ESET 5 - Nanduk Ngget Tul Pidnak Wene

Eset-nen nagawan min Aman min at imin nunggwi mende norak yonggo inpid wene 5:1-8

¹ Nde, tepan yogolat woragolar-e, kenan pem tak pogolar-e, kwe Eset iri na-ge kweyap nagawan-nen yurugwi sum yutluk, nagawan woraso sa o mborom arem nggwe wok yij-o. Wok yarik, o mborom iri na me worasola-ge, nde, nagawan iri na-ge at koreyak woraso sa iri na me-nen erengen-e tu wirik koreyak worasoma-ge, Eset iri na-ge tumende bem men yil mbirij-o.

² Nde, nagawan iri na-nen nagawan ogwe Eset iri na tumende bem mendak worasola karug-e, abuwa karuk, nagawan-nen-e owangun emas-nen konidnak iri na-ge Eset ambigit nuk kagaij-o. Iri yosola, Eset na mberarik, wangon iri na erep tenagij-o.

³ Iri luk, nagawan iri na-nen kin wanosolar-e: ”Kar-e ngge kwarak-nen lobok yigen-o? Kar-e no wok kururak lobok yigen-o. Ndak yi-o. Kat-nen nde an-nen tenagidnak wi yu nde kuri wosa ponok nggwe an ninggem pi-o yosola na kinggem-et pimin-o. Larog-e yimin pug-o” luk yak tij-o.

⁴ Yosoloma, Eset-nen onggo yosolar-e: ”Nagawan kat-nen nde yimin yu nde ob-o perasolar-e, an-nen nunggwi mende sagimin iri na lambuksa norak pem kat min Aman min-e yawo kubu an neram lobok yurag-o” luk yak tij-o.

⁵ Yosoloma, Eset-nen yid iri na ndak ndag-et eram mbururak pem nagawan-nen-e: ”Aman iri na ndag-et nak lobok yuwag-o” yosolug-e, it enmbereg-e Eset-nen nggok sagusu iri na me mbiriga-o.

⁶ Mbirigarik, anggut amburu ereba na nonggolar-e, nagawan-nen Eset yak tosolar-e: ” ’An-nen tenagidnak wi yu menggesa ninggem pi-o’ yosola na, kat-nen nggi yugun-e wog-et kirimin me, kar-e no kindingen-o? Ndak yak niri-o” luk yij-o.

^7-8 Yosoloma, Eset-nen onggo yosolar-e: ”Nagawan kat-nen nde an-nen nggi yimin iri nde nene erep nggarurak kindingen ala-ge, kat min Aman min-e tuguruk kub-e kubu nunggwi mende sagimin iri na norak pem tuguruk neram lobok yurag-o. Iri yogolat iri-nen-e an-nen nagawan kat kebem nggi yurak peragi-ge yak kirimin-o” luk yak tij-o.

Aman-nen Morendekai wururak yebet kaidnak wene 5:9-14

⁹ Nde, Aman iri na nagawan ogwe Eset-nen nggok sagid iri na nuruk mborosolar-e, mondok indi-ge alen yosolat o kibi nggal irit yij-o. Alat nde, Aman iri na nagawan woraso sa nggugwi sa pak tumende bem wok yidnggal-e, Morendekai nde men luk at kek tak ibigit lak irit yosola irit kagaij-o. Iri yosola karug-e, ar-e mondok isilepma kwarat yij-o.

¹⁰ Iri yosolar-et nde, eyak linggirik puruk, ama mbirij-o. Nde, Aman iri na ama wok yosolar-e, at-nen-e anggamirak ereba na ”Lobok yer-o” yak unduruk, at-nen ogwe Seres iri na yak tosolar-e: ”Totno koreyak wolmog-o” yak tij-o.

¹¹ Iri yosolat-nen Aman-nen indi kek tak pem ene amburu ndagosolar-e, at aringgi arengge wene min ambararak kwarat ereba na onowene min nagawan-nen yabu kek tak wok tid wene min nagawan yabu wanugwi nap ereb-e teberag-et nde, ar-e mondok kek tak nggok worasu wene min ereba na ndindera yak indij-o.

¹² Nde, erep yosolar-e: ”Nagawan ogwe Eset-nen nagawan min an min nenarig-et nenmanggim nggok saguruk, nit nagawan min nenmberek nak yonggo ninpij-o. Kup na nggok sagurug-et yonggo nunpuwa-o.

¹³ Alat nde, an-e Yawuri nap Morendekai iri-ge nagawan eram nggugwi pak tumende bem irit worala kasolar-e, ereba oboksa-ge an nebem lasu bug-o” luk yij-o.

¹⁴ Iri yosola, anggamirak min ogwe min-nen at yak togolar-e: ” ’At iri tiong tak uburak e mor-e dua pulu dua (22) meter irit yener-o’ luk yak indi-o. Iri lug-e, kub-e kuplila nagawan yak tosolar-e: ’An-e Morendekai iri na urusu kerebara tiong tak purag-e nunggwirig-o?’ luk yak turug-e, Morendekai iri urusu kerebara tiong tak purug-e, kub-e kar-e yamuksa Eset-nen nggok saguwa iri me-ge mbururag-o” luk yak togola-ge, Aman-nen-e: ”Wene iri-ge ob-et yigeb-o” yosolug-e, ”Morendekai kerebara tiong tak purak e yener-o” ap erep ereba na yak indij-o.