ESET 7 - Nanduk Ngget Tul Pidnak Wene

¹ Nde, mberen pem tak pogolar-e, nagawan min Aman min-e Eset imin lambuksa ningga-o.

² Anggut amburu ereba na nonggolar-e, nagawan-nen Eset iri na tuguruk kin wok obosolar-e: ”Eset wa-e. Kar-e no wok kururak perasu-o? Ndak yi-o. Kat-nen nde an-nen tenagidnak wi yu menggesa an ninggem pi-o luk nggi yosola na wog-et kirimin-o” luk yak tosola-ge,

³ Nagawan ogwe Eset-nen onggo yosolar-e: ”Nagawan kat-nen nde ob-o yosolar-e, an min an nelem nap min-e nindigit lak, nunluk keya nunpurak irit perasu-o.

⁴ Nde, an min an nelem nap min-e nundurak pem nunsuwa wora worali-o. Nit nde mumnggupmanggi rak nunpurak pem nunsuwa woraidnak nggal-nen-e an-e kat sil keyagit lak nindiyabu nak yurag-et nde, nir-e mondok nunduruk, lak tak nunpurag-et yogola-nen yak kurusu-o!” luk yij-o.

⁵ Yosoloma, Nagawan Agasuweros-nen Eset kin wanosolar-e: ”Ta-nen kwiye lag-et iri nggal kwarusu-o? Iri kwarusu nab-e ngge me worasu-o?” yij-o.

⁶ Yosoloma, Eset-nen erep nggarosolar-e: ”Nit lel mberel nonposo, nit ninmin sirid nab-e meya yoso nab-e Aman yur-o!” luk yak tij-o. Iri yosoloma-ge, Aman na mondok kwiye kwarat min irit nagawan min nagawan ogwe Eset min irit yik eneyagaij-o.

⁷ Nde, nagawan iri na-ge mondok isilepma kwarat luk, nunggwi ondoro iri na me-nen wurungsa menluk mborosolar-e, yik kudtak amanggim e wi kere wi yagidnak sa iri na nggwe mbirij-o. Iri yosola, Aman-nen yebet kasolar-e: ”Nagawan yu-nen-e mondok angin worag-et nebem mberak puwa kagi” perasolug-e, at iri na-ge Eset imin irit worasolat, ”Nimiri yi-o” luk Eset emengen mbareyekluk, imin larok yij-o.

⁸ Nde, Aman iri na-ge at-nen kwarid iri na Eset-nen amberam tak posolat imiri yuwaklug-e, Aman iri na-ge indi kabak yosolat, Eset ondoro iri na bem Eset eram erare nggwe tud yarik worasoma-ge, nagawan iri na-ge yik kudtak amanggim e wi kere wi yagidnak sa iri na me-nen lobok yidnggal-e, iri kwarak ala karug-e, nagawan iri na-nen ene nggoksa yosolar-e: ”At yu no kwarusu-o? An nerengen pem nama-net nde yawo-ge Eset tenagusu-a?” luk yij-o. Nagawan iri na-nen ene nggoksa yosola karug-e, ap yabu winde ereba na lobok yogolar-e, Aman iri na anggul-e erare min muruk tak piga-o.

⁹ Iri rak puruk, ap yabu ombo ereba na ennggendumu ap Arobona iri na-nen yosolar-e: ”Nagawan wa-e. Aman uwi mborom-e ap kerebara tiong tak unpugwi e mor-e dua pulu dua (22) meter irit sindik worasu-o. Iri-ge Aman-nen ap kat kagap ndagid Morendekai iri na urusuwak kerebara tiong tak purak pem sindik parik worasu-o” luk nagawan iri na yak tij-o. Yosoloma-ge, nagawan iri na-nen wene wirik posolar-e: ”E iri bem-e at Aman ondomok nde kerebara tiong tak per-o!” luk yij-o.

¹⁰ Iri kwasa Aman iri na-ge at-nen Morendekai wururak e sindik pid iri na bem-e at nde urusu kerebara tiong tak uburug-e, nagawan-nen isilepma yid iri na-ge isilepma teyok yij-o. 8:1–10:3 Pasal 8 kuri-nen Pasal 10 kuri iri arem-e Nagawan Agasuweros-nen-e Aman arengge oboksa Eset wok tosola, Eset-nen Morendekai wok tidnak wene mbarak worasu-o. Iri-nen Yawuri nab-e it ondomok inmiri yuwakluk, Morendekai-nen nagawan unu bem engga mbara tomborosola, it-nen-e it inmin sirid nap mondok kwarat indiga wene mbarak worasu-o. Iri-nen Yawuri nap enalen kagolar-e, it inmiri yidnak yebet kagolar-e, Purim nggok sakwi tel kwiriga wene na pasal yeba arem mbarak worasu-o.