ESERA 3 - Nanduk Ngget Tul Pidnak Wene

Tuguruk Mbal Pem Nagawan erembel wanugwi tel kwiridnak wene 3:1-6

¹ Nde, waneya tuju bem tak pogolar-e, Isarael nab-e unuwi silmu lombok irit woraiga-o. Woragolat, waneya iri arem tanggal satu iri na bem-e it oboksa Yerusalem nak ndok wiriga-o.

² Woragolar-e, Yosandak ambara Yesua min at anggamirak yabu misiget erep wanugwi nap tepan ombo min Saltiel ambara Serubabel min at owe owot min-nen-e Isarael nap Enmbal Pem Nagawan amanggim wam wosa kan purak ondoro iri na tuguruk koniga-o. Nde, iri nggal kwatlug-e, Mbal Pem Nagawan ndegel oboso nap Musa-nen mbaridnak imiri mbarak pidnak engga bem mbarak iri na ndak ndag-et wam wosa ondoro iri na bem wam wosa kan piga-o.

³ Nde, o iri me woragwi nap enaye kagolar-et nde, Mbal Pem Nagawan amanggim wam wosa kan purak ondoro iri na-ge nanduk woraso ondolma iri na me-t tuguruk koniga-o. Konurug-e, tuguruk Mbal Pem Nagawan amanggim kan pugwi tel kwiriga-o. Iri kwarogolar-e, kuplila-nen na keyama-nen na kan pogolat woraiga-o.

⁴ Iri-nen Engga Kerengge Wi Wiridnak Tarem iri na min-et ”Irit kwarurag-o” luk wat tak pidnak ndak ndag-et yebet kagolar-e, ir-e pempa pogolat-nen kan purak mende-ge Mbal Pem Nagawan amanggim pogolat woraiga-o.

⁵ Nde, erep kwarogolar-e, it-nen-e Mbal Pem Nagawan amanggim kan pugwi mende pogolat na, waneya ngget arem nggogolat-nen wam wosa kan pogolat na, Nagawan Indo yebet kagwi tarem yebet kudtak lenak pidnak ereba na yebet kagolat-nen pogolat woraiga-o. Iri-nen ereb-e it-nen-e it inndi-nen Nagawan Indo amanggim pogolat woraiga-o.

⁶ Nde, Nagawan Indo uwi iri na-ge tuguruk awo wirigit lag-et nde, waneya tuju tanggal satu iri bem-e it ap ereba na-nen-e Nagawan Indo amanggim wosa kan pugwi tel kwiriga-o.

Nagawan Indo uwi iri na wurugwi tel kwiridnak wene 3:7-13

⁷ Yewura nap oboksa-nen Nagawan Indo uwi iri na wururak pem kerep konugwi nap min e ngarugwi nap min onggo wok undurak pem tol ndok wiriga-o. Iri-nen it-net nunggwi mende min yi min saitun engen amburu min ereba na-ge e libe Libanon woraso ereba na onggo onggo yurak pem nunggwi mende ereba na-ge Tirus min Siron min pil mbiriga-o. Iri yikma-ge, e ereba na-ge yi koma bem Yapo pil lobok yiga-o. Nde, ereba oboksa-ge Perisia nap Nagawan Kores iri na yak turuk, ob-o yidnak pem-net kwariga-o.

⁸ Nde, Isarael nap ereba na Yerusalem lobok yigarik woragolar-e, olengen misik woraruk, misik arem nggwigarik woragolat, waneya mberen pem-e Nagawan Indo uwi iri na-ge wurugwi tel kwiriga-o. Nde, Serubabel min Yosua min enlem misiget it ennggamirak min tepan omborak min Lewi nap min nde poro bem yogolar-e, Mbabilonia iri me mbo inpidnak nap oboksa-nen-e o worogola-ge, inmin-et wiriga-o. Nde, Lewi nap olengen dua pulu ombol nggwe woraidnak nap oboksa ereba na-ge Nagawan Indo uwi iri na worogolat yik eneyarok wolmomtak yabu-ge it enpem piga-o.

⁹ Enpem pikma-ge, Lewi nap Yesua min at ilirak min anggamirak min iri-nen Katmiel min at ilirak min anggamirak min-nen-e Nagawan Indo uwi iri na worogola-ge, yik eneyarok woraiga-o. Iri yogola, Lewi nap enlem Endarat nap-nen na it yongga-t indiga-o.

¹⁰ Nde, o wurugwi nap ereba na-nen mondog-et tel korogolat, Nagawan Indo uwi iri na mondog-et mabin pogola-ge, Nagawan Ndaut-nen ”Irit kwarurag-o” luk wat tak pidnak ndak ndag-et tepan ombo ereba na-ge leyok sum yesa enne pu yugwi mende tenasa ondoro wanuruk woraiga-o. Nde, Lewi nap enlem Asap min-et ene lo rak pugwi mende marik ereba na tenasa woragolar-e, Nagawan Indo erembel wanogolat ene rak piga-o.

¹¹ Ap oboksa-nen ndawi bem Nagawan Indo erembel wanogolar-e: ”Nagawan Indo iri-ge konak-nen yusu-o. At-nen Isarael nap nenabuwa kaso-ge mondok pok tak poso buk kundugu irit kaso-nen yusu-o.” Iri yogolar-e, tugurug-et yuruk, tugurug-et yuruk kwat tenak woraiga-o. Nde, iri yiga iri-ge, Nagawan Indo uwi iri na mabin abu pidnak ala karuk-nen ap oboksa-nen enne nggoksa Nagawan Indo erembel wanogolat ndawi yogolat woraiga-o.

¹² Nde, ap ereba na ennggendumu abu indi worak tepan ombo min Lewi nap min it ennggendumu enne kulugwi nap min enpe kwarat ereba na-ge Nagawan Indo uwi nanduk iri na enaru me-ge, Nagawan Indo uwi witli iri na mabin pidnak iri na karug-e, yip langgu mariga-o. Alat nde, it erep iri me ndok wiriga ereba na-ge enalen-nen enne lek kagolat woraiga-o.

¹³ Iri kwarogolar-e: ”E! Iri-ge enalen-nen enne lek kali-o! Nde, iri-ge yip tili-o!” luk yenggerak purag-e meya agaij-o. Nde, enne kwiye worak irit erepma-t nde, kuliga-o. 4:1–5:17 Pasal 4 min 5 min ya arem-e Mbal Pem Nagawan uwi na wuruwa naru, it unuwim nap-nen enpem mbud yogola-t nde, Mbal Pem Nagawan ene lomboksa yugwi nap Agai min Sakaria min-nen-e eneyak marogolat woragala, Yawuri nap-nen-e Mbal Pem Nagawan uwi iri na-ge tuguruk wat tenak woraiga-o. Iri yogola-ge, it unuwim nap-nen-e: ”O yu witli yu-ge Nagawan Kores-nen werer-o yidnak pem witli, lak?” luk pempa enpem mbud tenak woragola karuk, Perisia nap-nen Nagawan Ndarius iri na amanggim engga mbarogolar-e: ”Nab-o. Nagawan Kores-nen Mbal Pem Nagawan uwi iri na tuguruk wuruwag-o luk mbaridnak engga nagawan woraso sa iri me pugwi sa pidnak mbi worasu, lak? Kat-nen limbini-o” luk engga mbariga wene-ge pasal ereya arem-e mbarak worasu-o