ESET 3 - Nanduk Ngget Tul Pidnak Wene

Aman-nen Yawuri nap oboksa undurak unsuwa woragid wene 3:1-15

¹ Nde, siyak woraruk abok nggwe-ge Nagawan Agasuweros iri na-ge ap misik unu-ge Aman iri na-ge at indipma nagawan irit mendak ibij-o. Nde, Aman iri-ge Amendata ambara, Agak-nen wigarag-o.

² Nde, Agasuweros-nen at eyabu wanugwi nap ereba na yak ondosolar-e: ”Kir-e Aman iri-ge kek tak obogolat, eram kentare nggwe yud tud mburag-o” luk yak indij-o. Iri yamu, ap oboksa-nen nagawan-nen yak indid iri na kwarogolat, Aman eram yud tud mbogolat, nde, Morendekai arig-et nak iri nggal kwarigit lak, larok yosolat woragij-o.

³ Iri kwarosola, nagawan woraso sa iri me yabu wanugwi nap erep ereba na-nen Morendekai yak togolar-e: ”Kar-e noluk-nen nagawan ene tarusu-o?” luk kin wok obogolat woraiga-o.

⁴ Iri kwarogolar-e, pempa-nen nagawan-nen yidnak yidnak kwarosolat, Aman eralu tud yuwakluk emengen mbarogolat woraiga-t nde, Morendekai-nen yosolar-e: ”An-e Yawuri nap me, nggweyakma nap iri-ge mondok kek tak obosolat eralu tud yimin pug-o” luk yosola-ge, it-nen-e: ”Aman-nen-e Morendekai iri-ge ngge nggal kwat ubuwa-o?” luk enaru yurak pem-e Morendekai-nen kwaroso wene iri-ge tup tup pendaga Aman iri na yak tiga-o.

⁵ Nde, Aman iri na-ge Morendekai-nen at kek tak ibigit lak yoso iri na aru yosolar-e, mondok isilepma kwarat yij-o.

⁶ Nde, Aman iri na-nen Morendekai iri na-ge Yawuri nab-o yogola aru lug-e, ”Morendekai iri na-ge angin worak ebem pimin-o. Nde, at nag-e lag-o. Are, Yawuri nap oboksa Perisia nagawan iri-nen tenagidnak wi arem woragwi ereba na-ge oboksa mondok lak tak inpimin-o” luk mondok arem yimnik woragij-o.

⁷ Nde, Nagawan Agasuweros iri na-nen o tena woralat olengen duabelas pem tak posolat, waneya nandug-et unu-ge Nisan iri na bem-e Aman-nen-e at-nen Yawuri nap undurak arem yemnak pid iri na kwarurak pem-e waneya min kwarurak tarem min-e ”Ngge tarem nggal-nen kwarimin-o? luk wat tak puwakluk engga mbara ligik purag-o” luk ap ereba na yak indij-o. Nde, engga mbarak ligik pugwi iri na unu-ge Purim irir-o. Engga mbarak iri na ligik purug-e, at-nen meya kwarurak peragid iri na-ge waneya duabelas unu-ge Andat arem tanggal tiga belas iri bem-nen kwarurak irit wat tak piga-o.

⁸ Iri rak puruk, Aman-nen Nagawan Agasuweros yak tosolar-e: ”Nagawan wa-e, Kat-nen tenagidnak wi yu me-ge ap enlem misig-e ngguberenot woraidnak sa lombok yeba me wigak yidnak worali-o. Nde, ap enlem erep-nen kwarugwi-ge nin-et nde, it-nen kwarugwi-ge mondok arig-er-o. It-nen-e kat-nen tenagidnak wi yeba me-nen kwarogolat wolmomtak owak mbarak pidnak ereba na-ge mondok kwatli bug-o. Iri kwatli iri-ge nagawan kat-nen-e it ondomok inndi-nen pidnak ereba nak kwarogolat wolmakluk keya unpurak pug-o.

⁹ Kat-nen nde lak tak unpurak nde ob-o perasolar-e: ’It iri-ge mondok lak tak unpurag-o’ luk engga mbara timbiri-o. Nde, nagawan kat-nen nde ndegel koboso nap an-nen yigi iri nde ob-o yosola-ge, an-nen-e perak tol angin-e 340.000 kilogram irit kat-nen korol ndok woroso sa iri na me yarak pil nggwimin-o” yak tij-o.

¹⁰ Iri yak tosola kulurug-e, nagawan iri na-nen-e at-nen wene wirik posolar-e, engga bem lop nok tak poso iri na-ge inggi bem-nen yonggora keya buruk, Yawuri nap inmin sirid nggok mbarak woraso Aman iri na wok tij-o.

¹¹ Wok turuk-nen nagawan iri na-nen Aman iri na yak tosolar-e: ”Ap enlem iri min ontol min-et kat kinggem nak kegera keya busu-o. Kat-nen it kwat unpurak nde perasolar-e, kwat nak unpurag-o” luk yak tij-o.

^12-13 Yak tosoloma-ge, waneya nandug-et iri na bem tanggal tiga belas iri bem-e Aman-nen-e nagawan-nen yidnak nap engga mbarugwi nap ereba na wene mbo inpij-o. Wene mbo unpurug-e: ”Kir-e an-nen yidnak ndak ndag-et engga mbatluk, engga iri na-ge nden yaga enne lombok pem oboksa mbatluk, nagawan-nen tenagidnak wi yu me-nen yili wene ndak ndak irit mbarurag-o.” Iri rak purug-e, engga iri na-ge Nagawan Agasuweros-nen yidnak pem mbatluk, lop nok tak pugwi mende nagawan inggem-nen yonggora pid iri na bem-nen engga iri bem lop nak tak pij-o. Iri luk, engga iri na-ge propinsi oboksa enmawi worak nap min ngguberenot min unnu worak nap min ndag-et nak endam wirik pij-o. Nde, wene ebe-ge yu-o: Nagawan-nen yosolar-e: ”Waneya Andat iri bem tanggal tiga belas iri bem-e Yawuri nap oboksa ap indi worak-nen, ap sujwe-nen, kwami-nen, li marik-nen oboksa misik tarem-et mondok pendaga unduruk, enarengge-ge mberena waruk ndi yurag-o” luk mbara wirik pij-o.

¹⁴ Nde, wene iri na-ge ngguberenot woraidnak sa oboksa naru karu rak puruk, kwarurak yidnak tarem wat tak pidnak iri nak towarogolat lid lud tak puruk wolmomtag-o luk mbarij-o.

¹⁵ Engga mbarak ereba na-ge ap enpem pikma, ndag-et nak nagawan iri-nen tenagidnak wi iri na me ngguberenot woragwi sa lombok ereba na me pil mbiriga-o. Nde, wene iri na-ge nagawan-nen irit kwarurag-o yidnak wene-o luk Perisia iri me o siri iminepma o Susan iri na me naru karu rak piga-o. Iri rak puruk, nagawan min Aman min-e koreyak ereba anggut amburu nonggolat woragola-ge, o siri iminepma Susan iri me-ge wene iri na yogolar-e, inni enne nono mbirij-o.