TEPAN OMBO-NEN KWARURAK WENE 16 - Nanduk Ngget Tul Pidnak Wene

It meya yidnak korak poso tarem sakwi wene 16:1-19

¹ Arun ilirak-nen Mbal Pem Nagawan indi-n peragit lak kanduk at amanggim pukmu, wat yiga ombol nggwe-ge Nagawan Indo-nen Musa yak tosolat-nen yosolar-e:

² ”Wene yu kowe Arun iri yak ti-o. At nde o sum-nen kuri worak mondok marak iri me nggosolar-e, ’Iri tarem nggurag-o’ luk ludtak pidnak tarem nak nggurag-o. Nde, iri me-ge an-e urul pidnak labu mbarak iri na usurup pem nggan nggan arem-nen nam yoso sa-nen yusu-o. Arun-nen nde wene yu kwid tosolar-e, mondok abu wat ma-o.

³ Iri me nggurag-e, sapi wam kusi marik misik ebem kop kap lag-e meya yidnak lak tak purak pem Mbal Pem Nagawan amanggim wosa posoluk, lomba kusi misik wosa kan posolat tarem nak-nen o mondok marak iri me-ge nggurag-o” yij-o.

⁴ Nggosolar-e, kwarurak mururak yeba-ge mondok kwara kwarurag-o. At nde o mondok marak kuri worak ponok iri na me nggweyekluk yosolar-e, aboro matluk, tepan ombo-nen yurugwi sum yorosolar-e, abare sum min inggiri sum poro min tani are min anggul mbid min linen sum-nen konidnak iri oboksa yutluk-net nggurag-o.

⁵ Nggosola-ge, meya yidnak korak purak pem wosa puwakluk kambing kusi mberen min lomba kusi misig-e wosa kan purak min-e Isarael nap-nen-e Arun eram purag-o.

⁶ At Arun ondomok-nen na, at ondomok ogwela inmin enmanggim na it meya yidnak lak tak purak sapi wam kusi misik wosa burag-o.

⁷ Nde, Arun-nen kambing kusi mberen Isarael nap-nen eram pidnak ereya na-ge mondok Nagawan Indo uwi tu mende bem waruk mbururag-o.

⁸ Iri lug-e, Arun-nen-e yenggerak purak pem kerep mberen wanuruk, nde, kerep misig-e ”Nagawan Indo amanggim purag-o” luk yenggerak purak ebem mbatluk, misig-e ”Asasel amanggim purag-o” luk yenggerak purak ebem mbatluk, iri nggal kwasa wam mberen ereya na lena labuk yosola-ge,

⁹ kambing misik Nagawan Indo amanggim lena labuk yidnak iri na-ge meya yidnak lak tak puwakluk wosa purag-o.

¹⁰ Nde, Asasel amanggim lena labuk yidnak iri na-ge Isarael nap meya yidnak lak tak puwakluk waruk lobok yuwarik, urug-et Nagawan Indo eram puruk, Asasel amanggim walma nggwe sera wirik purag-o.

¹¹ Nde, Arun nen at ondomok min ogwela inmin meya yidnak korak puwakluk sapi wam kusi wosa purug-e,

¹² Arun-e Mbal Pem Nagawan amanggim wam wosa pugwi sa-nen kan pugwi ondoro wanuruk, kan ngen yebetsa puruk, emben konak mende yigirik inggi mberen pem waga puruk, o mondok marak iri na me waruk mbururag o.

¹³ Mbutlug-e, emben konak mende iri na-ge Nagawan Indo-nen yidnak urul pidnak wene labu mbarak iri na erengen-nen karug-e, wat ma naru, kule-nen urul pidnak wene labu mbarak iri na usurup muruk tak puwakluk kan purag-o,

¹⁴ Iri rak puruk, Arun-nen sapi eyabi iri na marig-et inggi anggul pem-nen wanuruk, urul pidnak wene labu mbarak iri na usurup pem nggweyel karuk, urul pidnak wene labu mbarak at ambigit nam nggwe tuju bem nggweyel kudtag-o.

¹⁵ Iri rak purug-e, Arun-nen Isarael nap meya yidnak korak purak amanggim pidnak kambing iri na wutluk, eyabi-ge o mondok marak iri na me waruk ngguruk, yanem sapi eyabi kwaridnak iri na nggal-et kwasa urul pidnak labu mbarak usurup pem nggweyel karuk, urul pidnak wene labu mbarak at ambigit nam nggwe tuju bem nggweyel karuk, kwarurag-o.

¹⁶ Iri nggal kwarosolar-e, Mbal Pem Nagawan uwi na-ge Isarael nap-nen lugudtak kwarugwi mende min yi meya ndi meya kwarugwi oboksa min masa labuk ma-o. Nde, Nagawan Indo uwi na-ge Isarael nap unuwi enggendumu worasolat, it-nen lugudtak kwarugwi mende-nen Nagawan Indo uwi kimirik pidnak ala karuk, Nagawan Indo uwi-ge mondok marurag-o.

¹⁷ Nde, Nagawan Indo uwi iri na marurak yabu iri na waneyekluk, o mondok marak ma ngguwa kuri-nen woma kuri ereya-ge ap misiger-o luk Nagawan Indo ama iri me-ge mondok wolmomtak pug-o. Nde, yabu iri na wanosolug-e, Arun-e at ondomok ogwela inmin nde, Isarael nap oboksa meya yidnak marak purak yabu iri na wanurug-e,

¹⁸ mbepme wasolar-e, mondok. Mbal Pem Nagawan amanggim wam wosa kan pugwi sa iri mareyekluk mbururag-o, Nde, mborosolar-e, sapi eyabi min kambing eyabi min marig-et waruk mbutluk, iri na marosolat wam kan pugwi ondoro iri na unggut manda ambo nggwe eyabi-ge kilik purag-o.

¹⁹ Iri kwarosolar-e, eyabi marig-et inggi anggul pem wanuruk, Mbal Pem Nagawan amanggim wam wosa kan pugwi ondoro iri na bem eyabi-ge abam nggwe tuju bem nggweyel kudtag-o. Iri nggal kwarosolar-e, Isarael nap meya yidnak ereba-ge kora mbo buruk, Mbal Pem Nagawan amanggim wam wosa kan pugwi ondoro iri na-ge masa labuk ma-o.

Isarael nap meya yidnak ebem puruk, wirik purak kambing 16:20-28

²⁰ O mondok marak iri na min Nagawan Indo ama kuri worak ponok nggwe tepan ombo erep-nen nggugwi sa na min Mbal Pem Nagawan amanggim wam wosa kan pugwi ondoro min iri na masa keya burug-e, kambing wam uruk Asasel amanggim lenak pidnak iri na-ge Nagawan Indo arem kegera purag-o.

²¹ Iri rak purug-e, Arun-nen-e inggi mberensa-t wam iri na anggul bem puruk, Isarael nap-nen meya kwarugwi min lugudtak kwarugwi min it-nen wene kwid tugwi min oboksa para kambing iri na anggul pem yatku purug-e, wam iri sera wirik purak nap lenak iri na-nen-e ap lak ma ereba wirik purag-o.

²² Kambing iri na-nen Isarael nap meya yidnak pidsa waruk o ap woragwi buk sa mbutlug-e, kambing iri na-ge nembaga ereba-t keya burag-o.

²³ Iri rak puruk, Arun na-ge Nagawan Indo ama iri na me ngguruk, yanem o mondok marak iri na me nggosolat yutluk nggwidnak sum iri na-ge tuguruk yonggora Nagawan Indo uwi iri na me purag-o.

²⁴ Iri rak puruk, yi mondok at nak-nen marurak sa iri na me aboro matluk, pem yoroso at usum yururag-o. Iri rak puruk wasolar-e, at min Isarael nap min meya yidnak lak tak purak pem Mbal Pem Nagawan amanggim wam na kan purag-o.

²⁵ It meya yidnak lak tak purak pem wiridnak wam iri na omog-e Mbal Pem Nagawan amanggim wam wosa kan pugwi sa iri na me mondok kan purag-o.

²⁶ Nde, Asasel amanggim lenak pidnak kambing iri na ap lak ma wirik pid nap iri na-ge o ma lobok yigit lak ma-net mondok usum min ebe min matluk-net lobok yurag-o.

²⁷ Kambing min sapi min meya yidnak lak tak purak pem wutluk, eyabi meya yidnak lak tak puwakluk o mondok marak iri na me waruk nggwidnak ereya na-ge waruk mbepme o wiridnak ereba na ombol nggwe waruk mbutluk, mondok kan purag-o. Kan pogolar-e, aboro min uno min al min mondok oboksa kan purag-o.

²⁸ Nde, iri kan puwa nab-e ma mbirigit lak ma-net mondok usum min ebe min marurag-o.

Meya yidnak lak tak purak tarem yebet kagolat-nen kwarugwi wene 16:29-34

^29-31 Kwarurak mururak pidnak yeba-ge pem irit mondok kwat tenak wolmomtag-o. Waneya tuju bem tak pogolat tanggal sepulu iri bem-e kit Isarael nap min erem nin nap kennggendumu woragwi min mondok kininggi ambok kenemnde ambok irit wolmomtag-o. Nde, iri tarem-e Nagawan Indo amanggim mondok lenak pidnak tarem-nen yusu-o. Nde, iri tarem-e Isarael nap meya yidnak masa labuk makluk, it meya yidnak lak tak purak yabu nak wanurag-o.

³² Nde, Tepan Ombo Nggulok iri-ge eid wat yosola, ondolmasa Mbal Pem Nagawan amanggim nak lenak pidnak ambara na-nen-e meya yidnak marak purak yabu iri-ge at iri-net wanurag-o. Iri yosolar-e, tepan ombo-nen yurugwi sum yutluk,

³³ o mondok marak iri na me min Nagawan Indo ama kuri worak ponok nggwe tepan ombo erep-nen nggugwi sa min Mbal Pem Nagawan amanggim wam wosa pugwi ondoro min it tepan ombo min Isarael nap min oboksa mat momtak yabu wanurag-o.

³⁴ Nde, Isarael nap meya yidnak kora keya buwakluk wanurak yabu iri wanogolar-e, olengen ndak wosa misik arem-nen misik pem nak kwatluk, pempa kwat tenak wolmomtag-o. Yosoloma-ge, Musa-ge Nagawan Indo-nen yak tidnak ndak ndak nak irit kwarij-o.