri mbarak pidnak wene engga arem-e no mbarak worasu-o? Nde, iri me-nen-e kar-e no mbarak kaso-o?” luk yij-o.

²⁷ Yosoloma-ge, ap iri-nen yosolar-e: ” ’Nagawan Indo Kenmbal Pem Nagawan iri abuwa kagolar-e, kinndi oboksa min kenpe oboksa min kenmawi oboksa min kinndi nggat nggat oboksa min-net at abuwa kagolat wolmer-o’ lug-e, ’Kat kambik kabuwa kasu nggal-et kimin woragwi nap enabuwa ki-o’ yidnak nde kaso-o” luk yij-o.

²⁸ Yosoloma-ge, Yesus-nen at yak togolar-e: ”E! Yigen iri-ge ndemerer-o. Yigen iri ndak ndag-et kwarosola-ge, kurug-et woragun-o” luk yij-o.

²⁹ Alat nde, mul ondoso nap iri na-nen mot mot kwaroso nap kwat yosolar-e: ”Nde, an nimin woragwi nab-e tarag-o?” luk kin wok ibij-o.

³⁰ Kin wok obosoloma-ge, Yesus-nen wene erep nggarosolar-e: ”Ap misig-e Yerusalem-nen Yeriko mbosoma-ge, yariya wanugwi nap-nen at tenaguruk, aringgi arengge na pidsa wanogolat, ebe na wosa keya buruk, tulabiyem iri me abu komo wat yekluk yosola, keya buruk mbiriga-o.

³¹ Iri rak pikma worasoma-ge, tepan ombo misig-e tula iri nggwe mbosolar-e, ap na karug-et nde, wot karuk mbirij-o.

³² Iri nggal-et Lewi nap misik mbosolar-e, ap na karug-et nde, wot eyaruk nok nok mbirij-o.

³³ Alat nde, o Samaria nap misig-e tu iri nggwe mbidnggal-e, ap na karug-e, abuwa kwarat kagaij-o.

³⁴ Karug-e, at eram mberarik, amburu min anggut engen amburu min-nen ud ereba na masa keya buruk, ud na nggitlik pij-o. Nggitlik purug-e, at owam kelerai wam ombolwak pem ap na purug-e, ap ngguru lobok luk, nene yugwi sa pil mbutluk, yongga worosolat woragaij-o.

³⁵ Nene luk, kub-e at orol mberen wanuruk, o iri na winde wok tosolat-nen yak tosolar-e: ’Ap yu-ge yongga worosolat wolmin-o. Nde, at yongga wururak pem uwang pugun iri-ge an tuguruk lobok yosolar-e, uwi yagimin-o’ luk yak tij-o” luk Yesus-nen yij-o.

³⁶ Iri yurug-e, Yesus-nen yosolar-e: ”Kat kindi arem-nen-e ap kenan ereya ennggendumu-nen-e yariya wanugwi nap-nen wiriga nap imin woraso nab-e ta nde perasu-o?” luk yij-o.

³⁷ Yosoloma-ge, imiri mbarak pidnak wene mul ondoso nap-nen yosolar-e: ”At abuwa kagaid nap irir-o” luk yosoloma-ge, Yesus-nen at yak tosolar-e: ”Iri ala-ge, at-nen kwarid iri nggal-et kat-nen na mburugundik, iri nggal-et kwari-o” luk yak tij-o.

Yesus na Maria min Marata min iniyil mbiridnak wene 10:38-42

³⁸ Nde, Yesus owosirak inmin mborogolar-e, o misik mu wok yij-o. O iri me-nen-e kwe mbi unu-ge Marata-nen at ama ngguwakluk Yesus yonggo ibij-o.

³⁹ Kwe na owot unu-ge Maria. Nde, Maria iri-ge Nagawan Indo eram kore luk, at-nen mul undusu wene iri na kolak woragaij-o.

⁴⁰ Alat nde, Marata na-ge it enmanggim kwarurak yabu kwarat ala karuk, Yesus eram mberarik-nen yosolar-e: ”Nagawan Indo wa-e. Maria na-ge an narig-et nak yabu wanuwakluk keya nuburag-e ob-a? An yongga nuruwak-nen yak ti-o” luk yij-o.

⁴¹ Yosoloma-ge, Nagawan Indo-nen kwe na yak tosolar-e: ”Marata wa-e. Marata wa-e. Kar-e yabu kwarat iri-nen ndowaga kar-e kindi kabak yosolat, kumud kasu-t nde,

⁴² nanduk tak purak mende-ge misiget nak worasu-o. Nde, Maria-nen-e konak kwarurak mende mbenasa wanid iri-ge tuguruk at inggem-nen wanurak puk irit wanij-o” luk yij-o.