WENE MBENARUGWI NAP-NEN KWARIDNAK WENE 8 - Nanduk Ngget Tul Pidnak Wene

Mirian nap urugwe nggwe yidnak wene 8:1-28

¹ Iri luk Eperaim nap-nen Nggireyon yak togolar-e: ”Kar-e noluk-nen Mirian nap indil mborosolar-e, ’Indil mburuwog-o’ luk nenmengen mbarigit lak yigen-o? Noluk-nen kar-e iri nggal kwat ninpigen-o?” luk enambuwon mbarogolat Nggireyon met piga-o.

² Alat nde, Nggireyon nen onggo yosolar-e: ”An-nen kwarigi-ge kit-nen kwarigep min ndak worogolar-e, an-nen kwarigi-ge ebe lag-et nde, kit-nen kwarigeb-e mondok ebe worak-nen yusu-o. Nde, kit-nen kwarigeb-e mariger-et kwarigeb-et nde, an nelem nap-nen kwariga nggal-e lag-o. Kit-nen kwarigeb-e ebe worak ombol nggwe terak minik-net yusu-o.

³ Kit perak nde Mbal Pem Nagawan-nen amawi wok kendamu, Mirian nap nagawan Orep min Sep min ereya na indigeb-o. Kit-nen iri kwarigep iri min ndak worogolar-e, an-nen kwarigi-ge kit-nen kwarigep nggal ebe worak, lak, ngge-o?” luk Nggireyon-nen yak ondosoloma-ge, Nggireyon met pili na-ge yanggo yiga-o.

⁴ Iri tarem-e Nggireyon min at-nen idnak san ombo kere tiga ratus ereya na inmin-e Yi Yareren arem wok luk, mbara ndil lagolar-e, mondok abu enpabok lak yidnag-et nde, unuwim nab-et muk mak eneyagolat woraiga-o.

⁵ Iri yogolar-e, o Sukot wok yogolar-e, Nggireyon-nen iri me woragwi nap yak ondosolar-e: ”Naptag-o. Nunggwi mende marig-et mbi an nowosirak yeba mak ender-o. Mirian nap nagawan Seba min Salmuna min muk eneyagolat nere-nen enpabok lak yusu-o” yak indij-et nde,

⁶ o Sukot iri me-nen enne kulugwi nap ereba na-nen onggo yogolar-e: ”Kir-e Seba min Salmuna min kininggem yigit lak yu-t nde, no onggo-nen kat kowosirag-e nunggwi mende mak undurag-o?” luk yiga-o.

⁷ Yogoloma, Nggireyon-nen yak ondosolar-e: ”Iri ala-ge, ob-o. Nagawan Indo-nen nde Seba min Salmuna min ninggem posola-ge, abog-e nembaga woraso egere isile worak pem linggamburok kindimin-o” luk yak indij-o.

⁸ Iri yak undurug-e, Nggireyon na-ge tu wanarik o Penuel wok yij-o. Iri me wok yosolat na owosirak enmanggim nunggwi mende-t nggi yij-o. Iri yij-et nde, Penuel nap na Sukot nap-nen yiga iri na nggal nag-et yiga-o.

⁹ Iri yogola karuk, Nggireyon-nen o iri me woragwi nap yak ondosolar-e: ”An nde nurug-et lobok yosolar-e, iri tarem-e o yu me enlengen woragwi o mondok teram yu-ge ndamera tudtak pimin-o” luk yij-o.

¹⁰ Nde, iri na yogola-ge, Seba min Salmuna min ensan ombo oboksa inmin-e Karakot iri me woraiga-o. Nde, ap nembaga ereba woragwi nap san ombo oboksa-ge seratus duapulu ribu (120.000) indikma, enpe-ge lima belas ribu (15.000) nak iri me woraiga-o.

¹¹ Nde, Nggireyon na-ge inmbirig-et mberarik, mo luwaso nggwe nembaga mak mak o Noba min o Yobea min-et mberarik, wim nab-e iri me worakmu, mimo enpem kore yij-o.

¹² Iri yogola-ge, Mirian nagawan Seba min Salmuna min ereya na-ge kwiye mbiriga-t nde, Nggireyon-nen-e muk eneyagarik, tena-t onposola-ge, it-nen idnak san ombo ereba oboksa na-ge ngge kwarurak nggal pabok piga-o.

¹³ Nde, wim iri na ngguruk, tuguruk ma mborogolar-e, Nggireyon na-ge tula-ge Eres-nen lagwi nggwe tula-ge lagaij-o.

¹⁴ Lasolar-e, ereba-nen Sukot nap sujwe misik tenagij-o. Tenaguruk, Sukot woragwi nap ap yok nggok ereba na unnu kin wanij-o. Iri yosola-ge, ap iri na-nen ap yok nggok tuju pulu tuju (77) irit unnu engga bem mbara Nggireyon wok tij-o.

¹⁵ Wok tosoloma-ge, Nggireyon na mberarik, o Sukot iri na me enne kulugwi nap ereba na inmin lambuk luk, wene yak ondosolar-e: ”Kir-e nagawan Seba min Salmuna min ninggem lak ala karuk, an yongga nururak yak kindigi-t nde larok yigep iri na-ge ndemeret yeberak worali, lak? An nowosirag-e nere-nen enpabok lak ala karuk, nunggwi mende kenpem nggi yigi-t nde, larok yigep na-ge Seba min Salmuna min ereya na-ge yar-o” luk nuk eneyagaij-o.

¹⁶ Iri yak undurug-e, Nggireyon-nen-e nembaga ereba-nen wanidnak isile worak ereba na bem eneyanggo wat makluk o Sukot iri me woragwi enne kulugwi nap ereba na-ge linggamburok indij-o.

¹⁷ O Penuel-nen na enlengen woragwi o mondok teram iri na-ge ndamera tudtak posolat, iri me woragwi nab-e oboksa indij-o.

¹⁸ Iri rak puruk, Nggireyon-nen Seba min Salmuna min kin wok onposolar-e: ”Kit-nen Tabot Ndobo bem-nen indigep ereba-ge ap enpe-ge tarak nggal indigeb-o?” luk kin wanij-o. Iri yosola, Seba min Salmuna min-nen onggo yogolar-e: ”Ap indige ereba oboksa-ge ap kek tak-nen wigarak nggal-et indige-o. Nde, ap ereba enpe-ge kat nggal nggal nag-o” luk yiga-o.

¹⁹ Yogoloma, Nggireyon-nen yosolar-e: ”Ereba-ge an nowe nowot niniya misik-nen nderag-et indigeb-o. Kit-nen nde it nde indigit lak nggal-nen-e mondok ndemeret kendeleb-e lik lak sa-o” yak indij-o.

²⁰ Yak unduruk, Nggireyon nen ambara manggiya Yeset iri na yak tosolar-e: ”Mondok indi-o” yak tij-et nde, Yeset iri-ge ap sujwe indi lele me, undurak kabo lit kudtag-e kwiye-nen larok yij-o.

²¹ Nde, Seba min Salmuna min-nen Nggireyon yak togolar-e: ”Kat nde ap kusi-nen-e kat kondomok kinggi-net nindi-o” luk yak tiga-o. Yogoloma, Nggireyon-nen-e ap mberen ya na unduruk, it onowam unta umukmu woraso imirik umuruk ereba na wanij-o.

²² Iri luk, Isarael nap-nen Nggireyon yak togolar-e: ”Kar-e Mirian nap ininggiyapma-nen wisirik ninpidnak me, kat na irit kat-nen wigarak na irit pempa nit nennggendumu nagawan wolmer-o” luk yak tiga-o.

²³ Yogoloma, Nggireyon-nen yosolar-e: ”An-nen kit kennggendumu nagawan wolmomtag-e lag-o. An nambara-nen na mondok lag-er-o. Kit kennggendumu nagawan-e Mbal Pem Nagawan arig-et nak worasu-o” luk yak indij-o.

²⁴ Alat nde, abok nggwe-ge Nggireyon-nen yak ondosolar-e: ”Kit-nen wim kugun pem wanidnak emas-nen konidnak eneyanggo sumbanok oboksa an neram nak pil lobok yer-o” luk yak indij-o. (Nde, Mirian nab-e ap nembaga ereba woragwi nap-nen yurugwi nggal emas-nen konidnak eneyanggo sumbanok kwarat puruk woragwi-o.)

²⁵ Nde, Isarael nap-nen wene onggo yogolar-e: ”Nab-o. Keram pul-o” luk enalen min-et yak tiga-o. Iri lug-e, sum abak misik yemarak puruk, ap oboksa-nen emas-nen konidnak eneyanggo sumbanok kugun pem wanidnak ereba na waruk lobok yogolar-e, sum abak yemarak iri na me nak perenak woraiga-o.

²⁶ Mirian nap nagawan-nen unmuruk yurugwi mende min it-nen yurugwi kiloga sum min it onowam unta urusuwak pem-nen wanidnak ereba na min angin-e wonarigit lag-et nde, emas-nen konidnak eneyanggo sumbanok iri tarem Nggireyon eram piga-ge angin-e duapulu (20) kilo nggal irit wok tiga-o.

²⁷ Wok tikma-ge, Nggireyon-nen-e emas ereba na bem kugwiwak ut mimirik misik ndak wosa at uwi silmu Opera iri me pij-o. Ndak wosa bamu Isarael nap oboksa-nen mborogolar-e, kugwiwak ndak worak iri na erembel wanogolat woraiga-o. Iri yogolar-e, Mbal Pem Nagawan-e meme rak piga-o. Iri-nen ndowaga Nggireyon min at ama woragwi inmin-e enare burak irit kwat yij-o.

²⁸ Nde, Mirian nab-e Isarael nap-nen pinik indidnak me, mondok mariget tet sil eneyagit lak woraiga-o. Iri kwasa woragolar-e, Nggireyon uruk worasola, it woragwi sa iri me konak yamuksa woragolar-e, olengen empat pulu (40) woraiga-o.

Nggireyon wat yidnak wene: 8:29-35

²⁹ Wim iri na nggurug-e, Nggireyon na-ge ama mberarik, iri me woragij-o.

³⁰ Nde, Nggireyon iri-ge ogwerag-e kwarat me, ambararag-e ap nak tuju pulu (70) irit ndagij-o.

³¹ Nde, at kwe mbi ndemeret ogwe-ge lag-et nde imin nak woraso mbi o Sikem woragij-o. Nde, kwe iri-nen ndagosolar-e, li ap misik ndaguruk unu-ge Abimelek yarij-o.

³² Yoas ambara Nggireyon iri na-ge abu indi worak luk-net wat yij-o. Wat yamu-ge, at eid Yoas yapma piga ma-t yapma ibiga-o. Nde, at elem nap Abieset nap woragwi sa Opera iri me-t yapma ibiga-o.

³³ Nde, Nggireyon iri na wat yosola-ge, Isarael nab-e tugup lak Nagawan Indo-nen yidnak yidnak kwarigit lak yiga-o. Iri kwarogolar-e, kugwi Mbaal erembel wanogolat, Mbaal Mberit iri na-ge it enmbal pem nagawan tak piga-o.

³⁴ Iri kwarogolar-e, it Enmbal Pem Nagawan-e unuwim nap ennggendumu it worali ereba ininggiyapma-nen wisirik inpid Nagawan Indo iri ndegel ubugwi na-ge mondok keya biga-o.

³⁵ Iri-nen Nggireyon-nen Isarael nap konak nak kwat onposolat woragid ereba na onggo-ge Nggireyon ama woragwi nab-e konak nak kwat inpigit lag-et yiga-o.