TEPAN OMBO-NEN KWARURAK WENE 19 - Nanduk Ngget Tul Pidnak Wene

Imiri mbarak pidnak wene bem woragolat marak, mot mot nak kwarogolat wolmomtak wene 19:1-37

^1-2 Nde, Musa-nen wene yu Isarael nap yak unduwakluk, Nagawan Indo-nen Musa yak tosolar-e: ”Nagawan Indo kit Kenmbal Pem Nagawan an-e marak nak woraso me, kit-nen na mondok marak irit wolmomtag-o.

³ Kit kenambiktak-nen kineid kiniya-nen yidnak yidnag-et kwarogolat wolmomtag-o. An-nen yidnak ndak ndag-et we woragi tarem (Sabat) irit yebet kagolat wolmer-o. An-e Nagawan Indo Kenmbal Pem Nagawan-nen yusu-o.

⁴ Kugwiwak erembel wanurak pug-o. Posid pem misik ndak wosa keya buruk, erembel wanurak pug-o. An-e Nagawan Indo Kenmbal Pem Nagawan-nen yusu-o.

⁵ Kit-nen nde Nagawan Indo imin kundurak pem wam wosa kan pogolar-e, an-nen wanuwaklug-e an-nen kwarurak mururak mirik kinpigi ereba ndak ndag-et kwarurag-o.

⁶ Wam iri mbarak nonggolar-e, wiridnak tarem min kup min nak norag-o. Nde, mbarak woralat mberen nene yidnak ala-ge, mondok kan purag-o.

⁷ Kit nde mbarak woralat mberen nene yidnak irit nde nonggola-ge, an namanggim wosa kan pugup iri-ge mondok yik tet kamin pug-o.

⁸ Ta-nen nde wam mbarak mberen nene yidnak iri nasola-ge, an namanggim pidnak iri na te rak posola me, ap iri-ge mondok an nelem nab-e wolma bug-o.

⁹ Kit nde kenmbato mbarogolar-e, inggi inggi-ge mondok mbarurak pug-o. Iri mbarogolat kapsa mbidnak ereba na-ge tuguruk ndok wiril mbururak pug-o.

¹⁰ Kit-nen kenengen anggut anggul mbatlug-e, tuguruk erep keya bidnak ereba na ndok wiril mbururak pug-o. Iri-nen engen lera mbidnak min mondok wanurak pug-o. Are, ap sal min ap enarengge lak nap min enmanggim keya burag-o. An-e Nagawan Indo Kenmbal Pem Nagawan-nen yusu-o.

¹¹ Yariya wanurak pug-o. Ap enmberam ludtak pug-o. Kenesiget wene na yurak pug-o.

¹² Kwarigit lak yurak peragolar-et nde, ’Iri kwarimin-o’ luk an nunu bem owak mbatluk, urul purak pug-o. Iri nde yugup ala-ge, an nunu mbilaro ngin tak pugub-o. An-e Nagawan Indo kit Kenmbal Pem Nagawan-nen yusu-o.

¹³ Kir-e kennggamirak enarengge ondoro rak pogolat, enarengge mengga wanogolat kwarurak pug-o. Ap-nen onggo wok undurak pem yabu wanidnag-e onggo wok indigit lag-et mondok nene yurak pug-o.

¹⁴ Kir-e ap eneyanggo lak imbiri lamut tak unpurak pug-o. Ap enlengen lak enabuwok unuwok abis wudsa mberak unpurak kerep purak pug-o. An-e Nagawan Indo Kenmbal Pem Nagawan-et me, an kek tak nobogolat, naye worak wolmer-o.

¹⁵ Kit-nen ap enpem wene mbarogolar-e, ap enarengge lak nap enambigit na yurak puk. Ap kek tak na enaye yurak puk. Are, mot mor-et ap enpem wene mbarurag-o.

¹⁶ Kit kenlem nap ennggendumu kennggamirak onpok pil waring kudtak pug-o. Nde, kit-nen yidnak-nen ndowaga kenggam na wat ma naru, at ebem-e wene-ge ludtak nak yurag-o. An-e Nagawan Indo-nen yusu-o.

¹⁷ Kit-nen-e kit kwat kinpidnak onggo purak pug-o. Are, kir-e nin nap enpem-nen meya yugup naru, kit-nen kuri worak woragwi-ge mondok lak tak puruk wolmomtag-o.

¹⁸ Kit kwat kinpidnak pem onggo purak pug-o. Kinsilepma na ap enpem purak pug-o. Kit kondomok kenabuwa kali nggal kit na kit-net nabuwa kabuwa wolmer-o. An-e Nagawan Indo-nen yusu-o.

¹⁹ An-nen ’Iri kwarurag-o’ yak kindidnak nak kwarogolat wolmer-o. Wam unu misik mende-nen wam unu misik mende iye nujwakluk eram purak pug-o. Yakwi mende engen-e unu ariktag-et nde, ondoro misik me lambuksa yagurak pug-o. Nde, sum-e kere unu ariktak pem-nen yagidnag-e mondok yururak pug-o.

²⁰ Ap misik-nen nde at ndegel oboso kwe iri na ap misik ndegel ubuwakluk wok turak wene mbaruwarik-net nde, onggo purak yidnak nap iri na-nen nde onggo wok tigit lak ala karuk, nanduk imin woraso nap iri na-nen nde imin nene yidnak ala-ge, kwe iri-ge ap iri na ndegel oboso kwe-t worasu me, mondok undurak pug-o. Are, angin worak nak enpem purag-o.

²¹ Ap iri na-ge at meya yidnak uwi yagosolar-e, lomba kusi misik an nuwi tumende bem waruk lobok yurag-o.

²² Waruk lobok yosola-ge, tepan ombo-nen-e ap iri na meya yidnak lak tak puwakluk kwarugwi mende kwarosolat wam iri na wosa kan purag-o. Iri yosola-ge, Mbal Pem Nagawan an-nen at meya yidnag-e namberam tak pimin-o.

²³ Kit o Kanaan wi nggugupndik woragolar-e, e uwi kere uwi nin tak nan tak yakupndig-e, olengen kenan arem woragolar-e, e ereba na engen yidnag-e kit norag-e mondok abu wosama-o.

²⁴ Nde, olengen kweyap mendak pem tak pogolat-nen e ereba na engen yuwa-ge oboksa wa yak norogolat, Nagawan Indo an namanggim-et purag-o.

²⁵ Alat nde, olengen lima rak pogolat iri arem-nen yuwa engen ereba perak kit norag-e ob-o. Kit-nen nde kwarurak mururak ereba kwarogola-ge, e ereba engen-e mondok terak menna puwa-o. An-e Nagawan Indo Kenmbal Pem Nagawan-nen yusu-o.

²⁶ Kir-e eyabi min-e norak pug-o. Kugwi amawi bem yi kwatlik ndi kwatlik kwarurak pug-o.

²⁷ Kenanggulsu na keneyanggo ambigit ponok ponok mbarurak pug-o. Kondoksu na mbarurak pug-o.

²⁸ Yenggerak purak mende kenaboro bem mbarogolat, kenaboro kumururak pug-o. Ap wat yosoma ala, kininggi mbarurak pug-o. An-e Nagawan Indo-nen yusu-o.

²⁹ Kit kinligwami unnu mbilaro ngin tak pogolat, onggo wanurak pem kweyap terak inmin nene yugwi sa inpil nggurak pug-o. Iri nggal kwarogolar-e, kunuwi nggweyak emben to rak pili-o. Nde, lugudtak kwarugwi mende-ge kit woragwi sa tabuk ma-o.

³⁰ We woragwi tarem nggok tak pogolat, an nerembel wanurak sa na nggok tak purag-o. An-e Nagawan Indo-nen yusu-o.

³¹ Kir-e ap wat yidnak enngena min wene mbarugwi nap endam wene kin wil mbururak pug-o. Kit-nen nde iri kwarogolar-e, kir-e mbilaro ngin mende kwat yugub-o. An-e Nagawan Indo Kenmbal Pem Nagawan-nen yusu-o.

³² Kir-e ap indi worak endam tebe luk, it-nen yidnak yidnag-et kwarogolat wolmer-o. Kenmbal Pem Nagawan an naye worak wolmer-o. An-e Nagawan Indo-nen yusu-o.

³³ Nde, kir-e ap sal kit kennggendumu worali nab-e lel unpurak pug-o.

³⁴ Alat nde, kit-nen kit nap kwat unpugwi nggal kwat onpogolat, kit-nen kondomok kenabuwa yili nggal-et enabuwa kagolat yer-o. Kit na ap sal Mesira iri me woraigep iri na kinndi yebet ker-o. An-e Nagawan Indo Kenmbal Pem Nagawan-nen yusu-o.

³⁵ Kir-e ap erep enmberam lagolat, mot ndak wurugwi mende min angin ndak wurugwi mende min irit ndara yasa wok undugwi mende bem min-e ap enmberam ludtak pug-o.

³⁶ Ndemeret mot ndak wurugwi mende iri na bem ndak ndag-et ndak worogolat, angin na ndak ndag-et ndak worogolat, irit ndara yasa wok undugwi mende na ndak ndag-et yasa wok ondogolat kwarurag-o. An-e Kenmbal Pem Nagawan Mesira-nen lesa wok kunpuruk lobok yigi Nagawan Indo-nen yusu-o.

³⁷ An-nen ’Iri kwarurag-o’ luk watsa kenpem pigi oboksa ndak ndag-et kwarogolat wolmer-o. An-e Nagawan Indo-nen yusu-o” yij-o.