ESERA 1 - Nanduk Ngget Tul Pidnak Wene

Esera Kores-nen Yewuri nap ”Kenma mberer-o” luk lerak inpidnak wene 1:1-11

¹ Nde, Perisia Nagawan Kores iri na men yosolar-e, olengen at men yid iri na bem-et Nagawan Indo-nen at ene lomboksa yoso nap Yeremia emndam tak posola urul yid iri na ndak ndak makluk, Nagawan Indo-nen Kores arem yabu wanosola-ge, Kores-nen-e wene misik wirik posolar-e, at-nen tenagidnak wi oboksa ap-nen wonat unduwakluk engga mbara wirik pij-o.

² Wirik posolar-e: ”Yu-ge Perisia nap Nagawan Kores-nen yidnak wene-o: Nagawan Indo Aid Arem Tena Woraso Mbal Pem Nagawan iri na-nen-e an-e yi wi ndi wi oboksa enanggul pem nagawan mendak nebamu-o. Mendak nuburug-e, Yewura nggweyak pem Yerusalem iri me at uwi wururak yabu-ge an nebem pamu-o.

³ Nde, kit Mbal Pem Nagawan ilirak kwat yigep nap oboksa-ge Nagawan Indo-nen ndegel kunpuruk nuwag-o. Nde, kir-e tuguruk Yerusalem mburugupndik, Nagawan Indo Isarael nap Kenmbal Pem Nagawan Yerusalem woraso iri na uwi-ge tuguruk werer-o.

⁴ Mbo kinpidnak sa yu me worali Mbal Pem Nagawan ilirak mbi ta-nen nde tuguruk mbururak pem silobulo yongga wururak yosola-ge, at imin woragwi nap-nen-e mondok yongga-t wururag-o. Yongga worogolar-e, emas min perak min wok togolat, tularo min wok uburuk mbururak sapi min iri-nen Nagawan Indo uwi Yerusalem wururak amanggim yi mende ndi mende min-et mondok wok turag-o” luk yij o.

⁵ Yosoloma-ge, enlem Yewura nap min Mbenyamin nap min ennggendumu enne kulugwi nap ereba na min tepan omborak min Lewi nap min iri-nen Nagawan Indo-nen enarem yabu wanidnak nap oboksa-nen-e Yerusalem mbutluk, tuguruk Nagawan Indo uwi wururak pem mija lele lid lud tak piga-o.

⁶ It inmin woragwi nap oboksa-nen yongga ondogolat-nen silobulo wok ondogolar-e, perak min emas min-nen konidnak mende min nunggwi mende tularo min silobulo waruk mbururak sapi wam min iri-nen silobulo erep min Nagawan Indo uwi wururak silobulo erep min-et wok indiga-o.

⁷ Nde, Nagawan Kores-nen it wok ondosolar-e, nanduk Yerusalem iri me-nen Mbal Pem Nagawan ama iri me yabu wanogolat-nen wanugwi yi kenanggugwi yimbe min yimbe erep min Mbal Pem Nagawan ama woraso Nebukatnesat-nen waruk lobok yarik, at-nen erembel wanoso kugwiwak uwi iri na me ndok worak pid ereba na-ge wok indij-o.

⁸ Perisia nap Nagawan Kores-nen-e silobulo ereba oboksa wirik puwakluk, at-nen tenagidnak wi amanggim uang tena woraso nap Miterendat iri na inggem pij-o. Iri rak pamu, Miterendat-nen-e silobulo ereba na-ge wonasa engga bem mbatluk, Yewura iri me Ngguberenot Sesmbasat iri na wok tij-o.

^9-10 Nde, silobulo ereba wonasa mbaridnag-e yu-o: Mbal Pem Nagawan amanggim pogolat-nen wanugwi embe emas-nen konidnag-e 30 min Mbal Pem Nagawan amanggim pogolat-nen wanugwi embe perak-nen konidnag-e 1.000 min embe ereb-e 29 min emas-nen konidnak embe marig-e 30 min perak-nen konidnak embe marik marik 410 min silobulo ereb-e 1.000 min irir-o.

¹¹ Nde, emas min perak min-nen konidnak embe ereba na min iri-nen silobulo erep min lambuksa wonarag-e 5.400 ereba na oboksa-ge Sesmbasat min mbo inpidnak nap erep ereba na min Mbabilonia-nen Yerusalem mborogolar-e, waruk mbiriga-o. 2:1-70 Pasal 2 yu arem-e Yewura nap enlem lombok mbo inpidnak sa Mbabilonia-nen tuguruk Yerusalem mbiridnak oboksa wonasa mbaridnak worasu-o.