WENE MBENARUGWI NAP-NEN KWARIDNAK WENE 9 - Nanduk Ngget Tul Pidnak Wene

Abimelek-nen kwaridnak wene 9:1-22

¹ Nde, misik tarem-e Nggireyon ambara Abimelek na-ge ija owe owot endam o Sikem mbirij-o. Mberarik it yak ondosolar-e:

² ”Sikem woragwi nap oboksa kin wok enper-o. Nggireyon ambararak tuju pulu (70) oboksa-nen nagawan nak wolmomtag-e op, lak? Are, misiget nak-nen nagawan wolmomtak ob-a?” yuruk, inndi yenggerak posolat-nen yosolar-e: ”An-e kit kenmbara-net yusu-o” luk yak indij-o.

³ Yosoloma, ija owe owot ereba na mborogolar-e, Abimelek-nen yak indid wene ereba-ge Sikem nap yak indiga-o. Iri yogola-ge, Sikem nap-nen-e: ”Abimelek iri-ge nit nenmbara-t me, nir-e Abimelek ene-t kulul-o” yiga-o.

⁴ Iri lug-e, kugwi Mbaal Mberit erembel wanugwi o iri na me-nen wanidnak perak tol tuju pulu (70) irit wok tiga-o. Wok tikma tol ereba na bem-nen-e o laga mbaga rak purak nap at imin makluk onggo wok indij-o.

⁵ Iri lug-e, eid woraso sa ama Opera mbirij-o. Mberarig-e, iri me-nen kerep misik pem-e owe owot Nggireyon ambararak ap enpe tuju pulu (70) ereba na-ge mondok oboksa indij-o. Alat nde Nggireyon ambara labo Yotam iri nak perak nde kwiye kurak yidnak me, wirigit lag-o.

⁶ Undurug-e, Sikem woragwi nap min Mbet-Milo woragwi nap min oboksa ndok wirigarig-e, aye kagwi e terepentin Sikem worasu iri na me mbirigarik, Abimelek na-ge it nagawan tak ibiga-o.

⁷ Iri rak pidnak wene iri na kulurug-e, Yotam na-ge Ndobo Nggerisim anggul pem lagarik, mendak woralar-e, ap ereba na enambigit nggwe ene mbo bil mborosolat-nen yosolar-e: ”Sikem nap wa-e. Mbal Pem Nagawan-nen kit kenne kuluwaklug-e, an-nen yimin wene yu kwara koler-o!

⁸ Misik tarem-e yi e ndi e oboksa ndok wirigarik it ennggendumu nagawan wolmomtak mendak purak ndok wirigarig-e, it-nen e saitun yak togolar-e: ’Kar-e nit nennggendumu nagawan men min-o’ yak tiga-o.

⁹ Iri yogola, e saitun iri na-nen onggo yosolar-e: ’An nde kit kennggendumu nagawan yosolar-e, an nengen amburu bem kugwiwak kek tak pogolat, ap enpem kilik pogolat kwarugwi iri na keya burak iri-ge nimbir-o’ luk yij-o.

¹⁰ Yosoloma, e erep ereba na-nen e ara yak togolar-e: ’Iri ala-ge, nit nennggendumu nagawan-e kar-et men min-o’ yak tiga-o.

¹¹ Alat nde, at-nen onggo yosolar-e: ’An kit kennggendumu men yosolat an nengen undu konak poso iri na keya burag-e nimbir-o’ luk yij-o.

¹² Iri yosola karuk, e oboksa-nen anggut ari yak togolar-e: ’Nit nennggendumu nagawan-e kar-e kwat min-o’ yak tiga-o.

¹³ Alat nde, anggut ari iri na-nen onggo yosolar-e: ’Kit kennggendumu nagawan kwat momtak iri bem nak an nengen kugwiwak min ap min inndi alen tak poso iri keya burak nimbir-o!’ luk yij-o.

¹⁴ Larok nak yogola karug-e, e isile worak iri na yak togolar-e: ’Kar-et nit nennggendumu nagawan kwat min-o’ yak togola-ge,

¹⁵ e isile worak iri na-nen onggo yosolar-e: ’Kit-nen nde ndemeret an-net kit kennggendumu nagawan tak nubugup ala-ge, kit oboksa lobok yogolat, an nindipma nak nggwer-o. Nde, kit-nen an nindipma nggurak kinsili ala-ge, an nondogal pem nisile yeba arem-nen kanduk wasolar-e, e aras Libanon woraso yeba-ge oboksa kan nujwa-o” luk yij-o.

¹⁶ Wene iri na yosoluk yarik, Yotam-nen wene erep min-et yosolar-e: ”Abimelek nagawan tak obogolar-e, mondok kinndi mbektak pem-et konag-et kwarigeb-a? Kit-nen iri kwarigep iri-ge an neid Nggireyon min at elem nap min-e konag-et kwat inpigep, lak? An neid-nen konak kwat konposolat kwiye worak kwarid ereba na-ge onggo-ge kwat ibigep, lak?

¹⁷ Kinndi yebet ker-o. Mirian nap ininggiyapma-nen wisirik konposolar-e, ar-e mondok iminep wisirik puruk amawi kondosolat woragid iri nar-o.

¹⁸ Alat nde, kir-e nden karuk an neid ama woragwi nap inmin eyak worogolar-e, ambararag-e misik tarem-et enpe tuju pulu (70) ondoro kerep misiget iri na bem nak indigeb-o. Nde, Abimelek iri-ge an neid ambara-t nde, ndegel oboso kwe-nen nderak yu na-t nde, kit-nen-e kenmbara kenenggetma iri bem nak-nen Sikem nagawan tak ibigeb-o.

¹⁹ Kit yawo kwatli yu nde kinndi mbektak pem-et konag-et an neid min at ama woragwi nap min kwat onpogolat nggal-nen-e ob-et nde, kenalen-e Abimelek ebem pogolat, at-nen na alen-e kit kenpem posolat kwat tenak wolmer-o.

²⁰ Alat nde, we kenaboro nak-nen nde kwatli ala-ge, Abimelek ebem-nen kanduk wasolar-e, Sikem woragwi nap min Mbet-Milo woragwi nap min oboksa kanduk-nen nok kunpuwag-o. Iri-nen Sikem min Mbet-Milo min enpem-nen kanduk wasolar-e, Abimelek nok ubuwag-o” luk yij-o.

²¹ Iri yosoluk yarig-e, Yotam na-ge owe Abimelek aye-nen mberarik, o Mbet iri me woragij-o.

²² Nde, Abimelek na Isarael nap tena unpuruk woralar-e, olengen kenan woragij-o. 9:23–11:28 Pasal 9 erep kuri-nen Pasal 11:28 kuri pasal ereya arem-e Abimelek iri na wat yosola, wene mbenarugwi nap erep ondolma lud lud Isarael nap ereba na lit unpuruk mborogolar-e, olengen tuju pulu lima (75) nggal-et lit unpuruk mbiriga wene-ge pasal ereba arem mbarak worasu-o.