WENE MBENARUGWI NAP-NEN KWARIDNAK WENE 2 - Nanduk Ngget Tul Pidnak Wene

Nagawan Indo-nen idnak aid nap Mbokim iri me wok yidnak wene 2:1-5

¹ Nagawan Indo-nen idnak aid nab-e o Nggilnggal-nen mberarik Mbokim wok yosolat-nen Isarael nap yak ondosolar-e: ”Kir-e an-nen Mesira-nen wesera keya kunpuruk, an-nen konmborak wok kindimin-o luk urul yak indigi o iri na me kinmin lobok yigi-o. An-e tugurug-et yak kondosolar-e: ’An-nen urul yak kindigi iri-ge mondok worok tak pimin pug-o.

² Iri bem-e kir-e o yu woragwi nap inmin-e mondok are kundurak pug-o. It unkugwiwak amanggim kan pugwi ondoro ereba-ge mondok mijara keya burag-o’ luk yak kindigi-t nde, kit-nen iri nggal kwarigit lak yogolat, kwarurak puk yigi iri na nde kwatli-o.

³ Iri ala karuk, yawo-ge kwara koler-o! Kit-nen yu me woragwi nap inmin wim mbarogola-ge, an-nen na langgara wirik inpimin pug-o. Ir-e kit kunuwim nap kwat ma-o. Nde, kir-e kenare bogola it-nen erembel wanugwi kugwiwak ereba na erembel wanogola-ge, ngonok tak kunpuwa-o” luk yak indij-o.

⁴ Nde, aid nap iri na-nen wene iri na yak ondosola-ge, Isarael nap oboksa-nen yip sa nggwa mbiga-o.

⁵ Iri kwaridnak sa ala karuk, o iri na me unu-ge Mbokim yariga-o. Nde, iri na me-ge Isarael nap-nen-e Nagawan Indo amanggim eyabi worak wosa kan piga-o.

Yosua wat yidnak wene 2:6-10

⁶ Yosua-nen ap ereba na enmarak mburuwakluk keya enpamu-ge, ap ereba na-ge mbirigarik, it o wok indil lobok yidnak ereba na me ondomoktak wunde yiga-o.

⁷ Nde, Yosua na uruk worala-ge, Isarael nab-e Nagawan Indo imin kundik woraiga-o. Wat yamu ombol nggwe-nen na Nagawan Indo-nen Isarael nap enmanggim kwiye worak kwaridnak ereba na enlengen kaidnak nap ereba na enne kologolat woragolar-e, Nagawan Indo imin-et kundik woraiga-o.

⁸ Nagawan Indo ndegel oboso nap Yosua Nun ambara iri na-ge olengen seratus sepulu (110) woraruk, wat yij-o.

⁹ Wat yamu-ge, at onggweyak pem-et yapma ibiga-o. Nde iri-ge Ndobo Nggas erabet ponok nggwe, abare abam (utara) nggwe, o ndobo worak Eperaim, Timnat Sera iri me-t yapma ibiga-o.

¹⁰ Nde, imbirig-e, ap at anggul mbilit ereba na-ge war-et yiga-o. Wat yikma, ap it inmbirik waiga nab-e Nagawan Indo enaru buk irit woraiga-o. Iri kwariga iri-ge Nagawan Indo-nen Isarael nap enmanggim kwarid ereba na enaru buk-nen ndowaga kwariga-o.

Isarael nap Nagawan Indo erembel wanugwi iri na keya bidnak wene 2:11-23

^11-14 Iri kwarogolar-e, Isarael nab-e Nagawan Indo imin meya kwarogolar-e, onmborak Enmbal Pem Nagawan Mesira-nen wesera wok unpuruk lobok yid Nagawan Indo erembel wanugwi na-ge keya biga-o. Iri kwarogolar-e, kugwiwak Mbaal min Asitoret min iri-nen ennggendumu it worali nap ereba-nen erembel wanugwi kugwiwak ereba na erembel waniga-o. Iri yogola, Nagawan Indo isilepma yosolar-e, keya enpamu, ap nden unpugwi nap-nen ondogolat, enarengge ndena wanogolat woraiga-o. It unuwim nap it-nen ennggendumu worali nap ereba na undurag-e enmawi lak yiga-o.

¹⁵ Pempa it-nen wim pil mbiridnag-e nandug-et enaru rak pid iri na ndak ndag-et Nagawan Indo-nen-e it inmin nde wim posolat woragij-o. Iri kwarosola-ge, ir-e angin worak anggun panggun enpem mbosolat woragij-o.

¹⁶ Iri kwarogola-ge, ap nden unpugwi nap ereba na ininggiyapma-nen wisirik unpuwakluk, pempa Nagawan Indo-nen enne kulurak nab-e wok ondosolat woragij-o.

¹⁷ Alat nde, ir-e enne kulurak nap ereba-ge no mende nggal tak onpogolat woraiga-o. Iri yogolar-e, Nagawan Indo-nen yidnak yidnak tugup lak kwarigit lak, kugwiwak nde erembel wanogolat woraiga-o. Nde, ir-e onmborak-nen Nagawan Indo nen enpem pidnak nak kwatli ereba na nggal-e kwarigit lak yiga-o.

¹⁸ Nagawan Indo-nen nde Isarael nap ennggendumu it lit eneyaruk nurak nap nde lenak unpurug-e, Nagawan Indo-nen-e at-nen lenak pidnak nap iri na-t yongga worosolat woragij-o. Lit unpuruk nurak nap lenak pidnak iri na uruk worala-ge, Nagawan Indo-nen-e Isarael nab-e pempa unuwim nap ininggiyapma-nen wisirik onposolat woragij-o. Nde, it yemndak unpuruk woragolat anggun panggun tak onpogola, yane witli ereba na kulurug-e, Nagawan Indo-ge enabuwa-t kasolat woragij-o.

¹⁹ Alat nde, lit unpuruk noso nap iri na nde wat yosola-ge, ap it woragit lak ma-nen woraiga enpage-ge konak nggal-et nde, it iri na-nen kwarugwi enpage-ge mondok meya irit woraiga-o. Iri yogolar-e, mbal pem nagawan nin ereba nde ndegel pogolat, erembel wanogolat woraiga-o. It-nen meya kwarugwi ereba na kwaril mborogolar-e, it-nen meya kwarugwi iri na keya buruk nden kudtag-e insili yiga-o.

²⁰ Iri kwarogola karuk, Nagawan Indo isilepma Isarael nap enpem posolat-nen yak ondosolar-e: ”An-e it enlem yu onmborak inmin kondosolat, it-nen tena wolmakluk urul yak indigi-t nde, it enlem yu-nen-e inmin kondosolat urul pigi iri na-ge an-nen enpem pigi iri na kwid togolar-e, pok tak pili-o.

²¹ Nde, yawo-ge Yosua wat yosolat wim nap erep o yu me keya inpid yeba-ge an-nen-e mondok langgara wirik inpimin pug-o.

²² An-nen-e wim nap ereba enpem-net Isarael nap yu-ge onmborak-nen kwarugwi nggal an-nen enpem pidnak iri na ndak ndag-et kwaruwa, lak? luk inndi ngarosolar-e, ap ereba enpem-net ngarimin-o” luk yij-o.

²³ Iri luk-nen Nagawan Indo-nen-e wim nap enlem ereba na-ge pinik unduwakluk Yosua ombol nggwe rak pigit lag-o. Alat nde, wim nap ereb-e Nagawan Indo-nen ndag-et nak maga wirik inpigit lak, iri me-t wolmakluk keya enpamu-o. 3:1-31 Pasal 3 yu arem-e kenan pem-et Isarael nap-nen-e Nagawan Indo keya bogola karuk, at-nen-e it endam woragwi nap-nen Isarael nap ereba na urugwe nggwe rak unpuwakluk, keya inpij-o. Iri luk, Isarael nap-nen it yongga unduwakluk Nagawan Indo emengen mbarogola, at-nen-e wim nap ininggiyapmanen wisirik unpuwakluk, Otniel min Eyut min Samnggat min lenak inpij-o.