WENE MBENARUGWI NAP-NEN KWARIDNAK WENE 14 - Nanduk Ngget Tul Pidnak Wene

Simson-nen Timna kwe ndugum misik indi ebem pid wene 14:1–15:8

¹ Misik tarem-e Simson na-ge Timna mberarig-e, Pilisin kwe ndugum mbi kagaij-o.

² Karuk, tuguruk oma lobok yosolar-e, eid ija yak ondosolar-e: ”An-e Timna woraso kwe ndugum mbi nindi ebem pigirik me, neid min niya min kit-nen wok niril lobok yobokluk yak kundusu-o” yak indij-o.

³ Alat nde, eid min ija min-nen yogolar-e: ”Pilisin nab-e Nagawan Indo ilirag-e lak yu-t nde, noluk-nen Pilisin nap endam mbutluk-nen kwe imin lobok yurak yusu-o? Nit nenlem nap ennggendumu min Isarael nap ennggendumu min kwe kat wanurak ndak ndag-e lak ala-n wanugun-a?” luk yak tiga-o. Iri yogola, Simson-nen eid onggo yak tosolar-e: ”An-e Pilisin kwe irit nindi ebem pigirik me, neid kar-e irit wok niril lobok yurak perasu-o” luk yij-o.

⁴ Nde, Nagawan Indo-nen no bem-nen Pilisin nap inmin wim mbarurak? tu kore yosolat me, Nagawan Indo-nen Simson arem yabu wanosolat-nen kwarusu iri na-ge Simson eid ija-ge kabak woraiga-o. Nde, ereya tarem-e Pilisin nap-nen Isarael nap teberak unpuruk woraiga-o.

⁵ Nde, Simson iri na-ge eid ija inmin Timna mborosolar-e, anggut yabu misik nggwe mborogolar-e, Simson iri na-ge singa ndakngge kusi misik karuk urum ene ngol yosola kulij-o.

⁶ Ereya na-net Nagawan Indo-nen amawi rak posola-ge, ap-nen kambing amarik lebena keya bugwi nggal singa iri na-ge inggi bem-nen nak lebena keya bij-o. Nde, iri kwarid iri na wene-ge eid ija-ge mondok yak indigit lak yij-o.

⁷ Iri lug-e Simson na-ge kwe ndugum iri na eram mberarik, imin wene ndorosolar-e, indi ebem pij-o.

⁸ Iri kwatluk siyak woraruk, kwe iri na wok uburak mborosolar-e, tu keya buruk, singa ndakngge worak pid iri na kil kil mbiridnggal-e, singa orogak iri na arem-e tamuk ija kwiye worak amburu min-et karug-e,

⁹ inggi pil nggwarik, amburu iri na wanurug-e, nil nil mberarik, eid ija endam wok yosolar-e, mak endamu, ningga-o. Nde, Simson-nen-e: ”Amburu yu-ge singa orogak arem-nen wanigirig-o” luk iri na mondok yak indigit lag-o.

¹⁰ Nde, Simson eid iri na kwe ndugum iri na ama wok yosola-ge, o iri me-nen ap sujwe-nen kwe wanogolat-nen kwarugwi kwarosolar-e, mondok nggok sagij-o.

¹¹ Nde, Pilisin nap-nen Simson karug-e, at imin nogolat wolmakluk ap sujwe nak tiga pulu (30) lenak inpiga-o.

¹² Iri yikma, Simson-nen ap sujwe ereya na yak ondosolar-e: ”An-nen wene ombol mbarak wene misik yak kindimin nde, ludsa-t yogola-ge, linen sum abak miniya miniya kinlit tak wok kondosolat, yurugwi sum kinnggiri sum min kenpare sum min kinlit tak wok kondosolat kwarimin-o. An kwe wanosolat tuju bem nggok sagosolat ya worala-ge, ombol mbarak wene iri ebe para yurag-o.

¹³ Kit-nen nde para yigit lak ala-ge, kinlit wosa linen sum abak miniya miniya min yurugwi sum nebare sum nde ninggiri sum nde min-et an wok nurugub-o” luk yak indij-o. Yosoloma, Pilisin nap-nen yogolar-e: ”Ob-o. Iri ala-ge, ombol mbarak wene iri ebe yi-o” yak tiga-o.

¹⁴ ”Naso iri na bem-nen-e nunggwi mende nam yij-o. Nde, amawi worak iri na bem-nen-e undu konak mende nam yij-o” luk yak indij-o. Yak endamu o kenan pem-et kore yogolat woraiga-t nde, ombol mbarak wene iri na-ge ebe para yurak meya yij-o.

¹⁵ Iri ala karuk empat pem tak pogolar-e, it-nen-e Simson ogwe iri na yak togolar-e: ”Ombol mbarak wene iri na nit yak nunduwak-nen kat-nen kun emengen mbari-o. Kat-nen nde ebe para yak nindigit lak ala-ge, kat min keid kiya enma woragwi nap inmin oboksa kan kunpul-o. Kir-e nit yonggo ninpigeb-e nit nenarengge mende nak ondoro rak purak yonggo ninpigeb-a?” luk yiga-o.

¹⁶ Iri yogola, Simson ogwe iri na yip-nen un eram mborosolat-nen un yak tosolar-e: ”Kar-e mondok an nabuwa kasu buk keyagi-o. Kat-nen-e ombol mbarak wene an nanggamirak yak indigen-et nde, ombol mbarak wene iri ebe-ge iri nggal-o luk para an yak nurusu bug-o! Ndemeret kar-e an-e kisili-t kagi-o” yak tij-o. Yosoloma, Simson-nen yosolar-e: ”Irit nde, an nondomok neid niya-t nde, yak undusu bug-o. Noluk-nen kar-e yak kururak yusu-o?” luk yak tij-o.

¹⁷ Nggok sakolat tuju bem ereya na woragolar-e, Simson ogwe iri na-ge wene iri na yak turak tak puruk, yip-nen ujwa mbal tenak woragij-o. Iri ala karug-e, tuju bem tak pogolar-e, ombol mbarak wene iri na ebe-ge para ogwe yak tij-o. Iri yamu-ge at-nen-e Pilisin nap yak indij-o.

¹⁸ Iri yamu, tuju bem tak pogolar-e, mo wusa mbigit lak ma o iri me woragwi nap-nen Simson yak togolar-e; ”Tamuk amburu undu konak iri ombol pem undu konak terak minig-e no mende-o? Singa ndakngge teberak puruk, mondok amawi worag-e no mende-o?” yogoloma-ge, Simson-nen onggo yosolar-e: ”An nogwe iri lak nggal-nen-e ombol mbarak wene ebe iri-ge yelep pug-o!” luk yak indij-o.

¹⁹ Ereya na-net Nagawan Indo amawi-nen Simson amawi rak posolar-e, Simson iri na-ge Askelon mbirij-o. Mberarig-e, ap sum konak nak yirik tiga pulu (30) indij-o. Unduruk unsum ereba na yonggora wanuruk lobok yosolar-e, ap tiga pulu (30) ombol mbarak wene ebe yiga ereya na wok indij-o. Iri lug-e, ama mborosolar-e, kwat ibiga ereba na bem isilepma kundugu irit mbirij-o.

²⁰ Worala-ge, abak-nen-e kwe na-ge Simson min kwe iri wanosolat enanggul tenakolat tarem at eram mendak woragid nap iri na wok tij-o.