WENE MBENARUGWI NAP-NEN KWARIDNAK WENE 6 - Nanduk Ngget Tul Pidnak Wene

Nggireyon-nen kwaridnak wene 6:1-40

¹ Nde, Isarael nap na tuguruk Nagawan Indo imin meya kwarogola-ge, Isarael nap na-ge Mirian nap ininggem pamu yemndak unpuruk woragolar-e, olengen tuju irit woraiga-o.

² Woragolar-e, Mirian nap-nen Isarael nap na-ge enmawi bem ininggiyapma rak onpogola-ge, Isarael nap na-ge Mirian nap enaye kwarat kagolar-e, kwiye-nen kerep yanggo ereba me kurak yil mborogolat, it konak wolmomtak sa ndobo bem ereba kurak yil mborogolat kwariga-o.

³ Nde, ereb-e pempa Isarael nap-nen yabu waga yaguruk worakmu-ge, Mirian nap min Amalek nap min ap erep nembaga nggwe-nen na lobok yogolar-e, Isarael nap ondogolat woraiga-o.

⁴ Nde, wim nab-e Isarael nap woragwi sa-t unuwi lije wiril lobok yigarik woragolar-e, yabu yagidnak oboksa meya rak pil pil abare ena (selatan) nggwe o Nggasa inggi inggi ereba me yabu yagidnak min-et meya rak pil mburugwi-o. Iri-nen Isarael nap onowam lomba min sapi min kelerai min oboksa waruk ndi yogolar-e, it norak nunggwi mende min it enarengge mende mbi mondok woragit lag-o.

⁵ Nde, ap ereba na-ge enpe-ge kwarat lobok yogolar-e, onowam nde unuwi lije nde imin-et nduguluk lobok yugwi-o. Nde, ir-e ap nde onowam unta wam nde lambuksa-ge wonarurak puk irit lobok yugwi-o. Nde, it lobok yogolar-e, Isarael nap unuwi-ge nggweyak min leraben waga keya bugwi-o.

⁶ Iri yogola-ge, Isarael nap-nen enpem kore yurag-e meya irit kwat yoso-o.

⁷ Iri ala karug-e, Isarael nap-nen-e inmin wim mbarurak pem-e ”Yongga nindi-o” luk Nagawan Indo emengen mbariga-o.

⁸ Iri yogola-ge, Nagawan Indo-nen-e at ene lomboksa yoso nap misik endam pil lobok yamu, ap iri na-nen yosolar-e: ”Nagawan Indo Isarael nap Kenmbal Pem Nagawan-nen yosolar-e: ’Kir-e Mesira-nen anggun panggun tak konpogola, an-net wisirik kunpukmu-o.

⁹ Nde, an-nen-e Mesira nap min yu me nap kinmin wim mbariga nap min ininggem-nen kinmiri yigi-o. Iri yosolar-e, kit-nen it enpem kore yogola-ge, an-nen-e yu me-nen maga wirik unpukmu-o. Iri rak unpurug-e, onnggweyag-e kit wok kindigi-o.

¹⁰ Iri luk an-nen nanduk kit yak kondosolar-e, an-e Nagawan Indo Kenmbal Pem Nagawan-nen yusu-o. Nde, kir-e Amori nap unuwi yawo kit worali yu me-nen erembel wanugwi unkugwiwak mondok erembel wanurak pug-o yak kindigi na-t nde, kir-e an-nen kwarurak yak kindigi iri na ndak ndag-e kwarigit lak yigepma-o’ yij-o” luk yak indij-o.

¹¹ Nde, misik tarem-e Nagawan Indo-nen idnak aid nap mbi lobok yarik, o siri Opera wok yij-o. Iri yarig-e enlem Abieset nap Yoas-nen idnak e terepentin iri na indipma koreyak woragij-o. Worala-ge, Yoas ambara Nggireyon na-ge anggut engen amburu mbutlugwi sa iri na me nggandum mbato engen lera mbuwakluk lel tenak woragij-o. Iri kwarid iri-ge Mirian nap-nen kujwa naru mbik mbok kwarosolat woragij-o.

¹² Iri kwarosolat worasoma-ge, aid nap iri na-ge Nggireyon eram wok yosolat-nen yosolar-e: ”Sujwe kwiye lak, kamawi worak yu-ge wa-e. Nagawan Indo-ge kimin worasu-o” luk yak tij-o.

¹³ Yosoloma, Nggireyon-nen onggo yosolar-e: ”Nab-o. Irit nde, Nagawan Indo-ge ninmin worasolat-net nde, noluk-nen angin worak yeba-ge nenpem mbusu-o? Nagawan Indo-nen kwiye worak kwarosolat Mesira-nen nonmborak wisirik inpid iri na-ge iri na wene-ge nonmborak-nen yak nundugwi yeba na-t nde, yawo-ge Nagawan Indo-nen keya nonposolat, Mirian nap ininggem nenpamu yemndak nunpuruk worali-o” luk yak tij-o.

¹⁴ Yosoloma, Nagawan Indo-nen wene yu-ge Nggireyon ebem pij-o: ”Kar-e mondok kamawi kunduruk mburugundik, Mirian nap ininggiyapma-nen Isarael nap wisirik inpi-o. Mondok an-net wirik kubusu-o” luk yak tij-o.

¹⁵ Yosoloma, Nggireyon-nen yosolar-e: ”Nagawan Indo wa-e. An nggal-nen-e Isarael nab-e Mirian nap ininggiyapma-nen wisirik inpimin-a? An nelem Manase iri me-nen-e ap suwon mondok enmawi lag-e an nelem irir-o. Nde, an neid niya nowe nowot ennggendumu-nen-e an-e mondok no mende nggal ebe lak-nen yusu-o” luk yij-o.

¹⁶ Yosoloma, Nagawan Indo-nen yosolar-e: ”An-nen yongga kirimin me, kar-e mondok ndak-net yusu-o. Kat-nen-e misiget nap imin wim mbaridnak nggal, Mirian nap mondok pendaga lak tak unpugun iri-ge mondok te-nen yusu-o” luk yij-o.

¹⁷ Yak tosoloma, Nggireyon-nen wene onggo yosolar-e: ”Kar-e ndemeret nabuwa kasolar-e, iri-ge ndemeret Nagawan Indo-net nebem pusu-o luk yenggerak peyek-nen yenggerak purak kwiye worak misik mirik nibi-o.

¹⁸ Nagawan Indo wa-e. Kar-e yu me-t wolmin-o. Nunggwi mende saga keram posola-net mbururag-o” luk yak tij-o. Yosoloma, Nagawan Indo-nen yosolar-e: ”Ob-o. Keyarok woramindik, kar-et lobok yosola-net mbirimin-o” luk yak tij-o.

¹⁹ Yosoloma, Nggireyon na mberarig-e, kambing mendaso misik saguruk, nggandum mbato yigirik mabe nggal angin-e sepulu kilo wanuruk, oroti lomboroso mende pigit lak kona woragurug-e, iri rak purug-e, uno iri na-ge mul sum misik arem yarak puruk, nde, amburu-ge togolwak arem puruk, saguruk lobok yosolar-e, Nagawan Indo-nen idnak aid nap at yik karok e terepentin indipma worasu iri na eram saga pil lobok yij-o.

²⁰ Pil lobok yosola, aid nap iri na-nen yosolar-e: ”Uno min oroti min ereba-ge kerep yu bem pi-o. Nde, wam amburu-ge ebem-et kilik pi-o” yak tosoloma-ge, Nggireyon-nen-e kwaruwakluk ebem pid iri na ndak ndag-et kwarij-o.

²¹ Nde, Nagawan Indo-nen idnak aid nap iri na-nen inggi mberak parik, erok inggem tena iri na-nen-e uno min oroti min iri na bem ndurum tak posoma-net kerep iri na pagosolar-e, uno min oroti min iri na-ge mondok nuruk lak tak pij-o. Iri yosola-ge, aid nap iri na-ge mondok lak nak yij-o.

²² Iri ala karuk-nen perak nde, yu-ge ndemeret Nagawan Indo-nen idnak aid nab-er-o luk aru yij-o. Aru luk kwiye-nen yosolar-e: ”Nagawan Indo Kek tak wa-e. An-e kat-nen idnak aid nap imin neptare mboma woraidnak me, an-e mondok yawo-net kagi-o” luk yij-o.

²³ Alat nde Nagawan Indo-nen yosolar-e: ”Kar-e kwiye kagit lak, kondok tag-et wolmin-o. Kar-e wat yugun-e lag-o” yak tij-o.

²⁴ Yosoloma, Nggireyon-nen-e Nagawan Indo amanggim kan purak ondoro misik konuruk, unu yarosolar-e, ”Nagawan Indo iri-ge mondok yamuksa woragwi elem-nen yusu-o” luk yarij-o. Nde, Nagawan Indo amanggim wam wosa kan purak ondoro konid iri na-ge Abieset nap enma o siri Opera iri me worasu-o.

²⁵ Iri na tarem kubu-ge Nagawan Indo-nen wene yu Nggireyon ebem posolar-e: ”Kar-e keid esapi kusi mondok nggok olengen tuju woraidnak mbi wanurug-e, keid-nen kugwi Mbaal amanggim kan poso ondoro konid iri-ge ndamera keya bosolat, kugwi kwe Ndewi Asera ut mimirik ndak worak erembel wanugwi e sindil lobok yidnak wam wosa kan pugwi eralu ereba-ge mbara keya bi-o.

²⁶ Iri rak puruk mijarak pugun iri na bem-e Nagawan Indo amanggim kan purak ondoro mondok kona ndak wosa pidnak iri na purug-e, sapi kusi iri na-ge mondok ebis-et Nagawan Indo amanggim kan purag-o. Nde, kan purak kan-e kugwi kwe Ndewi Asera erembel wanugwi e mbara keya bugun ereba bem-et kan purag-o” yak tij-o.

²⁷ Yosoloma-ge, Nggireyon-nen-e at ndegel ubugwi nap enpe sepulu inmin tak puruk, Nagawan Indo-nen ebem pidnak iri na-t kwarurak mbirij-o. Alat nde, eidtak min owe owot min o iri me woragwi nap min enaye-nen-e lengge-nen kwarurag-e keya buruk, ar-e kubu-nen nde kwarij-o.

²⁸ Nde, o iri me woragwi nap kup men yogolat-nen yik kaiganggal-e, kugwi Mbaal amanggim kan pugwi ondoro min kugwi kwe Ndewi Asera erembel wanugwi e sindik ereba na min ndamera lak tak puruk, iri na me-ge eyabi worak wosa kan purak ondoro ngget nin misik ndama pil laruk iri na bem-e sapi kusi misik wosa kan pidnak karug-e,

²⁹ it nak kin wok kerak mbogolar-e: ”Yu-ge ab-e ta nggal-nen kwarij-o?” luk mbenariga-o. Mbenarukmu-ge, Yoas ambara Nggireyon-nen kwaridnak karug-e,

³⁰ it-nen Yoas yak togolar-e: ”Kat kambara iri-nen kugwi Mbaal amanggim kan pugwi ondoro ndamera keya bosolat, kugwi kwe Ndewi Asera erembel wanugwi e wam wosa kan pugwi ondoro eralu ereba na mbarak posolat kwaramu me, kambara iri-ge mondok wat mak-nen yu me waruk lobok yi-o” yak tiga-o.

³¹ Iri yogola karuk, Yoas-nen at ebem kore yili nap ereba na yak ondosolar-e: ”Kir-e Mbaal kugwi ambigit yogolat imiri yili-a? Ta-nen nde Mbaal kugwi ambigit yusu ala-ge, yawo-t wat ma-o. Mbaal iri nde ndemeret mbal pem nagawan-nen-e at amanggim pugwi ondoro iri-ge ndemeret at arengge-t mijaridnak me, imiri yosolar-e, at ondomok-net onggo buwa-o” luk yak indij-o.

³² Yosoluk, Yoas-nen yosolar-e; ”Nggireyon iri-ge Mbaal amanggim wosa kan pugwi ondoro ndamera keya bidnak me, kugwi Mbaal ondomok-net wuruwag-o” yij-o. Iri yidnak ombol nggwe-nen Nggireyon unu yarogolar-e, Serumbaal yariga-o.

³³ Ereya tarem-e Mirian nap min Amalek nap min ap enlem erep Yareren eyak ponok mo luwaso sa ambigit nembaga ereba me woragwi nap min ndok worogolar-e, Yi Yareren mbatluk, Yisiriel mbirik iri na me unuwi lije wiril lobok yiga-o.

³⁴ Iri yogola-ge, Nggireyon na-ge Nagawan Indo Indi arem yebet yosolar-e, at elem nap Abieset nab-e ndok wosa at eram lobok yuwakluk posid poba ene yij-o.

³⁵ Iri kwarosolar-e, it enlem Aset min Sebulon min Naptali min iri-nen enlem Manase ereb-e mo luwaso ambigit min Yareren eyak ponok mo mboso nggwe min worali ereba min at eram lobok yuwakluk endam yonggo ab-e wirik inpij-o. Yosoloma-ge, it oboksa Nggireyon yongga wururak lobok yiga-o.

³⁶ Nde, Nggireyon-nen Mbal Pem Nagawan yak tosolar-e: ”Nagawan Indo wa-e. Kat-nen yak norosolar-e: ’Isarael nap wisirik onponok-nen an-e yongga kirimin-o’ yigen nar-o.

³⁷ Nde, yigen iri na nde ndemeret kwarosolar-e, nit-nen nggandum engen lurugwi sa yu me-t an-nen lomba usu mbarak pusu yu nde, kup nde nggweyag-e ndibe-t nde, lomba usu mbarak nak nde lilangen ludtak karug-e, ndemeret Isarael nab-e an nebem-net wisirik unpugun-o luk yenggerak pimin-o” yak tij-o.

³⁸ Iri luk, Nggireyon na kup kil mbiridnggal-e, at-nen nggi yid iri na nggal-et nggweyag-e ndibe-t nde, lomba usu iri nag-e lilangen ludtak-nen amburu mbela-ge embe marik misik kobong yij-o.

³⁹ Iri rak puruk, Nggireyon-nen Mbal Pem Nagawan yak tosolar-e: ”Nagawan Indo wa-e. An tugurug-et kimin wene yosola-ge, kisilepma nuburak pug-o. Nab-o. Lomba usu mbarak ya bem-et tuguruk wal kamin me, ’Ob-o’ luk yak niri-o. Lomba usu mbarak pusu yu-ge ndibe woralat, nggweyak inggi inggi-ge piri mag-o” yak tosolug-e,

⁴⁰ kubu iri na-ge Nagawan Indo-nen-e Nggireyon-nen ebem nggi yid iri na-t kwarak pij-o. Iri yamu, kub-e kil mbiridnggal-e, lomba usu mbarak iri na-ge ndibe-t nde, nggweyag-e lilangen-nen piri rak pidnak irit kagaij-o.