WENE MBENARUGWI NAP-NEN KWARIDNAK WENE 7 - Nanduk Ngget Tul Pidnak Wene

Nggireyon-nen Mirian nap urugwe nggwe rak inpidnak wene 7:1-26

¹ Nde, misik tarem-e Nggireyon min at imin nugwi nap inmin-e kubu kabu men lug-e, mbirigarik Yi Asot pilana pil waso sa ulusu koroga iri na me o lije witulu woraiga-o. Nde, Mirian nab-e ndobo More koroga mbirikmu ereba abare abam (utara) nggwe woraiga-o.

² Nagawan Indo-nen Nggireyon yak tosolar-e: ”Kat kimin mbururak nab-e kwarat me, an-nen Mirian nap urugwe nggwe rak unpuruk ir-e ombol nggwe rak inpimin pug-o. Nde, iri yimin iri-ge kat kowosirak inndi arem-nen yebet kagolar-e: ’Nit nenmawi bem-net nir-e ombol nggwe yige-o’ luk, an nerembel wanigit lak yurak ala karuk, kwarimin-o.

³ Iri ala-ge, kat-nen kat kowosirakyak indi-o: ’Ta-nen nde kwiye ala-ge, mondok Nggileat Ndobo yu bem-nen tuguruk enma mburuwag-o’ yak indi-o” yij-o. Nde, iri yosoloma, ab-e dua pulu dua ribu (22.000) tuguruk enma mborogolat, sepulu ribu (10.000) nak woraiga-o.

⁴ Iri luk tuguruk Nagawan Indo-nen Nggireyon yak tosolar-e: ”Kat kowosirag-e kwarat me, yi ma wok unpuruk mburugundig-e, iri me-nen an-nen lena kat kimin mbururak nap keya inpimin-o. An-nen yak korosolat nde: ’Ap yu-ge kimin mbururag-o’ yak kirimin iri nak kimin mborosolat, nde, ’Ap yu-ge kimin mbururak pug-o’ yosola-ge, mondok kimin mbururak pug-o” luk yak tij-o.

⁵ Yosoloma, Nggireyon-nen-e ap ereba na-ge yi ma inmin mbirij-o. Nde, Nagawan Indo-nen Nggireyon yak tosolar-e: ”Ap yi nonggolat nde, yengge-nen naso nggal abenak nonggola-ge, lena arik tak posolat, nde, endaru yunggusa-nen nonggola na lena arik tak posolat kwari-o” yak tij-o.

⁶ Yi na nonggola yik kasoma-ge, yengge-nen naso nggal ininggi mok pem abenak ninggidnak nab-e tiga ratus (300) nak kwat yij-o. Nde, ap erep oboksa-ge endaru yunggusa kore luk-nen ninggidnak nak kwat yij-o.

⁷ Iri ala, Nagawan Indo-nen Nggireyon yak tosolar-e: ”Ap tiga ratus yengge-nen nago nggal ningga nap ereya inmin nak lena keya kinpig-o. Nde, it ereya enpem-net Mirian nab-e an-net urugwe nggwe rak unpuruk, kir-et ombol nggwe rak kinpimin-o, Nde, ap erep ereba-ge tuguruk enma wirik inpi-o” luk yak tij-o.

⁸ Yak tosoloma, Isarael nap erep ereba na-ge wirik onposolat, ap tiga ratus ereya nak keya unpuruk, tularo nunggwi mende-ge tuguruk mbitli nap ereba na enpem-nen wanogolat, wim kum mbo bugwi mende terompet ereba min-et waniga-o. Nde, Isarael nab-e ndobo bem o sare lit kuruk woragola, nde, Mirian nab-e mbirikmu ena nggwe woraiga-o.

⁹ Nde, iri na tarem kubu-ge Nagawan Indo-nen Nggireyon yak tosolar-e: ”Nggireyon wa-e. Men min-o. Mirian nap worali sa mbugundik enpem kore yi-o. Ir-e urugwe nggwe rak unpuruk, kar-et ombol nggwe rak kibimin-o.

¹⁰ Alat nde, kat nde kwiye ala-ge, kat ndegel koboso nap Pura emengen mbatluk, wim nap endam mberer-o.

¹¹ Mburugunnggal-e, wim nab-e wene mbi it nak ereba yogola kulugun-o. Kulurug-e, kwiye lak yosolat enpem kore yurak kindi kwat ma-o” yosoloma-ge, Nggireyon na-ge at ndegel oboso nap Pura iri na enmberek wim nap worali sa mak mak ereba na nggwe mbiriga-o.

¹² Mbiganggal-e, Mirian nap min Amalek nap min ap erep nembaga nggwe-nen lobok yidnak nap min oboksa mbirikmu ereba na me mondok it nak tabuk tak worakmu eneyaiga-o. Mondok ubugwe nggal logo logo irit eneyaiga-o. Nde, onowam unta wam-e mondok wonarurak puk yi sisiri nggal irit kaiga-o.

¹³ Nde, iri na me Nggireyon wok yidnggal-e, ap misig e at-nen nabi kagaid anggam misik ndindera yak tosola kulij-o. Nde, ap iri na-nen yosolar-e: ”Oroti wora misik ndobo bem-nen limbik lambik nit nunuwi lije wiridnak sa lobok yosolat, o lije misik ebem mbud yosola-ge, o lije iri na-ge nggweyak min panggara keya bamu kagi-o” luk kiringgij-o.

¹⁴ Koronggosola, anggam iri na-nen erep nggarosolar-e: ”Nab-o. Mondok iri-ge Yoas ambara Nggireyon Isarael nap iri na eyalawi lombok kaigen-o. Iri-ge nin-e lag-o. Mbal Pem Nagawan-nen ar-et ombol nggwe rak obosolat, nit wim nggurak lobok yige oboksa min Mirian nap min-e urugwe nggwe rak nunpuwa-o!” luk yij-o.

¹⁵ Nde, Nggireyon-nen nabi iri na kuluruk, iri-nen nabi iri-ge ebe-ge iri nggal-o yidnak iri na min kulurug-e, ar-e tud luk Mbal Pem Nagawan erembel wanij-o. Wanuruk mberarik, Isarael nap worali sa wok yosolat-nen yak ondosolar-e: ”Mondok lid lud tak pogolat wolmer-o. Nagawan Indo-nen Mirian nap urugwe nggwe rak unpuruk, kir-et ombol nggwe rak kunpuwa-o” luk yak indij-o.

¹⁶ Yak undurug-e, at owosirak tiga ratus ereya na-ge tembesa kere kenan tak unpurug-e, ap oboksa inlittak kum pugwi terompet min yimbe arem tal paga pil nggwidnak min wok indil lobok yij-o.

¹⁷ Ereba na wok ondosolat-nen Nggireyon-nen yak ondosolar-e: ”An nde Mirian nap worali sa mak mak wok yosolat-nen kwarimin iri kwara karuk, an-nen kwarimin iri ndak ndak nak kit-nen na kwarurag-o.

¹⁸ An min an nimin mbirimin nap inmin-nen nde posid poba ene yogola-ge, kit-nen na kunkum pugwi terompet enne yurag-o. Iri yogolar-e, it worali sa inggi inggi lop lop worak woragolat-nen: ’Nagawan Indo min Nggireyon min enmanggim-o’ luk kenne nggoksa yogolat kek kok nak lel tenak wolmomtag-o” luk yak indij-o.

¹⁹ Kubu nggiringgendumu nggal-e, Nggireyon owosirak inmin mbirigarik, wim nap woragwi sa mak mak wok yiganggal-e wim nap tu mbal tenak woragwi nab-e nggeret ondolma kondolma yukmu, wok yiga-o. Nde, Nggireyon-nen waruk ap kere misik iri na-nen-e kum pugwi terompet ene yogolat, tal paga yimbe arem pidnak yimbe ereba na tagara keya biga-o.

²⁰ Iri kwarogola-ge, it kere mberen ereya na-nen na iri nggal-et kwariga-o. Iri kwarogolar-e, ininggi kware nggwe-ge tal pago tena, nde, ininggi kigit nggwe-ge kum pugwi terompet tenaga woragolar-e: ”Yalawi-ge Nagawan Indo min Nggireyon min eneyalawi-o” luk kek kok mbak lel kaiga-o.

²¹ Nde, Isarael nab-e wim nap o lije wiridnak sa inggi inggi iri na me ondolma iri nat mendak woragola-ge, wim nab-e enne sa nggwa nggilarak mbu pong kil mbiriga-o.

²² Nde, iri yogola-ge, Nggireyon min at-nen idnak san ombo inmin-e kum pugwi terompet ene nak pu yogolat woragola-ge, Nagawan Indo-nen kwat onposolar-e, wim nap yeba na-ge yalawi bem it nak wat kerak mborogolar-e, Serera ambigit nggwe Mbet Sita wok, o Tabat koroga o siri Abel Meola ereba nggwe-t kwiye mbiriga-o.

²³ Iri yogola-ge, it enlem Naptali min Aset min iri-nen elem Manase nap erep mo luwaso nggwe worali min mo mboso nggwe Yareren eyak ponok nggwe worali min ereba na min-et wene-t mbo inpiga-o. Iri lug-e, Mirian nap san ombo mbitli ereba na langgal unpuruk mbiriga-o.

²⁴ Nde, Nggireyon-nen-e o ndobo worak Eperaim nap enma oboksa enmanggim wene wirik posolar-e: ”Kir-e mbumer-o. Mirian nap unduwog-o. Nde, Yi Yareren min yi waru oboksa min iri-nen mburuwarik Mbetmbara kuri lidsa iri-ge Mirian nap yi mbara mburuwa naru, mondok pak til mberer-o” yak endamu, ndok wosa lobok yogolar-e, Yi Yareren min yi waru oboksa min Mbetmbara kuri irit oboksa pak til lobok yiga-o.

²⁵ Iri yogolar-e, Mirian nap nagawan mberen Orep min Sep min ya na-ge it-nen tena unpurug-e, Orep na-ge Kerep Orep pem-nen wiriga-o. Nde, Sep na-ge anggut engen amburu mbulugwi sa Sep iri me-nen wiriga-o. Nde, Eperaim nab-e Mirian nap muk iniyil mbiriga mbiriga keya buruk, Orep min Sep min enanggul mbarak waruk Nggireyon eram mo luwaso ambigit Yareren eyak ele bem waruk ndil laiga-o.