IBERANI 9 - Nanduk Ngget Tul Pidnak Wene

Nggweyak ma-nen na, aid arem-nen na Mbal Pem Nagawan erembel wanugwi wene 9:1-22

¹ Nanduk urul pidnak wene na bem-e, Mbal Pem Nagawan erembel wanogolat-nen kwarugwi kwarugwi min ki nap ininggi-nen wiridnak Mbal Pem Nagawan erembel wanugwi min na woragaij-o.

² Sum-nen wiridnak wi iri na worogolar-e, kuri wosa mberen tak purug-e, nggugwi sa nggwe iri-ge unu yarogolar-e, ”O Marak Sa-o” luk yariga-o. Nde, o ma iri me-ge tal owak min e ndamak min Mbal Pem Nagawan amanggim pugwi oroti min woragaij-o.

³ Nde, sum timnik ombol nggwe iri me sum-nen wiridnak kuri worak misik iri na unu-ge ”O Mondok Marak Sa-o” irit woragaij-o.

⁴ Nde, o ma iri me-ge emben worak mende kan pugwi sa emas-nen konidnak iri min emas-nen mbeyoksa keya bidnak labu mbarak iri min woragaij-o. Nde, Mbal Pem Nagawan-nen urul pidnak wene labu mbarak na arem-e no mende mburu yarak emas-nen konidnak yimbe na min Arun owangun isit mbiridnak iri na min Mbal Pem Nagawan-nen imiri mbarak pidnak wene sepulu mbaridnak kerep abak mberen iri na min-e labu mbarak iri arem yarak woragaij-o.

⁵ Nde, labu mbarak na ombol pem-e abinal worak aid nap ndak worak iri ponok ponok woragaij-o. Nde, aid nap iri enlap labe erep kwindik worala, ap-nen meya yogolat woraidnak korak poso sa iri-ge indipma rak piga-o. Alat nde, iri wene oboksa yawo-t kwara ndindera yurag-e meya-o.

⁶ Iri nggal kwasa konurug-e, tepan omborak-nen-e it eneyabu wanuwakluk sum-nen wiridnak wi mondog-et nggugwi sa iri me pempa nggwerenak woragwi-t nde,

⁷ sum-nen wiridnak wi kuri worak ponok nggwe iri me-ge at tepan ombo nggulok ariget nak, o lengen misiget pem-e misik tarem nak nggosolat woraso-o. Iri me nggosolar-e, lomba wam eyabi wanuruk at ondomok amanggim na, it ap iri-nen-e an-e meya-t nde kwarusu-o luk peragit lak ma meya yogolat woraidnak amanggim na Mbal Pem Nagawan amanggim eyabi poso-o.

⁸ Iri kwarogolat woraidnak mende iri bem Konak Indi-nen mirik nonposolar-e, sum-nen wiridnak wi mondog-et nggugwi sa iri na worala-ge, O Mondok Marak iri me nggurak tu-ge awo kuwak yigit lak worasu-o luk nam-et nak mirik nunpusu-o.

⁹ Nde, iri-ge yawo worali ut mimirik-nen yusu-o. Iri-nen yogolar-e, Mbal Pem Nagawan amanggim pugwi min wam wosa eyabi Mbal Pem Nagawan amanggim pugwi min-nen-e Mbal Pem Nagawan amanggim poso nap indi iminep mbarak purag-e meya-o.

¹⁰ Nde, Mbal Pem Nagawan amanggim pugwi iri-ge nunggwi mende nde, yi nunggwi nde, yi mende ndi mende yi marugwi wene nde iri-ge we enaboro-nen kwarugwi mende-o. Iri kwarugwi iri-ge kwat tenag-et worakmu, Mbal Pem Nagawan-nen ngget kwarak puwa tarem wok yosola-nen keya burag-o.

¹¹ Alat nde, Kerisut lobok yid iri-ge abok-nen nam momtak konak mende iri bem tepan ombo nggulok irit lobok yij-o. Nde, at-nen eyabu wanoso sa sum-nen wiridnak wi iri perak nde, terak minik nggulok iminep mbarak-nen yusu-o. O iri-ge ki nap ininggi-nen wiridnak wi-ge lag-o. Nde, iri-ge, nggweyak ma yu me ndak worak pidnak mende bem-nen wiridnak uwi-ge lag-o.

¹² Nde, Kerisut na-ge sum-nen wiridnak wi O Mondok Marak Sa iri me nggosolar-e, pem-et woralik nalik momtak pem misik pem na nggwij-o. Iri me nggosolar-e, kambing wam eyabi nde sapi wam kusi marik eyabi nde Mbal Pem Nagawan amanggim peyekluk waruk nggwigit lag-o. Are, at ondomok eyabi waruk nggosolar-e, nit nunlug-et pem-et woralik nalik wolmakluk, weserak ninpij-o.

¹³ Nde, kambing wam kusi eyabi min sapi wam kusi eyabi min sapi wam marik kan pidnak mabe min-e wene kuruk tidnak nap enpem nggweyel kagola-ge, it enaboro-ge marak onposo-t nde,

¹⁴ Kerisut eyabi-nen-e terak minik irit kwat nonposo-o. Nde, Kerisut-nen at ondomok indi wesera Mbal Pem Nagawan amanggim posolar-e, mondok iminep mbarak mende pid iri-ge urug-et pem-et woralik nalik woraso Konak Indi bem-net pij-o. At eyabi-nen-e nir-e ebe lak mende kwarugwi ninndi iri na mat nunpuruk, nir-e uruk nak woraso Mbal Pem Nagawan na ndegel tenak wolmakluk, marak nunpurag-e ndag-o.

¹⁵ Iri bem-e, Kerisut-nen-e ki nap min Mbal Pem Nagawan min ennggendumu ngarak koro yosoluk, urul pidnak wene ngget misik kwat yid iri-ge, it Mbal Pem Nagawan-nen wene mbo inpidnak nap-nen-e Mbal Pem Nagawan-nen imbiringgat pem-et wolmomtak urul pidnak iri wanuwakluk kwat yij-o. Nde, nanduk tul pidnak wene na tena woragolat-nen meya yogolat woraidnak iri na lak tak posolat-nen Kerisut wat yid iri bem-nen pidsa ndak kwat yusu-o.

¹⁶ Arengge nggawi mbara engga bem pidnak mbi worala-ge, arengge nggawi mbarak engga pid nap yu-ge war-et yamu-o luk peragwi-o.

¹⁷ Nde, angge nggawi mbara engga bem pidnak nap na wat yigit lak worala-ge, engga iri-ge ebe lak mende-o. Nde, arengge nggawi mbara engga bem pidnak nap iri na wat yosola-nen perak nde engga na ebe kwat yusu-o.

¹⁸ Iri ala-nen nanduk tul pidnak wene iri-ge eyabi bem nak-nen ebe worak tak poso-o.

¹⁹ Nde, Musa-nen-e imiri mbarak pidnak wene bem-nen ”Iri nggal kwaru-o” yidnak wene oboksa-ge Isarael nap iri na yak ondosoluk, at-nen-e sapi wam marik eyabi min kambing wam kusi eyabi min wanuruk, yi amburu puruk, lomba wam usu mimi min isop angga min ebem puruk, eyabi iri-ge imiri mbarak pidnak engga na bem nggweyel karuk, ap ereba na oboksa enpem nggweyel kagaij-o.

²⁰ Nggweyel kasolat-nen Musa-nen yosolar-e: ”Kit pidsa-nen kwarobokluk Mbal Pem Nagawan-nen urul pidnak wene iri ebe worak tak poso eyabi-ge yur-o” luk yij-o.

²¹ Iri nggal kwasa-t sum-nen wiridnak wi ebem na irit, Mbal Pem Nagawan erembel wanogolat-nen wanugwi mende pidsa ebem na irit, eyabi nggweyel kagaidj-o.

²² Ndemerer-o. Imiri mbarak pidnak wene-nen yidnak yidnak kwarogolar-e, yi mende ndi mende oboksa-ge eyabi bem nak-nen mbek tak poso-o. Nde, eyabi wirik pidnak pem nak-net ap-nen meya yogolat woraidnag-e amberam tak poso-o.

Kerisut at eyabi pidnak pem meya yidnak lak tak poso-o 9:23–10:18

²³ Iri mende iri-ge ebe-ge aid arem worala-t nde, we amorok ndak worak iri-ge eyabi iri nggal kwasa ebem nggweyel kaidnak pem-nen mbek tak poso-o. Alat nde, ebe aid arem worasu iri perak nde, iri mbek tak purak pem-e Mbal Pem Nagawan amanggim wam eyabi wirik pugwi iri nggal-e lag-o. Are, Mbal Pem Nagawan amanggim wosa pugwi mende terak minik konak iri nak-net mbek tak poso-o.

²⁴ Nde, Kerisut-nen O Mondok Marak Sa iri me nggwid iri-ge, ininggi-nen wiridnak wi iri na me nggwij-e lag-o. Nde, ininggi-nen wiridnak wi iri-ge ndemeret wi-ge aid arem worasu iri ut mimirik-nen yusu-o. Alat nde, at-nen-e aid arem iri me-t nggwij-o. Nggwarig-e, nit nonowene mbarurak pem ar-e yawo-ge Mbal Pem Nagawan eram worasu-o.

²⁵ Yawuri nap tepan ombo nggulok iri-ge O Mondok Marak Sa iri me nggosolar-e, olengen irit wosa misik tarem nggosolat, iri nggal pempa nggwerenak woralar-e, wam eyabi min nak nggoso-o. Alat nde, Kerisut-e O Mondok Marak Sa iri me nggosolar-e, at eyabi-ge kwarat pem wirik peyekluk nggwigir-e lag-o.

²⁶ Kwarat pem wirik peyekluk-nen nggwidnggal-e, nggweyak yu ndak worak pid kuri-nen kwarat pem yane wat tenak woraleb-o. Alat nde, i worok tak purak tarem panggo yidnak worali yu tarem-nen Kerisut-e misik pem nak nam yid iri-ge at-net at iminep wesel koraruk, meya yogolat woraidnak iri-ge mondok lak tak peyekluk-nen nam yij-o.

²⁷ Ab-e misiget pem nak wat yugwi-o. Nde, wat luk ombol nggwe-ge enpem wene mbarurak worasu-o.

²⁸ Iri nggal-et Kerisut-e ap kwarat-nen meya yogolat woraidnak iri lak tak peyekluk, misiget pem nak at eyabi-ge Mbal Pem Nagawan amanggim pamu-o. Nde, ar-e mberen pem tak posolat abok nam marig-e, ap-nen meya yogolat woraidnak waneyekluk nam ma-ge lag-o. Are, at lobok yuwa-o luk yik karok woraidnak nap inmiri yurak pem nam ma-o.