IBERANI 7 - Nanduk Ngget Tul Pidnak Wene

Tepan ombo Melkisendek 7:1-14

¹ Nde, Melkisendek iri-ge o Salem nagawan yosolat, Mondok Kek tak Woraso Mbal Pem Nagawan-nen idnak tepan ombo irit woragaij-o. Woralar-e, Abaram na-ge ap nagawan nagawan inmin wim mbatluk, unduruk lobok yosola-ge, Melkisendek iri-nen at imin lid pid luk Abaram na imbiringgat tak pij-o.

² Nde, Abaram-nen Melkisendek wok tosolar-e, at arengge pidsa enggep lombok wonasa sepulu sepulu rak puruk, karetkwe-nen yidnak ndok wosa Melkisendek wok tij-o. Melkisendeg-o nanduk nandug-er-e: ”Lud tak nak yoso Nagawan-o” luk yogolar-o. Nde, iri-nen ar-e o Salem iri me nagawan ala karuk, at unu misig-e: ”Ap Lambuk tak Onposo Nagawan-o” luk yogolar-o.

³ Melkisendek na-ge eid ija unnu na lak, eid ombo unnu na lak, at ndet ibidnak wene na lak, at wat yidnak wene na mondok lag-o. At iri-ge Mbal Pem Nagawan Ambara nggal me, pem-et woralik nalik wolmomtak tepan ombo-nen yusu-o.

⁴ Iri ala-ge, Melkisendek iri-ge ap kek tak iri ker-o. Nonmbo kek tak Abaram na-nen-e wim kugun pem wanidnak silobulo konak nak iri na karetkwe-nen yidnak oboksa ndok wosa ap iri na wok tij-o.

⁵ Nde, tepan omborak lenak inpidnak nap Lewi-nen wigarak nap iri-nen-e Musa-nen imiri mbarak pidnak wene-nen yidnak yidnak kwarogolar-e, Isarael nap ininggem woraidnak silobulo iri wonasa sepulu sepulu rak puruk karetkwe-nen yidnak oboksa ndok wosa wanogolat woragwi-o. Iri wanogolar-e, it ondomok onowe onowot iri-ge Abaram-nen wigarak misiget nde, insilobulo pogola, wanugwi-o.

⁶ Nde, Melkisendek na-ge Lewi-nen wigarag-e lag-et nde, Abaram isilobulo karetkwe-nen yidnak sepulu sepulu rak pidnak iri na posola, wanij-o. Wanurug-e, Abaram-e Mbal Pem Nagawan-nen urul paga yak tidnak nab-et nde, Melkisendek-nen imbiringgat tak pij-o.

⁷ Wene yu-ge lugud tak purak puk wene-o. Ap kek tak iri-net ap teberak imbiringgat tak unpugwi-o.

⁸ Nde, sepulu sepulu rak puruk karetkwe-nen yidnak wanugwi tepan omborak iri-ge wat yugwi nap-net nde, wanugwi-o. Alat nde, Mbal Pem Nagawan engga bem-nen yosolar-e, karetkwe-nen yidnak Melkisendek-nen wanid iri-ge uruk nak woraso nap-nen wanij-o.

⁹ Nde, Lewi iri-ge karetkwe-nen yidnak wanoso nab-et nde, Abaram ebem nggwe-nen karetkwe-nen yidnak ndok wosa Melkisendek wok tid iri-ge, Lewi-nen Melkisendek wok tij-o luk iri yurag-e ndak-nen yusu-o.

¹⁰ Nde, Melkisendek-nen Abaram imin lid pid yiga tarem-e, Lewi na awo ndakit lag-et nde, ombo Abaram arem worasola-nen lid pid yiga-o luk yurag-e ndak-nen yusu-o.

¹¹ Musa-nen imiri mbarak pidnak wene iri-ge tepan omborak Lewi-nen wigarak iri enpem-nen wene iri-ge Isarael nap wok endamu-o. Nde, tepan omborak Lewi nap iri-nen-e it iminep mbarak unpurag-e ndak nggal-e, noluk-nen tepan ombo misik iri nam tak peleb-o? Nde, tepan ombo misik nam yid iri-ge Arun nggal-e lag-o. Are, Melkisendek nggal-o.

¹² Nde, tepan omborak nde nin nde kwat yosola-ge, Yawuri nap-nen idnak imiri mbarak pidnak wene na irit mondok nin-et kwat momtak-nen yusu-o.

¹³ Nde, wene imin yid nap iri-ge nit Nenagawan Indo-o. Nde, at iri-ge Lewi nab-e lag-o. Are, at elem-e nin nab-o. Nde, at elem nap-nen-e ap misiger-o luk tet Mbal Pem Nagawan amanggim wam wosa eyabi pugwi sa iri na me tepan ombo luk yabu mondok wanugwi bug-o.

¹⁴ Nde, nit Nenagawan Indo iri-ge elem-e Yewura nab-o luk ap pidsa nenaru nar-o. Nde, Musa-nen-e tepan omborak-nen kwarurak wene mbarosolar-e, enlem Yewura nap ri unnu mbi yoso bug-o.

Melkisendek nggal tepan ombo misik owene 7:15-28

¹⁵ Nde, Melkisendek nggal, tepan ombo nin misik men yid iri bem-nen wene yu yili yu-ge mondok nam-et kali-o.

¹⁶ At iri-nen yid iri-ge Lewi-nen wigarak lolo-nen men yugwi nggal men yij-e lag-o. Are, at iri-ge lak yoso buk, pem-et woraso amawi iri na bem-nen tepan ombo men yid irir-o.

¹⁷ Nde, Mbal Pem Nagawan engga bem-nen at imin urul posolar-e: ”Kar-e Melkisendek nggal tepan ombo pem-et woralik nalik irit woragun-o” luk yij-o.

¹⁸ Iri bem-e, nanduk imiri mbarak pidnak wene iri-ge ndeyak, ebe lak wene ala karuk, keya biga-o.

¹⁹ Nde, Musa-nen imiri mbarak pidnak wene iri-nen-e yi mende ndi mende mbi iminep mbarak purag-e mondok meya-o. Alat nde, yawo-ge nit Mbal Pem Nagawan eram panggo rak nunpurak ebem ninndi mbung mbung tak wolmomtak mondok konak mbi nam tak pij-o.

²⁰ Nde, iri-nen-e, at iri mendak posolar-e, Mbal Pem Nagawan-nen owak mbarosolat-net mendak ibij-et nde, it erep iri-ge tepan omborak onposolar-e, we owak mbarigit lak irit mendak inpij-o.

²¹ Alat nde, Yesus na tepan ombo rak obosolat-nen Mbal Pem Nagawan-nen owak mbara yak tosolar-e: ”Nagawan Indo-nen owak mbarosolar-e: ’Kar-e tepan ombo pem-et woralik nalik irit woragun-o’ luk yid iri-ge indi-ge mondok nden kujwa bug-o” luk yak tij-o.

²² Wene iri nggal yak tidnak pem-e urul pidnak wene mondok konak wene iri-ge kwarak poso-ge Yesus-er-o.

²³ Nde, it tepan omborak ereb-e wat nak yugwi me, it enpem pidnak yabu lak tak purag-e meya ala karuk, enpe mondok kwarat woraiga-o.

²⁴ Alat nde, Yesus na-ge uruk pem-et woralik nalik woraso me, at-nen tepan ombo worasolat-nen eyabu wanoso na-ge nin nap enpem puwa bug-o.

²⁵ Iri bem-e ap Yesus ebem-nen Mbal Pem Nagawan eram lobok yili nab-e pem-et woralik nalik makluk, at-nen-e it inmiri yaga wok undurag-e ndak-nen yusu-o. Iri yusu iri-ge ar-e urug-et pem-et woralik nalik woraso me, it enmanggim-e Mbal Pem Nagawan emengen mbaroso-o.

²⁶ Nde, nit nentepan ombo nggulok iri-ge Yesus at irit nindingen kali-o. At iri-ge mondok mbek tak woraso nap, lugud tak kwaroso buk, meya mbi mondok kwaroso buk nap-nen yusu-o. At na-ge meya yogolat woragwi nap inmin-e erep kundig-e lak, arik lenak me, ar-e mbal tap ombol nggwe kek tak pidnak nap-nen yusu-o.

²⁷ Nde, Yesus na-ge it tepan omborak nggulok erep ereba na nggal-e lag-o. It-nen-e pempa Mbal Pem Nagawan amanggim wam wosa eyabi pogolar-e, nandug-et it ondomok meya yidnak pem puruk, imbirig-e ap pidsa meya yidnak pem pugwi-t nde, Yesus-e misik tarem nak Mbal Pem Nagawan amanggim posolar-e, wam wosa eyabi pidnak nggal at ondomok eyabi pij-o.

²⁸ Nde, Musa-nen imiri mbarak pidnak wene-nen-e tepan ombo nggulok mendak onposolar-e, lugud tak kwarugwi ki nab-et mendak onposo-t nde, imiri mbarak pidnak wene imbirik lobok yid, Mbal Pem Nagawan-nen owak mbara urul pidnak wene iri-nen-e tepan ombo nggulok mendak posolar-e, pem-et woralik nalik iminep mbarak wolma Mbal Pem Nagawan Ambara irit mendak ibij-o.