ESERA 9 - Nanduk Ngget Tul Pidnak Wene

Yawuri nap-nen enlem nin kweyap wok inpidnak ereba na Esera yak tidnak wene 9:1-15

¹ Ereba na oboksa kwatlug-e, Isarael nap ennggendumu enne kulugwi nap erep an neram lobok yogolat-nen an yak norogolar-e: ”Isarael nap min tepan ombo min Lewi nap min-nen-e ap enlem nin nap entalu worali Amon nap min Moap nap min Mesira nap min Kanaan nap min Et nap min Peris nap min Yebus nap min Amori nap min ap enlem yeba inmin-e mondok lambinik worali-o. Iri nggal woragolar-e, enlem nin nap-nen meya mbilaro ngin mende kwarugwi ereba na it-nen na kwatlir-o.

² Iri kwarogolar-e, Yawuri nap-nen-e enlem nin kweyap wok onpogolat, iri nggal kwarogolar-e, Nagawan Indo ilirak at ondomok arengge-o luk lenak kop kap lak woragwi iri na-ge kop kap tobok tak piga-o. Nde, mondog-et tel kwiriga iri-ge Isarael nap ennggendumu enne kulugwi nap min ap yabu ombo kek tak min-net kwariga-o” luk yak niriga-o.

³ Nde, an-nen wene iri kulurug-e, nindi abi kalok yosolar-e, nusum ndela keya buruk, nanggulsu min nondoksu min pena keya burug-e, nindi abi kalak yosolat koreyak woragi-o.

⁴ Nde, an-e nindi mbel tenak iri na me-t koreyak worasoma-ge, o iri na-ge keyama Nagawan Indo amanggim kan purak ndak yosoloma, ap lobok yogolar-e, an neram lop lop wiriga-o. Nde, it lobok yogolar-e, ap Mbabilonia iri me mbo inpidnak sa-nen lobok yidnak nap ereba na-nen meya kwaridnak pem Nagawan Indo-nen enpem mbud momtak ereba na yebet karug-e, mondok kwiye kwarat yiga-o.

⁵ Nde, keyama Mbal Pem Nagawan amanggim wam wosa kan pugwi tel korogola-ge, an-e nindi abi kalok yosolat koreyak woragi sa-nen men yosolar-e, nusum ndelep pelep tak iri-net nerare nggwe tud yigi-o. Iri yosolar-e, ninggi-ge Nagawan Indo Nembal Pem Nagawan ambigit nuk kagi-o.

⁶ Nuk karuk an-nen yosolar-e: ”Nembal Pem Nagawan wa-e. An-e kat kimbiri bem nanggul pugak yurak iri-ge mondok ninggiri meya-o. Nde, nit-nen meya kwatli-ge nenanggul pem tap mbal mbal lagaid lagaid mbal pem ndurum yij-o.

⁷ Nanduk nonmborak woraiga kuri-nen nit yawo-nen na kat kilirak nir-e kat kimin meya kwat tenak worali-o. Meya nak kwat tenak woragola-ge, nit min nit-nen idnak nagawan nagawan min nit-nen idnak tepan omborak min nit oboksa-ge enlem nin nap nagawan ereba na-nen-e urugwe nggwe rak nonpogolat, nondogolat, nenarengge yariya wanogolat, wim kugun pem kamat nunpuruk mborogolat, nam-et ap inmbiri bem nggweyel nonpogolat kwatli-o. Iri kwat nonpogolar-e, yawo na kwat ninpili yur-o.

⁸ Alat nde, Nagawan Indo Nenmbal Pem Nagawan wa-e. Yawo-ge kar-e kat-nen nenabuwa kaso elem iri na-ge nggeret tel korosolar-e, nit nennggendumu worali nap erep yeba-ge anggun panggun tak unpugwi nap ininggem-nen wisirik nunpuruk, wisirik yamuksa wolmomtak sa yu me wolmakluk kat-nen wisirik ninpigen-o.

⁹ Nde, nit ap ininggiyapma mumnggupmanggi woragola-ge, kat-nen-e nir-e keya ninpigit lag-o. Kat-nen kwat nonposolar-e, Perisia nagawan ereba na-nen nenabuwa karuk, nunluk keya nonpogolat, kat kuwi ndamera nggilara labuk yidnak iri na tuguruk wuruwakluk nenpem piga-o. Kat-nen o Yewura min Yerusalem min wolmakluk ninmiri yusu-o.

¹⁰ Alat nde, Nagawan Indo Nenmbal Pem Nagawan wa-e. Kat-nen ’Irit kwarurag-o’ luk nenpem pigen wene-ge keya bigerik me, ereba oboksa kwat yosola-ge, nir-e no nde yul-o?

¹¹ Kat-nen nenpem pidnak wene-ge kat kene lomboksa yugwi nap min kat ndegel kubugwi nap min enpem pigenma, it-nen yak nondogolar-e: ’Kit wolmomtak sa iri-ge iri me woragwi nap-nen-e mondok meya mbilaro ngin mende ereba na kwarogolat me, o nggweyak iri-ge mondok oboksa emben to rak pidnag-o’ luk yak nindiga-o.

¹² Mbal Pem Nagawan kene lomboksa yugwi nap ereba-nen yak nondogolar-e: ’Kir-e enlem nin kweyap min ap min mondok wok kerak mburak pug-o. Nde, kit nde kenmawi kondogolat, nggweyak iri bem yagidnak mende na nonggolat, nggweyak iri na kit-nen wigarak-nen winde luk pempa woragolat makluk, kit-nen-e o iri me woragwi nab-e yi mende ndi mende bem ndak woragolat, yamuksa woragolat yurak pem yongga undurak pug-o’ luk yak nindiga-o.

¹³ Nenmbal Pem Nagawan wa-e. Nir-e kat-nen idnak imiri mbarak pidnak wene iri na kwid togolat, meya kwarogola-ge, kat-nen-e onggo angin worak nenpem pigen-o. Nit meya kwarat kwarige ndak ndag-et angin worak mende nggog-et nenpem purag-et nde, kat-nen angin worak nenpem pigen iri-ge we te-t nenpem pigen-o. Nenpe na yawo ninmiri yigen-o. Iri kwat ninpigen iri-ge nir-e nenaru-o.

¹⁴ Iri kwat nonposola-t nde, nir-e noluk-nen kat kene tarak puruk, enlem nin kweyap min ap min kugwiwak erembel wanogolat mbilaro ngin mende kwarugwi ereba inmin wok kerak mburag-o? Nde, nit-nen nde meya ereba kwarogola-ge, ndemeret kat-nen-e kisilepma yosolar-e, yigisa lak tak nunpugun irir-o. Mondok ap misiger-o luk tet nunluk keya nunpugun pug-o.

¹⁵ Nagawan Indo Isarael nap Nenmbal Pem Nagawan wa-e. Kar-e mondok lud tak nak kwaroso me, nit-nen kwarugwi bem nundurag-et nde, kat-nen-e nunluk keya nunpusu-o. Nit-nen meya kwarugwi-ge kimbiri bem patli-o. Nit-nen kat kerare bem wok momtag-e mondok meya-o” luk yij-o.