WENE MBENARUGWI NAP-NEN KWARIDNAK WENE 16 - Nanduk Ngget Tul Pidnak Wene

Simson o Nggasa-nen kwaridnak wene 16:1-3

¹ Misik tarem-e Simson na-ge Pilisin nap unuwi Nggasa nggwe mbiridnggal-e, kwe uwingga mbaroso misik min lambuk luk imin nene yil mbirij-o.

² At na iri me worala-ge, Nggasa woragwi nap-nen kuliganggal-e: ”Simson na-ge yu me worasu-o” yogola kulurug-e, at worasu sa iri na me lop lop worak puruk, o siri iri na pak tumende bem towarak iri-net o nda yij-o. It inndi-nen peragolar-e: ”Mo kona pil wasoma-nen wururak” purug-e, kubu iri na tarem-e untugup yigit lak irit woraiga-o.

³ Alat nde, iri tarem-e Simson iri na-ge iri me nene yigit lag-o. Kubu nggiringgendumu-ge menluk mberarik, o siri pak leget tumende iri na me wok yosolar-e, owak nggok ebem watsa tumende pidnak iri na min-et konoksa keya burug-e, endak pem kud turuk mberarik, Eboron ndik pindik ndobo bem pij-o.

Simson min Ndelila min-nen kwaridnak wene 16:4-22

⁴ Iri kwatluk ombol nggwe-ge Simson na-ge o Sorek iri me woraso kwe misik ebem indi pij-o. Nde, kwe iri na unu-ge Ndelila-o.

⁵ Pilisin iri me woragwi nagawan lima Ndelila eram wok yogolat-nen yak togolar-e: ”Kar-e at-nen idnak amawi iri elem mirik kubuwakluk amberam layekluk emengen mbari-o. Iri-nen amawi iri lak tak pogolar-e ngge kwasa-n lak tak purag-o? luk mirik kubuwakluk emengen mbarurag-o. Iri kwarugunmu nit lobok yogolar-e, kamatluk urugwe nggwe rak puwok-nen-o. Iri kwarugunmu nit ninlit tak lombok-nen perak tol seribu seratus (1.100) wok kurul-o” luk yak tiga-o.

⁶ Iri yak tikma, Ndelila-nen Simson yak tosolar-e: ”Simson wa-e. Kar-e kat kamawi iri-ge no-nen ndowaga-o? Kat kamawi iri lak maklug-e no bem-nen kamat kuburag-o? Kat kamawi yusu kura wene iri-ge mondok para yak niri-o” luk yak tij-o.

⁷ Yak tosola, Simson nen onggo yosolar-e: ”San tuju anggare ngget ki nak tuju bem-net kamat nubuwa-nen perak namawi lak yosolat, we nap nggal-et kwat yimin-o” yak tij-o.

^8-9 Iri yosoloma-ge, Pilisin nap nagawan nagawan ereba na-nen san tuju anggare ngget ki nak tuju Ndelila wok tiga-o. Wok turuk Pilisin nap ereba na-ge o kuri worak misik me woragola, Ndelila-nen-e san tuju anggare ngget ki nak tuju ereya na bem Simson iri na kamarak posoluk yarik, yak tosolar-e: ”Pilisin nap lobok yili-o!” yak tosoloma, ereya na-net kere yeba na-ge mondok ndela bela kan-nen kere sum panggarugwi mende ninggidnak nggal lebena keya bij-o. Iri ala-ge, Simson-nen amawi yusu iri na elem-e enaru buk irit woraiga-o.

¹⁰ Iri ala karuk Ndelila-nen Simson yak tosolar-e: ”A! Kar-e an-e kerengenma nggal tak nuburuk, kenesiget yak nirigenma-o. Ndak yak niri-o, nab-o! No bem-nen kamat kibidnak-nen perak ndulurak meya ma-o?” luk yak tij-o.

¹¹ Yosoloma, Simson-nen onggo yosolar-e: ”An-e kere mondok ngget inik pem-et kamat nobogola-nen perak namawi lak luk, we nap nggal kwat yimin-o” luk yij-o.

¹² Iri yosola-ge, Pilisin nab-e o kuri worak misik me woragola-ge, Ndelila-nen-e kere ngget nak siyak wanuruk, Simson na kamarij-o. Iri rak puruk kwe iri na-nen ene nggoksa yosolar-e: ”Simson wa-e! Pilisin nap lobok yili-o!” yosoloma-ge, ereya na-net kere yeba na-ge kere sum panggarugwi mende yeba ininggi-nen pok tak pugwi nggal nak pok tak pij-o.

¹³ Iri ala karuk Ndelila-nen yak tosolar-e: ”A! Kar-e kerengenma nggal tak nuburuk kenesiget wene yak nirigenma-o. Ndak yak niri-o, nab-o. No bem-nen kamat kibidnak-nen perak ndulurak meya ma-o?” luk yak tij-o. Yak tosoloma, Simson-nen onggo yosolar-e: ”An nanggulsu ut tuju mbok sum yakwi mende kere bem kamarak puruk, kere erep iri na-ge e mbok sum yakwi iri na bem yilik pugunmu-ge, namawi lak yosolat, we nap nggal kwat yimin-o” yak tij-o.

¹⁴ Yosoloma, Ndelila-nen Simson iri na-ge erengen lambururak mende kwarak obosola, nene yosola-ge, Simson anggulsu ut tuju mbok sum yakwi kere iri na bem kamarak puruk ereb-e e sum yakwi iri na bem parik pij-o. Iri rak puruk-nen yosolar-e: ”Simson wa-e. Pilisin nap lobok yili-o!” ene nggoksa yij-o. Iri yosoloma, Simson na men yosolar-e, anggulsu iri na lit kagaidnggal-e, e mbok sum yakwi iri na min kamarak iri na-ge wosoksa labuk yij-o.

¹⁵ Iri ala karuk, Ndelila-nen yosolar-e: ”Kat-nen an yak norosolar-e: ’An-e kat kabuwa kasu-o’ yak nurusu iri na-ge yawo-ge kombol nggwe nak-nen yoso keyagi-o. Kenan pem-et kerengenma nggal tak nuburuk, yawo-nen na: ’An namawi-ge iri nggal-nen yusu-o’ luk yak nurusu bug-o” luk yak tij-o.

¹⁶ Iri nggal kwarosolar-e, pempa Ndelila na-ge ujwa mbarosolar-e, Simson emengen mbal tenak woragij-o. Iri kwarosola-ge, Simson-nen kulurak isili irit yosolar-e,

¹⁷ Simson-nen kura wene iri na para yak tosolar-e: ”An nanggulsu-ge mondok mbarugwi bug-o. An-e Mbal Pem Nagawan amanggim nak lenak wolmakluk, mondok ndesa mbosola-net Nasit nap ala-nen nanggulsu-ge mondok mbarigit lag-o. An nanggulsu nde mbatlepnggal-nen-e mondok namawi lak yosolat, we nap nggal kwat yeleb-o” luk yij-o.

¹⁸ Iri yak tosola-ge, Ndelila-nen perasolar-e: ”Arem nak woraso kura wene iri na-ge yawo-nen yid yu-t kagi” perasolug-e, Pilisin nap nagawan ereba na endam wene wirik posolar-e: ”Kir-e mondok tuguruk yawo nak lobok yer-o. Nde, Simson amawi yoso kura wene iri na-ge abu para yak neramu-o” yosoloma, lobok yogolar-e, Ndelila amanggim uang waruk lobok yiga-o.

¹⁹ Iri lug-e, Ndelila-nen inggi Simson ebem kogo worosola-ge, Simson na-ge Ndelila abem nene yamu-ge, ap misik wene mbo ebamu, Simson anggulsu ut tuju ereya na mbarak pamu amawi lak yosola-ge, kwe iri na-nen andi bandi rak ibij-o.

²⁰ Iri rak puruk ene nggoksa Ndelila-nen yosolar-e: ”Simson wa-e. Pilisin nap lobok yili-o!” luk yak tosoloma-ge, Simson-nen perasolar-e: ”An-e nanduk-nen men yusu ereba na nggal-et men yimin-o” luk peragidnggal-e, mondok ndeyak irit men yij-o. Nde, Nagawan Indo-nen keya ibid iri na-ge ar-e aru buk irit woragij-o.

²¹ Iri yosola-ge, Pilisin nap lobok yogolar-e, tenaguruk erengen kela keya buruk, o Nggasa waruk mbirigarik, posid kere mberen pem kamarak puruk, o kubu me pil ngguruk, yabu-ge nggandum mbato engen mbilarugwi mende kerep iri na ebem pikma engen mbilarosolat woragij-o.

²² Alat nde, at na iri me worasola-ge, anggulsu iri na-ge tuguruk lasolat woragij-o.

Simson wat yidnak wene 16:23-31

²³ Nde, misik tarem-e Pilisin nagawan ereba na-ge it unkugwiwak Ndagon iri na amanggim wam wosa kan pogolat nggok saguwokluk ndok wiriga-o. Iri yogolat-nen ndawi yogolar-e: ”Nit nunkugwiwak-net nit nunuwim nap Simson iri na-ge urugwe nggwe rak puruk ombol nggwe rak ninpij-o” luk yiga-o.

^24-25 Nde, it na enalin enalen kagolat-nen yogolar-e: ”Simson iri yu me waruk lobok yer-o. Pesel obogolat nda tuwok-nen-o” yogola-ge, it-nen-e Simson iri na-ge o kubu me-nen waruk lobok yigarik, pesel obogolat nda tiga-o. Iri yogolar-e, Simson iri na-ge o owak ndum nggok nin wok nin wok iri na me mendak uburuk, ap kwarat ereba na-nen Simson yik karug-e, it unkugwiwak Ndagon iri na nak erembel wanogolat ndawi yogolar-e: ”Nit nunkugwiwak-nen-e nit nunuwim nap nit nunuwi komorosolat, nit nap kwarat ondosolat kwaroso iri na urugwe nggwe rak puruk nir-et ombol nggwe rak ninpij-o” luk unkugwiwak erembel waniga-o.

²⁶ Iri yogola, Simson-nen liap at inggi waruk nusu iri na yak tosolar-e: ”Ninggi tena iri keya nibi-o. O yu owak undum ya tena bimindik, nggularak watsa woramin-o” yak tij-o.

²⁷ Nde, o iri na-ge ab-e mondok kobongsa nggwigarik woraiga-o. Nde, Pilisin nap nagawan lima ereya na iri me-t woraiga-o. Nde, silabaga abam iri me woraiga-ge enpe-ge tiga ribu (3.000) woraiga-o. It oboksa-nen Simson yik kagolar-e, pesel obogolat irit woraiga-o.

²⁸ Iri tarem Simson-nen tepan yosolat-nen yosolar-e: ”Nagawan Indo Kek tak wa-e. Kindi an yebet niyi-o. Mbal Pem Nagawan wa-e. Pilisin nap-nen an nerengen kiliga nemepnggo beyek-nen yawo nak tuguruk kamawi wok niri-o” luk emengen mbarij-o.

²⁹ Iri lug-e, Simson-nen o owak undum enggendumu sindik ereya inggi kigit nggwe-ge misik tena, nde, inggi kware nggwe-ge misik tena iri sa tenaburug-e,

³⁰ at-nen ene nggoksa yosolar-e: ”An-e Pilisin nap yeba inmin-et wat yeg-o” yosoluk, o owak undum enggendumu ya na amawi min-et wat kagaidnggal-e, o iri na tud yosolar-e, Pilisin nagawan lima ya na min-et ap kwarat ereba na inmin-et tebel inpij-o. Iri yosolar-e, Simson iri na min-et wat yij-o. Alat nde, Simson uruk woralat-nen ap indij-e mariger-et nde, at wat yosolat iri-nen indij-e mondok terak minik irit indij-o.

³¹ Nde, Simson na wat yamu-ge, owe owot nde imi ambara nde Simson orogak iri na wil lobok yiga-o. Waruk mbirigarig-e, at eid Manoa yapma pidnak sa iri na me-t yapma ibiga-o. At yapma ibidnak sa iri-ge o Sora wok o Esitaol wok enggendumu iri me-o. Nde, Simson-nen Isarael nap lit unpuruk nosolar-e, olengen dua pulu irit woragij-o. 17:1–21:25 Pasal 17 kuri-nen Pasal 21:25 kuri engga yu woroksa pasal ereba na arem-e Isarael nap ennggendumu nagawan len inpigit lak ma-nen kwaril mbiriga wene-ge mbarak worasu-o.