ESERA 10 - Nanduk Ngget Tul Pidnak Wene

Enlem nin kweyap wanili iri na keya burak wene mbariga wene 10:1-17

¹ Nde, Esera iri na yip tosolat-nen Nagawan Indo uwi iri na eralu-nen meya yidnak parosolat tepan yosola-ge, Isarael nab-e ap-nen kweyap-nen li marik-nen kwarat yip sa nggwa at eram ndok wiril lobok yiga-o. Lobok yogolar-e, at lop lop wiriga-o.

² Iri yogola, erem Elam nap Yeiel ambara Sekania-nen Esera yak tosolar-e: ”Nir-e enlem nin kweyap wanogolar-e, ndemeret Nagawan Indo imbiri bem meya-t kwarige-t nde, nit Isarael nap ninmiri yurak pem tu kore yurag-e worasur-o.

³ Iri-ge, ’Yawo nir-e enlem nin kweyap wanige yeba-ge mondok inlirak inmin ndegera langgara wirik unpul-o’ luk Mbal Pem Nagawan imbiri bem owak mbaruwog-o. Iri rak puruk, nir-e kat min Mbal Pem Nagawan enpem pidnak wene ereba na kwarugwi nap min-nen nenpem pugup wene ereba na ndak ndak nak kwarul-o. Iri yogolar-e, Mbal Pem Nagawan-nen idnak imiri mbarak pidnak wene nak kwarul-o.

⁴ Kat-net kamawi yosolat wene-ge yurag-o. Iri yosola, nir-e kwara kene erep logo bul-o. Iri yurak iri-ge kat keyabu me, mondok wat tag-et purag-o” luk yak tij-o.

⁵ Yosoloma-ge, Esera iri na-ge amawi-t kondosolar-e, at-nen-e tepan omborak min Lewi nap min iri-nen Isarael nap erep min enanggul pem kek tak ereba na yak ondosolar-e: ”Kir-e ’Sekania-nen yusu irit kwarul-o’ luk owak mbarer-o” luk yak indij-o.

⁶ Iri kwasa owak mbarogolikma-ge, Esera iri na-ge Nagawan Indo uwi tumende bem-nen mborosolar-e, Elyasip ambara Yoanan ama nggosolar-e, iri me nene yij-o. Nde, iri me woralar-a, mbo inpidnak nap Mbabel-nen lobok yidnak nap-nen kwatli ereba na nak yebet kerenak woralat, inndi puru-nen yi min nunggwi mende min ninggit lak irit woragij-o.

⁷ Iri rak purug-e, mbo inpidnak nap Mbabel-nen lobok yidnak ereba na oboksa Yerusalem nak ndok wuruwaklug-e, wene wosa o Yewura min Yerusalem min ereba na me wirik pogolar-e:

⁸ ”Ta-nen nde kenan pem ya woragolat nde, lobok yigit lak ala-ge, mondok arengge-ge ondoro rak pogolat, at ebe na mondok ninmin kundik wolmomtag-e mondok lag-o” luk ap enne kulugwi nap ap yok nggok ereba na nen-e: ”Nit-nen pige-o” luk engga mbara ininggi amburu puruk wirik piga-o.

⁹ Nde, kenan pem ereya na worarug-e, waneya sembilan tanggal duapulu iri bem-e o Yewura min Mbenyamin min nggweyak pem woragwi nap oboksa Yerusalem nak lobok yogolar-e, Nagawan Indo uwi mborom nak ndok wiriga-o. Nde, iri tarem-e mondok talme nggok irit mbosolar-e, toro-nen ap ereba na-ge enne-ge ndok lele enne waniga-o. Nde, ereb-e wene nggok mbatli iri na-nen ndowaga kwiye-nen enne-ge ndok lele enne waniga-o.

¹⁰ Nde, tepan ombo Esera iri na-nen yosolat-nen it yak ondosolar-e: ”Kir-e meya kwarogolar-e, elem nin kweyap ereba na wanogolar-e, Isarael nap ennggendumu meya kwarat ligik pili-o.

¹¹ Iri ala, nonmborak-nen erembel wanugwi Mbal Pem Nagawan, Nagawan Indo iri na eram kit meya yidnak para keya ber-o. Keya burug-e, at indi alen tak purak mende nak kwarer-o, Enlem nin nap nit woragwi sa worali nap inmin-e mondok kundik wolmomtak pug-o. Iri-nen konkwerak enlem nin kweyap wanigep ereba-ge sera mondok wirik enper-o” luk yak indij-o.

¹² Yak ondosoloma, ap ereba na-nen misik pem-et enne leksa yogolar-e: ”Kat-nen nenpem pigen irit kwarul-o” luk yiga-o.

¹³ Iri luk, it-net tuguruk yogolar-e: ”Ap ndok wirige yeba na kwarat ndok worogolat, o ret sumbat tarem-e nir-e talme yeba nggal pem mbepme mendak wolmomtag-e meya-o. Iri-nen nit kwarat-nen meya iri nggal-e kwarigerik worali me, wene yeba nggal konurag-e we mberen pem misiget pem nak-nen konurag-e meya-o.

¹⁴ Nit-nen enne kulugwi nap nak Yerusalem woragolat wene yu konogolat wolmer-o luk yak indi-o. Iri yogolar-e, nit worali sa ndomok-nen onkwerak enlem nin kweyap wanidnak lombok-nen iri tarem-e lobok yurag-o luk wat tak pidnak iri na tarem-nen-e unuwi lombok enne kulugwi nap min wene mbenarugwi nap min lombok inmin lobok yurag-o. Iri nggal konul pem-e Mbal Pem Nagawan isilepma nenpem pid iri-ge lak ma-o” luk yiga-o.

¹⁵ Nde, wene iri na onggo-ge ap misiget ter-o luk mbi-nen eyak wirigit lag-o. Alat nde, Asael ambara Yonatan min Tikwa ambara Yaseya min it mberen yu nak-nen perak nde Lewi nap Mesulam min Sambetai min enambigit yogolat, eyak wiriga-o.

¹⁶ Nde, it mbo inpidnak sa-nen lobok yidnak nap ereba na-nen-e: ”Iri kwarurak yigep iri-ge ob-o” luk yogola-ge, Esera-nen-e it enlem lombok-nen enne kulugwi nap ereba na ennggendumu-nen ap erep lenak inpil lobok yij-o. Lenak unpurug-e, it unnu-ge engga bem mbarij-o. Mbatlug-e, waneya sepulu tanggal satu iri bem-e wene iri na mbenarogolat wene mbarugwi tel kwiriga-o.

¹⁷ Wene ereba na mbarogolar-e, waneya kenan ereya na arem woragolat-nen perak Isarael nap-nen enlem nin kweyap wok inpil lobok yiga ereba na oboksa wene-ge amburu mbara lak tak piga-o. 10:18-44 Ayat ereba arem-e enlem nin kweyap wok inpiga-t nde, kweyap ereba keya inpidnak nap ereba na unnu mbarak worasu-o.