IBERANI 11 - Nanduk Ngget Tul Pidnak Wene

Inndi angin tubu yugwi iri-ge yu nggal-o luk yidnak wene 11:1-40

¹ Inndi angin tubu yugwi-ge yu nggal-o: Inndi ebem mbung mbung tak woragwi na-ge ndemeret wanul-er-o luk peragwi irir-o. Nde, nit nenlengen-nen kagit lag-et nde, ndemeret kul-er-o luk peragwi irir-o.

² Nde, it inndi angin tubu yidnak pem-net Mbal Pem Nagawan alen-e nit nenlawingga enpem pam-o.

³ Nde, ninndi angin tubu yidnak pem-net mbal min nggweyak min yi mende ndi mende oboksa Mbal Pem Nagawan ene nak-nen ndak worak pij-o luk perali-o. Iri ndak worak posolar-e, nenlengen-nen kali buk mende iri bem-nen-e nenlengen-nen kali mende ndak worak pij-o.

⁴ Nde, Abel na indi angin tubu yidnak pem-net Mbal Pem Nagawan amanggim wosa posolar-e, Kain-nen pidnak nggal-e lag-o, are, terak minik konak mende Mbal Pem Nagawan amanggim pamu-o. At indi angin tubu yidnak na bem-e ”Kar-e lud tak nak kibidnak nab-o” luk Mbal Pem Nagawan-e Abel-nen pidnak mende na bem alen kagaij-o. Nde, Abel na wat yij-et nde, at indi angin tubu yidnak iri na-ge yawo-nen na nit mul nondosolat worasu-o.

⁵ Nde, Enok na indi angin tubu yoso ala, at wat ma naru, lek karuk Mbal Pem Nagawan eram lagaij-o. Nde, Mbal Pem Nagawan-nen waruk laidnak me, ap-nen ogore yiga-t nde, kagit lak yiga-o. Nde, Enok na ibil lagit lak worala-ge, Mbal Pem Nagawan engga bem-nen at imin yosolar-e: ”At ebem-e Mbal Pem Nagawan alen kagaij-o” luk yij-o.

⁶ Nde, ap-nen-e Mbal Pem Nagawan ebem indi angin tubu yigit lak ala-ge, Mbal Pem Nagawan-nen-e ap iri ebem-e alen kujwa bug-o. Nde, Mbal Pem Nagawan eram lobok yuwa nap-nen perasolar-e: ”Mbal Pem Nagawan-e ndemeret worasu-o” yuruk, ”Mbal Pem Nagawan-nen-e kwara at ogore yuwa nap na onggo wok unduwa-o” luk wene na bem indi angin tubu yosolat wolmag-o.

⁷ Nde, Nu na indi angin tubu yidnak pem-net Mbal Pem Nagawan-nen-e abok-nen kwat momtak wene yak tosola, kuluruk, indi kwiye luk, at erengen-nen kagit lak mende-t nde, Mbal Pem Nagawan-nen yidnak yidnak kwarosolar-e, at min ogwela min inmiri yurak e koma wirij-o. Iri kwarosolat-nen-e nggweyak ma woragwi nap oboksa enpem wene mbarosola, at indi angin tubu yidnak pem-e Mbal Pem Nagawan-nen at lud tak nak tak ibij-o.

⁸ Nde, Abaram na indi angin tubu yidnak pem-net Mbal Pem Nagawan-nen yonggo obosola, at-nen-e Mbal Pem Nagawan-nen yidnak yidnak nak kwarosolar-e, Mbal Pem Nagawan-nen: ”O iri me wok kirimin-o” luk urul yak tidnak sa iri na mo-t mbirij-o. Nde, at ama keya buruk mborosolar-e, an-e o iri na me-t mburusu-o luk peragit lak, indi kabak irit mbirij-o.

⁹ Nde, Mbal Pem Nagawan-nen urul yak tidnak sa iri na me wok yarig-e, at indi angin tubu yidnak pem-net o iri me-ge ap sal nggal woragaij-o. Abaram iri-ge Isak min Yakub min-e o yu-ge kit kenma-t ma-o luk urul yak indidnak sa woragolar-et nde, unuwi-ge luru sum uwi nak worogolat woraiga-o.

¹⁰ Nde, Abaram na-ge Mbal Pem Nagawan-nen mabin tugup lak pem ”Iniksa-t wirimin-o” luk wiridnak o siri iri na bem indi-ge mbung mbung tak yik karok woragaij-o.

¹¹ Nde, Sara na irit at indi angin tubu yidnak pem-net ar-e kwe arowe li yidnag-et nde, la ndagurak ndak kwat agaij-o. At-nen perasolar-e, urul paga yak tid nap Mbal Pem Nagawan iri-ge mot mot nak kwaroso me, kwaruwar-o luk peragaij-o.

¹² Nde, Abaram na-ge komo wat momtak panggorag-et nde, ar-e ap misiget nag-et nde, at arem-nen mbilarosolar-e, at-nen wigarak mondok kwarat, wonaru mbal pem woraso nggal, yi sisiri nggal wonarurak puk irit kwat agaij-o.

¹³ Nde, it ap iri oboksa-ge inndi angin tubu yogolat-net wat yikma-o. Nde, Mbal Pem Nagawan-nen urul paga yak indidnak iri-ge ir-e wanigit lag-et nde, wanurak mende iri-ge erepma-nen yik karuk, iri-net yusu-o luk, enalen kagolat woraiga-o. Iri bem-nen it-nen nam-et yogolar-e: ”Nir-e nggweyak ma yu me worali yu-ge ap sal, luru lobok yidnak irit worali-o” luk yiga-o.

¹⁴ Nde, nit yu-ge ap sal-net yili-o luk yugwi nab-e it unuwi pem uwi kore yogolat-nen yili-o luk nam-et enperali-o.

¹⁵ Alat nde, it-nen keya buruk lobok yiga unuwi nggweyak iri na yeberak woragit lag-o. Nde, nanduk unuwi nggweyak iri yeberak woraiga nggal-e, o iri me tuguruk unuwok lem mbururag-e ndak yeleb-o.

¹⁶ Alat nde, it iri-nen-e konak uwi misik iri nak kore yogolat woraiga-o. O iri-ge aid arem irir-o. Nde, Mbal Pem Nagawan-nen-e iri yidnak nap enmanggim-e o siri misik kona keya bamu me, it-nen-e Mbal Pem Nagawan imin-e ”Nit Nenmbal Pem Nagawan-o” luk yogola-ge, Mbal Pem Nagawan-e inggiri kasu bug-o.

¹⁷ Nde, Mbal Pem Nagawan-nen-e Abaram na indi kayekluk yosola-ge, Abaram na indi angin tubu yidnak pem-net at ambara Isak na-ge wosa Mbal Pem Nagawan amanggim eyabi wirik peyekluk yij-o. Nde, Mbal Pem Nagawan-nen wene urul paga Abaram yak tij-et nde, at ambara misiget nderak iri-ge indi angin lag-et Mbal Pem Nagawan amanggim wosa peyekluk yij-o.

¹⁸ Nde, Mbal Pem Nagawan-nen Abaram yak tosolar-e: ”Isak-nen wigaruwa iri inmin-et kat kilirag-o luk yuwa-o” luk yak tid nar-o.

¹⁹ Abaram indi-nen perasolar-e: ”Isak wirimindik, wat ma-t nde, Mbal Pem Nagawan-nen uruk tak purag-e ndak-nen yusu-o” luk peragaij-o. Nde, wat yidnak unluk tak pidnak nggal irit Abaram-nen ambara Isak na tuguruk winde yij-o.

²⁰ Nde, Isak na indi angin tubu yidnak pem-net abok woragolat-nen inmbiringgat tak unpurak wene-ge Yakup min Esau min urul paga yak indij-o.

²¹ Nde, Yakup na indi angin tubu yidnak pem-net at wat eyekluk yosolar-e, ereya na-net Yusup ilirak na enarik tak inmbiringgat tak unpuruk, at owangun erep pem imbiri kundugu puruk, nggulal yosolat-nen Mbal Pem Nagawan emengen mbarij-o.

²² Nde, Yusup na indi angin tubu yidnak pem-net ar-e wat eyekluk yosolat-nen Isarael nab-e Mesira wi keya buruk mbururak wene yak unduruk, ”Mborogolat-nen-e an nowag-e iniksa kwarugup na-e” luk yak indij-o.

²³ Nde, Musa eid ija na inndi angin tubu yidnak pem-net at ndet uburuk yigarik, kura buruk woragolar-e, waneya kenan woraiga-o. Enla-ge mondok kigirik ala karuk, kwiye lag-et Pirayon-nen yidnak wene kuruk tiga-o.

²⁴ Nde, Musa na indi angin tubu yidnak pem-net ar-e indi worak yosolar-e, ”At yu-ge Pirayon ara ambara-o” uburudtak iri-ge isili peragaij-o.

²⁵ At iri-ge Mbal Pem Nagawan ilirak inmin lambuksa andi bandi kudtak iri indingen tak puruk, meya kwarosolat woralat-nen we luru alen kudtak iri isili rak pij-o.

²⁶ Nde, at-nen perasolar-e, Kerisut ebem-nen nggweyel nuburak iri perak nde onggo nggulok terak minik wanurak mende kagi. Nde, Mesira silobulo kwarat iri-ge ebe lak mende-o luk peragaid iri-ge, abok-nen onggo kwarat irit wanurak mende yik karuk-nen peragaij-o.

²⁷ Nde, Musa na indi angin tubu yidnak pem-net Pirayon isilepma at ebem posola-t nde, kwiye lag-et Mesira wi keya buruk mbirij-o. Enlengen-nen kagwi buk Mbal Pem Nagawan iri-ge at-nen-e kaidnak nggal kwarosolar-e, at indi-n pidnak sa irit mboroso komo nak yij-o.

²⁸ At indi angin tubu yidnak pem-net O Anggul Abandok Mbiridnak tarem iri tel korosolar-e, ap ondoso aid nap iri-nen-e Isarael nap inlirak manggu nderak iri na unduwa naru, at-nen it yak ondosolar-e: ”Lomba wam eyabi-ge tumende mbanggo bem nggweyel ker-o” luk yak indij-o.

²⁹ Nde, it Isarael nap na inndi angin tubu yidnak pem-net Yi Koma Mimi na mbarogolar-e, yi na eberek yamu, nggweyak tu mbiridnak nggal ndil laiga-o. Nde, it Mesira nap-nen-e: ”Nit na iri nggal-et ndil lujwog-o” luk ndil lakmu-ge, yi-nen tebel inpid nar-o.

³⁰ Nde, it Isarael nap inndi angin tubu yidnak pem-net o Yeriko kerep leget iri na ombol nggwe kambuk tak pogolat o tuju bem tak pukmu-ge, kerep leget iri na ndamara labuk yij-o.

³¹ Nde, terak yebugwi kwe Arakap na indi angin tubu yidnak pem-net o yen wil lobok yiga nap na kona wok inpidnak pem-e it Mbal Pem Nagawan ene kuruk tugwi nap ereba na lak tak onpogolar-e, kwe na wirigit lak yiga-o.

³² Nde, iri wene-ge motsa ndindera yimin, lak? Nde, Nggireyon min Mbarak min Simson min Yepta min Ndaud min Semuwel min Mbal Pem Nagawan ene lomboksa yugwi nap min onowene an-nen ndindururak tarem lak ala karuk, larok yusu-o.

³³ Nde, it inndi angin tubu yidnak pem-net wim nap nagawan-nen tenagaidnak wi ereba na inmin wim mbatluk, urugwe nggwe rak onpogolat, lud tak nak kwarogolat-nen Mbal Pem Nagawan-nen urul paga yak indidnak mende wanogolat, isilepma worak singa ndakngge na emende nggilil lobok yogolat,

³⁴ kan kwiye worak mende-t nde, nigirik pogolat, yalawi bem mbal unpuwokluk yidnag-et nde, kwiye mborogolat, kwarogolat woraiga-o. Ir-e ndeyak yidnag-et nde, amawi yogolat; wim mbarogolar-e, it enmawi lagolar-e, elem nin nap wim nap kere kwarat nde, urugwe nggwe rak onpogolat woraiga-o.

³⁵ It kwami na inndi angin tubu yidnak pem-net it winde na abu wat yidnag-et nde, unluk tak onpogola, wok inpiga nar-o. Nde, ap erep-nen-e wat luk ombol nggwe konak nak wolmomtak pem tuguruk unluk tak unpuwakluk, inndi te bem-et andi bandi sa ondogola-t nde, ”An nimiri yurag-e nimbir-o” luk yiga-o.

³⁶ Ap ereb-e nggweyel onpogolat, linggamburok ondogolat, kamasa o kubu me inpil nggogolat yiga-o.

³⁷ Nde, ap ereb-e kerep pem ondogolat, ereb-e nggere nggere bem mbal onpogolat, ereb-e yalawi bem mondok ondogolat yiga-o. It na waring kagolar-e, unsum-e lomba wam aboro min kambing wam aboro min yorogolat, ontol lak nap yogolat, lel mberel onpogolat, andi bandi rak onpogolat kwat onpogola, waring kaiga-o.

³⁸ Nggweyak ma yu me-ge it wolmomtak ndag-e lak me, it iri na-ge karu ma nde ndobo bem nde waring kagolat, kerep ndo arem nde mbunmu nde iri me-t nene yogolat woraiga-o.

³⁹ Nde, ap ereba na pidsa it inndi angin tubu yidnak pem-net unnu kek tak irit woraiga-t nde, Mbal Pem Nagawan-nen urul paga yak indidnak mende na-ge wanigit lak yiga-o.

⁴⁰ Nde, it wanigit lak yiga iri-ge, Mbal Pem Nagawan indi-nen nit nenperasolar-e, terak minik konak mende wok nundurak iri-ge it ereba-ge nit ninmin totno-nen iminep mbarak nunpurak irit peragaij-o.