IBERANI 3 - Nanduk Ngget Tul Pidnak Wene

Musa iri-ge kek tag-et nde, Yesus-e mondok terak minik kek tak-nen yusu-o 3:1-6

¹ Kerisut ebem mbek tak kinpidnak nanggamirak kit na aid arem woraso Mbal Pem Nagawan-nen wene mbo kinpidnak nap wa-e. Yesus na kwara kinndi-n yebet ker-o. Nit wanuruk ebem ninndi angin tubu luk wanige wene na bem Yesus-e Tepan Ombo Kek tak wolmakluk Mbal Pem Nagawan-nen wirik ibil mbuwagaid nap-nen yusu-o.

² Nde, Musa na-ge Mbal Pem Nagawan ilirak oboksa ndegel onposolar-e, mot mot nak kwarosolat woragaid na nggal, nde, Yesus-nen na irit Mbal Pem Nagawan-nen at eyabu wanuwakluk len ibidnak me, yabu iri wanosolar-e, mot mot nak kwarosolat woragaij-o.

³ O wiridnak karuk, o iri na-ge erembel wanugwi bug-o. Are, o woroso nap iri perak nde erembel wanugwi-o. Nde, iri nggal-et Musa na-ge teberak-nen yusu-o. Nde, Yesus-e mondok kek tak wolmomtag-e ndak-nen yusu-o.

⁴ Nde, o pidsa-ge o wurugwi nap-nen witli-t nde, yi mende ndi mende oboksa ndak woroso aru nab-e Mbal Pem Nagawan-net yusu-o.

⁵ Nde, Musa na-ge Mbal Pem Nagawan ilirak oboksa ndegel onposolar-e, mot mot nak ndegel onposolat nap irit woralar-e, Mbal Pem Nagawan-nen abok-nen nam tak purak wene na para yak ondosolat woragaij-o.

⁶ Alat nde, Mbal Pem Nagawan uwi na-ge at Ambara Kerisut inggem pidnak me, ar-e mot mot nak tena worasu-o. Nde, nir-e wog-et nunduwa-o luk ninndi embem min-et ninndi mbung mbung tak woragwi ala-ge, nir-e Mbal Pem Nagawan uwi-net yili-o.

Inndi angin tubu yidnak na keya bidnak pem lak tak unpurak wene 3:7-19

⁷ Iri bem-e Konak Indi-nen yosolar-e: ”Kir-e yawo nde Mbal Pem Nagawan ene kulurug-e,

⁸ keneyanggo lak yurak pug-o. Nanduk konmborak karu me-nen Mbal Pem Nagawan indi ngarogolat, eneyanggo lak luk Mbal Pem Nagawan imin eyak wiriga na nggal kwarurak pug-o.

⁹ Nde, Mbal Pem Nagawan-nen yosolar-e: ’Iri me-nen-e olengen empat pulu woragolar-e, an-nen kwarosolat woraidnak iri-ge enlengen-nen kagolar-et nde, kit kenlawingga-nen-e an nindi ngarogolat, an nabut mbarogolat woraikma-o.’

¹⁰ Iri ala karuk, an-e it inmin nisilepma luk-nen yosolar-e: ’It inndi-ge pempa pempa mborok tak nggwe nak peragolar-e, it-nen-e an nurula-ge enaru buk nak woragi-o’ luk yigi-o.

¹¹ An-e nisilepma luk, owak mbarosolar-e: ’An nindisep kwaroso sa iri me-ge it iri-nen-e neram-e mondok pem ngguma bug-o’ luk yigi-o.”

¹² Nanggamirak wa-e. Kit kennggendumu ap misik-nen indi meya yosolat, indi angin tubu yigit lak yuwarik me, urug-et woraso Mbal Pem Nagawan urula keya buwa naru, kir-e kwara wolmer-o.

¹³ Are, kit kennggendumu ap misiger-o luk tet meya yugwi elem-nen konmbol pem lasola, keneyanggo lak yugup naru kit na kit-nen pempa kinndi eyak wat kerak mbogolat woragolar-e, ”Yanem-er-o” luk unu yaridnak tarem worala ya-t iri nggal kwat tenak wolmer-o.

¹⁴ Nir-e nanduk-net ebem ninndi mbung mbung tak pige wene na puksa tena irit worakmu, woroksiyem-nen-e nit pidsa-ge Kerisut arengge na at totno winde mul-o.

¹⁵ Mbal Pem Nagawan engga bem-nen yosolar-e: ”Kir-e yawo Mbal Pem Nagawan ene kulurug-e, kenlawingga nanduk Mbal Pem Nagawan imin eyak wutluk, eneyanggo lak yiga iri nggal kwarurak pug-o” luk yij-o.

¹⁶ Nde, tarak-nen Mbal Pem Nagawan ene kulurug-et nde, at imin eyak wiriga-o? Iri–ge Mesira wi-nen Musa-nen lit eneyaruk lobok yid nap it oboksa-nen kwariga nar-o.

¹⁷ Nde, olengen empat pulu woralar-e, Mbal Pem Nagawan-e tarak enpem isilepma posolat woragaij-o? It meya nak kwat tenak woragolat, karu me-nen onowak nggilara mbiga nap ereba na enpem-et isilepma posolat woragaij-o.

¹⁸ Mbal Pem Nagawan-nen owak mbarosolar-e: ”An nindisep kwaroso sa iri me-ge an neram-e mondok pem ngguma bug-o” luk yid iri-ge tarak inmin yij-o? Iri-ge at ene kuruk tiga nap it inmin-et yij-o.

¹⁹ Iri bem-e ir-e Mbal Pem Nagawan indisep kwaroso sa nggwigit lak yiga iri-ge it inndi angin tubu yigit lak ala-nen nggwigit lag-o luk nir-e nam-et kali-o.