ESET 6 - Nanduk Ngget Tul Pidnak Wene

Nagawan Agasuweros-nen Morendekai iri na kek tak ibidnak wene 6:1-13

¹ Iri na tarem kubu-ge nagawan iri na-ge nene yurag-e meya irit yij-o. Iri ala karug-e, at-nen-e at-nen tenagidnak wi arem-nen kwaridnak wene mbarugwi engga iri na wok niril lobok yer-o yosola-ge, waruk lobok yogola-ge, ”Kuleyek-nen wonat nerer-o” luk yak indij-o.

² Nde, engga iri na arem wonarukmu-ge, at nene yoso sa iri me at yik karok woragwi nap Mbingtan min Teres min-nen nagawan iri na wururak yogola kuluruk, Morendekai-nen nam tak pidnak wene irit mbarak wonarogola, kulij-o.

³ Iri na kuluruk, nagawan iri na-nen kin wanosolar-e: ”Iri kwaridnak pem-e Morendekai kek tak obogolar-e, no mende wok tige-o?” yosoloma, it-nen yogolar-e: ”Iri kwaridnak pem-e Morendekai iri-ge mondok wok tigit lag-o” luk yak tiga-o.

⁴ Iri yogoloma, nagawan-nen yosolar-e: ”Yawo an woraso sa yu me-ge an neyabu wanugwi nab-e ta worasu-o?” luk yosoma-ge, Aman iri na-ge Morendekai kerebara tiong tak purak e iri na-ge yena sindik puruk, Morendekai wururak pem nagawan yak turak nggeret nagawan uwi mborom wok yosoma, irit yij-o.

⁵ Yosola, at ndegel ubugwi nap ereba na-nen nagawan iri na yak togolar-e: ”Aman perak nde kat keram lobok yosolat nggeret wok yusu yu-o” yak togolikma-ge, nagawan-nen yosolar-e: ” ’Ma nggwi-o’ yak ter-o” yak indij-o.

⁶ Yosola, Aman iri na nggosoma-ge, nagawan-nen Aman yak tosolar-e: ”An-e ap misik mondok kek tak ibimin-o. Iri ala-ge, iri kwarak obosolar-e, an-nen-e ngge kwat ibimin-o?” luk kin wok ibij-o. Yosoloma, Aman-nen perasolar-e: ”Ab-e misig-e ta nggal nde nagawan-nen-e kek tak ubuwa-o? Iri-ge nin-e lag-o. Iri-ge an-et kek tak nuburak yid kagi” luk peragij-o.

^7-8 Iri peraruk, Aman-nen onggo yosolar-e: ”Kat-nen ap iri kwat obosolar-e, nagawan kat-nen o tena woralat-nen kusum yoroso iri na-t yirik obosolat, kat-nen ebem koreluk mboroso kura wam iri na-ge kat-nen tenagidnak wi yu ut memera pidnak ereba na bem-nen umuruk posolug-e,

⁹ nagawan kat-nen yoroso kusum iri na-ge kat-nen tenagidnak wi yu me arem-nen ap yok nggok ereba ennggendumu-nen kek tak misik inggem pugunmu, at iri na-nen-e ap nagawan kat-nen kek tak pugun iri na yirik uburag-o. Yirik uburug-e, ap iri na-nen imin lug-e, nagawan kat-nen idnak kura iri na bem koreyak puruk, ap kek tak iri na-nen-e kura iri na lit karuk nanduk mborosolar-e, o siri tula nggwe nurag-o. Iri yogolar-e, ap mondok kek tak iri na-nen-e: ’Nagawan-nen at-nen kek tak pid nap iri na kek tak obosolar-e, yu nggal kwarusu yur-o!’ luk yil yil nanduk nurag-o” luk yak tij-o.

¹⁰ Yosoloma, nagawan-nen Aman yak tosolar-e: ”Ndag-et nak kat-nen-e sum iri min kura wam iri min wanuruk, Yawuri nap Morendekai na woraso sa pak tumende bem koreyak worasu iri na kek tak obosolat wok ti-o. Iri kwat obosolar-e, misiget ter-o luk mberak pigit lak, yanem yigen ereba-ge mondok ndak ndaksa-t kwat ibi-o” luk yak tij-o.

¹¹ Iri yosoloma-ge, Aman-nen-e sum iri na min kura wam iri na min-e wanuruk, sum iri na-ge Morendekai yirik uburuk, kura wam wok tid iri na bem Morendekai iri na kore yil lasola-ge, Aman iri na-nen-e imin luk nanduk o siri tula nggok ereba na nggwe nosolar-e: ”Nagawan-nen at-nen kek tak pid nap iri na kek tak obosolar-e, yu nggal kwarusu yur-o!” luk ene nggoksa yil yil waring kagaij-o.

¹² Iri kwasa waring karug-e, Morendekai iri na-ge tuguruk nagawan uwi mborom pak tumende towaril lobok yij-o. Nde, Aman iri na tuguruk ama mborosolar-e, ap-nen kujwanaru inggiri-nen erare kura buruk mbirij-o.

¹³ Mberarig-e, ogwe min at anggamirak min inmbiri bem-e at ebem mbid ereba na wene ndindera yak indij-o. Yak ondosola, ogwe min anggamirak inndi nggat nggat worak ereba min-nen yak togolar-e: ”Morendekai ebem-nen kamawi lak yid iri-ge at iri-ge Yawuri nap me, kat-nen at ebem kore yurag-e mondok meya-nen yusu-o. Ndemeret at-net urugwe nggwe rak kubuwa-o” luk yak tiga-o.

Aman wiridnak wene 6:14–7:10

¹⁴ Nde, it ereba na inmin wene yil mburukmu-ge, nagawan woraso sa iri me yabu wanugwi nab-e Eset-nen nggok sagidnak iri na norak pem ndag-et mbururak pem Aman inggi wil lobok yiga-o.