WENE MBENARUGWI NAP-NEN KWARIDNAK WENE 11 - Nanduk Ngget Tul Pidnak Wene

Yepta-nen ”Irit kwarimin-o” luk owak mbaridnak wene 11:29-33

²⁹ Iri lug-e Nagawan Indo Indi-ge Yepta ebem mbuwasolar-e, Yepta na-ge o Nggileat min Manase min ereba nggwe kil mberarik, tuguruk Nggileat nggweyak pem o Mespa lobok yij-o. Nde, iri me-nen-e nok Amon nap onnggweyak nggwe irit mbirij-o.

³⁰ Nde, Yepta-nen Nagawan Indo imin urul posolar-e yu nggal yij-o: ”Nagawan Indo wa-e. Kat kindi-n pidnak pem nde Amon nap nde urugwe nggwe rak inpimindik,

³¹ tuguruk nurug-et lobok yosolar-e, ta-nen nde nandug-et nama-nen wurungsa an nabuwok lobok yuwa iri-ge wosa Nagawan Indo kat kamanggim kan pimin-o” luk owak mbarij-o.

³² Iri yosolug-e, Yepta iri na-ge Amon nap inmin wim mbaril Yi Yareren eyak ele bem ndil lagarik, Amon nap inmin wim mbarosola-ge, Nagawan Indo-nen-e Yepta ombol nggwe rak ibij-o.

³³ Nde, Yepta-nen it yigisa lak tak onposolar-e, o Aroet kuri-nen mberarik o Minit wi inggi inggi ereba na kuri irit urugwe nggwe rak inpij-o. Oboksa-ge o siri dua pulu irit lak tak onposolar-e, o Abel-Keramin kuri irit lak tak paga pil mbirij-o. Iri kwarosolar-e, Amon nap kwarat indij-o. Iri nggal kwasa Amon nab-e urugwe nggwe rak enpamu, Isarael nap enambigit nak tebe yiga-o.

Yepta ara ndugum wiridnak wene 11:34-40

³⁴ Nde, Yepta wim ngguruk, tuguruk o Mespa lobok yosola-ge, ara ndugum iri na-ge poba erebana ene rak posolat lel kil kil-e kot kil eid abi wil lobok yij-o. Nde, ela iri-ge mondok misiget nak nderag-o.

³⁵ Nde, Yepta-nen yik kagaidnggal ara iri na nde karug-e, indi puru kwarat yosolar-e, abare sum iri na mondok ndela bela keya bosolat-nen yosolar-e: ”O! Nara wa-e. Mondok nindi abi kalak pusu-o! Noluk-nen kar-e an nindi andi rak pusu-o? Nde, an-e Nagawan Indo imin ’Irit kwarimin-o’ luk owak mbaridnak me, tuguruk larok yurag-e meya-o” luk yij-o.

³⁶ Yosoloma, ara ndugum iri na-nen eid yak tosolar-e: ”Neid wa-e. Kat-nen Nagawan Indo imin ’Irit kwarimin-o’ luk owak mbara urul posola-ge, neid kat kuwim nap Amon nap-nen meya kwat kubugwi ereba na kat-nen kemepnggo kwat unpurag-e Nagawan Indo-nen ob-er-o luk kebem pidnak me, kat-nen ’Irit kwarimin-o’ owak mbarigen iri-ge mondog-et kwat nuburag-o” luk yak tij-o.

³⁷ Yosoluk la kwe iri na-nen yosolar-e: ”Nab-o. Wene misiget yu nak perak nde ’Ob-er-o’ luk yak noronok-nen kebem nggi yusu-o, Waneya mberen-et nak wok niri-o. Iri yugunmu, waneya mberen ereya arem woralar-e, o ndobo worak ereba nggwe nanggamirak ligwami erep inmin waring kul-o. Iri yogolar-e, an-e awo nundugum pem-et wat yurak me, nubud yip til waring kagolat wolmog-en-o” luk nggi yak tij-o.

³⁸ Yosoloma, eid-nen-e waneya mberen ereya na arem waring kasolat wolmakluk, lerak obosoloma, mbirij-o. Nde, kwe ndugum iri na anggamirak inmin ndobo worak ereba nggwe mbirigarig-e, Yepta ara iri na-ge ap na wanigit lak, la na ndakit lak irit wat yurak ala karuk, inndi puru-nen yip mak til nogolat woraiga-o.

³⁹ Iri kwaril nuruk, waneya mberen ereya na lak yosola-ge, la kwe iri na-ge eid eram tuguruk lobok yosola-ge, eid iri na-nen-e Nagawan Indo imin ’Irit kwarimin-o’ luk urul posolat owak mbarid iri na ndak ndag-et kwat ibij-o. Iri kwat obosola, la kwe ndugum iri na-ge awo ndugum pem irit wat yij-o. Elem iri kwaridnak pem-nen Isarael nap ennggendumu kweyap ndugum-nen-e yu nggal kwarugwi-o.

⁴⁰ Kweyap ndugum-nen-e o Nggileat nap Yepta ara iri-nen kwarid iri na yebet kagolar-e, olengen irit wosa mbutluk empat pem woragolar-e, inndi puru yogoluk, yip togolat woraruk lobok yugwi-o. 12:1-15 Pasal 12 yu arem-e Yepta min Eperaim nap min-nen wim mbariga wene min wene mbenarugwi nap erep min-nen kwaridnak wene min mbarak worasu-o.