ESET 4 - Nanduk Ngget Tul Pidnak Wene

Yongga unduwakluk Morendekai-nen Eset emengen mbarid wene 4:1-17

¹ Nde, Morendekai-nen iri kwariga wene ereba na kolosolug-e, indi abi kalok yosolar-e, usum ndela bela keya buruk, karung sum yutluk, mabe ndatluk, yip nggwa arem mberarig-e, o siri nggwe mbirij-o.

² Mberarig-e, ap karung sum yirik-nen nagawan woraso sa nggurag-e meya me, Morendekai iri na mberarig-e, nagawan woraso sa nggugwi tumende bem iri na me pak tumende eralu ndong yij-o.

³ Iri-nen nin me nan me ngguberenot woraidnak sa Yawuri nap worali ereba na-ge nagawan-nen it undurak wene wirik pidnak iri na kulurug-e, yip yud ngud mbogolat woraiga-o. Iri kwarogolar-e, nunggwi mende ninggit lak, tepan nak yogolat, yip nak yogolat, ”Ngge rak nunpuwa-o?” luk yane worogolat woraiga-o. It ennggendumu ap ereb-e karung sum yutluk, mabe bem mbinggirik nak woragolat kwat tenak woraiga-o.

⁴ Iri yogola, Morendekai-nen kwarusu wene ereba na-ge nagawan ogwe Eset nak ndegel obogolat wolmomtak yabu wok indidnak kweyap ndugum min ap min ereba na-nen-e Eset iri na yak togola-ge, Eset iri na-ge indi puru kwarat yij-o. Iri yosolar-e, Eset-nen-e karung sum iri na keya buruk yuruwakluk sum-e Morendekai amanggim pil mbirij-o. Iri kwarij-et nde, Morendekai-nen-e sum iri na yururag-e keya bij-o.

⁵ Iri yosola-ge, Eset-nen-e nagawan-nen at ndegel purak yabu ebem pidnak nap Ata iri na wene mbo buruk-nen yak tosolar-e: ”Kar-e Morendekai eram mburugundik: ’Kit kenpem-e no mende mbosola-nen kar-e iri nggal kwarusu-o?’ kin wil mbiri-o” yak tij-o.

⁶ Yosoloma-ge, Ata iri na-ge Morendekai eram silmu nagawan eram nggugwi sa leget pak tumende bem irit mbirij-o.

⁷ Eram mborosola-ge, Morendekai-nen-e iri me-nen kwaridnak miridnak wene ereba na yak tosolat, iri-nen Yawuri nap oboksa unduruk, Aman-nen nagawan-nen idnak tol ndok woroso sa iri na me tol-e inik nggal pil nggwimin-o yidnak wene ereba na min oboksa yak tij-o.

⁸ Iri-nen nagawan-nen o Susan-nen wene wirik posolat Yawuri nab-e mondok oboksa undurag-o luk mbaridnak engga mbarak iri na min-et Morendekai-nen-e Ata iri na wok tij-o. Wok tosolar-e: ”Engga yu-ge Eset wok ti-o. Iri yosolar-e, wene ereba min-et kwara iri nggal-o luk mbena yak turag-o. Nde, Eset iri-ge at elem nap ereba na nagawan-nen enabuwa kujwakluk, ar-e nagawan eram mburuwag-o” luk yak tij-o.

⁹ Yak tosoloma-ge, Ata iri na-ge Eset eram wok yosolar-e, Morendekai-nen Eset amanggim at ebem wene wosa pid ereba na yak tij-o.

¹⁰ Alat nde, Eset-nen-e tuguruk Ata na Morendekai eram wirik posolar-e:

¹¹ ”Kweyap-nen na irit, ap-nen na irit, nagawan indi-nen peragit lak ma-nen nde nagawan woraso sa eram lobok yidnak nde ala-ge, mondok undurag-o luk wene mbarak me, ap nagawan indi tenakwi nap min ngguberenot woragwi sa woragwi nap oboksa min-nen-e wene iri-ge enaru-o. Nde, ’Iri nggal kwarurag-o’ luk owak mbarak pidnak iri na inggem-nen mengga keya unpurag-e tula-ge misiget nak perak worasu-o. Iri-ge, nagawan iri-nen o tena worasolat-nen tena woraso wangun emas-nen konidnak iri na nde enambigit nuk kasola-ge, indigit lak, keya onposo-o. Iri kwarugwi me, an-e wene mbo nibigit lak irit waneya misik woragi-o” luk wene wosa ebem pij-o.

¹² Yak tamu-ge, Eset-nen yidnak wene iri na-ge Ata-nen-e Morendekai yak tij-o.

¹³ Yosoloma-ge, Morendekai-nen-e Eset indi yenggerak purak Eset amanggim wene wosa pil mborosolar-e: ”Kat karig-et nagawan ama worasu iri bem nak Yawuri nap erep enpem nak anggun panggun mbosola, ’An-e wene lak, kona woramin-o’ luk yebet kudtak pug-o.

¹⁴ Kat nde wene yu nggal kwarak worasola-t nde, kindiyabu nak worasola-ge, aid arem nggwe-nen Yawuri nap inmiri yurak elem lobok yuwa-t nde, kat perak wat yugun-o. Keid owe owot min-et lak tak unpuwa-o. Yu nggal kwarak woragola karuk, iri nggal-et kwat mag-o luk-nen kar-e nagawan ogwe kwat momtak lenak kibidnak nde kwat ma-o!” luk amanggim wene wosa bij-o.

¹⁵ Iri yamu kuluruk, Eset-nen Morendekai amanggim-e wene-ge yu nggal wosa bij-o:

¹⁶ ”Kar-e Yawuri nap o Susan worali oboksa ndok worak unpuruk, an namanggim tepan yogolat wolmer-o. Lengge-nen kubu-nen kenan pem ereya woragolar-e, nunggwi mende ninggit lak, tepan nak yogolat wolmer-o. Nde, an min an ndegel nubugwi kweyap ndugum inmin na nit na tepan-et yogolat wulmul-o. Iri luk, pem-nen kwarugwi wene iri na kwid turuk, an-e nagawan eram mbirimin-o. Iri kwarosola karuk, norosola-ge, war-et yimin-o!” luk wene wosa bil mborosoloma-ge,

¹⁷ Morendekai iri na-ge mberarik, Eset-nen kwaruwakluk wene wosa bid ereba na ndak ndag-et kwarij-o.