WENE MBENARUGWI NAP-NEN KWARIDNAK WENE 5 - Nanduk Ngget Tul Pidnak Wene

Ndebora min Mbarak min-nen yidnak ndawi 5:1-31

¹ Nde, iri tarem-e Ndebora min Abinoam ambara Mbarak min-e ndawi yu yiga-o:

² Isarael nap wim wari-ge wim nggurak wat tak puruk woragolat, nde, it erep na ondomok inndi-net wim timbiril mborogolat kwatli bem-e Nagawan Indo nak erembel wanurag-o!

³ Nagawan nagawan min nagawan inlirak min wa-e. An-e Nagawan Indo Isarael nap Enmbal Pem Nagawan ebem ndawi yusu yu kwara koler-o!

⁴ Nagawan Indo wa-e. Kat o Seit ndobo bem-nen mborosolat, Erom nggweyak keya buruk mborosola-ge, nggweyak lele yosolat mbal usurup kuwak yil lobok yosolat, nggan nggan-nen talme nggilara mberak pij-o.

⁵ Ndobo Sinai tena woraso Nagawan Indo Isarael nap Enmbal Pem Nagawan iri na at erengen pem ala ndobo oboksa lele yij-o.

⁶ Anat ambara Samnggat min kwe Yael min woragola tarem-e, tula nggok nggwe-ge ap kogo nduguluk mburugwi bug-o. Alat nde, tu waring kagwi nab-e tula marik nggwe nak mburugwi-o.

⁷ Isarael nap unuwi siri-ge enpe lak me, o aptu borak ala karuk, Ndebora kar-e men yigen-o. Isarael nap iniya inndi kundig-et men yigen-o.

⁸ Nde, Isarael nab-e kugwiwak erembel wanugwi tel korogola-ge, Isarael nap enma-ge wim nggok yij-o. Iri yogola-ge, san ombo empat pulu ribu (40.000) ennggendumu ap misiger-o luk tet san-e wanigit lag-o.

⁹ Isarael nap san ombo onowe ereba min it erep min nen it ondomok inndi yebet karuk wim nggwili bem-e an-e mondok kwarat kek tak unpusu-o. Nagawan Indo nak erembel wanurag-o!

¹⁰ Kit kelerai wam loro bem koreyak worali min kit kune mondok konak pem koreyak worali min kit nggweyak tu mbitli oboksa min wa-e. Ombol nggwe yidnak yu wene wigarer-o.

¹¹ Yi kenanggugwi sa ereba na me-nen ap enalen pem Nagawan Indo nen pempa ombol nggwe rak onposo wene min Nagawan Indo ilirak Isarael nap ombol nggwe rak enperenak woraso wene min koronggogolat enne nggu lek kali-o. Nagawan Indo ilirak obo nesa keya buruk, mabunuruk o siri pak tumende ambigit mbiga-o.

¹² Ndebora wa-e. Men yosolat ndawi pijani-o! Abinoam ambara Mbarak wa-e. Men yosolat ap wim kugun pem tena inpidnak nab-e nduguluk mbiri-o!

¹³ It ap enlem kek tak minggirik keya inpidnak ereba-ge it lit eneyaruk noso iri na eram mbiriga-o. Nagawan iri na amanggim wim mbarurak lid lud tak puruk eram mbiriga-o.

¹⁴ Ir-e Eperaim-nen mbirikmu mbiga-o. Mbenyamin nap obo nesa puruk, nanduk mburusu iri na imbirik mbiriga-o. Nde, o Magit-nen-e san ombo onowe lobok yogolat, nde, Sebulon nap ennggendumu-nen-e san ombo enmawi worak nam yiga-o.

¹⁵ Enlem Isakat ennggendumu enne kulugwi nab-e Ndebora imin lobok yiga-o. Nde, Isakat nap lobok yogola-ge, Mbarak na inmin-et lobok yiga-o. Ir-e at imbirik mbirikmu mbiga-o. Alat nde, it Uruben nab-e: ”Inmin mburuwog-o” luk inndi misiget yigit lak me, mbururak inndi mberen yiga-o.

¹⁶ Noluk-nen ir-e lomba wam enggendumu woraiga-o? Wam yik karok woragwi nap-nen wam wene mbo bili ereba na kolak wolmomtak pem woraiga, lak? Ndemeret, it enlem Uruben ennggendumu-ge inndi misiger-e lak me, wim pil mbururak inndi mberen yiga-o.

^17-18 It enlem Sebulon min Naptali min-e mondok wim pem nggogolat enmawi kondogola-t nde, it enlem Ndan iri-ge yi koma bem nak panggarak woraiga-o. Alat nde, it enlem Nggat iri-ge mo luwaso ambigit Yi Yareren eyak ele bem nak woraiga-o. Nde, it enlem Aset iri-ge wudsa mbirigit lak, pempa unsune lak yi koma eyak eyak nak woraiga-o.

¹⁹ O Tanak nggweyak pem yi Megiro koroga iri me-ge nagawan nagawan wim mbariga-o. Nde, Kanaan nagawan-e wim nggogolat enmawi kundiga-t nde, perak mbi kugun pem-nen waruk mbirigit lag-o.

²⁰ Wonaru-nen na at waring kaso sa mbal pem iri me-net Sitera imin wim mbarij-o.

²¹ Nde, yi Kison kobong yil luwasolar-e, wim nab-e wok unpuruk mbirjj-o. Nindi yu-ge wa-e. Kamawi min-et wim pem mbiri-o!

²² Nde, kura wam ombol pem koreluk mborogola, kura wam pong kasolar-e, ujok ene mbirip mbirip yij-o.

²³ ”O Neros siri min iri me woragwi nap enpe min-e Nagawan Indo-nen idnak wim wari nggal at amanggim wim nggurag-e lobok yigit lak me, mondok inmbiri lamut mag-o” luk Nagawan Indo-nen idnak aid nap iri na-nen yij-o.

²⁴ Nde, Keni nap Ebet ogwe Yael iri-ge mondok imbiringgat mag-o. Nde, o lijema woragwi kweyap ereba oboksa ennggendumu-nen-e ar-e mondok terak minik irit imbiringgat worak worasu-o.

²⁵ Nde, Sitera-nen-e Yael ebem we yi nggi yij-et nde, Yael-nen-e sapi agamo amburu kenangga wok tamu-o. Nde, at iri-ge nagawan nagawan-nen kenangga nunggwi yimbe mondok konak arem wam agamo amburu-ge kenangga wok tamu-o.

²⁶ Yael inggem ndonggwid min o lije owak sundugwi min iri na bem-nen-e Sitera anggulwak mondok ndameramu-o.

²⁷ Ap iri na-ge Yael eralu irit indisep nggoboksa lak yij-o. Nggweyakma irit indi worok yosolat, langgusa wat yij-o.

²⁸ Iri yamu, Sitera ija-nen papalo tumende nggwe yik kasolat-nen yosolar-e: ”Noluk-nen at uwim koma iri-ge ndag-et lobok yusu bug-o? Noluk-nen lobok yosolat kura wam ujok ene mbirip kuligit lag-et yusu-o?” luk yij-o.

²⁹ Iri yosola, at ndegel ubugwi kweyap ennggendumu mondok indi tenggerak kwe misik-nen onggo yosolar-e, at ondomok indi-net yebet kagaid wene irit yak tij-o.

³⁰ Iri-ge: ”Ir-e wim kugun pem wanidnak silobulo timbitli-o. Tembesa wanogolar-e, wim pem-nen wok inpidnak kweyap ndugum ereba na-ge misiget ala na, mberen ala na, san ombo ondomok tag-et tembesa wok indili-o. Nde, Sitera amanggim-e onggo nggok pugwi sum abak wok togolat, nde, nagawan onkwe enabelwak pugwi sum umuruk nin tak nan tak worak min-et wok tili-o” luk yak tij-o.

³¹ Nagawan Indo wa-e. Kuwim nap oboksa-ge Sitera lak yid iri nggal-e lak mag-o. Alat nde, kat kanggamirak oboksa-ge molengen kona bil wasolat konak eyaya worag-et wasu iri nggal-et wolmag-o. Iri lug-e o iri na kona yamuksa woragolar-e, olengen empat pulu (40) irit woraiga-o.