ESET 1 - Nanduk Ngget Tul Pidnak Wene

Nagawan Agasuweros ogwe Wati-nen un ene taridnak wene 1:1-22

^1-2 Perisia iri me o siri iminepma-ge Susan iri me-t Nagawan Agasuweros iri na-ge o tena irit woragij-o. Nde, at-nen tenagidnak wi-ge India kuri-nen Sundan kuri iri me-ge propinsi-ge seratus dua pulu tuju (127) irit woragij-o.

³ Nde, Nagawan Agasuweros-nen o tena woralar-e olengen tiga iri bem-e at-nen-e at-nen tenagidnak wi arem woragwi ap yok nggok oboksa ereba na min ap yabu winde ereba na inmin norak nggok irit sagij-o. Nde, nggok sagidnak iri na me ndok worogolar-e, san ombo onowe nggok Perisia iri me woragwi min Meria woragwi min irit ndok wiriga-o. Iri na nggal-et ngguberenot min ngguberenot woragwi sa yabu ombo kek tak ereba na min-et ndok wiriga-o.

⁴ At kek tak anggu obok worak tak poso aringgi arengge ereba na kujwakluk nam tak posolar-e waneya enam irit woragij-o.

⁵ Iri kwatlug-e, Agasuweros-nen-e at ijokma woragwi nap Susan iri me woragwi insilobulo lak min insilobulo worak min oboksa inmin norak nggok irit sagij-o. Iri kwasa sagosolar-e, minggu misik arem pempa sak tenak irit woragij-o. Nde, iri sagosolar-e, nagawan woraso sa kudtak amanggim engen kerengen uwi yagidnak sa iri na me-t sagij-o.

⁶ Iri kwarogolar-e, sum abak linen-nen konidnak erare kisikmbal erare min loro min ereba na-ge kere sum linen-nen konidnak ereba na bem kamasa keya buruk, ondoro manggo ya perak-nen konidnak ereba na sum abak ereba na bem panggara yela keya buruk, nagawan woraso sa iri na me umuruk pogolat kerep-nen konidnak mot sindil lobok yiga ereba na bem yiong tiong pil lobok yiga-o. Nde, sum abak ereba na indipma o kune kerep-nen konidnak loro min kerep konak-nen (ablut mimi min mutiara owak abinal worak min kerep pirus erare kinggambarak min) konidnak kune abinal worak ereba na bem-e koreyak woragwi emas min perak min-nen konidnak ereba na pil lobok yiga-o.

⁷ Nde, iri na kwarogolar-e, nagawan-nen-e emas min perak min-nen konidnak yimbe erare nin tak nan tak ereba na bem anggut amburu-ge kobong kobong mbosola, kenangga pil lobok yij-o.

⁸ Nde, Nagawan Agasuweros-nen nagawan woraso sa iri me yi min nunggwi mende min saga pil lobok yugwi nap ereba na yak ondosolar-e: ”Kit-nen-e ap sal lobok yidnak yeba-ge anggut amburu norak pem-e abu ninggeb-o yak ondogolat, ndak mer-o luk lembesa yak ondogolat iri-ge kwarurak pug-o. Are, it inndi-nen norak puwa ndak ndak irit wok nak undurag-o” luk yak indij-o.

⁹ Nde, iri na kwarogola-ge, nagawan ogwe Wati iri na-nen-e nagawan woraso sa iri na me-nen it kweyap ereba na enmanggim-et nggok irit sagij-o.

¹⁰ Nde, iri na kwarogolat enam nene luk, tuju bem tak pogolar-e, Nagawan Agasuweros iri na-ge anggut amburu kwarat nasolar-e, alen irit yij-o. Iri yosolar-e, at ondomok amanggim kwaruwakluk lenak inpidnak kek tak enpe tuju irit yonggo inpij-o. Nde, ap ereya-ge Meguman min Mbista min Arabona min Mbikta min Abakta min Sesat min Karakas min irit yonggo inpij-o.

¹¹ Yonggo unpuruk-nen yak ondosolar-e: ”Kir-e an nogwe Wati iri na nagawan onkwe-nen pugwi iri na anggul pem pago irit an neram waruk lobok yurag-o” luk yak indij-o. Nde iri-ge at ogwe iri-ge mondok kwe erare konak me, at ogwe erare konak iri na ap yok nggok min ap erep ndok wiriga ereba na oboksa min inmbiri bem nuk kudtak puruk pil lobok yer-o yak indij-o.

¹² Iri yurak puruk wirik enpamu, at ndegel ubugwi nap ereya na mbirigarik, nagawan ogwe Wati iri na eram wok yogolat nagawan-nen yidnak wene iri na yak tiga-t nde, kwe Wati iri na-nen yosolar-e: ”An mbururag-e nimbir-o” luk larok yidnak ala karug-e, nagawan iri na-ge mondok isilepma kwarat yij-o.

¹³ Nde, nagawan iri na-nen-e wene worala konurak pem min it-nen kwarugwi wene bem min wene worala konurak pem-e nagawan iri na-nen-e wene konugwi enaru nap ereba na-nen konuwakluk yonggo onposolat woraso me-ge at-nen-e wene yanem iri na konurak pem-e at indi tenakwi nap ereba na yonggo inpij-o.

¹⁴ Nde, at indi tenagurak pem yonggo onposolat woraso nab-e Karesena min Setat min Atmata min Tarisis min Meres min Meresena min Memukan min irir-o. Nde, it iri-ge at-nen tenagidnak wi Perisia min Meria min ereba me yabu tena woragwi ap mondok kek tak irit woraiga-o.

¹⁵ Nde, Nagawan Agasuweros-nen ap enpe tuju ereya na yak ondosolar-e: ”An-e an ndegel nubugwi nab-e an nogwe Wati iri na lobok yuwakluk eram inpil mbirigi-t nde, ar-e nimbir-o luk larok yij-o. Iri ala-ge, iri nggal kwaridnak ala-ge, nit-nen-e no nggal kwat unpugwi-o?” luk yak indij-o.

¹⁶ Yosoloma, Memukan-nen nagawan min ap yok nggok erep ereba na min yak ondosolar-e: ”Iri nggal iri-ge nagawan kat nak kogwe Wati iri-nen erengenma nggal tak kobosolat kwarij-e lag-o. Iri nggal-e kat keyabu wanugwi nap oboksa min kat-nen tenagidnak wi yu arem woragwi nap ab-o yidnag-e iri nggal nag-et kwat ninpij-o.

¹⁷ Nde, nagawan kogwe iri-nen kwarid iri nde kweyap oboksa-nen kologolar-e, ununtak enlengenma nggal tak inpil lobok yuwa-o. Iri yogolat-nen yogolar-e: ’Nagawan-nen at ogwe Wati iri na neram lobok yurag-o luk yak tij-et nde, Wati-ge larok yid na-t nde-o’ luk yuwa-o.

¹⁸ Ap yok nggok Perisia min Meria min woragwi yeba onkwerak-nen nde wene iri nde kologolar-e, ndemeret ununtak lombok enaru rak pil lobok yuwa irir-o. Iri yogolar-e, iri na-nen ndowaga onkwerak-nen-e ununtak-nen wene yak ondogola-ge, eyak worogola-ge, ununtak-nen-e insilepma enpem puwa irir-o.

¹⁹ Iri bem-e, nit ninndi-nen wat tak pogolar-e, kat-nen nggaruk tak posolar-e: ’Kwe Wati iri-ge an neram-e lobok yurak pug-o’ luk kat-nen wat tak purak kebem pige-o. Nde, iri yugunmu-ge nit o Perisia min Meria min yu me-nen nde ununtak enne eyak worogola-ge, kat-nen pugun iri nggal nag-et kwarogolat wolmok-nen-o. Iri yurug-e, kogwe Wati iri na ondolma-ge Wati iri-ge keya buruk, kwe mondok konak misik pil nggurag-o.

²⁰ Nde, nagawan kat-nen wene nggaruksa mbarak pugun wene iri nde kat-nen tenagidnak wi kwarat yeba me nde wigak yil mborosolar-e, ap enarengge lak-nen na irit, enarengge worak-nen na irit onkwerak-nen-e ununtak enne eyak wirigit lak, it-nen yidnak yidnag-et kwarogolat wolma-o” luk yij-o.

²¹ Nde, Memukan-nen wene yid iri na-ge Nagawan Agasuweros min ap yok nggok iri me ndok wiriga ereba na min-nen-e ob-er-o yogolug-e, nagawan iri na-nen-e wene iri na ndak ndag-et kwarosolar-e,

²² Nagawan Agasuweros-nen-e engga mbara at-nen tenagidnak wi ngguberenot worali sa (propinsi) ereba na me engga mbara wirik pil mborosolar-e: ”Ap oboksa onkowerak lombok-nen-e un-nen yidnak yidnak nak kwat tenak wolmomtag-o” luk, it woragwi sa ondomok enne bem lombok engga mbara timbiril mbirij-o.