IBERANI 2 - Nanduk Ngget Tul Pidnak Wene

Ninmiri yurak wene iri-ge ija lombog-o 2:1-4

¹ Iri bem-e, nit wok nunpuruk, nin tula nggwe ninpil mburuwa naru, Mbal Pem Nagawan-nen mul nindidnak wene kulige iri-ge kwara puksa tena wolmog-o.

² Nde, aid nap enpem nggwe-nen Musa yak tidnak imiri mbarak pidnak wene iri-ge ndemeret wene-t me, ta-nen nde wene iri na kulurug-et nde, ndak ndak kwarigit lak ala-ge, iri kwaridnak iri na onggo ndak ndak enpem mboso-o.

³ Iri ala-ge, ninmiri yurak wene nggulok iri-ge kuligit lak keya pulndig-e, nggesa-nen ninmiri yuwa-o? Nde, nanduk nandug-er-e wene iri-ge Nagawan Indo Yesus at-nen nam tak posola, wene na nam tak posola kuliga nap-nen nit yak nondogolar-e: ”Wene iri-ge ndemeret wene-net yusu-o” luk yak nondogola-ge, nir-e ndemerer-o luk menggesa nenaru yige-o.

⁴ Iri kwarogola ereya na-net it-nen kinggiridnak wene lomboksa Mbal Pem Nagawan-nen na kenggera yak nondosolar-e, yenggerak purak mende kwatlik, kwiye worak mende kwatlik, kagwi buk mende kwarat kwatlik kwarosolar-e, at indi-n pidnak pem-net Konak Indi-nen we wok ondoso mende na tembesa wok ondoso-o.

Aid nab-e teberak woragwi-t nde, ap inmiri yekluk Yesus-e we luru tebe yidnak wene 2:5-18

⁵ Nde, o nggweyak ngget lobok yuwa iri na tena wolmakluk Mbal Pem Nagawan-nen-e aid nap innggem pigit lag-o. Nde iri-ge nggweyak yawo nit-nen obok yili yu-t nde yigi-o.

⁶ Are, Mbal Pem Nagawan engga mbi arem-nen yosolar-e: ”Mbal Pem Nagawan wa-e. Nggweyak ma nap iri-ge no ala-nen kat kindi yebet eyasu-o? Nggweyak ma nap iri-ge nggweyak ma nab-et nde, kar-e noluk-nen kumud eyasu-o?

⁷ We mariget tarem nak kat-nen-e nggweyak ma nab-e aid nap indipma nggal tak pigen-o. Nde, kat-nen nagawan tak posolar-e, kek tak ibigen-o.

⁸ Yi mende ndi mende oboksa-ge at-nen tena wolmakluk, at inggem-et pigen-o” luk yij-o. Nde, ”Mbal Pem Nagawan-nen yi mende ndi mende oboksa-ge nggweyak ma nap inggem-et pij-o” luk yij-et nde, misiget ter-o luk keya bigit lak, oboksa at inggem pidnag-et nde, yawo-nen perak nde, nggweyak ma nab-e yi mende ndi mende oboksa inggem pidnag-et worasola-t nde, nir-e kali bug-o.

⁹ Alat nde, nir-e Yesus kali-o. Nde, Mbal Pem Nagawan-nen we wok ondoso elem pem ap oboksa enmanggim wat makluk Yesus iri-ge luru nak aid nap indipma teberak ibij-o. At andi bandisa wat yid iri bem-e yawoge ar-e nagawan nggulok kek tak pidnak irit kali-o.

¹⁰ At ondomok amanggim at-nen yi mende ndi mende oboksa ndak worak pid Mbal Pem Nagawan iri na-nen Yesus-e at andi bandi kagaid iri bem-net iminep mbarak ibid iri-ge yurag-et kwarij-o. Iri bem-nen-e at ilirak kwarar-e at unu kek tak pidnak na erep wanuwakluk andi bandi kagaij-o. Nde, iri yid nap Yesus iri-ge ap inmiri yurak tula nggwe lit eneyaruk mboroso nap-net yusu-o.

¹¹ Nde, it-nen meya kwarugwi na inggem-nen weserak onposo nap Yesus min weserak inpidnak nap it min-e ineij-e misiget-nen yusu-o. Iri kwarak ala karuk, at-nen-e inggiri lag-et it inmin-e ”An nowosirak-nen yili-o” luk yoso-o.

¹² Nde, Yesus-nen yosolar-e: ”Mbal Pem Nagawan wa-e. An-e kat kobog-e nowosirak yak ondosolat, lambuk tak inpidnak nap ennggendumu-nen na ndawi bem kat kerembel wanosolat yimin-o” luk yij-o.

¹³ Nde, ar-e misik pem-nen yosolar-e: ”An nindi-ge Mbal Pem Nagawan ebem nak mbung mbung tak woramin-o” luk tuguruk Yesus-nen yosolar-e: ”An min Mbal Pem Nagawan kat-nen wok nirigen nilirak yu min worali yur-o” luk yij-o.

¹⁴ Nde, ”nilirag-o” luk inmin yid nap ereba na-ge, ki nap enaboro nde eneyabi nde worak-net yili me, Yesus-e it enaboro worak yid iri bem-e ki nap enpage worak irit woragaij-o. Iri yid iri-ge Yesus wat yosolat-nen-e wat yugwi elem tena woraso Sere amawi na urugwe nggwe rak peyekluk-nen wat yij-o.

¹⁵ Iri kwarid iri-ge, ap pidsa pempa woragolat wat momtak kwiye kagwi iri na-nen urugwe nggwe rak inpidnak inggem-nen weserak enpeyekluk irit kwarij-o.

¹⁶ Nde, iri-ge nam-et kali-o. At-nen-e aid nap yongga undusu-ge lag-o. Are, Abaram-nen wigarak irit yongga undusu-o.

¹⁷ Iri nggal yosolar-e, at-nen-e at owosirak enpage lid ludsa irit mondok kwat agaij-o. Iri kwat yid iri bem-e Mbal Pem Nagawan ndegel obosolar-e, owosirak entepan ombo kek tak mot mot nak yoso min unpud kwarat kaso min eyekluk-nen iri kwat yid iri-ge ap pidsa-nen meya yidnak na lak tak peyekluk-nen yij-o.

¹⁸ Nde, at indi ngarosola, andi kasolat woragaid na bem-e nin nap inndi ngarosola, at-nen-e it yongga undurak iri-ge ndak-nen yusu-o.