IBERANI 10 - Nanduk Ngget Tul Pidnak Wene

¹ Musa-nen imiri mbarak pidnak wene iri-ge abok-nen wok nunduwa konak mende iri nde ebe worak-nen yusu-ge lag-o. Are, we amorok ndak worak-net yusu-o. Nde, wam wosa eyabi-ge Mbal Pem Nagawan amanggim pogolar-e, olengen irit ndak wosa pempa pempa iri na nggal nak perenak woragwi-o. Iri ala-ge, Musa-nen imiri mbarak pidnak wene iri na kwarogolar-e, wam eyabi iri nggal kwasa pogolar-e, it Mbal Pem Nagawan eram lobok yidnak nap iminep mbarak unpurag-e meya-o.

² Nde, eyabi pidnak iri-nen-e iri pogolat woraidnak nap ereya-nen meya yogolat woraidnag-e ndemeret marak inpidnggal-e, it-nen-e an-e meya yoso nap kagi-o luk peragit lak woralar-e, Mbal Pem Nagawan amanggim wam wosa eyabi-ge perenak woragit lak yeleb-o.

³ Alat nde, it-nen-e pempa olengen ndak wosa eyabi pogolat woragwi me, eyabi perenak woragwi iri-nen it-nen meya yogolat woraidnak iri-ge yeberak onposo-o.

⁴ Nde, sapi wam kusi eyabi min kambing wam kusi eyabi min-nen-e ap-nen meya yogolat woraidnak iri-ge korak unpurag-e mondok pem lag-o.

⁵ Iri bem-e, Kerisut na-ge nggweyak ma yu me mbuwasolat-nen Mbal Pem Nagawan yak tosolar-e: ”Kar-e wam wosa eyabi kamanggim pugwi min kat kamanggim eyabi wirik pugwi min kar-e kisili-o. Alat nde, nebe kwarak nibigen-o.

⁶ Wam wosa pugwi sa-nen wam ebis-et kamanggim kan pugwi min ap-nen meya yogolat woraidnak iri-ge lak tak purak pem wam wosa eyabi pugwi min iri-ge kar-e kisili-o.

⁷ Iri ala-ge, an-nen yosolar-e: ’Mbal Pem Nagawan wa-e. An-e yu-o. An lobok yigi yu-ge kat kindi-n pidnak iri nak kwarurak pem lobok yigi-o. Nde iri-ge, Musa-nen engga mbarak arem-nen an nowene mbaridnak irit ndak ndak tak posolat-nen lobok yigi-o’ luk yij-o.”

⁸ Ayat abam nggwe yu-nen Kerisut-nen yosolar-e: ”Wam kamanggim eyabi wirik pugwi min wam kamanggim pugwi min kat kamanggim wam wosa ebis-et kan pugwi min meya yogolat woraidnak lak tak puwakluk wam eyabi wirik pugwi min iri-ge kar-e kindingen-e lag-o, mondok kisili-o” luk yij-o. Iri yid iri-ge, Musa-nen imiri mbarak pidnak wene-nen yidnak yidnag-et kwarogolat-nen Mbal Pem Nagawan amanggim wam wosa eyabi wirik pugwi-t nde, iri yij-o.

⁹ Iri luk, Kerisut-nen yosolar-e: ”Mbal Pem Nagawan wa-e. An-e yu-o. Kat kindi-n pidnak nak kwareyekluk lobok yigi-o” luk yij-o. Nde, iri bem-nen Mbal Pem Nagawan-nen-e nanduk wam wosa eyabi wirik pugwi na lak tak puruk, ondolmasa Kerisut na wam wosa pugwi nggal at eyabi ngget irit pij-o.

¹⁰ Nde, Yesus Kerisut-nen Mbal Pem Nagawan indi-n pidnak nak kwaridnak pem-e, nit pidsa-nen meya yogolat woraidnak iri mbek tak ninpid iri-ge, at na at-net ondomok ebe posolar-e, pem-et woralik nalik wolmomtak amanggim misiget pem nak pij-o.

¹¹ It Yawuri nap tepan omborak enambiktak-net pempa pempa Mbal Pem Nagawan ndegel perenak woragwi-o. Nde, eyabi wirik pidnak iri-nen-e meya yogolat woraidnak iri-ge lak tak purag-e mondok lag-et nde, Mbal Pem Nagawan amanggim pogolar-e, wam wosa eyabi pidnak iri na nggal nak pempa perenak woragwi-o.

¹² Alat nde, Kerisut-nen-e ap-nen meya yogolat woraidnak pem misiget pem nak Mbal Pem Nagawan amanggim wosa posolar-e, pem-et woralik nalik wolmomtak mende irit puruk, Mbal Pem Nagawan inggi kigit nggwe kore yij-o.

¹³ Nde, yawo-ge Mbal Pem Nagawan-nen-e Kerisut imin wim nab-e at ijok ondoro rak unpuwak yik karok worasu-o.

¹⁴ Iri ala-ge, at eyabi-ge misiget pem nak wirik pid pem-e it-nen meya yogolat woraidnak iri mbek tak inpidnak nap oboksa-ge Kerisut-nen-e pem-et woralik nalik wolmakluk iminep mbarak inpij-o.

¹⁵ Iri wene-ge Konak Indi-nen na kenggera yak nundusu-o. Nandug-et at-nen yosolar-e:

¹⁶ ”Nagawan Indo-nen yosolar-e: ’Iri kwarurak tarem wok yosola-ge, It urul paga yak indimin wene-ge yur-o: An-nen imiri mbarak pidnak wene waga it inndi arem posolat, wene na-ge it inndi nggat nggat pem mbarak posolat yimin-o’ luk yij-o.”

¹⁷ Iri yuruk, at-nen yosolar-e: ”It-nen meya yogolat woraidnak min it-nen wene kuruk tugwi min-et yeberak woramin pug-o” luk yij-o.

¹⁸ Nde, meya yogolat woraidnak lak tak puwakluk Mbal Pem Nagawan amanggim wam wosa eyabi mbi purag-e lak-nen yusu-o.

Mbal Pem Nagawan eram panggosa mburuwog-o 10:19-39

¹⁹ Iri bem-e, nanggamirak wa-e. Yesus eyabi pidnak pem, nir-e O Mondok Marak Sa iri me kwiye lag-et nggurag-e ndak-nen yusu-o.

²⁰ Yesus-nen-e unlug-et wolmomtak tu ngget misik nit nenmanggim tel kwirij-o. Nde, tula iri-ge o marak iri kuri worak woraso sum timnik iri na ngak yid iri nggwe-nen tel kwirij-o. Nde, sum iri-ge Yesus ebe arer-o.

²¹ Nit nentepan ombo nggulok kek tak iri-ge Mbal Pem Nagawan ilirag-e at inggem wolmakluk mendak ibidnak nap-nen yusu-o.

²² Iri bem-e, nit-nen Mbal Pem Nagawan eram panggosa mborogolar-e, ninndi mot mot tak puruk, ninndi ndemeret kwara angin tubu luk, meya yebet kagwi na mbek tak ninpidnak pem-net, kop kap lak yi bem nenpe mat ninpidnak pem-net panggosa mburuwog-o.

²³ Mbal Pem Nagawan-nen-e at-nen urul pidnag-e mondok kwaroso-t me, ”Irit kwat nunpuwa-o” luk peragwi na bem ninndi mbung mbung tak woragwi iri-ge puksa tena wolmog-o.

²⁴ Nde, nir-e lombot kerak mbogolat wolmog-o. Iri kwarogolar-e, nabuwa kabuwa bem konak nak kwaruwokluk yongga yongga wolmog-o.

²⁵ Ap erep-nen kwatli nggal, nit-nen-e lambuksa ndok wurugwi tarem ndok wururak pem perari perari rak purak pug-o. Are, Nagawan Indo lobok yurak tarem-e panggo yidnak me, nit na nit-net mondok kwara ninndi eyak wat kerak mbogolat wolmog-o.

²⁶ Nit-nen-e ndemeret wene nenaru yidnak ombol nggwe-t nde, nit ninndi-net meya nak kwat tenak wulmulndig-e, meya iri nggal yogolat woraidnak iri lak tak purak pem eyabi purak mende-ge mondok lag-o.

²⁷ Are, Mbal Pem Nagawan imin wim pugwi nap enabuwog-e misiget nak worasu-o. Nde, iri-ge, enpem wene mbatluk, kan amare kwiye worak-nen nok unpuwa-o.

²⁸ Nde, ap mbi-nen-e Musa-nen imiri mbarak pidnak wene kuruk tosola-ge, ap mberen ala na, ap kenan ala na-nen: ”Iri kwarosola, kaige-o” luk yetlak pogola-ge, e! Ndemeret meya kwaramu-o luk ap iri na abuwa lak mondok wurugwi nar-o.

²⁹ Nde, meya kwaridnak nap na iri nggal kwat unpugwi ala-ge, Mbal Pem Nagawan Ambara unuwok liri rak pili nap min Mbal Pem Nagawan-nen urul pidnak eyabi, at mbek tak ibidnak eyabi iri na te rak pusu nap min we wok ondoso elem wok nindid Konak Indi na meya rak puwa nap min enpem-e terak minik anggun worak mende ngge nggal kwasa enpem puwa-o?

³⁰ Nde, at-nen yosolar-e: ”Onggo purak iri-ge an winde me, onggo an-nen pimin-o” luk yid Mbal Pem Nagawan iri-ge nir-e nenaru-o. Iri-nen na at-nen yosolar-e: ”Nagawan Indo-nen-e at elem nap enpem wene mbaruwa-o” luk yij-o.

³¹ Nde, urug-et woraso Mbal Pem Nagawan inggem nunpuwa iri-ge mondok meya lombog-o!

³² Nanduk woraigep iri na kinndi yebet ker-o. Iri tarem-e Mbal Pem Nagawan eyaya wanigep pem-e anggun panggun kwarat kenpem mbosola-t nde, kir-e mamak puruk woraigeb-o.

³³ Iri kwat konpogolar-e, nin tarem-e ap inmbiri bem-et nggweyel konpogolat, kondogolat yiga-o. Nde, nin tarem-e kit nap ereb-e iri nggal kwat onpogola, kir-e it inmin lambuksa andi bandi kaidnak nggal-et kagwi-o.

³⁴ Kir-e o kubu me inpil nggwidnak nap na inmin lambuksa andi kaidnak nggal kagolat woraigeb-o. Nde, kinsilobulo na mengga wanogola-t nde, kit kenalen min-et woraigeb iri-ge, an narengge namanggim pidnak terak minik konak pem-et wolmomtak mende-ge worasur-o peragoluk-nen kwarigeb-o.

³⁵ Iri bem-e, kit kinndi kabak yili-ge meyog-o. Nde, kinndi angin tubu luk woragup pem-e onggo mondok nggulok wanugup nar-o.

³⁶ Mbal Pem Nagawan indi-n pidnak kwarobok-nen kir-e mondok mamak puruk wolmer-o. Nde, iri kwarugup pem-e Mbal Pem Nagawan-nen urul pidnak mende na-ge wanugub-o.

³⁷ Mbal Pem Nagawan engga mbarak pem-nen yosolar-e: ”We mariget nak worarug-e, Lobok yuwa-o yidnak nab-e lobog-et yuwa-o. Wolma-ge lag-o.

³⁸ Nde, an nelem nap, lud tak nak tak inpidnak nab-e inndi angin tubu yidnak pem-net unluk wolma-o. Alat nde, ap misik-nen nde indi angin tubu yidnak keya bosola-ge, an-nen-e ap na ebem-e nalen kamin pug-o” luk yij-o.

³⁹ Nde, nir-e ninndi angin tubu yidnak keya bidnak pem lak tak nunpurak nab-e lag-o. Are, nit ninndi angin tubu yidnak pem ninmiri yidnak nap-nen yili-o.