WENE MBENARUGWI NAP-NEN KWARIDNAK WENE 4 - Nanduk Ngget Tul Pidnak Wene

Ndebora min Mbarak min-nen kwaridnak wene 4:1-24

¹ Wene mbenaroso nap Eyut iri na wat yosoloma-ge, Isarael nab-e tuguruk Nagawan Indo imin meya kwariga-o.

² Iri kwarogola-ge, Nagawan Indo-nen keya enpamu, Kanaan nagawan Yabin o Asot iri me woraso iri na nen yemndak unpuruk woragij-o. Nde, at-nen idnak san ombo onowe unu-ge Sitera-o. Nde, Sitera iri-ge o Aroset Agoyim woragij-o.

³ Nde, Yabin-nen idnak wim pil mburugwi nggweyak koma-ge posid-nen konidnak nak sembilan ratus (900) irit woragij-o. Yabin yu-nen mondok isilepma bem-nen Isarael nap yemndak unpuruk woralar-e, olengen duapulu irit woragij-o. Worala, Isarael nap-nen-e ”Yongga nindi-o” luk Nagawan Indo emengen mbariga-o.

⁴ Nde, iri tarem Isarael nap lit unpuruk nij-e Lapindot ogwe Mbal Pem Nagawan ene lomboksa yoso kwe unu-ge Ndebora iri-nen lit unpuruk nosolat woragij-o.

⁵ Nde, kwe Ndebora iri-ge Arama wok Mbetel wok o ndobo worak Eperaim wi iri me kuruma engen nunggwi kelapa ari nggal iri na erep pem koreyak worasola-ge, Isarael nab-e wene worala-ge, wene kon unduwakluk eram lobok yugwi-o.

⁶ Nde, misik tarem-e Ndebora-nen-e ab-e Abinoam ambara Mbarak iri na eram yonggo Naptali nggweyak pem o siri Kendes-nen wirik inpij-o. Iri yamu, Mbarak na lobok yamu yak tosolar-e: ”Nagawan Indo Isarael nap Enmbal Pem Nagawan kat kebem pid wene-ge yu-o: ’Naptali nap min Sebulon nap min ap nak enpe sepulu ribu (10.000) kamarak puruk Tabot Ndobo bem inmin mbiri-o.

⁷ Nde, an-nen-e Yabin-nen idnak san ombo onowe Sitera iri kwarak obosolar-e, kit kinmin wim purak Yi Kison arem nggwe san ombo min wim timbiril mburugwi nggweyak koma min-et kinmin wim purak inpil lobok yimin-o. Alat nde, wim nggogolar-e, an-net ombol nggwe rak kibimin-o’ yij-o” luk yak tij-o.

⁸ Yak tosoloma, Mbarak-nen Ndebora yak tosolar-e: ”Kat totno mborogolat-nen perak mbirimin-o. Alat nde, kat nde mbirigit lak ala-ge, mbirimin pug-o” luk yij-o.

⁹ Yosoloma, Ndebora-nen onggo yosolar-e: ”An totno-t mburul-o. Alat nde, mondok karu wolmin-o. Ombol nggwe yugup iri bem-e mondok kek tak kubuwa pug-o. Alat nde, Nagawan Indo-nen-e kwe misik-nen Sitera iri-ge urugwe nggwe rak puwa-o” yak tij-o. Yak turug-e, kwe Ndebora totno-t Mbarak imin Kendes mbiriga-o.

¹⁰ Mbarak-nen-e enlem Sebulon min Naptali min Ndebora enmberek inmin mburuwakluk yonggo inpij-o. Iri yosola-ge, ap enpe-ge sepulu ribu (10.000) inmin mbiriga-o.

¹¹ Nde, iri tarem-e ap Ebet elem Keni nap iri-ge at anggamirak Keni nap ereba na keya unpuruk, arig-et mbirij-o. Nde, it enlem Keni iri-ge Musa ambasi Obap-nen wigarag-o. Nde, Ebet na-ge o Kendes koroga Sanaim iri me e terepentin ereba na indipma o lije sum worak puruk woragij-o.

¹² Nde, Sitera-nen kulidnggal: ”Mbarak na-ge Tabot Ndobo bem lobok yij-o” yogola kulurug-e,

¹³ at-nen-e wim pil mburugwi nggweyak koma sembilan ratus (900) posid-nen konidnak ereba na min at-nen idnak san ombo oboksa min oboksa warug-e, o Aroset Agoyim-nen Yi Kison arem nggwe mbiriga-o.

¹⁴ Mborogola-ge, Ndebora-nen Mbarak yak tosolar-e: ”Mondok kamawi kundi-o! Nagawan Indo-net lit kunpuruk mburuwa-o. Yawo-net Nagawan Indo-nen Sitera urugwe nggwe rak puruk, kar-e ombol nggwe rak kubuwa-o” luk yak tosoloma-ge, Mbarak na-ge at nap sepulu ribu (10.000) ereya na inmin Tabot Ndobo bem-nen mbiga-o.

¹⁵ Mbogolar-e, Sitera iri na ebem kore yiga-o. Iri yogola-ge, Nagawan Indo-nen wim nap ereba na-ge nari wari rak onposolar-e, wim pil mburugwi nggweyak koma ereba na min san ombo ereba na min oboksa nari wari rak onposola-ge, Sitera na-ge uwim koma bem-nen kapsa mburuk, nggweyak tu kwiye mbirij-o.

¹⁶ Nde, Mbarak-nen-e wim nap kere wim koma bem mbitli ereba na muk iniyil mberarik, o Aroset Agoyim wok yij-o. Iri yosolar-e, Sitera-nen idnak ap san ombo ereba na-ge misik keya inpigit lak, oboksa indiga-o.

¹⁷ Ondogola-ge, Sitera iri na-ge kwiye-nen mberarik, Keni nap Ebet ogwe Yael uwi lijema nggwij-o. Iri nggwid iri-ge Nagawan Yabin Asot woraso iri-ge Ebet iri owe owot inmin kundik woragwi ala-nen nggwij-o.

¹⁸ Nde, Sitera iri na lobok yosola, Yael-nen wok obosoluk-nen yak tosolar-e: ”Nab-o. Kwiye yusu-ge meyog-o. Nama ngguwasug-o” yak tosoloma, Sitera na-ge ama nggosola-ge, Yael-nen-e kura wolmakluk kune yemarugwi sum-nen muruksa yemndak ibij-o.

¹⁹ Nde, Sitera-nen yosolar-e: ”An-e yi nere meya-o. Yi mbi mak niri-o” yosoloma-ge, Yael-nen-e yimbe wam aboro-nen konidnak sapi agamo ngen amburu kenanggo iri na emnde kuwara mak turug-e, tuguruk kune yemarugwi sum iri na-nen muruk tak ibij-o.

²⁰ Iri kwat obosola, Sitera-nen Yael yak tosolar-e: ”Kar-e mburugundik, o lije tumende bem mendak wolmin-o. Ap-nen kat kin wok kobogolat nde: ’Ab-e yu me-ge worali, lak?’ luk kin wok kobogola-ge, ’Lag-o’ yak undurag-o” luk yak tij-o.

²¹ Yak turug-e, Sitera na-ge ababok lak yidnak me, erengen lamborosolar-e, mondok abu nggaruksa nene yij-o. Nene yosola, Yael na-nen-e we mbik mbok nak eram mborosolar-e, ndonggwid na wanosolar-e, o lije sum worogolat owak sundugwi iri na bem ap yu na uruklukwak pem lud tak puruk, mbak lel kaga nggweyak min mbiringin tak paga worak pij-o. Nde, Sitera iri na-ge kwe Yael-nen iri nggal kwasa wirij-o.

²² Worak puruk worasoma, Mbarak na-ge Sitera ogwere ogwere Yael eram lobok yosolat-nen kin wanosola-ge, Yael-nen erep nggarosolar-e, ”Nab-o. Ap kat-nen ogwere yusu iri mirik kebeyek-nen lobok yi-o” yosoloma, Mbarak na Yael imin nggosolat-nen piridnggal-e, Sitera na-ge o lije owak sundugwi iri na bem uruklukwak mbiringin langsa worak nggweyakma yeberak worasoma kagaij-o.

²³ Iri tarem-e Nagawan Indo-nen Kanaan nagawan Yabin iri na-ge urugwe nggwe rak puruk, Isarael nab-et ombol nggwe rak inpij-o.

²⁴ Nagawan iri na-ge yemndak uburuk, anggun panggun tak obogolat irit woragolar-e, nagawan iri na-ge mondok ebe min-et lak tak ibiga-o.