ESERA 6 - Nanduk Ngget Tul Pidnak Wene

Nagawan Kores-nen Mbal Pem Nagawan uwi wururak yidnak wene engga mbara pidnak wene iri na kaidnak wene 6:1-5

¹ Iri na kwatlug-e, Nagawan Ndarius-nen Mbabilonia iri me at-nen tenagidnak wi iri na arem nagawan nanduk woragolat-nen mbaridnak engga ereba na ndok worak pidnak ereba na ”Mbenarer-o” luk yak indij-o.

² Alat nde, Nagawan Indo uwi wururak wene mbarak iri na-ge Mbabilonia-nen-e kagit lag-o. Are, Mendia wi o siri Ameta iri me-nen iri wene mbarak iri na-ge engga ket mbet tak-nen wisiril wisiril, kil kil kwarugwi iri na bem mbarak kaiga-o. Nde, wene-ge yu nggal yidnak kaiga-o:

³ ”Olengen mondog-et Kores nagawan men yid iri na bem-e Nagawan Kores-nen yosolar-e: ’Nagawan Indo uwi Yerusalem iri-ge mondok tuguruk wutluk, iri me-ge Nagawan Indo amanggim pidnak mende pil mborogolat, at amanggim kan pogolat kwarurak sa mondok wururag-o. Nde, o iri-ge mot kek tak nggwe-ge 27 meter purag-o. Abak nggwe na iri nggal-et 27 meter purag-o.

⁴ Nde, kebet worogolar-e, yu nggal wururag-o: Kerep pem obo kenan puruk, ombol pem e misik puruk, iri nggal kwasa wiril lorag-o. Nde, worogola onggo-ge pemerinta-nen tenagidnak wi amanggim tol ndok wurugwi ereba bem-net onggo-ge purag-o.

⁵ Nde, emas min perak min-nen konidnak mende Mbal Pem Nagawan ama yabu wanogolat-nen wanugwi Nebukatnesat-nen Yerusalem-nen kamuruk Mbabilonia waruk lobok yid ereba na-ge mondok tuguruk nanduk woraso ondolma pil mbururag-o’ ” luk mbaridnak irit kaiga-o.

Ndarius-nen ”Mbal Pem Nagawan uwi witli iri na-ge wuruwag-er-o” luk wene wirik pidnak wene 6:6-12

⁶ Karug-e, Ndarius-nen wene onggo-ge yu nggal yaga wirik pij-o: ”O Eperat mo mboso (barat) ambigit woraso Ngguberenot Tatnai min Setat-Mosnai min O Eperat mo mboso (barat) ambigit iri me yabu ombo min wa-e. Kir-e Yawuri nap iri me-ge sil iniyudtak pug-o.

⁷ It-nen Nagawan Indo erembel wanurak uwi witli iri-ge enabuwok tu nggilili iri-ge meyog-o. Ngguberenot Yewura worasu iri min Yewuri nap ennggendumu enne kulugwi nap min ereba-ge o iri tuguruk wuruwakluk keya unpurag-o.

⁸ Naptag-o. An-nen wene yu kenpem pusu-o. Kit-nen it o iri tuguruk worogola yongga ondogolar-e, yu nggal kwarer-o: O wuruwa iri onggo wok undurak tol-e O Eperat mo mboso (barat) ambigit ereba me-nen pemerinta enmanggim tol pidnak ndok witli ereba na bem-et onggo-ge per-o. Mondok larok yurak pug-o.

⁹ Nde, erep kwarurag-e tepan ombo Yerusalem worali ereba-nen ukwe yidnak mende, sapi kusi usul min lomba kusi min aid arem iri me kek tak woraso Mbal Pem Nagawan amanggim purak lomba amarik usul min nggandum mbato min mayu min anggut amburu min saitun amburu min oboksa mondok meme rak pigit lak, pempa wok enderenak wolmomtag-o.

¹⁰ Mbal Pem Nagawan aid arem kek tak woraso iri na alen tak pogolat, tepan ombo-nen wosa amanggim kan pogolar-e, an min an nambararak min imbiringgat tak nunpuwakluk emengen mbarogolat wolmak-nen mondok wok ondogolat wolmomtag-o,

¹¹ Mondok an yak kendeyeg-o. Ta-nen nde wene yu kwid tosola-ge, at uwi iri na owak misik mijara wanuruk, eraret nggabera keya buruk, kundugu mbiringin langsa keya burag-o. Nde, uwi-ge mondok mijara keya buruk, ondolma-ge eneyakngen mbo bugwi ondoro rak purag-o.

¹² O Yerusalem iri at erembel wanuwakluk lenak pid Mbal Pem Nagawan-nen-e nagawan-nen ala na, ap enlem misik-nen ala na-nen nde kwiye lag-et wene yu tarosolat, iri-nen Nagawan Indo uwi Yerusalem iri mijara lak tak posolat kwarosola-ge, at-nen mondok lak tak unpuwag-o. Wene yu-ge an Ndarius-nen kenpem pusu-o. Yigi iri ndak ndag-et mondok kwarogolat wolmomtag-o” luk yak indij-o.

Nagawan Indo uwi iri na worak puruk, at amanggim lena pidnak wene 6:13-18

¹³ Nde, Nagawan Ndarius-nen enpem pid iri na-ge ngguberenot o Eperat mo mboso (barat) nggwe woraso Tatnai min Setat-mbonai min it ennggamirak yabu misiget erep wanugwi nap erep inmin-nen-e mondok kona ndak ndag-et kwarogolat woraiga-o.

¹⁴ Nde, Yawuri nap ennggendumu ap enne kulugwi nap ereba na-ge Mbal Pem Nagawan ene lomboksa yugwi nap Agat min Sakaria min-nen eneyak marogola-ge, Nagawan Indo uwi iri na-ge mondok kundugu-t worogolat woraiga-o. Iri kwarogolar-e, Isarael nap Enmbal Pem Nagawan min iri-nen Perisia nap nagawan nagawan Kores min Ndarius min Aratatasta min-nen yidnak yidnak ndak ndag-et o iri na-ge abu worak piga-o.

¹⁵ Nde, Mbal Pem Nagawan uwi iri na-ge Ndarius iri na nagawan menluk woralat olengen enam pem tak posoma, waneya Andat pem tanggal-e tiga iri bem-e o iri na-ge abu iminep mbara worak piga-o.

¹⁶ Nde, o iri worak purug-e, Isarael nap tepan omborak min Lewi nap min Mbabilonia iri me mbo inpidnak sa-nen lobok yidnak nap min-nen-e o iri na lenak pogolar-e, enalen pem-et lenak piga-o.

¹⁷ Iri kwarogolat tarem-e Mbal Pem Nagawan amanggim wosa pogolar-e, sapi kusi 100 min lomba kusi-ge 200 min, nde, lomba amarik mendaso 400 min irit piga-o. Nde, it meya kwaridnak enmberam tak purak pem-e kambing kusi dua belas irit wosa kan piga-o. Iri wosa pogolar-e, Isarael nap enlem dua belas ereya na ndak ndag-et dua belas irit piga-o.

¹⁸ Iri rak purug-e, it-nen yabu wanurak Musa-nen mbaridnak engga bem worasu ereba na ndak ndag-et Mbal Pem Nagawan uwi Yerusalem iri na me tepan omborak min Lewi nap min yabu wanurak wok indidnak ndak ndag-et wok indil lobok yiga-o.

O Wot Kaidnak Tarem yebet kagolat nggok saiga wene 6:19-22

¹⁹ Iri kwatluk, olengen imbirik iri na bem-e waneya anggul-et iri na arem tanggal empat belas pem-e Mbabilonia iri me mbo inpidnak sa-nen lobok yidnak nap ereba na-ge O Wot Kaidnak Tarem yebet kagolat nggok irit saiga-o.

²⁰ Iri kwarogolar-e, tepan omborak min Lewi nap min oboksa-ge it meya yidnak masa keya bogola-ge, masa irit labuk yiga-o. Iri kwatlug-e, Lewi nap-nen-e O Wot Kaidnak Tarem yebet kagolat Mbal Pem Nagawan amanggim purak iri-ge mbo inpidnak sa Mbabilonia-nen lobok yidnak nap oboksa min it ennggamirak tepan ombo erep min it ondomok min enmanggim irit eyabi worak kwarat wiriga-o.

²¹ Nde, wam wiriga ereba na-ge Isarael nap mbo inpidnak nap Mbabilonia-nen lobok yidnak nap ereba na oboksa min iri-nen o iri me woragwi nap it meya kwarugwi keya buruk, Nagawan Indo Isarael nap Enmbal Pem Nagawan erembel wanurak lobok yidnak nap min ereba na oboksa-nen ningga-o.

²² Nde, enalin enalen pem Oroti Lomboroso Mende Pigit Lak Nunggwi Tarem iri na yebet kagolar-e, tuju bem irit woraiga-o. Nde, Nagawan Indo-nen Asiut nagawan iri na arem yabu wanosola, Asiut nagawan iri na-nen it inmin konak kwarosolar-e, it-nen Isarael nap Enmbal Pem Nagawan uwi iri na tuguruk worogola, yongga indid iri na bem-e mondok enalen kwarat yiga-o.