TEPAN OMBO-NEN KWARURAK WENE 23 - Nanduk Ngget Tul Pidnak Wene

Isarael nap-nen Nagawan Indo kek tak pogolat sakwi wene 23:1-4

¹ Nagawan Indo-nen Musa yak tosolar-e:

² ”Kit Isareal nap-nen an kek tak nobogolat-nen sakwi tarem-e yu nggal kwarurag-o.

³ Enam tarem-e kit keneyabu wanurag-o. Alat nde, tuju bem tak pogolar-e, we woragwi tarem iri-ge Nagawan Indo amanggim lenak pidnak tarem, we wolmomtak tarem-nen yusu-o. Nde, iri tarem-e kit ndok wutluk an nak nerembel wanogolar-e, yabu-ge mondok wanurak pug-o.

⁴ Nde, Nagawan Indo-nen sagurak tarem yeba na wat tak pidnak tarem-e ap oboksa yak undurag-o.

O Wot Kaidnak Tarem sakolat, Oroti Lomboroso Mende Pigit Lak Worakwi Tarem sakolat yurak 23:5-14

⁵ Nde, Nagawan Indo kek tak pogolat O Wot Kaidnak Tarem sakolar-e, waneya anggul-et tanggal empat belas iri bem-e mo wusa mbosola, keyama-nen sagurag-o.

⁶ Nde, iri luk kup tanggal lima belas pem-e Oroti Lomboroso Mende Pigit Lak Worakwi Tarem yebet kudtag-o. Nde, iri kwarogolat tuju bem woragolar-e, oroti lomboroso mende pidnak oroti-ge mondok norak pug-o.

^7-8 Tuju tarem ereya woragolar-e, mondok nunggwi mende-ge Nagawan Indo amanggim pogolat wolmomtag-o. Iri kwarogolat mondog-et tel kurugup tarem min worok tak pogolat tuju iri tarem min-e kit oboksa ndok wutluk Nagawan Indo kek tak purag-o. Iri tarem-e mondok kit-nen wanugwi yabu-ge wanurak pug-o.

^9-10 Kit nde konnggweyak Nagawan Indo-nen wok kindidnak wi iri na me wokluk woragolar-e, kit keneyapmu yagidnak mende mbara ndok wutluk, nggandum mbato nandug-et mbara ut kamasa pugup ereba-ge mondok tepan ombo wok til mbururag-o.

¹¹ We woragwi tarem iri na woraruk kub-e Nagawan Indo alen kenpem puwaklug-e, mbato ut kamasa pidnak ereba-ge tepan ombo-nen-e Nagawan Indo imbiri bem nuk kagolat at amanggim purag-o.

¹² Nggandum mbato ereba Nagawan Indo amanggim pogolar-e, at amanggim wosa kan purak lomba amarik ebem kopkap lak kusi olengen misik woraidnak misik min-et purag-o.

¹³ Nggandum mbato yigirik mabe nggal angin-e dua kilo nggal iri min-et purag-o. Nde, iri mende wok tugup iri na emben-nen Nagawan Indo indi alen tak puwa-o. Nde, anggut engen amburu kenanggo embe marik misik (satu liter) min-et purag-o.

¹⁴ Nde, Nagawan Indo amanggim pigit lak ma-ge nggandum mbato ki ala na, kan pem woraidnak ala na, kan pem woraga oroti rak pidnak ala na, mariget tet mondok norak pug-o. Kwarurak mururak ereba-ge kit-nen wigarak oboksa-nen na mondok pem irit tena wolmomtag-o.

Yagidnak Mende Anggul Mbarogolat Sakwi Tarem 23:15-22

¹⁵ We woragwi tarem kit-nen nggandum mbato nandug-et ut kamasa pidnak Nagawan Indo amanggim purug-e, tuju minggu woragolat-nen nene yugwi wonarurag-o.

¹⁶ Wonaril wonaril lima pulu bem-e we woragwi tarem enam pem woraruk, tuju bem tak pogolat we woragolar-e, nggandum mbato ngget imbirik mbarak iri-ge Nagawan Indo amanggim mondok pugup na-e.

¹⁷ Nde, ap o misik woragwi lombok oboksa-nen oroti wora mberen lombok Nagawan Indo imbiri bem nuk kagolat, amanggim purag-o. Nde, oroti iri konogolar-e, mbato mondok konak yigirik angin-e dua kilo nggal waga oroti lomboroso mende min oroti woraidnak iri pogolar-e, keneyapmu-nen yagidnak anggul-et mbara pidnak irit amanggim purag-o.

¹⁸ Nde, Isarael nap-nen oroti Mbal Pem Nagawan amanggim pogolar-e, mondok ebem kopkap lak lomba wam olengen misik woraidnak tuju min sapi kusi misik min kambing mberen min Nagawan Indo amanggim wosa kan purag-o. Iri yogolar-e, nggandum mbato mbarak min anggut engen amburu min-et purag-o. Nde, amanggim pidnak mende emben iri bem-e Nagawan Indo alen kujwa-o.

¹⁹ Iri yogolar-e, kambing kusi misig-e meya yidnak lak tak purak pem wosa pogolat, lomba kusi olengen misiget woraidnak mberen-e Nagawan Indo imin kundurak pem wururag-o.

²⁰ Oroti min lomba marik mberen ereya na min-e it tepan ombo enmanggim it tepan ombo-nen-e Nagawan Indo imbiri bem nuk kagolat, at amanggim purag-o. Nde, Nagawan Indo amanggim pidnak mende ereba-ge mondok lenak Nagawan Indo arengge-net yusu-o.

²¹ Nde, iri tarem-e yabu angin worag-e mondok wanurak pug-o. Are, an nerembel wanurak pem nak ndok wururag-o. Kit-nen kwarogolat wolmomtak kenpem pidnak ereba-ge kit-nen wigarak-nen-e it wolma sa ereba woragolar-e, mondok pem irit tena wolmomtag-o.

²² Kit-nen keneyapmu yagidnak mende mbarogolar-e, inggi inggi-ge mbarurak pug-o. Mbarogolat minggirik pidnak ereba na tuguruk mbaril mbururak pug-o. Ereba-ge enarengge lak nap min ap sal min enmanggim keya burag-o. Nagawan Indo iri-ge Kenmbal Pem Nagawan-nen yusu-o.

Olengen ki misik arem nggogolat-nen sakwi wene 23:23-25

^23-24 Waneya enam woraruk, tuju bem tak pogolat tanggal satu bem-e we wolmomtak tarem yebet kagolat sagurag-o. Iri tarem yenggerak purak pem-e poba ene yil lobok yogolar-e, kir-e an nak kek tak nuburak pem ndok wururag-o.

²⁵ Iri tarem-e nunggwi mende Nagawan Indo amanggim purag-o. Yabu nggog-e mondok wanurak pug-o.

Meya Yidnak Lak tak Poso Tarem 23:26-32

^26-27 Nde, waneya enam woraruk, tuju bem tak pogolat tanggal sepulu iri bem-e olengen ndak wosa Isarael nap oboksa Meya Yidnak Lak tak Purak Tarem yebet kagolat wolmomtag-o. Iri tarem-e nunggwi mende mondok ninggit lak woragolar-e, an nerembel wanurak pem ndok worogolat, nunggwi mende Nagawan Indo amanggim purag-o.

²⁸ Nde, iri tarem-e kit meya yidnak lak tak purak tarem me, kir-e kondomok keneyabu-ge Wanurak pug-o.

²⁹ Ta-nen nde iri tarem nunggwi mende mbi nujwa ala-ge, Nagawan Indo elem nab-e wolma bug-o.

³⁰ Ta-nen nde iri tarem yabu wanosola-ge, Nagawan Indo at ondomok-net onggo ebem posolar-e, mondok abu wuruwa-o.

³¹ Yabu wanigit lak we wolmomtak iri-ge kit-nen wigarak-nen na it wolma sa ereba woragolar-e, mondok irit kwat tenak wolmomtag-o.

³² Nde, iri kwarogolar-e, waneya iri arem-et tanggal sembilan keyama mo wusa nggosola-nen tel kutluk, tanggal sepulu keyama mo wusa ngguwa kuri iri woragolar-e, we woragwi tarem yebet kagwi nggal mondok we kenpabok kwarogolat, nunggwi mende ninggit lak kubu misik lengge misik aptusa we wolmomtag-o.

O Lije Engga Kerengga Wi Wutluk Sakwi Tarem 23:33-44

^33-34 O Lije Engga Kerengga Wi Wutluk Sakwi Tarem-e waneya enam woraruk, tuju bem tanggal lima belas iri bem tel kutluk, tuju bem yebet kagolat wolmomtag-o.

^35-36 Nde, tuju bem ereya woragolar-e, nunggwi mende-ge tuju bem-et Nagawan Indo amanggim pogolat wolmomtag-o. Nde, mondog-et tel kurugup tarem min tuju bem woraruk, delapan pem tak pogolat min-e Nagawan Indo kek tak purak pem ndok wutlug-e, nunggwi mende Mbal Pem Nagawan amanggim purag-o. Nde, iri tarem-e yabu nggog-e wanurak pug-o.

³⁷ Ereba-ge kit tena woragwi wene iri na yebet kagolat-nen kwat tenak wolmomtak, Nagawan Indo-nen watsa puruk oboksa Isarael nap yak undurag-o. Nde, yebet kagwi tarem ereba yebet kagolar-e, Nagawan Indo kek tak purak pem ndok worogolar-e, Nagawan Indo erembel wanogolat, at amanggim pogolar-e, nunggwi mende pogolat, kan pugwi mende pogolat, nggandum mbato mbara pogolat, wosa pugwi mende pogolat, anggut engen amburu pogolat, iri nggal kwarogolar-e, pempa pogolat wolmomtak amanggim min-et purag-o.

³⁸ Nde, yebet kagwi tarem erep ereba-ge we woragwi tarem yebet kali ereba na eralu nambena yebet kudtak pidnag-o. Iri ala, at amanggim pugwi mende ereba-ge kit-nen pem wok tugwi ereba na nambena pogolat, kit-nen ’Irit kwarimin-o’ luk owak mbaridnak pem pugwi ereba na eralu nambena pogolat, we-t kenalen min pogolat iri-ge Nagawan Indo wok togolat purag-o.

³⁹ Kit-nen yagidnak mende anggul mbatlug-e, tanggal lima belas waneya tuju na bem-e O Lije Engga Kerengga Wi Wutluk Sakwi Tarem yebet kagolar-e, tuju bem wolmomtag-o. Tel kurugup tarem min worok tak pogolat delapan pem min-e we mondok kenpabok nak kwarogolat wolmomtag-o.

⁴⁰ Nde, mondog-et tel kurugwi tarem-e keneyapmu yagidnak engen mondok konak nak mbatluk, e palma mbari nggal umbuwak min e engga miri kwarat inggi kalak min wanuruk, Nagawan Indo Kenmbal Pem Nagawan kek tak pogolat, yebet kagolar-e, kenalin kenalen woragolar-e,

⁴¹ tuju tarem wolmomtag-o. Kit-nen wigarak-nen na iri kwarugwi iri-ge pem irit kwat tenak wolmomtag-o.

⁴² Nde, Isarael nap oboksa-nen engga kerengga wiridnak o lije arem woragolar-e, tuju tarem wolmomtag-o.

⁴³ Nde, iri kwarugup iri-ge kit-nen wigarak-nen peragolar-e: ”E! O Mesira-nen Nagawan Indo-nen Isarael nap inmin lobok yosolar-e, ir-e o lije nggaribari yeba nggal arem wolmer-o yak endamu kagi” luk yuwakluk wururag-o. Ar-e Nagawan Indo Kenmbal Pem Nagawan-nen yusu-o.

⁴⁴ Nde, Nagawan Indo kek tak pogolat sakwi tarem ereba na sakolat-nen kwarurak wene-ge Musa-nen iri nggal kwasa yak indij-o.