WENE MBENARUGWI NAP-NEN KWARIDNAK WENE 13 - Nanduk Ngget Tul Pidnak Wene

Simson ndet yidnak wene 13:1-25

¹ Isarael nab-e tugurug-et Nagawan Indo imin meya kwarogola-ge, Nagawan Indo-nen kegera Pilisin nap ininggem enpamu, Pilisin nap-nen yemen unpuruk woragolar-e, olengen empat pulu (40) woraiga-o.

² Nde, ereya tarem-e o siri Sora iri me-ge ap misik unu-ge Manoa woragij-o. At elem-e Ndan, nde, ogwe-ge yibiri irit woragij-o.

³ Alat nde misik tarem-e Nagawan Indo-nen idnak aid nap misik nam luk-nen kwe iri na yak tosolar-e: ”Nde, kar-e la lak woraso-t nde, yanem-et kabila luk, liap misik ndakun-o.

⁴ Iri bem-e kat mondok kondomok-nen ndegel korasolar-e, anggut engen amburu min enanggul nden kaso mende min norak puk mende erep min-et mondok norak pug-o.

⁵ Nde, kambara iri nde ndakundig-e, la iri-ge mondok ndagidnak tarem-net Nagawan Indo amanggim nak lenak wolmomtak nap (Nasit nap) me, anggulsu-ge mondok mbarurak pug-o. At-nen-e Isarael naba-e Pilisin nap ininggiyapma-nen wisirik unpurak amawi kunduwa-o” luk yak tij-o.

⁶ Iri yak tosoloma-ge, Manoa ogwe na-ge un eram mberarik, un yak tosolar-e: ”Mbal Pem Nagawan-nen wirik ibil lobok yidnak nap mbi an neram lobok yarig-o. Nde, abage-ge Mbal Pem Nagawan-nen idnak aid nap abage nggal-et ala-ge, an-e kwiye kagi-o. Nde, an-nen: ’Kar-e ngge me-nen lobok yigendig-o?’ luk kin-e wok ibigit lag-o. Nde, at-nen na unu-ge yak nirigit lag-er-o.

⁷ Alat nde, at-nen an yak norosolar-e: ’Kar-e kabila luk liap misik ndakun-o. Nde, la iri woralar-e, Mbal Pem Nagawan amanggim nak lenak wolmomtak nap Nasit nap me, kar-e anggut engen amburu min enanggul nden kaso min norak puk mende erep min-et norak pug-o’ luk yak nirij-o” luk yak tij-o.

⁸ Yak tosola kulurug-e, Manoa na-ge Nagawan Indo emengen mbarosolar-e: ”Nagawan Indo wa-e. Kat ndegel koboso nap iri-ge la obok yigen iri ndaguruk-nen kwat uburak wene ereba tuguruk yak nuruwak-nen ndegel koboso nap iri-ge pil lobok yi-o, nab-o” yak tij-o.

⁹ Mbal Pem Nagawan-nen-e Manoa-nen nggi yid iri na kulurug-e, Nagawan Indo-nen idnak aid nap iri na-ge Manoa ogwe iri na-ge un abalma arig-et yapmu koreyak worasoma, eram lobok yij-o.

¹⁰ Lobok yosola-ge, kwe iri na-ge un eram mberarik-nen yak tosolar-e: ”Kil mbiri-o. Ap nanduk an neram lobok yid iri na-ge tuguruk lobok yarig-o” yak tij-o.

¹¹ Yosoloma-ge, Manoa na-ge kil ogwe imbirik mbirij-o. Mberarik, ap iri na yak tosolar-e: ”Nab-o. Nanduk an nogwe eram wene waruk lobok yigen na-ge kar-et, lak?” luk kin wanosoloma-ge, ”An-ner-o” luk yak tij-o.

¹² Yosoloma, Manoa-nen yak tosolar-e: ”Nap kat-nen yigen iri nde kwat yosola-ge, la iri-nen-e abog-e no kwaruwa-o? Nde, at abok woralar-e, ngge kwasa wolma-o?” luk kin wanij-o.

^13-14 Kin wanosoloma, Nagawan Indo-nen idnak aid nap iri na-nen onggo yosolar-e: ”Kogwe iri-ge anggut engen amburu min enanggul nden kaso mende min iri-nen anggut-nen konidnak mende erep min norak puk mende min-et mondok norak pug-o. An-nen at yak tigi mende oboksa kwarosolat wolmag-o. Mondok misiget keya bigit lak, oboksa kwarosolat wolmomtag-o” luk yij-o.

¹⁵ Yosoloma, Manoa-nen yak tosolar-e: ”Nab-o. Kar-e yu me yik neneyarok wolmin-o. Nir-e kambing mendaso misik saga wok kurul-o” yak tij-o.

^16-17 Alat nde, Nagawan Indo-nen idnak aid nap iri na-nen yosolar-e: ”An-e yu me-t yik keneyarok woramin-et nde, kit-nen mak nurugup iri-ge namin pug-o. Alat nde, kit-nen nde saga purak yogolar-e, Nagawan Indo amanggim kan purag-o” luk yak tij-o. Alat nde, Manoa-nen-e yu-ge Nagawan Indo-nen idnak aid nap-nen yusu-o luk kabak irit woragij-o. Kabak iri-nen ndowaga Manoa-nen Nagawan Indo-nen idnak aid nap iri na yak tosolar-e: ”Iri ala-ge, kat-nen urul yak nirigen ereba kwat yosola, kat kunu kek tak peyek-nen kunu yak niri-o” luk yak tij-o.

¹⁸ Yosoloma, Nagawan Indo-nen idnak aid nap iri na-nen kin wok obosolar-e: ”No manggim kar-e an nunu yak kururak yusu-o? An nunu-ge Kwiye Worak-nen yusu-o” luk yak tij-o.

¹⁹ Iri lug-e, Manoa-nen-e kambing marik mendaso misik min nggandum mbato siyak min kerep pem puruk, Nagawan Indo Kwiye Worak Kwaroso iri na amanggim kan pij-o.

^20-21 Nde, Mbal Pem Nagawan amanggim kan pugwi sa iri na pagosola-ge, Manoa ogwe min-nen yik karok worakmu-ge, Nagawan Indo-nen idnak aid nap iri na-ge kan amare bem-nen mbal nggwe lasola yik kaiga-o. Karuk-nen perak Manoa-nen perasolar-e: ”Yu na-ge Nagawan Indo-nen idnak aid nab-er-o” luk aru lug-e, at ogwe min-e entare nggwe tud luk erembel waniga-o. Iri luk ombol nggwe-ge Nagawan Indo-nen idnak aid nap iri na-ge mondok imbiri kagit lag-o.

²² Nde, Manoa-nen ogwe na yak tosolar-e: ”Nir-e Mbal Pem Nagawan kaigerik me, mondok wat mul-o” luk yak tij-o.

²³ Yosoloma, ogwe iri na-nen un yak tosolar-e: ”Nagawan Indo-nen nde ndemeret nendeyekluk nggal-nen-e nit-nen amanggim pige iri-ge keya beleb-o. Iri-nen at-nen yak nindid yeba oboksa mirik ninpigit lak yosolat kwatleb-o” luk yak tij-o.

²⁴ Iri luk ombol nggwe waneya siyak worarug-e, Manoa ogwe iri na-ge liap misik ndagurug-e, unu-ge Simson yarij-o: Nde, la na nggok yosola-ge, Nagawan Indo-nen imbiringgat tak ibij-o.

²⁵ Nde, la iri na-ge at elem nap Ndan woragwi sa o Sora wok Esitaol wok iri na me worala-ge, Nagawan Indo Indi-nen-e amawi ebem poso tel kwirij-o.