ESET 2 - Nanduk Ngget Tul Pidnak Wene

Kwe ndugum Eset iri na nagawan ogwe kwat yidnak wene 2:1-18

¹ Iri kwatluk, woraruk ereya ombol nggwe-ge Nagawan iri na isilepma-ge lak yosola-ge, at ogwe Wati-nen at ene tarosola at-nen kwat ibid ereba na yebet kasolat irit woragij-o.

² Iri kwarosola karuk, at indi tenakwi nap at imin kundik woragwi ereba na-nen Nagawan yak togolar-e: ”Yu nggal kwarurak perak ob-o. Nagawan kat kamanggim ap-nen enaboro mbarugwi buk kweyap ndugum konak onkore yuwog-o.

³ Kat-nen tenagidnak wi yu me ngguberenot woragwi sa (propinsi) ap lenak inpil lobok yugunmu, it-nen kweyap ndugum entare konak ereba na lembena lena wok unpuruk, o Susan yu me kweyap nagawan onkwerak woragwi sa inpil lobok yuwag-o. Iri yuwama, kweyap woragwi sa iri me-nen ene kologolat wolmomtak mendak ibidnak nap Egai-nen-e entare kegesa labuk makluk ngen mbal unpurak iri-ge at ebem worasu-o.

⁴ Iri kwaruwama-ge, Nagawan kat-nen-e kwe ndugum mondok kat kindi-nen pidnag-e lembena kogwe Wati ondolma pil nggurag-o” luk yak tiga-o. Yogola-ge, Nagawan-nen-e ob-er-o luk, yiga iri na nggal ndak ndag-et kwarij-o.

⁵ Nde, o siri Susan iri me-ge Yaiyet ambara Yawuri nap Morendekai irit woragij-o. Nde, at iri-ge elem Mbenyamin nap Kis min Simei-min-nen wigarak nap irit woragij-o.

⁶ Nde, Morendekai iri-ge Mbabel nap Nagawan Nebukatnesat-nen Yerusalem woragwi nap urugwe nggwe rak onposolat tarem iri na bem-nen Morendekai iri-ge Yewura nap Nagawan Yoyakin min ap erep min-et Mbabel ereba me inggi mbara mbo inpil mbiridnak nab-o.

⁷ Nde, at Morendekai iri-ge eid min Eset eid min-e ineid misik-nen nderag-o. Nde, Eset iri-ge erare mondok konak, ebe na konak irir-o. Nde, Eset unu-ge Iberani wene bem-e Andasa-o. Nde, Eset iri eid min ija min-e wat yikma, Morendekai-nen-e nggorarik, at-nen ndagidnak ara nggal irit parugu woragij-o.

⁸ Nde, Nagawan Agasuweros-nen yidnak wene iri na naru karu mbogolar-e, kweyap ndugum kwarat o Susan iri me inpil lobok yiga-o. Nde, kweyap ndugum ereba na ennggendumu-ge Eset min-et ibil lobok yiga-o. Nde, nagawan woraso sa kweyap ndugum ereba na wok unpuruk mborogolar-e, kweyap woragwi sa iri na me-nen ene kologolat wolmakluk mendak ibidnak nap Egai iri na inggem kwe Eset iri na-ge piga-o.

⁹ Nde, Egai-nen Eset iri na yik karug-e, wi yosolar-e, indingen tak irit ibij-o. Iri yosolar-e, kwe ndugum Eset iri na-ge ndag-et nak entare konak makluk-nen kwat unpugwi mende kwat obosolat, nunggwi mende min-et lena mak tosolat irit kwarij-o. Iri rak puruk, kwami woragwi sa iri na me-nen-e kwe Eset iri na-ge kweyap kek tak nak-nen woragwi sa iri na me puruk, nagawan iri na woraso sa iri me woragwi kweyap ndugum enpe tuju lenak ereya na-ge Eset ndegel obogolat wolmomtak irit inpij-o.

¹⁰ Nde, kwe Eset iri na-ge Morendekai-nen: ”An-e Yawuri kwe-o luk yurak pug-o” yidnak pem-et Eset iri na-ge ”An-e Yawuri kwe-o” yigit lak woragij-o.

¹¹ Nde, pempa nagawan ama kweyap ndugum woragwi sa iri na mborom tumende ambigit nggwe Morendekai iri na-ge waring kasolat irit woragij-o. Iri kwarosolar-e, at-nen-e: ”Eset iri na-ge op worasu, lak? Are, ngge kwarak worasu?” luk pempa kin wok onposolat irit woragij-o.

¹² Nde, pempa-nen kwarugwi-ge entare konak makluk entare kogorogolar-e, olengen misik aptusa entare kogorogolat wolmakluk wok undugwi-o. Iri kwarogolar-e, waneya enam pem-e amburu min kemenan min lambuk tak puruk, enpem ndal tenak woragwi-o. Nde, tuguruk waneya enam ereya bem-e emben konak unpubumben tak poso min amburu min lambuk tak puruk, enpem ndarogolat, entare konak makluk kogorogolat woragwi-o. Iri kwatluk-nen perak, it-nen Nagawan Agasuweros eram mbururak yidnak iri na ndak ndak wok yosola-ge, Nagawan Agasuweros eram mburugwi-o.

¹³ Nde, kweyap ndugum-nen nde Nagawan Agasuweros eram mburuwaklug-e, it-nen umuruk purak peraidnak mende-ge yurugwi nag-o.

¹⁴ Iri kwasa unmuruk lid lud tak posoma-ge, kubu nggwe ap-nen wok unpuruk nagawan woraso sa mburugwi-o. Nde, kup-nen-e nagawan woraso sa o misik me mburugwi-o. Iri me inpil mborosoma-ge, nagawan-nen we inmin nene yurak amanggim nak wok unpurak kweyap ereba na ndegel unpurak yabu ebem pidnak nap Saskas iri na inggem pugwi-o. Nde, kweyap ndugum ereba na-ge inndi nak-nen Nagawan Agasuweros eram mburugwi bug-o. Are, nagawan iri na-net indi enpem puruk, unu luk ”At eresa lobok yuwag-o” yosola-net perak eram mburugwi-o.

¹⁵ Iri kwarugwi me-ge yawo-ge kwe Eset iri na Nagawan eram mbururak tarem wok yij-o. Eset iri-ge Abigail ara-o. Eset eid min Morendekai eid min ereya-ge ineid iniya misiget-nen nderag-o. Nde, Morendekai-nen Eset iri na nggorarik, ondomok ara nggal tak ibij-o. Nde, ap-nen Eset iri na yik karug-e, ebe konak karuk wi yogolat woraiga-o. Nde, kwe Eset iri na nagawan eram mbururak pem sum yorosolar-e, kwami woragwi sa iri me yik eneyarok wolmakluk mendak ibidnak nap Egai iri-nen: ”Sum yorogolar-e, iri nggal kwasa yururag-o” yidnak iri na ndak ndag-et yirij-o.

¹⁶ Iri nggal kwasa, Nagawan Agasuweros iri na-nen o tena woralat olengen tuju bem tak posolat, waneya sepulu unu-ge waneya Tebet iri bem-e Eset iri na-ge imin luk, Nagawan Agasuweros woraso sa mbiriga-o.

¹⁷ Iri yogola-ge, kweyap ndugum erep ereba na-nen-e Nagawan iri na-ge indi yamuk tak pogolat, alen tak pogolat kwarugwi-ge te nggal-et nde, Eset-nen nagawan iri na indi yamuk tak posolat, alen tak pid iri-ge terak minig-er-o. Iri ala karuk, Eset iri na-ge Nagawan Agasuweros-nen-e indi pungen tak uburuk, nagawan-nen o tena woragolat-nen pugwi topi iri na ogwe Wati iri na ondolma pil nggosolat, Eset anggul pem pij-o.

¹⁸ Iri rak uburug-e, Nagawan-nen-e Eset iri na kek tak obosolat ubugo nggok irit sagosolar-e, at eyabu wanugwi nap min ap yok nggok ereba na min yonggo inpij-o. Iri yosolat-nen at-nen tenagidnak wi iri na me wene wirik posolar-e: ”Yawo tarem-e an-nen tenagidnak wi oboksa-nen mondok we irit kenpabok kwarogolat woragolar-e, silobulo-ge mondok kwarat we irit tembesa wok indil lobok yurag-o” luk yij-o.

Agasuweros wururak yiga-t nde, Morendekai-nen imiri yidnak wene 2:19-23

¹⁹ Nde, ereya na kwarosolar-e, Nagawan Agasuweros-nen-e Morendekai iri na-ge eyabu misik wok tij-o.

²⁰ Iri yamu-ge, Eset iri na-nen-e: ”An-e Yawuri kwe-o” luk yigit lak nak irit woragij-o. Nde iri-ge Morendekai-nen yurak pug-o yidnak pem-net kwarij-o. Nde, iri kwarid iri-ge Eset iri na-ge marik pem irid Morendekai-nen yidnak yidnak kwaroso iri na nggal-et kwarosolat-nen yigit lak yij-o.

²¹ Nde, misik tarem-e Morendekai na-nen nagawan woraso sa iri na me yabu wanosolat worasoma-ge, Nagawan Agasuweros ondomok ndegel ubugwi nap mberen Mbingtan min Teres min-nen-e nagawan iri na insili rak pogolar-e, nagawan iri na wururak wene mbariga-o.

²² Nde, wene iri na Morendekai-nen kolosolug-e, at-nen-e Eset iri na yak tij-o. Iri yamu-ge, Eset-nen-e Morendekai-nen yid ereya na ndak ndag-et Nagawan Agasuweros iri na yak tij-o.

²³ Iri yamu, wene iri na kwara mbenariganggal-e, ndemeret ala karug-e, mberen nap ereya na-ge unlusuwak kerebara tiong tak unpuruk indiga-o. Undurug-e, Nagawan Agasuweros-nen yidnak ndak ndag-et iri kwaridnak wene iri na-ge nagawan iri-nen tenagidnak wi arem kwaridnak miridnak wene mbarugwi engga iri na arem-et mbariga-o.