IBERANI 13 - Nanduk Ngget Tul Pidnak Wene

Nggesa-nen Mbal Pem Nagawan alen tak purag-o 13:1-19

¹ Kerisut ebem-nen nanggam kanggam woragolat nabuwa kabuwa yugwi iri-ge puksa tena wolmer-o.

² Kir-e kit-nen eneyagwi buk nab-et nde, kenma rak unpurak iri-ge meme rak purak pug-o. Ap erep-nen iri nggal kwariga bem-e enaru bug-et nde, aid nap nde enma rak pikma-o.

³ Nde, ap o kubu me inpil nggwidnak enperagolar-e, kit kenmberek o kubu me kinpidnak nggal yebet eneyudtag-o. Nde, meya sa lel mberel inpidnak nap enperagolar-e, kit kenmbereg-et lel mberel kinpidnak nggal-et yebet eneyudtag-o.

⁴ Ap oboksa-nen wok kerak mbugwi iri-ge konak-net yusu-o luk pururag-o. Nde, un min ogwe min-e mbabi kwarogolat wolmomtak pug-o. Nde, terak ye unpugwi min mbabi yugwi min enpem-e Mbal Pem Nagawan-nen wene mbaruwa-o.

⁵ Uang ukwe ukwe yugwi nap yurak pug-o. Are, kat karengge kinggem worasu iri na-ge ndak-nen yusu-o luk peragolat woragup na-e. Nde, Mbal Pem Nagawan-nen yosolar-e: ”An-e keya konposolat, meme rak konposolat mondok yimin pug-o” luk yij-o.

⁶ Iri bem-e nit-nen te-t yogolar-e: ”Nagawan Indo-ge an yongga noroso me, an-e kwiye kamin pug-o. Ab-e ta nggal-nen an nimin yuwa-o?” luk yurag-o.

⁷ Nandug-et Mbal Pem Nagawan-nen yidnak wene yak kunduwakluk mendak inpidnak nab-e yebet yebet tak wolmer-o. It unluk woragolat-nen kwarugwi enpage iri-ge kwara lombot puruk, it-nen inndi angin tubu yidnak iri-ge iri nggal-et kit-nen na kinndi angin tubu yogolat wolmer-o.

⁸ Yesus Kerisut-e tono-n na irit, yawo-n na irit, abok woralik nalik worasolat-nen na irit, nin yoso buk, iri na-t woraso-nen yusu-o.

⁹ Nde, nin wene owak, kwiye worak nggal kwarat yak kondogola-ge, iri wene-nen-e kabak tak kunpuwa naru, kulurak pug-o. Mbal Pem Nagawan-nen we wok ondoso elem-nen-e nit ninndi eyak worak purak perak nde ob-o. Nde, nunggwi mende nunggwi wene-nen yidnak yidnak nak kwariga nab-e ebe mbi kwarigit lak me, iri wene-nen nit ninndi eyak worak purag-e meya-o.

¹⁰ Nit-nen idnak Mbal Pem Nagawan amanggim wam wosa kan pugwi sa ondoro worasu-o. Nde, o sum-nen wiridnak iri me-nen yabu wanugwi tepan omborak-nen-e Mbal Pem Nagawan amanggim wosa kan pugwi sa iri me kan pidnag-e mondok norag-e meya-o.

¹¹ Tepan ombo nggulok iri-nen-e O Mondok Marak Sa iri me nggosolar-e, ap-nen meya yogolat woraidnak lak tak puwakluk wam wosa eyabi-ge waruk nggoso-o. Alat nde, wam iri na ebe-ge o iri leget amberam nggwe waruk mbutluk, kan pugwi-o.

¹² Iri kwarugwi na bem-e, Yesus na irit o iri leget amberam nggwe wat yid iri-ge at ondomok eyabi bem at ilirak-nen meya yogolat woraidnak iri na masa mbek tak enpeyekluk-nen wat yij-o.

¹³ Iri bem-e nit-nen na at eram o iri leget amberam nggwe mburuwog-o. Mbutlug-e, at imin nggweyel ninpidnak nap kwat mog-o.

¹⁴ Nde, nggweyak ma yu me-ge nit nunuwi pem uwi-ge lak me, abok-nen lobok yuwa o siri iri na kore yili-o.

¹⁵ Iri bem-e Mbal Pem Nagawan amanggim wam wosa pidnak nggal pogolar-e, Yesus ebem-nen nir-e pempa Mbal Pem Nagawan erembel wanogolat wolmog-o. Nde, at amanggim pogolar-e, nit nenemnde nggwe-nen at unu luk, at unu pempa kek tak pogolat wolmog-o.

¹⁶ Nde, kir-e konak nak kwarogolat, yongga yongga wolmomtak iri-ge meme rak purak pug-o. Iri kwarugwi iri-ge, Mbal Pem Nagawan alen tak pogolat, amanggim wam wosa pugwi nggal-nen yusu-o.

¹⁷ Kit kennggendumu enne kolobokluk mendak inpidnak nap-nen yidnak wene wanogolat, it-nen yidnak yidnak nak kwarogolat wolmer-o. It-nen-e kit kinndi yik karok woragolar-e, perari yili bug-o. Iri yili iri-ge ap inndi yik karok woraidnak pem Mbal Pem Nagawan-nen an nebem wene mbaruwa-o peragoluk-nen yik keneyarok worali-o. Nde, kit-nen nde it-nen yidnak yidnak kwarogola-ge, it eneyabu-ge enalen min-et wanogolat wolma-o. Nde, kit-nen iri kwarigit lak yogola-ge, it inndi puru min-et eneyabu wanuwa iri-nen kit kenmanggim-e ebe worak mende ma-ge lag-o.

¹⁸ Nit nenmanggim tepan kundugu wolmer-o. Nir-e pempa konak nak kwat tenak wolmomtak nindingen me, nit-nen yebet kagwi ninndi iri-ge konag-et worasu-o luk perali-o.

¹⁹ ”An namanggim tepan yer-o” luk an-e mondok kiri keresa yak kundusu-o. Mbal Pem Nagawan-nen an-e kit kendam ndag-et nak wirik nubuwakluk, tepan yugup na-e.

Tepan yid wene 13:20-21

²⁰ Mbal Pem Nagawan-nen-e ap wat yidnak ennggendumu-nen nit Nagawan Indo Yesus na uruk tak pij-o. At wat yid iri bem-nen Yesus na-ge olomba wam Yik Karok Woraso Nap nggulok iri kwat yij-o. At eyabi-nen-e pem-et wolmomtak urul pidnak wene iri na ebe worak tak pij-o.

²¹ Yamuksa woragwi elem Mbal Pem Nagawan-nen konak mende oboksa wok kondosola, iri bem-nen Mbal Pem Nagawan indi-n pidnak nak kwarobokluk, ndak tak kunpuwag-o. At indi-n peraidnag-e Yesus Kerisut ebem-nen Mbal Pem Nagawan-nen nit nenarem yabu wanuwag-o. Nde, Yesus Kerisut na-ge kek tak pem-et woralik nalik wolmag-o. Amen.

Worok tak posolat-nen yidnak wene 13:22-25

²² Nanggamirak wa-e. An-e kit kinndi eyak worosolat mbarigi wene yu-ge kenalen min-et wanobokluk-nen yak kundusu-o. Nde, engga mbarigi yu-ge mor-e lak, we poro-t mbal kindigi-o.

²³ Nit nennggam Timotius na-ge o kubu me ibil nggwiga na-ge yawo weserak ibiga-o luk kenaru yobokluk-nen yak kundusu-o. Nde, at nde an worasu sa lobok yosola-ge, an-e kit kendam lobok yosolar-e, imin lobok yimin-o.

²⁴ Kit kennggendumu enne kolobokluk mendak inpidnak nap oboksa min Mbal Pem Nagawan ilirak oboksa min-e ”Wiwa-o yak kindiga-o” luk yak undugup na-e. Kennggamirak Italia woragwi nap-nen na wa yak kindiga-o.

²⁵ Mbal Pem Nagawan-nen we wok ondoso elem-e kit pidsa kinmin wolmag-o.