KOLOSE 1 - Nanduk Ngget Tul Pidnak Wene

Wa yak indidnak wene 1:1-2

¹ Mbal Pem Nagawan indi-n pidnak pem Kerisut Yesus-nen wirik nibidnak nap an Paulus min nonowot Timotius min nit-nen

² Kolose woragwi nap, Kerisut ebem kinndi angin tubu yidnak marak woragwi nap kenmanggim engga yu mbatli-o. Nineid Mbal Pem Nagawan-nen we wok ondoso elem min lambuksa woragwi elem min kinmin wolmag-o.

Mbal Pem Nagawan erembel wanosolat tepan yidnak wene 1:3-14

³ Nir-e pempa kit kenmanggim tepan yogolar-e, nit Nenagawan Indo Yesus Kerisut Eid Mbal Pem Nagawan imin-e wa-o luk pempa yak tili-o.

⁴ Iri yili iri-ge, Kerisut Yesus ebem kit kinndi angin tubu yigep wene min marak nap oboksa enabuwa kali wene min kuluruk-nen yili-o.

⁵ Kit kenmanggim aid arem lid lud tak pidnak mende iri bem kinndi mbung mbung tak worasu-o. Nde, iri wene-ge kir-e nanduk-net ndemeret wene aid wene iri na bem-nen kuligeb-o.

⁶ Nde, kit kendam wok yid aid wene iri-ge iri nggal-et nggweyak ma yu me yi wi ndi wi wigak yosolar-e, ebe kwat yusu-o. Mbal Pem Nagawan-nen we wok ondoso elem obok na kulurug-e, ndemeret kenaru yigep kuri-nen yawo tarem-e kit kennggendumu-nen na irit aid wene wigak yusu-o.

⁷ Aid wene iri-ge nit nennggam abuwa worak, nit nenmanggim Kerisut eyabu-ge mot mot nak wanoso nap Epaparas-nen mirik kinpid nar-o.

⁸ Konak Indi bem-nen wok kindidnak ap enabuwa kagwi elem iri-ge at-nen yak nindij-o.

⁹ Iri bem-e kit konpok kulige kuri-nen yawo kuri-ge nir-e pempa kit kenmanggim tepan-e kundugu yili-o. Kit kenmanggim Mbal Pem Nagawan emengen mbarogolar-e: ”Kat kindi-n pidnak parosa enaru makluk, inndi tenggerak elem oboksa min ndemeret yebet kagwi elem min wok indi-o” luk emengen mbatli-o.

¹⁰ Iri rak konposola-ge, Nagawan Indo erengen pem kir-e ndak ndak yogolat, yi mende ndi mende bem at alen tak ubugub-o. Nde, kit-nen yi kwatlik ndi kwatlik kwarogolar-e, engen-e konak nak pogolat woragub-o. Nde, Mbal Pem Nagawan kenaru yogolat na, kwarat kenaru yuwa-o.

¹¹ Enpem mboso mende oboksa kenpem mbosola-ge, kinndi luruk puruk woragolat, kenalen min-et woraboklug-e, at amawi kwarat iri-nen kenmawi rak posola-ge, kit kenmawi yugub-o.

¹² Yaya nak woraso sa iri me marak nap inmin winde yobokluk ndak tak kinpidnak Nineid iri imin-e ”Wiwa-o” luk yak togolat wolmer-o.

¹³ At-nen-e ndamuk inggem-nen weserak nunpuruk, at Ambara abuwa worak-nen tenagaidnak wi ninpil lobok yij-o.

¹⁴ At Ambara ebem-nen nit nonnggo posolar-e, nit meya yidnak amberam tak pij-o.

Kerisut nak nggulog-o 1:15-23

¹⁵ Kerisut na-ge kagwi buk Mbal Pem Nagawan na abage-net yusu-o. Ndak worak pidnak tengge oboksa-ge teberak-nen yusu-o. Nde, at Ambara manggu iri perak nde mondok kek tak-nen yusu-o.

¹⁶ At ebem-nen Mbal Pem Nagawan-nen ndak worak posolar-e, mbal pem mende oboksa min nggweyak ma mende oboksa min kagwi mende min kagwi buk mende min nggweyak ma tenagaidnak wi nde pemerinta nde nagawan nagawan nde amawi worak ese mendak inpidnak nde oboksa ndak worak pij-o. Mbal Pem Nagawan-nen yi mende ndi mende oboksa ndak worak posolar-e, Kerisut ebem-nen at amanggim ndak worak pij-o.

¹⁷ Yi mende ndi mende ndak worak pigit lak ma-net ar-e worasor-o. Nde, yi mende ndi mende oboksa-ge at ebem-net worasu-o.

¹⁸ Nde, at ebe-ge lambuk tak inpidnak nap-nen yusu-o. Nde, enanggul-e at-net yusu-o. At ebe iri na elem-e at-net yusu-o. Nde, yi mende ndi mende bem at arig-et nak mondok kek tak wolmaklug-e, wat yidnak nap ennggendumu-nen tel korosolat uruk tak pid nab-e at-net yusu-o.

¹⁹ Nde, Mbal Pem Nagawan indi-n pidnak pem-e Mbal Pem Nagawan abage iminep mbarak iri-ge at Ambara arem worasu-o.

²⁰ Iri ala-ge, Mbal Pem Nagawan indi-nen yi mende ndi mende oboksa-ge at ondomok imin lambuk tak posolar-e, at Ambara na ebem-nen lambuk tak pij-o. At Ambara-ge e lang pang tak pem wat yid iri bem-et Mbal Pem Nagawan-nen lambuk tak posolar-e, nggweyak ma woraso mende oboksa nde mbal pem woraso mende oboksa nde at ondomok imin lambuk tak pij-o.

²¹ Nanduk kir-e Mbal Pem Nagawan imin nuruk tak woragolar-e, kit kinndi-n peragwi bem-nen na, kit meya yugwi bem-nen na, Mbal Pem Nagawan imin wim mbarak woraigeb-o.

²² Alat nde, yawo-ge Kerisut na ki nap enaboro worak luk wat yid na bem-e Mbal Pem Nagawan-nen at ondomok imin lambuk tak kinpij-o. Iri rak kinpid iri-ge kir-e marak nap, kenpem kopkap lak nap, meya kwarugwi buk nap tak kunpuruk, at eram kinpil lobok yekluk-nen iri kwarij-o.

²³ Nde, mbigija-ge kit-nen kinndi angin tubu yidnak pem mondok tugup lak woragolar-e, aid wene kuligep na bem kinndi mbung mbung tak woraidnak na amawisa-t wanogolat woragup na-e. Aid wene iri-ge nggweyak ma woragwi nap oboksa yak indidnak wene-nen yusu-o. Nde, Paulus an-e aid wene iri ndegel oboso nap-nen yusu-o.

Paulus-nen aid wene tomborosoma, anggun panggun ebem mbidnak wene 1:24–2:5

²⁴ Nde, yawo-ge an-e kit kenmanggim yane wurusu me, an nalen kasu-o. Kerisut-e at ebe amanggim yane wiridnag-et nde, mariget awo yane wirigit lak iri-ge an nebe bem yane wurusu iri bem-nen iminep mbarak pimin-o. Kerisut ebe iri-ge lambuk tak inpidnak nap-nen yusu-o.

²⁵ Kit konak tak kunpurak pem Mbal Pem Nagawan-nen an nebem eyabu posolar-e, lambuk tak inpidnak nap ndegel onposo nap tak nibij-o. Nde, an neyabu-ge at-nen yidnak wene ndegera ap yak undurak iri-net yusu-o.

²⁶ Nde, at-nen idnak kura wene iri-ge obi-net ineid onmbo ereba-n waruk la nderak pem lud ereba woragolar-e, kura woragaij-et nde, yawo-nen-e nam tak paga at winde nap yak undusu-o.

²⁷ Mbal Pem Nagawan-nen ”Irit timin-o” luk yidnag-e yu nggal-o. At-nen idnak kura wene, kek tak pidnak wene iri-ge, ap enlem oboksa ennggendumu-nen nam tak purag-o luk yusu-o. Nde, kura wene iri-ge yu-o: Kerisut kit kenarem worala-ge, Mbal Pem Nagawan unu kek tak pidnak iri-ge totno-t wanul-o luk kinndi mbung mbung tak wolmomtag-o.

²⁸ Iri bem-e, Kerisut owene iri-ge nir-e ab-e ap oboksa yak indili-o. Nit ninndi mondok pindong tak pem-net ap oboksa nggomo indilik, mul indilik yogolar-e, it enarik tag-et Mbal Pem Nagawan eram inpil lobok yogola, Kerisut ebem iminep mbal yidnak nap makluk-nen yili-o.

²⁹ Iri kwat unpurak pem an-e namawi min-et yabu wok tenak woralar-e, Kerisut-nen wok niridnak amawi kwarat iri na bem-nen yabu wanusu-o.